Trigj nom Enhault

No de Enhaultslist gonen

Vetru opp onsen Leida, dän Christus

Vetru opp onsen Leida, dän Christus

“Jie haben eenen Meista [ooda Leida], daut es Christus” (MAT. 23:10)

LEEDA: 18, 20

1-2. Wuarom wia Josua siene niee Oppgow soo schwoa fa am?

JEHOVA säd to Josua: “Mien Deena Moses es jestorwen; nu moak die opp un trakj äwa dän Jordan, du un daut gaunze Volkj, en daut Launt, waut ekj de Israeliten jejäft hab” (Jos. 1:1-2). Daut wia eene groote Endrunk fa Josua, wiels hee wia meist 40 Joa Moses sien Helpa jewast!

2 Moses wia eene lange Tiet de Israeliten äa Leida jewast un doawäajen wundad Josua veleicht, aus daut Volkj am wudd aus äaren Leida aunnämen (5. Mo. 34:8, 10-12). Een Buak toom nosieekjen sajcht von Josua 1:1-2: “Daut wia ieeschtemma aul eent von daut schwanste ooda jefäadlichste fa een Volkj, wan dee eenen freschen Leida kjrieejen, un daut es vondoag dän Dach noch soo.”

3-4. (a) Woo säajend Gott Josua, wiels dee opp am vetrud? (b) Waut kunn wie veleicht denkjen?

3 Josua haud goode Uasoak, sikj Sorjen to moaken. Oba hee vetrud opp Jehova un deed fuaz, waut hee am säd (Jos. 1:9-11). Gott säajend Josua doafäa un leid am un daut Volkj derch eenen Enjel. Daut es goot mäajlich, daut dis Enjel “daut Wuat” wia – Gott sien ieeschtjebuarna Sän (2. Mo. 23:20-23; Joh. 1:1).

 4 Aus Josua en Moses siene Städ de Leida wort, endad sikj väl un Jehova holp de Israeliten, fein doamet foadich to woaren. En onse Tiet jeft daut uk väl groote Endrungen un veleicht denkj wie soo: “En Gott siene Organisazion endat sikj soo väl. Wuarom kjenn wie ons secha sennen, daut wie ons opp Jesus aus onsen Leida veloten kjennen?” (läs Matäus 23:10). Daut woa wie seenen, wan wie unjasieekjen, woo Jehova ieeschtemma sien Volkj leiden deed, wan daut groote Endrungen jeef.

WÄA LEID GOTT SIEN VOLKJ EN KANAAN NENN?

5. Wäm bejäajend Josua dicht bie Jericho? (See daut Bilt aum Aunfank.)

5 Boolt nodäm aus de Israeliten derch dän Jordan-Riefa wieren, beläwd Josua waut besondret. Dicht bie de Staut Jericho bejäajend hee eenen Maun, waut een Schwieet enne Haunt reedhaud. Josua fruach dän: “Jehieescht du to ons ooda to onse Fiend?” Josua wundad sikj, aus de Maun säd, daut hee de Väaschta, ooda “Befälshaba äwa däm HARN sien Häa” wia; daut wia een Enjel, waut reed wia, Gott sien Volkj to beschitzen (läs Josua 5:13-15). Jehova räd derch disen Enjel to Josua, soo aus hee daut ieeschtemma foaken deed, wan daut opp aundre Städen en de Schreft uk sajcht, daut Jehova selfst to Josua räd (2. Mo. 3:2-4; Jos. 4:1, 15; 5:2, 9; Apj. 7:38; Gal. 3:19).

6-8. (a) Wuarom hieeden eenje von Jehova siene Aunwiesungen sikj veleicht onmoakhauftich fa de Israeliten? (b) Woo weet wie, daut de Aunwiesungen weis un to de rajchte Tiet wieren? (See uk de Footnoot.)

6 De Enjel säd Josua krakjt, woo hee Jericho ennämen sull. Fuaz hieeden eenje von de Aunwiesungen sikj veleicht nich sea moakhauftich. Biejlikj säd Jehova derch dän Enjel, daut aule Mana sullen beschnäden woaren. Oba dan wudden dee miere Doag nich kjamfen kjennen. Wia daut werkjlich eene goode Iedee, dee nu jroz to beschnieden? (1. Mo. 34:24-25; Jos. 5:2, 8).

