Ndeye fundo didi milonga

Ndeye gu mito ya milonga

Matemue a Yehowa

Tomba zuelelo Kipende

 GITSHINYI 7

Luholo Lua Gusasa Ana

Luholo Lua Gusasa Ana

“Mikuala ingudi mumihua mangino, muyikuate mu mutshima. Mukhale muyilongesa an’enu.”Mikhuala 6:6, 7

Tangua Yehowa wasendesele Fami, wahanele mvuaji ginemo giagusasa ana. (Kolosai 3:20) Idi ginemo gienu giagulongesa anenu guzumba Yehowa nu guakuatesa hagubua athu. (2 Timote 1:5; 3:15) Mudi naye gujiya milonga idi mu mutshima wa munenu wayala nga wamukhetu. Uvi khadilo dienu didi nu ndando yavula gumeso a ana. Hagula egi mulongese munenu mbimbi ya Yehowa, khalenu athu athomo aguyikuata mu mutshima.Ngimbo 40:8.

 1 KALAGALENU EGI ANENU AVIKO WOMA WAGUMITELA MENE JIAWO

BIBLIA YAZUELA EGI: ‘Vua mu phushi uvi zuela magemage.’ (Yakoba 1:19) Gutshigina guaye gudi egi munaye aviko woma waguguwambela milonga adi naye mu mutshima. Ana adi naye gujiya egi gula atshigina gu guleza mulonga, mba utegelela muabonga. Kalagala egi fami ikhale nu gusuanguluga, hagula anenu amileze milonga yawo. (Yakoba 3:18) Gula amona egi wana khala nu mbimbi jiabola nga wana guasophesa, ajiyileko guguwambela matshidia a milonga yawo. Khala nu mutshima waguhuiminyina gudi anaye, amonese tangua diagasue egi wana guazumba.Matayo 3:17; 1 Kolinto 8:1.

GIMA WAJIYA GUKALAGALA:

  • Gila anaye atshigina gugutela mene, heta tangua dia guategelela nu mutshima wagasue

  • Ta mene nu anaye tangua diagasue, ikhadiko phamba tangua dia milonga

2 KAMBENU GUJIYA MILONGA IDI MU MITSHIMA YA AN’ENU

BIBLIA YAZUELA EGI: ‘Muthu udi muhaga matshui gu mbimbi jidi mumuwambelewa mba ukhala mba ununga.’ (Ishima 16:20) Matangua ako, mbimbi jia ana jianako guzola matangi awo haphelo; yajiya gulomba egi ukambe gujikotelesa. Tangua diko mavuala ana gubalekesa, nu guzuela milonga anako gutangikiza, hafundo diaguzola matangi awo haphelo. ‘Gutuama dia gutaya utekelele gale. Gula ushiko mukalagala ngenyi idi ndaka ya musoni nu ya uhulu gudi aye.’ (Ishima 18:13) Guvua khabu muphushi ndo.Ishima 19:11.

GIMA WAJIYA GUKALAGALA:

  • Ikhale mona wazuela mulonga wa luholo lutshi, gumukoka mbimbi ndo, gumuvuila gisuka monyo ndo

  • Wunguluga (yabuluka) luholo aye wakhadile gukalagala nu gumona milonga tangua wakhadile mugindongo giawo

 3 DIBUNGISENU HAGULONGESA ANA

BIBLIA YAZUELA EGI: ‘Munami, uvue malongo a shaye, utunyigo idi ginaye muzuela.’ (Ishima 1:8) Ginemo giagusasa ana, Yehowa wa gihanele gua tata nu mama. Longesenu ana hagumivuila nu haguminemesa. (Efeso 6:1-3) Ana anagujiya gila mvuaji jiawo jidi ‘hamoshi mu ndaga jidi muzuela.’ (1 Kolinto 1:10) Gila mushiko kudivuisa, muimonesago gumeso a ana, handaga, yajiya gubulumuisa ginemo ana gumihua.

GIMA WAJIYA GUKALAGALA:

  • Divisenu luholo luaguhana munenu disipline

  • Gila mudi nu matangi akudisha muluholo luagusasa anenu, kalagalenu ngolo hagudivisa

 4 JIYENU GIMA GIAGUKALAGALA

BIBLIA YAZUELA EGI: “Longesa mona muho wabonga.” (Ishima 22:6) Gusasa ana muabonga gushiko mulonga waleba. Hathomo, dilondegenu hagujiya luholo lua guahana disipline. (Ngimbo 127:4; Ishima 29:17) Disipline dishiko phamba guhana ana ndola, diakotelesa luko guleza ana ndando ya mikhuala idi mu fami. (Ishima 28:7) Alongese nji guzumba mbimbi ya Yehowa nu gujiya gukhaphumuna mikhuala yenji. (Ngimbo 1:2) Handaga, mba ikolesa ukhaphumunyi wawo wa matangi.Hebelu 5:14.

GIMA WAJIYA GUKALAGALA:

  • Kuatesa anaye hagumona egi Nzambi udi muthu wa matshidia nu hagumushila mutshima

  • Akuatese hagujiya luholo luagulenga milonga yabola yajiya gubolesa khadilo diawo gifa Gutala ndaga jiabola mu internet. Alongese luholo lua gulenga athu ana gutshigina gubungisa mila nu ana

“Longesa mona muho wabonga”