Ndeye fundo didi milonga

Ndeye gu mito ya milonga

Matemue a Yehowa

Tomba zuelelo Kipende

 GITSHINYI 1

Tegelela Nzambi Hagukhala nu Ulo wa Gusuanguluga

Tegelela Nzambi Hagukhala nu Ulo wa Gusuanguluga

“Gu gisendeselo Nzambi wafugile yala nu mukhetu.”Matayo 19:4

Yehowa * Nzambi wasendesele ulo wa thomo. Biblia yazuela egi wa fugile mukhetu nu “wamuhanele gudi yala.” Adama wasuangulugile ngolo nu wazuelele egi: ‘you udi gifuwa gia ifuwa yami, musunyi wa musunyi wami.’ (Gisendeselo 2:22, 23) Uu nu mangino, Yehowa wana gutshigina egi yala nu mukhetu akhale nu gusuanguluga mu ulo.

Gu gisendeselo gia ulo, wajiya gutangiza egi milonga yagasue mba ikhala yagutagana. Uvi, yala nu mukhetu nga ana gudizumba lume, jiya egi lusugu luko ajiya gudisagesa. (1 Kolinto 7:28) Mu gamukand’aka, mudi mikhuala ya Biblia, eyi, gila muayikalegela, muajiya gukhala nu ulo nu fami yagusuanguluga.Ngimbo 19:8-11.

 1 TSHIGINA MUDIMO WAGUHANELE YEHOWA

BIBLIA YAZUELA EGI: Yala udi fumu ya fami.Efeso 5:23.

Aye yala, Yehowa watshigina egi ubambe mukaji’aye muabonga. (1 Phetelo 3:7) Wamufugile hagukhala mukuateshi waye, watshigina egi umunemese nu umuzumbe. (Gisendeselo 2:18) Udi naye guzumba mukaji’aye muavula nu gubalegesa milonga ana gutshigina gutuama.Efeso 5:25-29.

Aye mukhetu, Yehowa watshigina egi unemese mulumi’aye nu mutshima umoshi, umukuatese hagutaganisa mudimo wenji. (1 Kolinto 11:3; Efeso 5:33) Mukuatese mu badesizio enji agasue, dive n’enji nu mutshima umoshi. (Kolosai 3:18) Gila wakalagala luholo luene, mba umonega mukhetu wabonga gua mulumi’aye nu gua Yehowa.1 Phetelo 3:1-6.

GIMA WAJIYA GUKALAGALA:

  • Hula mukuenu luholo wajiya kukhala yala nga mukhetu wabonga. Tegelela giawaha mvutu yenji, hangima kalagala yagasue hagulondega makalegelo aye

  • Huiminyina. Idi gumizula tangua hagujiya gudisuanguluisa

2 TADILA LUME MATANGI A MUKUENU

BIBLIA YAZUELA EGI: Yala nga mukhetu ambe matangi mu ndaga jia muko. (Filiphi 2:3, 4) Yala nu mukhetu adihane ndando, ajiye egi Yehowa wana gutshigina egi athu ana gumukombelela amonese “guhuima gudi athu agasue.” (2 Timote 2:24) “Mbimbi jia uyilu jidi munamenesa gifua phogo ya khusa.” Hene, tombenu mbimbi nu gutema guagasue. (Ishima 12:18) Nyuma ya Yehowa idi gumikuatesa haguzuela nu gisemo nu guzumba.Galatiya 5:22, 23; Kolosai 4:6.

GIMA WAJIYA GUKALAGALA:

  • Gila watshigina guzuelela mulonga wa ndando nu mukaji’aye nga mulumi’aye, toga Nzambi a guhane mutshima wa guhuiminyina nu wa guditegelela muabonga

  • Tangiza muabonga mulonga wa guzuela nu luholo lua gu uzuelela

 3 KHADIENU MATANGI AMOSHI

BIBLIA YAZUELA EGI: Gila yala nu mukhetu adibungisa mu ulo, mba abua “muthu mumoshi.” (Matayo 19:5) Uvi mudi kaka athu muyadi, muajiya nji gukhala nu matangi agudisha. Hene, kalagalenu ngolo hagukhala nu matangi amoshi nu mutshima umoshi. (Filiphi 2:2) Gukhala nu matangi amoshi gudi nu ndando tangua diaguzula badesizio. Biblia yana guzuela egi: “Mukunda nu matangi abonga, muthu wajiya kutshita ndaga jia kotele muene.” (Ishima 20:18) Tangua dia guzula badesizio akoma bembenu mikhuala ya biblia imi tuameze.Ishima 8:32, 33.

GIMA WAJIYA GUKALAGALA:

  • Usugiko phamba hakuwambela mulonga nu matangi aye gua mulumi’aye nga mukaji’aye ndo; muleze luholo udi gudivua mu mutshima

  • Hula matangi a mulumi’aye nga mukaji’aye guphala ya kuzula desizio yakoma

^ par. 4 Yehowa jina dia Nzambi luholo ya monesewa mu Biblia.