Trigj nom Enhault

No de Enhaultslist gonen

 46. ARTIKJEL FA DAUT STUDIUM

Paust du no dienen Gloowen opp?

Paust du no dienen Gloowen opp?

“Nämt dän Gloowen aus eenen Schilt” (EFS. 6:16)

LEET 119 Wie motten Gloowen haben

WAUT WIE SEENEN WOAREN *

1-2. (a) Wuarom mott ons Gloowen no Efeesa 6:16 no soo sennen aus een grootet Schilt? (b) Waut woa wie nu seenen?

ES DIEN Gloowen soo aus een grootet Schilt? (Läs Efeesa 6:16.) Jo, secha. Soo aus een grootet Schilt meist dän gaunzen Kjarpa beschizt, soo beschizt dien Gloowen die en dise gottloose Welt fa daut schlajchte, orreine un grausome.

2 Oba wie läwen “en de latste Doag” un ons Gloowen woat emma wada aufjeprooft (2. Tim. 3:1). Woo kaust du dien Schilt, ooda dienen Gloowen, unjasieekjen toom seenen, aus dee stoakj es? Un woo kaust du dien Schilt fausthoolen? Daut woa wie nu seenen.

UNJASIEEKJ DIEN SCHILT GOOT

Nom Kjrich muaken de Soldoten äa Schilt wada foadich (See Varsch 3)

3. Waut deeden de Soldoten met äa Schilt, un wuarom?

3 En de Bibeltiet hauden de Soldoten foaken een Schilt, waut met Lada betrocken wia. Dee musten daut enschmurzen, daut daut Lada nich brosch wort un daut doa nuscht rostren kunn. Wan eenen Soldot sien Schilt Schoden jekjräajen haud, dan sach dee doano, daut et foadich jemoakt wort, daut hee emma reed wia toom kjamfen. Waut haft daut met onsen Gloowen to doonen?

4. (a) Wuarom mott wie onsen Gloowen unjasieekjen? (b) Woo kjenn wie onsen Gloowen unjasieekjen?

4 Krakjt soo aus de Soldoten ieeschtemma mott wie ons Schilt, ooda onsen Gloowen, uk pinkjlich unjasieekjen un no dän oppaussen, daut wie emma reed sent toom kjamfen. Wie sent en eenen jeisteljen Kjrich un motten biejlikj jäajen de beese Jeista kjamfen (Efs. 6:10-12). Kjeena kaun en onse Städ no ons Schilt, ooda onsen Gloowen, oppaussen.  Woo kjenn wie secha moaken, daut dee stoakj jenuach es fa Priefungen? Ieeschtens mott wie Gott no Help froagen. Dan mott wie sien Wuat brucken, daut wie ons soo seenen kjennen, aus hee ons sitt (Heb. 4:12). De Schreft sajcht: “Velot die opp däm HARN met dien gaunzet Hoat, un velot die nich opp dien ieejnet Vestaunt” (Spr. 3:5-6). Denkj doch mol aun eenje Entscheidungen, waut du en de latste Tiet muakst. Hautst du biejlikj Jeltsorjen? Dochst du dan aun Hebräa 13:5, wua Jehova vespruak: “Ekj woa die nich veloten, die nich em Stich loten”? Veleetst du die doaropp, daut Jehova die halpen wudd? Daut wiest, daut du fein no dien Schilt, ooda dienen Gloowen, oppaussen deist.

5. Waut woa wie woomäajlich en, wan wie onsen Gloowen unjasieekjen?

5 Wan wie onsen Gloowen goot unjasieekjen, dan wunda wie ons veleicht, daut wie Schwakheiten finjen, wua wie bat nu nuscht von jemoakjt haben. Woomäajlich woa wie en, daut ons Gloowen Schoden jekjräajen haft derch too väl Sorjen, Läajes ooda mootloos sennen. Woo kjenn wie onsen Gloowen dan beschitzen, daut dee nich noch mea Schoden kjricht?

