Trigj nom Enhault

No de Enhaultslist gonen

Dee, waut dän “jlekjeljen Gott” deenen, haben Freid

Dee, waut dän “jlekjeljen Gott” deenen, haben Freid

“Jesäajent [ooda jlekjlich] es daut Volkj dän äa Gott de HAR es” (PSA. 144:15)

LEEDA: 44, 111

1. Wuarom sent Jehova siene Deena schaftje Menschen? (See daut Bilt aum Aunfank.)

JEHOVA SIENE ZEIJEN sent Menschen, waut Freid haben. Wan dee bie äare Toopkomes, Kongressen ooda sestwua toop sent, dan hieet eena foaken, daut dee sikj schaftich unjahoolen un lachen. Wuarom sent dee soo schaftich? De jratste Uasoak doafäa es, daut dee Jehova, dän “jlekjeljen Gott”, kjanen un deenen un dän proowen notodoonen (1. Tim. 1:11NW; Psa. 16:11). De woare Freid kjemt von Jehova un hee well, daut wie Freid haben, un jeft ons välet, daut wie ons freien kjennen (5. Mo. 12:7; Liera 3:12-13).

2-3. (a) Waut bediet daut, Freid to haben, ooda jlekjlich to sennen? (b) Wuarom kaun daut eenjemol schwoa sennen Freid to haben?

2 Woo es daut bie die? Hast du Freid? Wurscht du kjennen noch mea Freid haben? “Freid haben”, ooda “jlekjlich sennen” bediet, daut eena sikj goot feelt, tofräd es met sien Läwen ooda mau rajcht sea schaftich es. De Schreft wiest, daut eena werkjlich Freid haft, wan eena von Jehova jesäajent woat. Oba en de vondoagsche Welt kaun daut eenjemol schwoa sennen Freid to haben. Wuarom?

 3 Daut es schwoa schaftich to sennen, wan wie schlemmet derchmoaken, biejlikj wan wäa stoaft ooda utjeschloten woat, waut wie sea jleichen, wan onse Ehe vebrakjt ooda wie de Oabeit velieren. Daut kaun ons uk de Freid vedoawen, wan et enne Famielje Oneenichkjeit jeft, wan se ons bie de School ooda bie de Oabeit vespotten ooda wäajen onsen Gloowen vefoljen ooda enstoppen. Veleicht woat daut uk met de Jesuntheit emma schlajchta ooda wie haben Narfentrubbel ooda eene aunhoolende Krankheit. Oba “de jlekjelja un eensja Harscha” Jesus Christus well de Menschen treesten un dee halpen Freid to haben (1. Tim. 6:15NW; Mat. 11:28-30). En siene bekaunde Räd oppem Boajch räd Jesus von een deel Ieejenschoften, waut ons kjennen Freid jäwen, wan wie en dän Soton siene Welt uk väl Trubbel haben.

ONEN JEHOVA KJENN WIE NICH WOARE FREID HABEN

4-5. Woo kjenn wie Freid haben un dee uk hoolen?

4 Daut ieeschte, wua Jesus von räd, wia besonda wichtich. Hee säd: “Jlekjlich sent dee, dee sikj doaräwa em kloaren sent, daut an daut jeistelje fält, wiels an jehieet daut Kjennichrikj em Himmel” (Mat. 5:3NW). Wan wie ons doaräwa em kloaren sent, dan weet wie, daut wie Gott kjanen lieren motten un daut wie siene Help un sienen Rot brucken. Woo wies wie daut? Wan wie de Bibel studieren, siene Jebooten hoolen un daut ieeschte doarom todoonen sent, dän jlekjeljen Gott auntobäden. Daut woat ons halpen, mea Freid to haben un noch dolla doaropp to vetruen, daut siene Vespräakjungen sikj boolt erfellen woaren. Un wan wie Trubbels haben, dan woat de scheene Hopninj ut de Schreft ons Moot jäwen (Tit. 2:13NW).

5 Daut wie Freid haben, endoont waut doa oppkjemt, mott wie enje Frind sennen met Jehova. De Apostel Paulus schreef: “Freit junt emma em Harn [Jehova]! Un ekj saj junt noch eemol: Freit junt!” (Filip. 4:4). Toom goode Frind met Jehova woaren bruck wie siene Weisheit. Gott sien Wuat sajcht: “Woo jesäajent es doch een Mensch dee Weisheit finjt, un een Mensch dee vestendich woat. See es een Läwen jäwenda Boom fa dee, dee äa aunnämen, un jesäajent sent aul dee, dee sikj aun Weisheit hoolen” (Spr. 3:13, 18).

