Ndeye fundo didi milonga

Ndeye gu mito ya milonga

Matemue a Yehowa

Tomba zuelelo Kipende

 LONGO 7

Wana Guvua Woma Gila Udi Hakhaye Ba?

Wana Guvua Woma Gila Udi Hakhaye Ba?

Tala mona wayala udi ha foto. Mona muene, udi hakhenji, udi guvua woma! Wadivile kale luholo luene ba?— Muthu wagasue wajiya guvua woma mu matangua ako. Biblia yazuelela mafuta a Yehowa ako avile woma nu gikenene. Mumoshi jina dienji Eliya. Tute gale lumene luenji.

Yezabele wakambele gushiya Eliya

Eliya wakhadile gu Isalele, ivo yavula gutuama Yesu avalewe. Fumu mumoshi wa Isalele jina dienji Ahaba, akhadilego gukombelela Yehowa Nzambi. Ahaba nu mukaji’enji, Yezabele, akhadile gukombelela nzambi wamambo, jina dienji Baala. Ana Isalele ako asendesele gukombelela Baala. Yezabele mukaji’a Ahaba, wakhadile muthu wabola, wakambele gushiya Eliya nu athu agasue akhadile gukombelela Yehowa! Wajiya gima Eliya akalegele ba?—

Eliya walengele gualeha! Wayile gudisuega mu temu. Mukunda n’atshi Eliya  akalegele luholo luene?— Wavile woma. Uvi Eliya akhadileko naye guvua woma ndo. Mukunda n’atshi? Handaka wajiyile egi Yehowa wajiya gumukuatesa. Yehowa wakhadi wamonesa gale ngolo j’enji gudi Eliya. Lusugu lumoshi, Yehowa wavile gutoga gua Eliya, tshiya tuejile gosa uu nu ha mavu. Yehowa wakhadile naye gukuatesa luko Eliya!

Luholo lutshi Yehowa akuatesele Eliya?

Tangua Eliya akhadile mosh’a seso, Yehowa wamuhudile egi: ‘Itshi udi mukalagala haha?’ Eliya wa vutudile egi: ‘Ngasala hakhami mu gimbelelo giaye. Ngudi nu gikenene, ngudi muvua woma, mba ngushiyiwa.’ Eliya watangijile egi akombeledi agasue a Yehowa ashiyiwe kale. Uvi Yehowa walezele Eliya egi: ‘Ishiko matshidia ndo. Gudi athu ako 7 000 ana gungukombelela. Khala nu ngolo. Ngudi nu mudimo wavula wa guguhana!’ Watangiza egi Eliya wasuangulugile guvua mbimbi yene ba?—

Mulonga wabuidile Eliya wajiya gugulongesa itshi?— Ushiko naye guvua gikenene nga woma ndo. Udi nu mafuta ana guzumba Yehowa nu ana guguzumba. Jehowa udi nu ngolo jiavula, wajiya gugukuatesa tangua diagasue! Wasuanguluga hagujiya egi ushiko hakhaye ndo?—

TANGA MU BIBLIA YAYE

  • 1 Mafumu 19:3-18

  • Ngimbo 145:18

  • 1 Phetelo 5:9