Trigj nom Enhault

No de Enhaultslist gonen

Aulmajchtich, oba om aundre bedocht

Aulmajchtich, oba om aundre bedocht

“[Jehova] weet von waut wie jemoakt sent; hee denkjt doaraun, daut wie bloos Stoff sent” (PSA. 103:14)

LEEDA: 135, 149

1-2. (a) Woo gonen Menschen, waut väl Macht haben, met aundre om? Woo deit Jehova daut? (b) Waut woa wie en disen Artikjel seenen?

MENSCHEN, waut väl Macht haben, doonen foaken “äwa . . . [aundre] romkommandieren” ooda stalen sikj sea wieetich opp (Mat. 20:25; Liera 8:9). Oba Jehova es gaunz aundasch! Hee es de Aulmajchtja, oba es doawäajen om onvolkomne Menschen bedocht. Hee es leeftolich un väabedocht un doarom bekjemmat, woo wie ons feelen un waut ons fält. Hee velangt kjeenmol mea von ons, aus wie doonen kjennen, wiels “hee denkjt doaraun, daut wie bloos Stoff sent” (Psa. 103:13-14).

2 En de Schreft sent väl Biespels oppjeschräwen, woo Jehova om siene Deena bedocht wia. Well wie mol dree von dee betrachten. Daut ieeschte woa wie seenen, woo leeftolich Gott dän kjlienen Samuel holp, dän Huagen Priesta Eli eene iernste Norecht to brinjen. Daut tweede woa wie seenen, woo väl Jedult Jehova met Moses haud, aus hee sikj daut nich äwanämen wull, de Israeliten ut Ägipten ruttoleiden. Un daut dredde woa wie seenen, woo Jehova om de Israeliten bedocht wia, aus hee dee von  Ägipten friemuak. Waut lieet ons aul dit äwa Jehova?

LEEFTOLICH OM EENEN JUNG BEDOCHT

3. (a) Waut fa butajeweeneljet beläwd de kjliena Samuel eenen Zeowes? (b) Waut vonne Froag kunn oppkomen? (See daut Bilt aum Aunfank.)

3 Samuel “deend däm HARN” von sea junk aun bie daut Aunbädungszelt (1. Sam. 3:1). Eenen Zeowes, aus Samuel aul schleep, passieed waut butajeweeneljet (läs 1. Samuel 3:2-10). * Hee hieed eene Stemm, waut sienen Nomen säd. Samuel docht, de elra Huaga Priesta Eli roopt am un hee rand fuaz no dän un säd: “Hia sie ekj. Du roopst mie.” Eli säd, hee haud am nich jeroopt. Aus dautselwje noch tweemol passieed, wort Eli en, daut et Gott wia, waut Samuel jeroopt haud. Dan säd hee to dän, woo hee auntwuaten sull, wan hee de Stemm wada hieed, un Samuel horcht no am. Wuarom säd Jehova nich von fuaz aun, daut daut hee wia, waut Samuel derch eenen Enjel roopt? Daut sajcht de Schreft nich, oba veleicht wia daut, wiels Jehova om Samuel bedocht wia.

4-5. (a) Waut deed Samuel, aus Gott to am säd, hee sull Eli eene Norecht brinjen? (b) Waut lieet dise Jeschicht ons von Jehova?

4 Läs 1. Samuel 3:11-18. Jehova sien Jesaz säd, daut Kjinja de Elre respakjten sullen, besonda de Rechta, ooda Leida (2. Mo. 22:27; 3. Mo. 19:32). Doawäajen wudd daut fa Samuel secha sennen schwoa jewast, zemorjes no Eli to gonen un dän jlikjtoo to sajen, daut Gott dän un siene Famielje strenj bestrofen wudd. De Schreft sajcht, Samuel “fercht sikj Eli to sajen, waut am wia kloa jemoakt worden”. Oba Gott wees Eli, daut hee Samuel jeroopt haud. Un Eli säd dan, Samuel sull nuscht trigjhoolen von daut, waut Jehova jesajcht haud. Samuel jehorcht un “vetald am aules”.