7 Veleicht dochten de Soldoten: “Woo woa wie onse Famieljes beschitzen kjennen, wan de Fiend jäajen ons komen?” Oba dan passieed waut, wua see nich met jeräakjent hauden. De Mana von Jericho kjrieejen Angst, enne Städ daut see jäajen an kjeemen. De Schreft sajcht: “De Staut Jericho wia veschloten un vesechat, aus de Israeliten noda kjeemen, soo daut kjeena rut ooda nenkomen kunn” (Jos. 6:1). Dit mott de Israeliten sea jeholpen haben, sikj noch dolla opp Gott siene Aunwiesungen to veloten.

8 De Enjel säd to Josua uk, daut de Israeliten nich sullen jäajen Jericho kjamfen. Enne Städ daut sullen see sas Doag jieda Dach eemol rom de Staut gonen un dän säwenden Dach säwenmol. Eenje Soldoten dochten veleicht: “Daut es je bloos toom meed woaren un Tiet vesiemen!” Oba Israel äa onsechtboara Leida Jehova wist krakjt, waut hee deed. Wäajen de Israeliten no am horchten, wort äa Gloowen stoakja un see brukten nich mol jäajen de Soldoten von Jericho kjamfen (Jos. 6:2-5; Heb. 11:30). *

9. Wuarom sell wie de Aunwiesungen von Gott siene Organisazion nokomen? Jeff een Biespel.

9 Waut lia wie von dise Jeschicht? Veleicht vesto wie eenjemol nich gaunz, wuarom Jehova siene Organisazion nu eenjet aundasch deit aus ea. Veleicht wundad wie ons aum Aunfank, aus biejlikj jesajcht wort, wie sullen toom studieren, bie de Toopkomes un em Deenst de Fons, Tablets un Komputasch  brucken. Oba nu hab wie secha jemoakjt, woo goot daut es, dee to brucken, wan daut sest mäajlich es. Wan wie seenen, woo goot soone Endrungen utkomen, woat ons Gloowen stoakja un feelen ons dolla met onse Breeda un Sestren veeent.

WOO LEID CHRISTUS DE IEESCHTE CHRISTEN?

10. Wäa sach doano, daut de Väastaunt en Jerusalem toopkjeem toom eene Sach trajchtstalen?

10 Ojjefäa 13 Joa nodäm aus Kornelius een Christ wort, streeden eenje judische Christen noch emma fa de Beschniedunk (Apj. 15:1-2). Aus daut en Antiochia wäajen dit eene Striedarie jeef, schekjten se Paulus no dän Väastaunt en Jerusalem toom de Sach oppem kloaren brinjen. Wuarom? Paulus säd: “Ekj jinkj han derch ne Oppenboarinj”. Daut es kloa to seenen, daut Christus daut soo lenkjen deed (Gal. 2:1-3, Reimerbibel).

Christus wia de ieeschte Christen äa Leida (See Varsch 10-11)

11. (a) Waut deeden eenje judische Christen noch emma? (b) Woo bewees Paulus, daut hee deemootich met de Eltestasch en Jerusalem toopschauft? (See uk de Footnoot.)

11 Christus leid dän Väastaunt toom daut kloa moaken, daut de Christen, waut Nichjuden wieren, sikj nich brukten beschnieden loten (Apj. 15:19-20). Oba Joaren no daut leeten judische Christen äare Säns noch emma beschnieden. Aus de Eltestasch en Jerusalem hieeden, daut se von Paulus säden, daut hee nich daut Jesaz Moses hilt, säden see, hee sull waut doonen, wua hee secha nich met jeräakjent haud (Apj. 21:20-26). * Dee säden, hee sull met vea Mana toop nom Tempel gonen, daut de Menschen seenen kunnen, daut Paulus soo läwd, “aus daut Jesaz [velangd]”. Paulus wudd haben kunt sajen: “Wuarom well jie haben, daut ekj dit doonen saul? Daut sent doch de judische Christen, waut daut nich rajcht vestonen met de Beschniedunk!” Oba Paulus deed deemootich daut, waut de Eltestasch säden. Hee vestunt, daut dee doano sträwden, daut aule Christen sullen veeent sennen. Oba wuarom deed Jesus doa nuscht met, daut et soo lang Oneenichkjeit wäajen de Beschniedunk jeef, wan daut Jesaz Moses no Jesus sienen Doot doch nich mea jeltich wia? (Kol. 2:13-14).