PAUSS OPP FA TOO VÄL SORJEN, LÄAJES UN MOOTLOOS SENNEN

6. Waut vonne Sorjen sent goot?

6 Nich aule Sorjen sent schlajcht. Daut es biejlikj goot, wan wie doarom bekjemmat sent, daut Jehova un Jesus met ons tofräd sent (1. Kor. 7:32). Un wan wie schwoa jesindicht haben, dan sent wie doarom besorcht, daut wie daut wada met Gott gootmoaken kjennen (Psa. 38:19). Wie sent uk doarom todoonen, onsen Ehepoatna to jefaulen un onse Famielje un onse Gloowesbreeda bietostonen (1. Kor. 7:33; 2. Kor. 11:28).

7. Waut lieet Spricha 29:25 ons doaräwa, wuarom wie nich sellen Menschenforcht haben?

7 Oba wan wie ons too väl Sorjen moaken, dan kaun ons daut em Gloowen schoden. Wie kunnen ons biejlikj emmawajch sorjen, aus wie jenuach Äten un Kjleeda haben woaren (Mat. 6:31-32). Daut kaun ons bat doa brinjen, nom tieteljen hinjaraun to sennen ooda soogoa daut Jelt to leewen. Un wan daut soo wiet kjemt, dan woat ons Gloowen schwak woaren un wie woaren em jeisteljen grooten Schoden lieden (Mar. 4:19; 1. Tim. 6:10). Wie kunnen ons uk too väl Sorjen doaräwa moaken, waut aundre äwa ons denkjen. Dan hab wie veleicht jratre Angst fa Spott ooda Vefoljunk aus doafäa, Jehova ontru to woaren. Wie motten Jehova om Gloowen un om Moot prachren, daut wie en Priefungen tru bliewen un nich Menschenforcht haben (läs Spricha 29:25; Luk. 17:5).

(See Varsch 8) *

8. Waut sell wie doonen, wan se Läajes vetalen?

8 De Soton es “de Voda äwa aule Läajes” un hee brinjt deejanje, waut opp siene Sied sent, bat doa, daut dee Läajes vetalen äwa Jehova un äwa onse Breeda un Sestren (Joh. 8:44). Em Internet, äwa Tellewizhen un aundatwäajen vetalen biejlikj Aufjefolne Läajes äwa Jehova siene Organisazion ooda räden mau de haulwe Woarheit. Aul dit jehieet to dän Soton “siene brennende Feilen” (Efs. 6:16). Waut sell wie doonen, wan wie von soone Läajes enwoaren? Wie horchen ons dee nich aun! Wuarom nich? Wiels wie Jehova un onse Breeda vetruen. Wie wellen kjeenmol waut met Aufjefolne to doonen haben. Wie sent ons gaunz eenich, ons nienich met dee to unjahoolen, nich mol ut Nieschia.

9. Waut kaun daut aun ons doonen, wan wie mootloos sent?

9 Mootloos sennen kaun ons em Gloowen schwak moaken. Eenjemol sent wie  mootloos, wäajen wie Trubbels haben. Un daut wudd je uk nich goot sennen, wan wie bloos von dee wajchkjikjen wudden un doa nuscht met doonen. Oba wie sellen uk nich dän Tiet äwa bloos aun onse Trubbels denkjen. Sest kunn wie leicht von de wundascheene Hopninj vejäten, waut Jehova ons jejäft haft (Opb. 21:3-4). Wie wudden kjennen soo mootloos woaren, daut wie nich mea Krauft hauden un oppjeewen (Spr. 24:10NW). Oba daut brukt nich soo wiet komen.

10. Waut lieescht du von daut, waut eene Sesta schreef?

10 Well wie mol seenen, woo eene Sesta en de Stäts em Gloowen stoakj blift. See mott sikj om äaren Maun kjemren, waut schwoa krank es. En eenen Breef no de Hauptoffiz schreef see: “Eenjemol es daut sea schwoa un wie feelen ons mootloos, oba onse Hopninj blift stoakj. Ekj sie sea dankboa fa aules, waut Jehova ons jeft, om ons em Gloowen to stoakjen un Moot tootospräakjen. Daut fält ons werkjlich, daut wie Rot kjrieen un oppjemuntat woaren. Daut halpt ons, daut wie wiedamoaken kjennen un en de Proowen tru bliewen, waut de Fient äwa ons brinjt.” Von dise Sesta äare Wieed kjenn wie lieren, waut ons halpen kaun, wan wie mootloos sent. Waut es daut? Wan du schwoaret derchmoakst, dan denkj doaraun, daut de Soton die aufprooft. Velot die uk doaropp, daut Jehova die treesten woat. Un räakjen daut jeistelje Äten väl, waut hee ons jeft.