5 De Norecht, waut Samuel brocht, wia nich waut framdet fa Eli. Dee paust krakjt met daut toop, waut “een Maun, dee Gott deend”, aul ea to dän Huagen Priesta jesajcht haud (1. Sam. 2:27-36). De Jeschicht von Samuel un Eli wiest ons, daut Jehova sea om aundre bedocht un weis es.

6. Waut kjenn wie von daut lieren, woo Gott dän jungen Samuel holp?

6 Best du noch junk? Dan kaust du von Samuel siene Jeschicht lieren, daut Jehova krakjt weet, woo du die feelst un waut fa Schwierichkjeiten du hast. Veleicht best du bleed un die felt daut schwoa, met Elre äwa de Norecht von daut Kjennichrikj to räden ooda aundasch to sennen aus aundre junge Menschen. Du kaust die secha sennen, daut Jehova die halpen well. Doawäajen kaust du to am bäden un dien Hoat ver am utschedden (Psa. 62:9). Denkj goot äwa de junge Menschen no, wua de Schreft von rät, biejlikj äwa Samuel. Un froag Breeda un Sestren en dien Ella ooda uk Elre, woo see soone Trubbels äwakomen sent, aus du nu hast. Dee woaren die secha vetalen, woo Jehova an jeholpen haft un veleicht mau rajcht opp soone Wajch, wua see kjeenmol aun jedocht hauden.

OM MOSES BEDOCHT

7-8. Woo wees Jehova, daut hee sea om Moses bedocht wia?

7 Aus Moses 80 Joa wia, jeef Jehova am eene schwoare Oppgow. Hee sull daut Volkj Israel von Ägipten friemoaken (2. Mo. 3:10). Moses scheen daut secha schwierich, wäajen hee de latste 40 Joa een Schophoad en Midian jewast wia. Hee säd: “Wäa sie ekj, daut ekj no däm Kjennich gonen saul, de Israeliten ut Ägipten rut to brinjen?” Gott  spruak Moses Moot too un säd: “Ekj woa met die sennen” (2. Mo. 3:11-12). Hee vespruak am uk: De Leida en Israel “woaren no junt horchen”. Oba Moses säd dan noch: “Ei wan see . . . nich no mie horchen?” (2. Mo. 3:18; 4:1). Daut wia soo, aus wan Moses Gott nich vetrud. Oba Jehova bleef jeduldich un holp Moses mau rajcht, Wunda to doonen. Moses wia de ieeschta Mensch, von dän de Schreft sajcht, daut hee de Krauft kjrieech, Wunda to doonen (2. Mo. 4:2-9, 21).

8 Oba Moses jeef doawäajen noch väa un säd, daut hee nich goot räden kunn. Dan säd Gott: “Ekj selfst woa die räden halpen, un die unjarechten waut du sajen saust.” Wia Moses dan reed, daut to doonen? Daut lat doa nich no, wäajen hee fruach, aus Jehova nich eenen aundren schekjen kunn. Aus Jehova dit hieed, wort hee kort met Moses. Oba hee docht doawäajen noch doaraun, woo dän daut jinkj, un schekjt Aaron met Moses met toom fa am räden (2. Mo. 4:10-16).

9. Woo holp Moses daut bie siene Oppgow, daut Jehova soo jeduldich om am bedocht wia?

9 Waut lieet dise Jeschicht ons von Jehova? Jehova es de aulmajchtja Gott un hee haud Moses leicht kunt engrulen un bemotten jehuarsom to sennen. Enne Städ daut wia hee jeduldich un leeftolich un spruak sienen bescheidnen un deemootjen Deena Moot too. Woo kjeem daut ut? Gaunz fein, wiels Moses wort een sea gooda Leida, waut met aundre krakjt soo leeftolich un väabedocht proowd omtogonen, aus Jehova met am deed (4. Mo. 12:3).

