Trigj nom Enhault

No de Enhaultslist gonen

 5. SACH

De wieetvolla Rot von groote Menschen

De wieetvolla Rot von groote Menschen

WAUT ES BIE DÄN ROT VON GROOTE MENSCHEN AULES MET EN?

Kjinja brucken dän Rot un de Aunleidunk von groote Menschen. Aus Elren kjenn jie june Kjinja daut baste doamet halpen – jie sent daut mau rajcht schuldich. Oba aundre groote Menschen kjennen june Kjinja uk lieren.

WUAROM ES DE ROT VON GROOTE MENSCHEN WICHTICH?

En väl Lenda haben Jugentliche sea weinich met groote Menschen to doonen. Wuarom es daut soo?

  • Kjinja sent väl Tiet em Dach enne School, wua väl mea Schoolkjinja sent aus Liera un aundre groote Menschen.

  • No de School komen eenje Kjinja no Hus, wan de Elren noch oppe Oabeit sent.

  • Menschen haben rutjefungen, daut enne Stäts Kjinja von 8 bat 12 Joa em Derchschnett jieda Dach soo bie sas Stund Tietvedrief haben, soo aus Tellewizhen kjikjen, Musikj horchen ooda Gäms spälen. *

Daut Buak Hold On to Your Kids sajcht: “De junge Menschen sieekjen sikj nich Rot un Aunleidunk bie de Elren, Lierasch ooda bie aundre groote Menschen, oba bie . . . äare Poatna, un nämen sikj dee toom Väabilt.”

WOO EENA ROT JÄWEN KAUN

Nämt junt Tiet fa june Kjinja.

BIBLISCHA GRUNTSAUZ: “Lia een Kjint dän rajchten Wajch gonen; dan woat dee uk doabie bliewen wan dee oolt woat” (Spricha 22:6).

Kjinja wellen jeweenlich, daut äare Elren an aunleiden un halpen. Jelieede sajen, daut mau rajcht Jugentliche leewa dän Rot von äare Elren wellen, aus dän von aundre Jugentliche. En daut Buak You and Your Adolescent schrift Dr. Laurence Steinberg: “Elren kjennen noch emma daut mieeschte aun de Kjinja äare Enstalunk un Benämen doonen, wan dee oppwaussen”. Hee sajcht noch: “Jugentliche wellen weeten,  waut jie denkjen un waut jie to sajen haben, mau rajcht dan, wan dee daut uk nich toostonen ooda met aules envestonen sent, waut jie sajen.”

Nuzt de Jeläajenheit ut, nu daut june Kjinja sikj von junt wellen aunleiden loten. Nämt junt Tiet fa dee un sajcht dee, woo jie äwa veschiednet denkjen, waut fa junt wichtich es un waut jie jelieet haben.

Sieekjt junt wäm, dee june Kjinja halpen kaun.

BIBLISCHA GRUNTSAUZ: “Wäa daut met weise Menschen helt, woat weis” (Spricha 13:20).

Kjan jie eenen grooten Mensch, waut fa june Kjinja kunn een Väabilt sennen? Wudd jie kjennen met dän ooda dee Tiet vebrinjen? Daut bediet nu nich, daut dee de Veauntwuatunk äwa june Kjinja haft. Oba een groota Mensch, waut jie vetruen un june Kjinja nich schoden woat, kaun dee em Läwen sea halpen. Dän jungen Timotäus von de Bibel deed daut sea toom gooden, daut hee met dän Apostel Paulus toop wia, un Paulus haud uk eenen Nutzen doavon, daut see Frind wieren (Filippa 2:20, 22).

Vondoag dän Dach läwen väl Famieljes nich mea aula toop ooda en deeselwje Jäajent, un foaken nich mol en dautselwje Launt. Wan daut bie junt soo es, dan moakt daut fa june Kjinja doawäajen mäajlich, daut dee von Menschen lieren kjennen, waut soone Ieejenschoften haben, aus jie junt wudden fa dee wenschen.

^ Varsch 9 Dee haben uk jeseenen, daut Jugentliche em Derchschnett meist näajen Stund dän Dach soonen Tietvedrief haben. Doa es nich de Tiet met enjetalt, wua de Kjinja un Jugentliche enne School ooda fa äare Schooloabeit em Internet sent.