Deist du no dien Schilt, ooda dienen Gloowen, oppaussen? (See Varsch 11) *

11. Äwa waut sell wie nodenkjen, om to seenen, woo stoakj ons Gloowen es?

11 Wudd dien Gloowen en eenje Stekjen noch kjennen stoakja woaren? Hast du biejlikj en de latste poa Moonat kunt doafäa oppkomen, daut du die nich too väl Sorjen muakst? Hast du oppjepaust, daut du nich no Aufjefolne horchst ooda met dee äwa de Läajes rädsd, waut dee vebreeden? Un kust du doano seenen, daut du nich too mootloos wieescht? Wan jo, dan es dien Gloowen stoakj. Oba du motst doawäajen oppaussen, wäajen de Soton uk noch aundret brukt toom ons schoden. Well wie mol eenatlei von daut seenen.

 PAUSS OPP, DAUT DU NICH NO TIETELJET HINJARAUN BEST

12. Woo kaun daut utkomen, wan eena no tieteljet hinjaraun es?

12 Wan eena no tieteljet hinjaraun es, dan kaun eena sikj leicht auflenkjen loten, daut eena nich mea jenuach no sien Schilt, ooda sienen Gloowen, oppaust. De Apostel Paulus säd: “Een Soldot dee em Deenst beschafticht es, woat sikj daut nich noch drock moaken fa sien auldoagschet Läwen to sorjen, daut hee däm jefaulen kaun dee am aunjestalt haft” (2. Tim. 2:4). De reemische Soldoten wia daut aufjesajcht, biesied noch waut to schaufen. Waut haud kunt passieren, wan een Soldot doa nich no jehorcht haud?

13. Wuarom schauften de Soldoten nich biesied noch waut?

13 Stal die mol eene Grupp Soldoten väa, waut zemorjes met äare Schwieets eewen. Oba een Soldot es doa nich, wäajen hee doamet drock es, en de Staut Äten to vekjeepen. No Meddach unjasieekjen de aundre Soldoten äa Kjrichsjereetschoft un schoapen äare Schwieets, oba dee Soldot, waut doa vekjeepen deed, moakt daut Äten reed, waut hee dän näakjsten Dach vekjeepen well. Oba dän näakjsten Dach zemorjes komen doa onverhofs Fiend jäajen an. Waut jleefst du, wäa woat reed sennen toom kjamfen un met wäm woat de Väaschta tofräd sennen? Un met wäm toop wurscht du leewa wellen kjamfen? Met eenen Soldot, waut fein reed es, ooda met eenen, waut bloos met sestwaut drock wia?

14. Waut es ons aus Christus siene Soldoten wichtich?

14 Soo aus de goode Soldoten lot wie ons nich auflenkjen. Fa ons es daut daut wichtichste, daut onse Väaschte Jehova un Jesus Christus met ons tofräd sent. Daut es ons mea wieet aus aules, waut dän Soton siene Welt auntobeeden haft. Wie paussen emma opp, daut wie jenuach Tiet un Krauft haben, om Jehova to deenen un om onsen Gloowen un daut äwaje von ons jeisteljet Kjrichsjereetschoft goot en Ordninj to hoolen.

15. Fa waut woarnd de Apostel Paulus ons, un wuarom?

15 Wuarom mott wie emma waka bliewen? Soo aus de Apostel Paulus säd, wieren  soone, waut doa wullen “rikj woaren”, “doaderch vom Gloowen aufjeert” (1. Tim. 6:9-10). Daut dee “aufjeert” sent, jeft auntovestonen, daut wie ons uk leicht kjennen auflenkjen loten, wan wie no tietelje Sachen hinjaraun sent, waut ons nich werkjlich fälen. Dan lot wie schlajchte Wenschen un “onsennje Lesten” en ons Hoat oppkomen. Toom dit väabieejen well wie emma em Denkj hoolen, daut de Soton soone Wenschen brukt, om ons em Gloowen to schoden.

