‘Ana adi khapho didi Yehowa mutuhua.’Ngimbo 127:3

Guvalewa gua mona guajiya gumisuanguluisa nga gumisagesa. Gila muavala mona, muajiya gutungumuga hagumona egi tangua dienu diagasue mudi gudibalegesa hagusasa mona muene. Gudifula tulo, nu milonga iko, yajiya gumibatela malamba mu ulo wenu. Hagusasa munenu muabonga nu gubamba ulo wenu, mudi naye gubalumuna luholo luenu lua gukalagala ima iko. Luholo lutshi malongo a Biblia ajiya gumikuatesa gu milonga yene?

 1 JIYA LUHOLO MONA WAJIYA GUBALUMUNA MILONGA

BIBLIA YAZUELA EGI: “Guzumba gudi nu guhuiminyina gudi guabonga.” Yazuela luko egi, guzumba ‘gushigo mudikambela khuta ndaga jiajiya gudikuatesa, gushigo mukuata khabu.’ (1 Kolinto 13:4, 5) Luholo wabua mama, udi naye gudihana muavula gua munaye. Uvi mulumi’aye wajiya gudivua gifa ushiko luko gumushila matangi ndo, hene ujimbilako egi udi naye gumushila matangi. Gila wamumonesela guhuiminyina nu gubonga mba umukuatesa adive egi udi nu ndando haguzula ginemo gia mona muene.

“Enue mala, mudi n’ayo ya gukhala muaboga nu akaji’enu, muwunguluge egi adi athu aleba.” (1 Phetelo 3:7) Jiya egi mukaji’aye udi naye guhaga ngolo jiavula hagusasa munenu. Mukhetu muene waheta ginemo giko, giajiya gumuhuidisa nga gumukatesa matangi. Matangua ako wajiya gu guzolela matululu, uvi huiminyina, uvigo khabu, ndaga “muenya mutshima wa guhuiminyina udi mubalega muenya manyinyi . . . jingolo.” (Ishima 16:32) Mukuatesehagumonesa egi wana gudihaga hafundo dienji.Ishima 14:29.

GIMA WAJIYA GUKALAGALA:

  • Aye tata: Kuatasa mukaji’aye hagusasa mona, ata muphipha. Bulumuna matangua wana balegesa mu midimo iko, hagula ubalegese tangua diavula nu mukaji’aye nu bebe wenu

  • Aye mama: Gila mulumi’aye watshigina gu gukuatesa, tshigina. Gila ashigo mujiya luholo luagulela mona, umusegulula ndo, uvi muleze luholo lua gukalagala

 2 KOLESENU ULO WENU

BIBLIA YAZUELA EGI: ‘Mbabua muthu mumoshi.’ (Gisendeselo 2:24) Ata muaheta muthu muko mu fami yenu, mujimbilago egi, yala nu mukhetu, mudi khuta ‘muthu mumoshi.’ Kalagalenu jingolo hagukolesa ulo wenu.

Aye mukhetu, shimana mulumi’aye luholo adi gu gukuatesa. Mbimbi jiaye jia gushimana jiajiaya gusaga. (Ishima 12:18) Aye yala, leza mukaji’aye egi wana gumuzumba muavula, mumonese egi wana gumunemesa. Mushimane luholo adi mukuatesa fami.Ishima 31:10, 28.

“Muthu gadikambelago ndaga jidi mumukuatesa muene uvi akambe ndaga jidi mukuatesa muthu na muko.” (1 Kolinto 10:24) Tangua diagasue kalagala ndaga jiabonga jidi gusuanguluisa mulumi’aye nga mukaji’aye. Muyadi’enu, zulenu tangua diaguta maga, diagudishimana, nu dia guditegelela. Mu tangua dia gubungisa mila, ukambiko phamba gusuanguluga guaye. Kamba nji gusuanguluisa mulumi’aye nga mukaji’aye. Biblia yazuela egi: “Mudisononago makunda hagitanda gula muadiangelego gudivua.” (1 Kolinto 7:3-5) Zuelelenu mulonga wene haphelo muyadi’enu. Guhuiminyina nu gudivua muabonga, mba gukolesa ulo wenu.

GIMA WAJIYA GUKALAGALA:

  • Ujimbilako gudishila tangua dia guta maga nu mulumi’aye nga mjkaji’aye

  • Kalagala tuma tuazonda tuajiya gumonesa mulumi’aye nga mukaji’aye egi wana gumuzumba, gifa: gumusonegela (kumufundjila) gamukanda nga gumusumbila gakado gazonda

 3 LONGESENU MUNENU

BIBLIA YAZUELA EGI: “Sendese mu ulenge waye uu nu luenyelu, aye wajiya Mukanda wa Nzambi. Wene wajiya guguhua jindunge jidi mutuala muthu gu guhuluga.” (2 Timote 3:15) Tangizenu muabonga luholo muajiya gulongesa munenu. Wajiya gukuata malongo enu, ata muvumo dia ginenji. Tangua adi muvumo, munenu wajiya gujiya mazui (mbimbi) enu, gula muasuanguluga nga muavua khabu, wajiya gudinyigisa. Mutangelenu mikanda tangua adi mona wazonda. Yajiya gukhala egi ashigo mujiya ima mudi mutanga, uvi gungima dia ivo, yajiya gumuhana uhote wagutanga.

Muajiya gutangiza egi bebe wenu udi mona wazonda, uvi wana guvua mbimbi ya Nzambi muana gumuleza. Kalagalenu egi amitegelele tangua mudi mukombelela Yehowa. (Mikhuala 11:19) Gila mudi mukena nenji, mutelenu lumene lua ima yafugile Nzambi. (Ngimbo 78:3, 4) Gila munenu wakula, mba umona egi muana zumba Yehowa, muene nji mba umuzumba.

GIMA WAJIYA GUKALAGALA:

  • Toga Yehowa aguhane ndunge jiagulongesa bebe wenu

  • Tangua diagumulongesa, vutugila mbimbi nu matangi andando, hagula muene ajikuate muphushi