12. Waut wia woomäajlich de Uasoak, daut Christus nich fuaz een Enj muak met de Striedarie wäajen de Beschniedunk?

 12 Eenje dieet daut lenja, daut auntonämen, wan sikj doa waut endat. Doawäajen brukten eenje judische Christen mea Tiet toom vestonen, daut see nich mea unja daut Jesaz Moses wieren (Joh. 16:12). Dee dochten, de Beschniedunk wia een Bewies doafäa, daut eena Gott sien Frint wia (1. Mo. 17:9-12). Aundre wada hauden Angst, daut se an wudden vefoljen, wan see aundasch wieren aus de aundre Juden (Gal. 6:12). Oba met de Tiet jeef Christus de Christen derch Paulus siene Breew noch mea Aunwiesungen äwa de Beschniedunk (Reem. 2:28-29; Gal. 3:23-25).

CHRISTUS LEIT DE VESAUMLUNK NOCH EMMA

13. Waut kaun ons halpen, ons von Christus leiden to loten?

13 Wan wie eenjemol nich krakjt vestonen, wuarom de Organisazion irjentwaut endat, dan wudd daut goot sennen, doaräwa notodenkjen, woo Christus en de Vegonenheit Gott sien Volkj jeleit haft. Hee jeef Gott siene Deena en Josua siene Tiet un uk en de Aposteltiet emma goode Aunwiesungen, om dee to schitzen un äaren Gloowen to stoakjen un om dee to halpen, veeent to bliewen (Heb. 13:8).

14-16. Woo es aun de Aunwiesungen von dän truen, weisen Kjnajcht to seenen, daut Christus ons halpen well, em Gloowen stoakj to bliewen?

14 Vondoag dän Dach leit “de trua, weisa Kjnajcht” ons un jeft ons krakjt to de rajchte Tiet Aunwiesungen (Mat. 24:45). Daut wiest, daut Jesus om ons bekjemmat es. Marc, waut vea Kjinja haft, sajcht: “De Soton prooft de Vesaumlungen doaderch schwak to moaken, daut dee de Famieljes toosat. Nu daut wie dän Rot jekjräajen haben, jieda Wäakj Famieljenstudium to haben, es daut fa daut Haupt von de Famielje kloa, woo wichtich daut es, siene Famielje to schitzen!”

15 Wan wie vestonen, woo Christus ons leit, dan woa wie seenen, daut hee ons halpen well, em Gloowen stoakj to bliewen. Patrick, een Eltesta, sajcht: “Aum Aunfank jleichten eenje daut nich, utgangs Wäakj en kjliene Gruppen tooptokomen fa dän Prädichtdeenst.” Oba hee sajcht uk, daut aun dise Endrunk to seenen es, daut Jesus om jiedren eenen von de Vesaumlunk todoonen es. Biejlikj feelen de Breeda un Sestren, waut bleed sent ooda nich soo väl em Deenst gonen, nu dolla, daut et aun an fält un daut see methalpen kjennen. Daut halpt dee, em jeisteljen verauntokomen.”

16 Christus halpt ons uk em Denkj to hoolen, daut daut prädjen daut wichtichste Woakj es, waut nu oppe Ieed jedonen woat (läs Markus 13:10). Een niea Eltesta, waut André heet, haft aul emma vesocht, de niee Aunwiesungen von Jehova siene Organisazion notokomen. Hee sajcht: “Väl Breeda un Sestren, waut em Betel schauften, worden sestwua hanjeschekjt. Daut wiest ons, woo wichtich daut es, daut wie onse Krauft nu toom prädjen brucken sellen.”