16. Äwa woone Froagen sell wie nodenkjen, wan wie aun de Jeschicht en Markus 10:17-22 denkjen?

16 Veleicht hab wie riew un kjennen ons väl kjeepen. Wudd daut dan orrajcht sennen, ons Sachen to kjeepen, waut ons nich werkjlich fälen, oba bloos jankren? Nä, daut wudd nich. Oba wie wudden sellen äwa de Froagen nodenkjen: “Hab wie werkjlich de Tiet un de Krauft, daut to brucken un to unjahoolen, wan wie ons daut uk kjeepen kjennen? Kunnen de tietelje Sachen ons met eemol too väl wieet woaren? Kunn wie dee soo väl räakjnen, daut ons daut soo gonen wudd aus dän jungen Maun, waut no Jesus kjeem, oba waut nich reed wia, mea fa Gott to doonen?” (Läs Markus 10:17-22.) Daut es väl bäta, wan wie een eefachet Läwen fieren un onse wieetvolle Tiet un Krauft brucken, om Gott sienen Wellen to doonen!

 HOOL DIEN SCHILT EMMA FAUST

17. Wua sell wie emma aun denkjen?

17 Wie motten emma doaraun denkjen, daut wie em Kjrich sent un jieda Dach reed sennen motten toom kjamfen (Opb. 12:17). Onse Breeda un Sestren kjennen nich ons Schilt droagen. Wie motten daut selfst fausthoolen, aulsoo doano seenen, daut ons Gloowen stoakj blift.

18. Wuarom hilden de ieeschtemmasche Soldoten äa Schilt emma faust?

18 Ieeschtemma worden de Soldoten jeieet, wan dee em Kjrich äwanäment wieren. Oba dee schämden sikj, wan see onen Schilt vom Kjrich trigjkjeemen. De reemischa Jeschichtsforscha Tacitus schreef: “De jratste Schaund wia, wan eena sien Schilt tochleet.” Daut es een Grunt, wuarom de Soldoten äa Schilt emma fausthilden.

Eene Sesta helt äa Schilt gaunz faust: Dee deit bäden un en Gott sien Wuat läsen, wankt pinkjlich no de Toopkomes un es flietich em Deenst (See Varsch 19)

19. Waut woat ons halpen, ons Schilt emma fausttohoolen?

19 Wie hoolen ons Schilt, ooda onsen Gloowen, faust, wan wie pinkjlich no onse Toopkomes wanken un met aundre von Jehova sienen Nomen un von sien Kjennichrikj räden (Heb. 10:23-25). Wie läsen uk jieda Dach Gott sien Wuat un bäden to Jehova, daut hee ons halpt, daut emma notokomen (2. Tim. 3:16-17). Dan kaun de Soton ons nuscht aundoonen, waut ons fa emma schoden woat (Jes. 54:17). Ons Gloowen woat ons soo beschitzen aus een grootet Schilt. Wie woaren fauststonen un äwanäment met onse Breeda un Sestren toopschaufen. Un wie woaren jieda Dach onsen Kaumf jewennen. Oba daut wichtichste es, daut wie dan uk lota kjennen opp Jesus siene Sied sennen, wan hee dän Kjrich jäajen dän Soton un siene Helpa jewennen woat (Opb. 17:14; 20:10).

LEET 71 Wie kjamfen fa Jehova

^ Varsch 5 De Soldoten hauden een Schilt, waut dee beschizt. Ons Gloowen es biejlikj soo aus een Schilt. Krakjt soo aus een Soldot no sien Schilt oppaussen must, mott wie no onsen Gloowen oppaussen. En disen Artikjel woa wie doavon räden, waut wie doonen kjennen, daut ons Schilt, ooda Gloowen, stoakj blift.

^ Varsch 58 BILTBESCHRIEWUNK: Eene Famielje von Jehova siene Zeijen switschen fuaz daut Tellewizhen ut, wiels doa waut von Aufjefolne väakjemt, waut Läajes äwa Jehova siene Zeijen vetalen.

^ Varsch 60 BILTBESCHRIEWUNK: Lota haben see Famieljenstudium un de Voda brukt waut ut de Schreft toom siene Famielje em Gloowen stoakjen.