Trigj nom Enhault

Wuarom gonen Jehova siene Zeijen nich em Kjrich?

Wuarom gonen Jehova siene Zeijen nich em Kjrich?

Daut jeft veschiedne Jrind, wuarom wie daut nich doonen:

  1. Wiels wie Gott jehorchen wellen. De Schreft sajcht, Gott siene Deena wudden “äare Schwieed to Pluachschoaren vekloppen” un “nich mea toom Kjrich reedmoaken” ooda sikj doafäa loten utlieren (Jesaja 2:4, De Plautdietsche Bibel).

  2. Wiels wie Jesus jehorchen wellen. To dän Apostel Petrus säd Jesus: “Stäakj dien Schwieet trigj wua daut hanjehieet! Wiels wäa daut Schwieet nemt, woat derch daut Schwieet omkomen” (Matäus 26:52, De Plautdietsche Bibel). Met dit wees Jesus, daut siene Nofolja nich sullen daut Jewäa nämen.

    Jesus säd uk, siene Nofolja “sent nich von dise Welt” (Johanes 17:16, De Plautdietsche Bibel). Doawäajen nämen dee kjeen Poat aun de Politikj. Dee menjen sikj doa biejlikj nich mank, wan daut wua Kjrich jeft un wan doa wäa well Soldot sennen, hoolen dee dän doa nich von auf.

  3. Wiels wie onsen Näakjsten leewen. Jesus säd to siene Jinja: “Jie sellen junt unjarenaunda goot sennen” (Johanes 13:34-35, De Plautdietsche Bibel). Jesus siene Jinja wudden aulsoo oppe gaunze Welt aus Gloowesbreeda veeent sennen. Doawäajen wudden dee kjeenmol unjarenaunda Kjrich fieren (1. Johanes 3:10-12).

  4. Wiels wie soo sennen wellen aus de ieeschte Christen. En de Encyclopedia of Religion and War steit: “Jesus siene ieeschte Nofolja deeden kjeenen Kjrich unjastetten un dee leeten sikj uk nich doatoo utlieren”, wiels dee daut seenen kunnen, daut daut “nich met de Leew tooppaust, waut Jesus jelieet haud, uk nich met daut Jeboot, äare Fiend to leewen.” Un de dietschlendscha Relijionsjelieeda Peter Meinhold schreef äwa de ieeschte Christen: “Een Christ sennen un Soldot sennen, daut paust fa dee äwahaupt nich toop.”

Waut wie fa aulem doonen

Jehova siene Zeijen bemieejen sikj, goode Birja to sennen, un dee sent nich eene Jefoa fa daut Launt, wua dee läwen. Dee achten un jehorchen de Rejierunk, soo aus de Schreft daut sajcht:

  • “Lot aulemaun de Rejierunk unjadon sennen” (Reema 13:1, De Plautdietsche Bibel).

  • “Jäft dän Kjeisa waut sient es, un jäft Gott, daut waut Gott sient es” (Matäus 22:21, De Plautdietsche Bibel).

Doawäajen hool wie ons aun de Jesazen, tolen Taks un sent reed mettohalpen, wan de Rejierunk waut deit, waut aulem togood kjemt.