Behaundelst du aundre soo, aus Jehova daut deit? (See Varsch 10)

10. Waut fa goodet brinjt daut, wan wie Jehova nodoonen un om aundre bedocht sent?

10 Waut lia wie doavon? Wan wie Ehemana, Elren ooda Eltestasch sent, dan sent wie en jewesse Stekjen äwa aundre aunjestalt. Doawäajen jroz es daut soo needich, daut wie Jehova nodoonen un leeftolich un jeduldich om dee bedocht sent, wua wie ons om kjemren sellen (Kol. 3:19-21; 1. Pet. 5:1-3). Wan wie ons aunstrenjen, Jehova un Jesus Christus, dän  jratren Moses, notodoonen, dan woa wie aundre Moot moaken un dee woat daut leichta sennen, met ons to räden (Mat. 11:28-29). Wie woaren uk een goodet Biespel fa dee sennen (Heb. 13:7).

EEN MAJCHTJA RADA, OBA OM AUNDRE BEDOCHT

11-12. Waut deed Jehova, daut de Israeliten sikj secha un beschizt feelden, aus hee dee ut Ägipten rutleid?

11 Aus de Israeliten aune 1513 v. Chr. Ägipten veleeten, wieren daut veleicht mea aus dree Millionen Menschen. Mank dee wieren Kjinja, elre Menschen un secha uk eenje Kranke ooda Kjräpelje. Toom soone groote Häad Menschen ut Ägipten rutbrinjen brukt daut eenen vestendjen un väabedochten Leida. Krakjt daut wia Jehova uk, un hee leid daut Volkj derch Moses. Doawäajen feelden de Israeliten sikj secha, aus see daut eensje Tus veleeten, waut see kjanden (Psa. 78:52-53).

12 Waut deed Jehova, daut sien Volkj sikj secha un beschizt feeld? Aus hee de Israeliten ut Ägipten rutleid, deeld hee dee biejlikj soo en, “aus wan see toom Kjrich jinjen” (2. Mo. 13:18). Daut jinkj aula sea ordentlich too un daut wees de Israeliten, daut Jehova aules unja Kontroll haud. Dee sagen uk, daut Jehova met an wia, wäajen “äwadach leid hee an met eene Wolkj, un de Nacht met een Licht vom Fia” (Psa. 78:14). Daut wia soo, aus wan Jehova wudd sajen: “Habt nich Angst! Ekj sie met junt toom junt leiden un beschitzen.” Daut wia krakjt to de rajchte Tiet, wiels boolt wudden see en eene schwoare Loag jeroden.

Woo holp Jehova de Israeliten bie daut Roode Mäa? (See Varsch 13)

13-14. (a) Waut deed Jehova bie daut Roode Mäa fa de Israeliten? (b) Woo wees Jehova, daut hee Macht äwa de Ägipta haud?

13 Läs 2. Mose 14:19-22. Stal die mol väa, du best mank de Israeliten, un jie sent tweschen daut Roode Mäa un Farao siene Soldoten faust. Dan met eenst moft Gott de steile Wolkj, waut emma ver junt wia, no hinjen, soo daut dee tweschen junt un de Ägipta es. Bie dee es daut nu diesta, oba bie junt es daut derch een Wunda dach. Dan strakjt Moses siene Haunt ut äwa daut Mäa un een stoakja Oostwint pust un moakt eenen Wajch op medden derch daut Mäa. Nu kjenn jie aula no de Rieej no de aundre Kaunt gonen – du, diene Famielje, de Hustieren un daut gaunze Volkj. Du woascht fuaz en, daut de Grunt von daut Mäa nich mol moddich ooda jlitschich es; dee es drieech un fein faust, soo daut eena doa goot gonen kaun. Soo komen soogoa de Langsome secha no de aundre Sied.

