1. Lumene lua bonga lutshi mukunda nu athu afuile gale?

Hakhalele Yesu ha mavu, wakhalele nu futa dienji Lazalo wakhalele mujinga gu Betaniya, hehi nu Yelusaleme. Lusugu lumoshi, futa dienji wafuile, enji Yesu wahetele gu Betaniya gu ngima dia masugu 4. Yesu wayile gu njinda nu Malata nu phangi’enji Maria, ampangi a muthu wafuile. Gua shiphile go, athu avula azalele hene pha. Wajiya gumona gusuanguluga gua Malata nu Maria tangua Yesu atugumuishigile Lazalo mu gufua?Tanga Yone 11:21-24, 38-44.

Malata wakhalele mujiya lumene lua bonga luatalela athu agufua. Wajiyile egi Yehowa mba utugumuisa athu agufua ha gujinga luko ha mavu.Tanga Yobo 14:14, 15.

2. Athu agufua anakhala luholo lutshi?

Nzambi walezele Adama egi: “Udi fuluguta dia mavu mbawuvutuga mu fuluguta dia mavu.”—GISENDESELO 3:19.

Athu afugiwe nu fuluguta dia mavu. (Gisendeselo 2:7; 3:19) Tushigo jinyuma jidi mujinga mu katshi dia muila wa muthu. Tudi ifugiwo ya musunyi; hene, gushigo ata gima gimoshi gianusala nu monyo gula muthu wafua. Gula tuafua, woongo wetu wanufua, nu matangi etu nji. Hene, Lazalo watelego ata lumene lumoshi luatalela gufua guenji, mukunda athu agufua anujiya gima gimoshi ndo.Tanga Lungimbo 146:4; Mulongeshi 9:5, 6, 10.

Nzambi wanasagesa athu mu katshi dia tshiya gu ngima dia gufua guawo ba? Luholo Biblia yamuenegesa egi mvumbi jianujiya gima ndo, gulonga athu egi Nzambi wanahana  athu lamba mu katshi dia tshiya idi guadimba nu gumbila Nzambi mambo. Matangi a guhana athu lamba mu tshiya anahana Nzambi lamba gu mutshima.Tanga Yelemiya 7:31.

3. Athu agufua ajiya gusolula nuetue ba?

Athu agufua ajiyilego guzuela nga gutegelela. (Lungimbo 115:17) Uvi anjelo ako adi abola; ajiya guzuela nu athu enji guadimba egi athu agufua adi muzuela. (2 Phetelo 2:4) Yehowa wanatuna tukambe gusolula nu athu agufua.Tanga Mikhuala 18:10, 11.

4. Nanyi mba wutugumuishiwa mu gufua?

Inunu nu inunu y’athu afuilegale mba avutuga nu monyo ha mavu. Ikhale athu ajiyilego Nzambi nu anyi akhalele mu kalagala ndaga jia bola mba adi mutugumushiwa mu gufua.Tanga Luka 23:43; Makalegelo 24:15.

Athu anyi mba atugumushiwa mu gufua mba heta luendu lua gulonguga giamatshidia giatalela Nzambi enji gumonegesa gutshigina gudi Yesu nu gumutumagela. (Yatuwuwe 20:11-13) Athu anyi mba akalagala ndaga jia bonga gu ngima dia gutugumuga mu gufua mba heta monyo wa ivuo nu ivuo ha mavu.Tanga Yone 5:28, 29.

5. Gutugumuisa athu mu gufua gudi gutulonga itshi mukunda nu Yehowa?

Nzambi wamonegesele felela dia gutugumuisa athu mu gufua luholo atutumile Mun’enji ha gutufuila. Hene, gutugumuisa athu mu gufua gudi gutulonga egi Yehowa udi nu guzumba guavula enji khenda jia vula. Tangua athu mba tugumuishiwa mu gufua, mba usuanguluga muavula gumona nanyi?Tanga Yone 3:16; Lomo 6:23.