Trigj nom Enhault

No de Enhaultslist gonen

 1. SACH

De Nutzen von Selfstbeharschunk

De Nutzen von Selfstbeharschunk

WAUT ES SELFSTBEHARSCHUNK?

Bie Selfstbeharschunk es met en, daut eena emstaunt es

  • no eene Beloonunk to luaren

  • sikj unja Kontrol to haben

  • Oabeit to doonen, wan dee uk nich scheen jeit

  • daut ieeschte om aundre bekjemmat to sennen

WUAROM ES SELFSTBEHARSCHUNK WICHTICH?

Kjinja, waut sikj bäta beharschen kjennen, wadastonen ea eene Vesieekjunk, wan dee uk no scheengonen lat. Oba Kjinja met weinich Selfstbeharschunk kjennen leichta mol

  • doll woaren

  • Narfentrubbel haben

  • schmieekjen, drinkjen ooda Droggs brucken

  • ojjesunt äten

Menschen haben doaräwa studieet, daut Kjinja, waut sikj bäta beharschen kjennen, lota em Läwen weinja Trubbel haben met de Jesuntheit un met daut Jelt un achten daut Jesaz dolla. Derch dit Studium kjeem de Doktafru Angela Duckworth von de Uniwersität von Pennsylvania bat doa, daut see säd: “Selfstbeharschunk es eenem kjeenmol toom Schoden.”

WOO EENA AUNDRE SELFSTBEHARSCHUNK LIEREN KAUN

Lieet to sajen un meent daut uk soo.

BIBLISCHA GRUNTSAUZ: “Lot jun jo, jo sennen, un jun nä, nä” (Matäus 5:37).

Kjliene Kjinja roaren ooda schrieen eenjemol toom daut kjrieen, waut dee wellen – mau rajcht ver aundre. Wan de Elren nojäwen, dan woaren de Kjinja daut uk fa wieda soo doonen, om daut to een jo to moaken.

Oba wan de Elren sajen un daut uk soo meenen, lieren de Kjinja waut wichtjet em Läwen – daut eena nich emma aules kaun, waut eena well. Dr. David Walsh schreef, daut Menschen, waut jelieet haben sikj to beharschen, väl schaftja sent un daut eena de Kjinja nich eenen Jefaulen deit, wan eena dee lieet, daut dee aules haben kjennen, waut an jankat. *

 Wan jie nu to june Kjinja sajen, dan woaren dee lota em Läwen uk sajen kjennen, wan dee biejlikj vesocht woaren Droggs to nämen, verem befrieen Sex to haben ooda waut aundret schlajchtet to doonen, waut toom Schoden es.

Halpt june Kjinja to vestonen, waut doabie rutkjemt, wan eena goodet ooda schlajchtet deit.

BIBLISCHA GRUNTSAUZ: “Waut een Mensch seit, woat hee uk arnten” (Galata 6:7).

June Kjinja motten weeten, daut et Foljen haft, waut eena deit, un daut et schlajcht utkjemt, wan eena sikj nich goot beharschen kaun. Biejlikj wan jun Jung leicht doll woat, dan woaren aundre sikj woomäajlich fa dän utem Stich brinjen. Oba wan dee daut lieet sikj to kontrollen, wan dee oppe Proow jestalt woat, ooda jeduldich blift enne Städ jäajenaun es, dan woaren dee dän jleichen. Lieet june Kjinja, daut et väl bäta es, sikj to beharschen.

Lieet june Kjinja, waut daut wichtichste es.

BIBLISCHA GRUNTSAUZ: “Fauststalen lieren, waut daut aulabaste es” (Filippa 1:10).

Selfstbeharschunk halpt ons nich bloos, daut schlajchte utem Stich to gonen, oba uk Oabeit to doonen, waut doa needich es, wan ons dee uk nich scheen jeit. June Kjinja motten lieren, woont daut wichtichste es, un daut dan daut ieeschte doonen. Biejlikj wudden dee ieescht sellen äare Schooloabeit doonen un dan spälen gonen.

Sie een goodet Väabilt.

BIBLISCHA GRUNTSAUZ: “Ekj hab junt een Biespel jejäft, daut jie uk soo doonen, aus ekj junt jedonen hab” (Johanes 13:15).

June Kjinja woaren beoobachten, waut jie doonen, wan junt waut doll moakt. Wiest derch junt Biespel, daut et bäta utkjemt, wan eena sikj beharscht. Biejlikj wan june Kjinja waut doonen, waut junt oajat, woa jie dan doll ooda bliew jie ruich?

^ Varsch 20 Von daut Buak No: Why Kids—of All Ages—Need to Hear It and Ways Parents Can Say It.