14 Läs 2. Mose 14:23, 26-30. Äwadäm es de stolta Farao soo onbedocht, daut dee junt hinjaraunkjemt en daut drieeje Mäa nenn. Dan strakjt Moses siene Haunt wada ut äwa daut Mäa, un daut Wota, waut soo aus eene Waunt steit, felt toop un pralt äwa Farao un siene Soldoten. Nich eena von dee blift aum läwen! (2. Mo. 15:8-10).

15. Waut lieet dise Jeschicht ons von Jehova?

15 Von dise Jeschicht kjenn wie lieren, daut Jehova een Gott von Ordnunk es. Daut halpt ons, ons secha un beschizt to feelen (1. Kor. 14:33). Jehova es uk een leeftolja Hoad, waut fa siene Schop sorcht. Hee sitt doano, daut dee secha sent, un beschizt dee fa äare Fiend. Daut jeft ons väl Moot un Troost, wiels daut Enj von dise Welt soo dicht bie es (Spr. 1:33).

16. Woo kjemt ons daut togood, wan wie doaräwa nodenkjen, woo Jehova de Israeliten friemuak?

16 Vondoag dän Dach es Jehova noch emma om sien Volkj bedocht. Hee halpt dee, daut dee kjennen Frind met am bliewen, un beschizt dee, daut de Jäajna dee  nich utroden kjennen. Un daut woat hee uk en de groote Triebsaul doonen, waut bosich noda kjemt (Opb. 7:9-10). Doawäajen woaren Gott siene Deena en de groote Triebsaul nich äwamotich Angst haben, endoont aus de junk ooda oolt sent ooda jesunt ooda krank. * Enne Städ sikj too sea to grulen, woaren dee aun Jesus siene Wieed denkjen, aus hee säd: “Häft de Kjap opp un kjikjt, wiels sikj june Radunk nodat” (Luk. 21:28). Dee woaren sikj mau rajcht dan opp Jehova veloten, wan Gog jäajen an kjemt – daut sent Velkja, waut sikj toopstonen un väl mea Macht haben aus de Farao (Hes. 38:2, 14-16). Wuarom woaren dee sikj opp Jehova veloten? Dee weeten, Jehova endat sikj nich. Hee woat wada bewiesen, daut hee een majchtja Rada es un om aundre bedocht es (Jes. 26:3, 20).

17. (a) Woo kjemt ons daut togood, wan wie Jeschichten studieren, wua Jehova om siene Deena bekjemmat wia? (b) Waut woa wie en dän näakjsten Artikjel seenen?

17 En disen Artikjel hab wie eenje Biespels jeseenen, woo sea Jehova om sien Volkj bedocht es un woo väabedocht hee es, wan hee fa siene Deena sorcht, dee aunleit un dee friemoakt. Wan du äwa soone Jeschichten nodenkjst, dan strenj die aun, mea äwa Jehova to lieren un no soone Eenselheiten to kjikjen, waut die bat nu noch nich oppjefollen sent. Wan du doaderch mea von Jehova siene besondre Ieejenschoften lieescht, dan woat diene Leew fa am un dien Gloowen stoakja woaren. En dän näakjsten Artikjel woa wie lieren, woo wie soo om aundre bedocht sennen kjennen aus Jehova. Wie woaren seenen, woo wie daut en de Famielje, en de Vesaumlunk un em Deenst doonen kjennen.

^ Varsch 3 De judischa Jeschichtsschriewa Josefus säd, daut Samuel to dee Tiet 12 Joa wia.

^ Varsch 16 Eena kaun sikj dietlich moaken, daut eenje, waut Harmagedon äwaläwen, kjräplich ooda krank sennen woaren. Aus Jesus oppe Ieed wia, heeld hee de Menschen “von aul äare veschiedne Krankheiten”. Daut wiest ons, waut hee lota fa dee doonen woat, waut Harmagedon äwaläwen (Mat. 9:35). Dee, waut vom Doot oppstonen, woaren dan aul gaunz jesunt sennen.