ONS TRU VON CHRISTUS LEIDEN LOTEN

17-18. Wuarom sell wie doaräwa nodenkjen, woo ons de Endrungen aul togood jekomen sent, waut daut de lotre Tiet jeef?

17 De Aunwiesungen, waut wie von Jesus Christus, onsen Kjennich, kjrieen, halpen ons nu aul un uk lota. Doawäajen well wie doaräwa nodenkjen, woo ons daut togood kjemt, wan wie dee nokomen. Wie kunnen uk bie ons Famieljenstudium doavon räden, waut sikj bie onse Toopkomes un em Deenst jeendat haft un woo ons daut aul jeholpen haft.

Halpst du diene Famielje un aundre, wan daut Endrungen en Jehova siene Organisazion jeft? (See Varsch 17-18)

18 Wan wie em Denkj hoolen, daut et väl goodet brinjt, wan wie ons aun de  Aunwiesungen von Jehova siene Organisazion hoolen, dan woat daut leichta sennen, dee notokomen un wie woaren Freid doabie haben. Wie freien ons secha, daut doa väl Jelt jespoat woat, wäajen doa nich mea soo väl Bieekja jedrekjt woaren aus ea. Aul de niee Sachen, waut daut nu jeft, halpen ons de goode Norecht oppe gaunze Welt to vebreeden. Wan wie aun daut denkjen, dan woa wie de ellektroonische Bieekja, daut oppjeschnakte un de Videos secha noch mea brucken. Soo kjenn wie wiesen, daut wie Christus unjastetten, wiels hee well, daut wie daut rajcht brucken, waut de Organisazion ons jeft.

19. Wuarom sell wie ons von Christus leiden loten?

19 Wan wie ons von Christus leiden loten, dan stoakj wie onse Breeda em Gloowen un halpen dee, noch dolla veeent to woaren. André docht doaräwa no, daut väl Breeda un Sestren, waut em Betel wieren, sestwua hanjeschekjt worden, un säd: “Aus ekj daut sach, waut fa eene feine Enstalunk deejanje hauden, waut ea em Betel wieren, kjrieech ekj noch mea Respakjt fa dee un mea Vetruen opp Christus aus Leida. Dee hoolen sikj aun Jehova sienen himlischen Woagen un haben Freid bie jieda Oppgow, waut dee kjrieen.”

GLOOWEN HABEN UN OPP ONSEN LEIDA VETRUEN

20-21. (a) Wuarom kjenn wie opp onsen Leida Christus vetruen? (b) Waut woa wie en dän näakjsten Artikjel derchgonen?

20 Boolt woat ons Leida Jesus Christus “volstendich jewennen” un “Wunda utrechten” (Opb. 6:2, NW; Psa. 45:5). Oba hee moakt ons nu aul reed fa daut Läwen en de niee Welt un fa daut, waut wie doa doonen woaren. Doa woa wie dee lieren, waut vom Doot oppstonen, un methalpen de Ieed to een Paradies to moaken.

21 Wan wie opp onsen Leida un Kjennich vetruen, endoont waut doa oppkjemt, dan woat hee ons en de niee Welt nenleiden (läs Psalm 46:2-4). De Endrungen, waut daut vondoag dän Dach jeft, kjennen schwoa sennen, besonda wan wie doa nich met jeräakjent haben. Woo kjenn wie doawäajen ennalich Fräd haben un opp Jehova vetruen? Daut woa wie en dän näakjsten Artikjel seenen.

^ Varsch 8 Jeschichtsforscha fungen en de vekjeiwelde Staut Jericho een deel Jeträajd. Daut wiest, daut de Staut nich lang beloagat wort un daut doa noch Ätwoa wia, aus de Soldoten doa nenkjeemen. De Israeliten hauden nich Frieheit, irjentwaut von Jericho fa sikj to nämen, doawäajen wia daut de rajchte Tiet toom daut Launt ennämen, wiels daut wia de Arnttiet un doa wia een deel Jeträajd oppe Stapen (Jos. 5:10-12).

^ Varsch 11 See dän Kausten Paulus besteht demütig eine Prüfungem Wachtturm vom 15. Moaz 2003, S. 24.