De Väastaunt es eene kjliene Grupp von Christen, waut väl Erfoarunk haben un waut daut Woakj von Jehowa siene Zeijen oppe gaunze Welt leiden doonen. Waut jehieet to dee äare Oabeit?

•   Dee seenen doano, daut de biblische Belierunk fa de Bieekja, Toopkomes un Schoolen von Jehowa siene Zeijen reedjemoakt woat (Lukas 12:42).

•   Dee sent äwa daut Woakj von Jehowa siene Zeijen oppe gaunze Welt aunjestalt: Dee leiden daut Prädichtwoakj un kjikjen, woo de friewelje Gowen jebrukt woaren.

 De Väastaunt von Jehowa siene Zeijen nemt sikj “de Apostel un Eltestasch en Jerusalem” toom Väabilt, waut fa aule Christenvesaumlungen em 1. Joahundat wichtje Sachen entscheiden deeden (Aposteljeschicht 15:2, De Plautdietsche Bibel). Soo aus dise true Mana ieeschtemma sent uk de Mana vom Väastaunt nich de Wieets äwa onse Organisazion. Dee loten sikj emma von de Schreft leiden, un dee sent sikj em kloaren, daut Jehowa Gott Jesus Christus aus Haupt äwa de Christenvesaumlunk aunjestalt haft (1. Korinta 11:3; Efeesa 5:23).

Wäa es aula em Väastaunt von Jehowa siene Zeijen?

 Toom Väastaunt jehieren Kenneth Cook jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane un Jeffrey Winder. Dee schaufen aula en onse Hauptoffiz en Warwick (New York, Stäts).

Woo haft de Väastaunt sikj de Oabeit enjedeelt?

 De Väastaunt haft sas Kommitees oppjestalt, waut sikj om ons Woakj kjemren un jieda eena vom Väastaunt schauft en eent ooda miere von dise Kommitees met.

•   Plonakommitee: Es äwa aules aunjestalt, waut met Jesazen un Rejierungssachen to doonen haft. Daut schauft uk doamet, wan daut derch Owwada ooda sestwaut Schoden jejäft haft, wan Jehowa siene Zeijen wäajen äaren Gloowen vefolcht woaren ooda wan doa sest waut oppkjemt, waut schwind jedonen mott.

•   Kommitee fa Betelmetoabeida: Kjemmat sikj om daut, waut met de Betelfamielje to doonen haft, aulsoo met deejanje, waut en onse Offizen methalpen.

•   Drekjariekommitee: Sitt doano, daut biblische Bieekja jedrekjt un utjeschekjt woaren un daut Vesaumlungshiesa, Kongresshiesa, Äwasatungsoffizen un aundre Offizen jebut woaren.

•   Deenstkommitee: Kjemmat sikj om daut Prädichtwoakj. Bie dit Woakj woat “de goode Norecht von daut Kjennichrikj” bekauntjemoakt (Matäus 24:14).

•   Liakommitee: Kjemmat sikj om de biblische Belierunk, waut daut en onse Toopkomes un Schoolen jäwen saul un uk opp Video un toom aunhorchen.

•   Schriewkommitee: Kjemmat sikj om de biblische Belierunk en de jedrekjte Bieekja un opp onse Websied un sitt no daut äwasaten.

 Oba de Mana vom Väastaunt schaufen nich bloos en dise Kommitees. Dee komen uk jieda Wäakj toop un räden doaräwa, waut en de Organisazion to doonen fält. Bie dise Toopkomes vesieekjen dee, eenstemmich to entscheiden (Aposteljeschicht 15:25). Doatoo unjastonen dee sikj daut, waut de Schreft sajcht, un loten sikj von Gott sienen heiljen Jeist leiden.

Wäa sent de Helpa vom Väastaunt?

 Daut sent true Christen, waut en de Kommitees vom Väastaunt methalpen (1. Korinta 4:2). Dee haben Erfoarunk un vestonen sikj met de Oabeit, äwa dee daut Kommitee jesat es. Dee sent uk jieda Wäakj bie daut Toopkomen von daut Kommitee bie, wua see methalpen. Dee doonen nich entscheiden, waut doa jedonen saul, oba dee unjastonen sikj de Sachen, wua daut Kommitee met schauft, un jäwen gooden Rot. Dan seenen dee doano, daut daut jedonen woat, to waut daut Kommitee sikj es eenich jeworden, un kjikjen, woo daut doamet wiedakjemt. De Väastaunt schekjt dee uk eenjemol no veschiedne Lenda, om de Breeda doa to besieekjen, ooda jeft an Oppgowen bie besondre Toopkomes, soo aus de Joarestoopkomes ooda de Schlusstoopkomes von eene Gilead-Klauss.