Trigj nom Enhault

No de Enhaultslist gonen

 EENE REJIERUNK, WAUT SIKJ MET DE SCHWIERICHKJEIT WEETEN WOAT

“Fräd ... woat onen Enj toonämen”

“Fräd ... woat onen Enj toonämen”

De Veeende Nazionen roden aule Menschen too, sikj tooptostonen, om de Menschenrajchten to achten un de Natua to schitzen. Wuarom? Soo aus Maher Nasser en de UN Chronicle säd, jeft daut oppe gaunze Welt “Wadawakjsel, Reibabaunden, emma mea Rikje un Oame, Kjrich, Grausomkjeit, äwaschlonende Krankheiten un daut väl Menschen äa Tus veloten motten, un noch aundre Jefoaren.”

Aundre hauden mau rajcht de Iedee, daut doa eene Weltrejierunk fäld. To dee jehieed biejlikj Dante, een italieenischa Forscha, Dichta, un Rejierungsmaun (1265-1321) un de Wissenschoftla Albert Einstein (1879-1955). Dante haud daut soo tohoolen, daut en eene Welt nich kunn Fräd sennen, wan dee sikj oneenich wia. Hee räd von daut, waut Jesus Christus mol säd: “Een Rikj, daut sikj en sikj selfst nich eenich es, brinjt sikj selfst en de Grunt” (Lukas 11:17).

Kort no dän tweeden Weltkjrich, wua twee Atomm-Bomm jebrukt worden, schreef Albert Einstein eenen Breef, waut aule Menschen läsen kunnen, aun de Hauptvesaumlunk von de Veeende Nazionen. Hee säd: “De Veeende Nazionen motten bosich daut needichste doonen toom de Gruntloag fa eene woare Weltrejierunk lajen, om oppe gaunze Welt fa Sechaheit to sorjen.”

Oba wudden Menschen, waut en soone majchtje Rejierunk harschten, emma opprechtich bliewen, aundre nich daut Läwen schwoa moaken ooda verheipts doatoo emstaunt sennen? Ooda wudden dee krakjt soo schlajcht sennen, aus aundre Harscha wieren? Dise Froagen halpen ons aun daut to denkjen, waut de enjlischa Jeschichtsforscha Lord Acton säd: “Wäa Macht haft, woat doavon vedorwen; wäa sea väl Macht haft, woat doavon sea vedorwen.”

Daut de Menschheit kaun woaren Fräd haben, mott dee veeent bliewen. Oba woo kaun daut bat doa komen? Es soont verheipts mäajlich? De Schreft sajcht, daut es. Daut woat bat doa komen. Oba woo? Daut woat nich derch eene Weltrejierunk komen, waut von onopprechtje Harscha oppjestalt es, oba derch eene, waut Gott oppjestalt haft. Un waut noch wichtja es: dise Rejierunk woat wiesen, daut bloos see daut Rajcht haft, äwa aules to harschen. Waut es dit fa eene Rejierunk? De Schreft nant dee “Gott sien Rikj” ooda Gott sien Kjennichrikj (Lukas 4:43).

“LOT DIEN RIKJ KOMEN”

Jesus Christus docht aun Gott sien Kjennichrikj, aus hee en daut “Unser-Vater”-Jebäd säd: “Lot dien Rikj komen. Lot dien Wellen oppe Ieed . . . jedonen woaren” (Matäus 6:9-10). Gott sien Rikj woat doafäa oppkomen, daut Gott sien Wellen oppe Ieed jedonen woat un nich Menschen äara, waut bloos no Macht hinjaraun sent un fa sikj strieden.

Gott sien Kjennichrikj woat uk “Himmelrikj” jenant (Matäus 5:3). Wuarom? Wiels daut woat em Himmel sennen un nich oppe Ieed, oba daut woat äwa de Ieed rejieren. Denkj mol han; dise Weltrejierunk woat nich Jelt ooda aundre Sachen velangen. Woo loosjeloten woaren de Menschen sikj nich feelen!

Soo aus daut Wuat “Kjennichrikj” to vestonen jeft, es Gott sien Rikj eene Rejierunk met eenen Kjennich. De Kjennich es Jesus Christus, waut siene Macht von Gott jekjräajen haft. De Schreft sajcht äwa Jesus:

  •   “Hee haft daut Rajcht to rejieren. . . . Sien Machtrajcht un de Fräd unja am woat onen Enj toonämen” (Jesaja 9:5-6).

  • “Dee jeef däm Macht un Pracht un Krauft. Un de Menschen von aule Velkja, Lenda, un Sproaken bäden am aun [ooda deenden am]. Sien Rajcht to rejieren wudd nienich to Enj komen” (Daniel 7:14).

  • “Nu haben ons Har un sien Christus de Harschoft äwa de gaunze Welt von de Kjennichs jenomen” (Openboarunk 11:15).

Daut “Unser-Vater” woat sikj erfellen, wan daut Kjennichrikj doafäa sorjen woat, daut Gott sien Väanämen sikj oppe Ieed gaunz erfelt. Unja dit Rikj woaren de Menschen lieren, sikj rajcht om de Ieed to kjemren, daut de Ieed wada jesunt un voll Läwen es.

Un äwa aules woaren se unja Gott sien Rikj aula deeselwje goode Belierunk kjrieen, un daut woat doa kjeene Oneenichkjeit jäwen. En Jesaja 11:9 sajcht daut: “Doa woat kjeen Schoden ooda vedoawen . . . sennen; un soo aus Wota daut gaunze Mäa bedakjt, soo woat en daut gaunze Launt Vestentnis fa däm HARN sennen.”

Oppe gaunze Welt woaren de Menschen dan veeent un en Fräd läwen. Soont haben de Veeende Nazionen nich kunt volbrinjen. Psalm 37:11 sajcht, daut de Menschen “sikj to de groote Fräd freien” woaren. Met de Tiet woaren de Wieed soo aus “Jesazloosichkjeit”, “Veorreinjunk von de Natua”, “Oamoot” un “Kjrich” nich mea em Jeräd komen. Wanea woat daut soo wiet sennen? Wanea woat Gott sien Kjennichrikj mol äwa de gaunze Ieed rejieren? Woo woat daut rejieren? Un woo kaun die dise Harschoft togood komen? Wie woaren seenen.