6. Waut mott wie doonen toom schaftich bliewen?

6 Daut wie de Freid nich velieren, mott wie wieda Gott sien Wuat läsen un nokomen. Jesus muak daut dietlich, aus hee säd: “Wan jie dit nu weeten, dan sent jie seelich [ooda jlekjlich], wan jie daut uk doonen” (Joh. 13:17; läs Jakobus 1:25). Soo kjrie wie daut, waut ons em jeisteljen fält, un woaren schaftich bliewen. Oba woo kjenn wie schaftich bliewen, wan doa soo väl es, waut ons de Freid nämen kaun? Well wie mol seenen, waut Jesus en siene bekaunde Räd oppem Boajch daut näakjste säd.

IEEJENSCHOFTEN, WAUT ONS FREID BRINJEN

7. Woo kjennen dee, waut truarich sent, Freid haben?

7 “Seelich [ooda ‘jlekjlich’, ‘NW’] sent dee, dee truarich sent; wiels an saul jetreest woaren” (Mat. 5:4). Eenje denkjen veleicht: “Woo kjennen soone, waut truaren, Freid haben?” Jesus räd hia nich von soone, waut wäajen irjentwaut truaden. Mau rajcht de schlajchte Menschen sent truarich ooda mootloos, wäajen daut nu “en de latste Doag jreslich schwoare Tieden” jeft (2. Tim. 3:1). Oba daut es bloos, wäajen dee daut schlajcht jeit. Dee woaren  nich Frind met Jehova un doawäajen haben dee nich woare Freid. Jesus mott jemeent haben, daut soone jlekjlich sent, waut weeten, daut an daut jeistelje fält, un dan doaräwa truarich sent, daut soo väl Menschen nuscht von Gott weeten wellen ooda dän nich jehorchen. Dee woaren uk en, daut see Sinda sent un daut et wäajen de Sind soo schlajcht toojeit en de Welt. Jehova sitt aule, waut wäajen soont truarich sent, un treest dee derch sien Wuat un jeft dee Freid un de Hopninj opp daut eewje Läwen (läs Hesekiel 5:11; 9:4).

8. Woo kaun saunftmootich sennen ons halpen Freid to haben?

8 “Seelich [ooda ‘jlekjlich’, ‘NW’] sent dee, dee saunftmootich sent; wiels dee sellen de Welt oawen” (Mat. 5:5). Woo kaun saunftmootich sennen eenem halpen Freid to haben? Wan eena de Woarheit kjanen lieet, dan endat eena sikj. Eenje wieren ea veleicht kort jesonnen ooda hunjsch. Oba nu haben dee “eene niee Natua aunjenomen”, doonen “sikj von Hoaten erboarmen” un sent “frintlich . . ., deemootich, saunftmootich un jeduldich” (Kol. 3:9-12). Doawäajen haben dee nu Fräd un woaren fein met aundre foadich un sent schaftich. Un Gott sien Wuat vesprakjt, daut soone “de Welt oawen” woaren (Psa. 37:8-10, 29).

9. (a) Waut bediet daut, daut de Saunftmootje “de Welt oawen” woaren? (b) Wuarom kjennen dee Freid haben, “dee een Hunga un Darscht no Jerajchtichkjeit haben”?

9 Waut bediet daut, daut de Saunftmootje “de Welt oawen” woaren? Jesus siene jesaulwde Nofolja woaren de Welt oawen, wan dee aus Kjennichs un Priesta äwa dee rejieren (Opb. 20:6). Un millionende Menschen, waut nich de Hopninj haben, em Himmel to komen, woaren doaderch de Welt oawen, daut see doa fa emma läwen kjennen. Dee woaren dan volkomen sennen un Fräd un Freid haben. Dise beid Gruppen sent uk jlekjlich, wiels “dee een Hunga un Darscht no Jerajchtichkjeit haben” (Mat. 5:6). Dee äa Hunga un Darscht no Jerajchtichkjeit woat en de niee Welt gaunz jestelt woaren, wan Gott aulet schlajchte oppriemen woat (2. Pet. 3:13). Dan woaren de Jerajchte fa emma Freid haben, wäajen doa kjeena mea woat schlajchtet doonen (Psa. 37:17).

10. Waut bediet daut, Metleet to haben?

10 “Seelich [ooda ‘jlekjlich’, ‘NW’] sent dee, dee met aundre Metleet haben; met dee woat Gott Metleet haben” (Mat. 5:7). Metleet haben meent, daut eena leeftolich un metfeelent es un daut eenem daut äwa dee leet deit, waut lieden. Oba doa es noch mea met en. De Schreft wiest ons, daut eena, waut Metleet haft, uk waut deit toom aundre halpen.

11. Waut kjenn wie von daut Jlikjnis von dän metliedenden Samarita lieren?

11 Läs Lukas 10:30-37. Jesus sien Jlikjnis von dän metliedenden Samarita wiest ons dietlich, waut Metleet es. Dän Samarita jaumad daut äwa dän Maun, waut lieden must, un sien Metleet brocht am bat doa, dän to halpen. Nodäm aus Jesus daut Jlikjnis vetalt haud, säd hee: “Go un doo uk soo.” Wie wudden sellen äwa nodenkjen: “Doo ekj dautselwje, waut de metliedenda Samarita? Hab ekj Metleet, wan aundre lieden? Kunn ekj noch mea doonen toom dee halpen? Wudd ekj biejlikj kjennen elre Breeda halpen ooda Wätfrues ooda Kjinja, waut nich Elren en de Woarheit haben? Wudd ekj kjennen waut doonen toom deejanje treesten, ‘dee de Moot verutscht es’?” (1. Tess. 5:14; Jak. 1:27).

Wan wie wellich aundre halpen, woa wie moakjen, woo väl Freid daut brinjt (See Varsch 12)

12. Wuarom woa wie schaftich sennen, wan wie metliedent sent?

12 Wuarom woa wie schaftich sennen,  wan wie metliedent sent? Wan wie aundre ut Metleet halpen, dan woa wie beläwen, daut jäwen schaftich moakt. Un wie woaren uk schaftich sennen, wiels wie weeten, daut Jehova met ons tofräd es (Apj. 20:35; läs Hebräa 13:16). De Kjennich David schreef äwa eenen, waut aundre Metleet wees. Hee säd: “Däm woat de HAR bewoaren un aum läwen hoolen, un dee woat oppe Ieed jesäajent sennen” (Psa. 41:2-3). Wan wie aundre Metleet wiesen, dan woat Jehova met ons uk metliedent sennen un wie woaren kjennen fa emma schaftich sennen (Jak. 2:13).

WUAROM “DEE, DEE EEN REINET HOAT HABEN”, SCHAFTICH SENT

13-14. Wuarom haben dee Freid, “dee een reinet Hoat haben”?

13 Jesus säd: “Seelich [ooda ‘jlekjlich’, ‘NW’] sent dee, dee een reinet Hoat haben; wiels dee sellen Gott seenen” (Mat. 5:8). Om een reinet Hoat to haben, mott wie onse Jedanken reinhoolen un oppaussen, waut wie ons jankren loten. Daut es opp iernst needich, wan wie Jehova soo deenen wellen, aus am daut jefelt (läs 2. Korinta 4:2; 1. Tim. 1:5).

14 Deejanje, waut een reinet Hoat haben, kjennen Frind met Jehova sennen, waut säd: “Seelich [ooda ‘jlekjlich’, ‘NW’] sent, dee äare Kjleeda wauschen” (Opb. 22:14, Fn.). Waut bediet daut, daut dee “äare Kjleeda wauschen”? Fa de jesaulwde Christen bediet daut, daut Jehova dee fa rein aunsitt un onstoafeljet Läwen em Himmel jeft un daut dee doa fa emma woaren Freid haben. Fa de groote Häad, waut de Hopninj haft, oppe Ieed to läwen, meent daut, daut Jehova dee uk fa jerajcht talt un daut dee uk met am kjennen Frind sennen. De Schreft sajcht: “Dee haben äare Kjleeda em Bloot vom Laum kloa witt jewoschen” (Opb. 7:9, 13-14).

15-16. Woo kjennen dee, waut een reinet Hoat haben, “Gott seenen”?

15 Jehova säd: “Kjeena, dee mie to seenen kjricht, kaun läwen” (2. Mo. 33:20). Wuarom sajcht daut dan, daut dee, waut een reinet Hoat haben, “Gott seenen” woaren? Daut griechische Wuat, waut hia met “seenen” äwasat es, kaun uk meenen, daut eena sikj waut väastalt ooda waut kjant ooda vesteit. Gott to seenen bediet aulsoo, daut eena dän goot kjant un siene Ieejenschoften väl räakjent (Efs. 1:18). Jesus deed Gott krakjt no un doawäajen kunn hee sajen: “Wäa mie jeseenen haft, haft uk dän Voda jeseenen” (Joh. 14:7-9).

16 Wie kjennen Gott uk seenen, wan wie beläwen, woo hee ons halpt (Hiob 42:5). Wie kjennen uk de wundascheene Dinj “seenen”, ooda em Uag hoolen, waut Jehova deejanje vesproaken haft, waut rein bliewen un am tru deenen. Un de Jesaulwde woaren Jehova werkjlich seenen, wan dee nom Himmel komen (1. Joh. 3:2).

 WIE KJENNEN SCHAFTICH SENNEN, WAN WIE UK TRUBBELS HABEN

17. Wuarom sent dee schaftich, waut Fräd moaken?

17 Daut näakjste säd Jesus: “Seelich [ooda ‘jlekjlich’, ‘NW’] sent dee, dee doa Fräd moaken” (Mat. 5:9). Wan wie ons bemieejen, met aundre Fräd to moaken, dan woa wie schaftich sennen. De Jinja Jakobus schreef: “Jerajchtichkjeit es eene Arnt, dee en Fräd von dee jeseit woat, dee doa Fräd vebreeden” (Jak. 3:18). Wan wie met wäm von de Vesaumlunk ooda von de Famielje Trubbel haben, dan kjenn wie Jehova no Help froagen toom Fräd moaken. Dan woat hee ons sienen heiljen Jeist jäwen, waut ons halpt, ons rajcht to vehoolen un mea Freid to haben. Jesus muak daut kloa, woo needich daut wia, Fräd to moaken, aus hee säd: “Wan du nom Aultoa jeist diene Gow to opfren un die doa biefelt, daut dien Brooda waut jäajen die haft, dan lot diene Gow doa ver däm Aultoa ligjen un go un moak ieescht Fräd met dienen Brooda, un dan go un brinj diene Gow” (Mat. 5:23-24).

18-19. Wuarom kjennen Christen sikj freien, wan dee uk vefolcht woaren?

18 Jesus säd: “Seelich [ooda ‘jlekjlich’, ‘NW’] sent jie, wan de Menschen om mient haulwen äwa junt schellen, junt vefoljen, un junt aulahaunt schlajchtet noräden, wan daut nich soo es.” Waut meend Jesus doamet? Hee säd wieda: “Freit junt un siet hechst froo; daut woat junt em Himmel goot beloont woaren. Wiels jrod soo haben see de Profeeten vefolcht, dee ver junt wieren” (Mat. 5:11-12). Aus se de Apostel veheiwden un an vebooden, wiedatoprädjen, “veleeten de Apostel dän Rot, un freiden sikj”. Dee freiden sikj nich doaräwa, daut se an schluagen, oba “daut see wieren wieet jeacht worden, fa Jesus sienen Nomen Schaund to lieden” (Apj. 5:41).

19 Vondoag dän Dach hoolen Jehova siene Deena daut uk met Freiden ut, wan see wäajen Jesus sienen Nomen vefolcht woaren ooda Schwierichkjeiten beläwen (läs Jakobus 1:2-4). Soo aus de Apostel jeit ons daut uk nich scheen, wan wie lieden motten. Oba wan wie en schwoare Tieden tru bliewen, dan kaun Jehova ons de Krauft jäwen uttohoolen. Soo wia daut biejlikj bie Henryk Dornik un sienen Brooda. En August 1944 worden dee no een Loaga fa Faustjenomne jeschekjt, wua de Menschen sea grausom behaundelt worden. Oba dee, waut an vefoljden, säden: “Daut es ommäajlich, dee to irjentwaut to beräden. Fa äaren Gloowen to lieden un to stoawen jeft dee Freid.” Brooda Dornik säd: “Mie jankad nich, wäajen mienen Gloowen to lieden ooda to stoawen, oba Jehova tru to bliewen jeef mie Freid, wan ekj uk lieden must. . . . Derch iernste Jebäda kjeem ekj Jehova emma noda un ekj beläwd, daut hee mie werkjlich holp.”

20. Wuarom frei wie ons, dän “jlekjeljen Gott” to deenen?

20 Wan Jehova, de jlekjelja Gott, met ons tofräd es, dan kjenn wie mau rajcht schaftich sennen, wan se ons wäajen onsen Gloowen vefoljen, wan de Famielje jäajen ons es ooda wan wie krank ooda ella sent (1. Tim. 1:11NW). Wie kjennen uk Freid haben wäajen aul daut scheene, waut Gott ons vesproaken haft, “dee nich lieejen kaun” (Tit. 1:2). Wan sikj daut ieescht erfelt, dan woa wie aun de Trubbels, waut wie nu haben, nich mol mea denkjen. Daut Läwen em Paradies woat noch väl scheena sennen, aus wie ons daut nu väastalen kjennen! Doa woa wie schaftja sennen aus jeemols ea un wie woaren ons “to de groote Fräd freien” (Psa. 37:11).