Trigj nom Enhault

No de Enhaultslist gonen

Woo steit daut met dien denkjen?

Woo steit daut met dien denkjen?

“Stalt junt nich soo han aus dise Welt deit” (REEM. 12:2)

LEEDA: 88, 45

1-2. (a) Waut vonne Auntwuat jeef Jesus Petrus? (See daut Bilt aum Aunfank.) (b) Wuarom säd Jesus daut?

DE Jinja kunnen daut nich jleewen, aus Jesus säd, daut hee boolt wudd lieden un stoawen motten. See hauden jedocht, daut dee wada wudd Israel äa Kjennichrikj oppstalen. De Apostel Petrus säd fuaz to am: “Gott bewoa die! Soowaut saul die nie passieren!” Jesus auntwuad am un säd: “Soton, see daut du wajch kjemst. Du steist mie em Stich! Du denkjst nich soo aus Gott, oba soo aus Menschen” (Mat. 16:21-23; Apj. 1:6).

2 Met dee Wieed muak Jesus kloa, daut Gott gaunz aundasch denkjt aus dise Welt, waut en dän Soton siene Macht es (1. Joh. 5:19). Petrus docht soo aus de Menschen von de Welt, un rod Jesus too, bloos aun sikj to denkjen. Oba Jesus wist, daut Jehova wull, daut hee sikj doaropp reedmuak, daut hee boolt lieden un stoawen wudd. Un daut, waut Jesus to Petrus säd, wiest, daut Jesus soo docht aus Jehova un nich soo aus de Welt.

3. Wuarom es daut nich leicht, de Welt äa denkjen tochtoloten un soo to denkjen aus Jehova?

3 Woo steit daut met ons? Denkj wie soo aus Gott ooda soo  aus de Welt? Aus Christen strenj wie ons aun, daut to doonen, waut Gott haben well. Oba woo steit daut met ons denkjen? Bemieej wie ons, soo to denkjen aus Jehova un daut fa rajcht to talen, waut hee fa rajcht talt? Doatoo mott wie ons aunstrenjen. Oba wie brucken ons nich aunstrenjen, soo to denkjen aus de Welt, wäajen de Welt äa Jeist emma rom ons es (Efs. 2:2). Un de Menschen en de Welt roden ons uk foaken too, daut wie aun ons selfst denkjen sellen, un daut kaun väl aun ons doonen. Daut haft opp iernst waut opp sikj, soo to denkjen aus Jehova, oba daut es sea eefach, soo to denkjen aus de Welt.

4. (a) Woo kaun daut utkomen, wan wie ons met de Welt äa denkjen aufjäwen? (b) Woo woat dis Artikjel ons halpen?

4 Wan wie ons met de Welt äa denkjen aufjäwen, kjenn wie leicht aunfangen, bloos noch aun ons to denkjen un selfst entscheiden to wellen, waut rajcht ooda orrajcht es (Mar. 7:21-22). Doawäajen mott wie lieren, “soo aus Gott” to denkjen un nich “soo aus Menschen”. Dis Artikjel woat ons doabie halpen. Wie woaren eenjet derchgonen, waut ons wiest, daut daut goot fa ons es, soo to denkjen aus Jehova. Daut nemt ons nich de Frieheit wajch. Wie woaren uk lieren, woo wie daut väabieejen kjennen, daut wie nich soo denkjen aus de Welt. En dän näakjsten Artikjel woa wie dan seenen, woo Jehova äwa eenje Sachen denkjt un woo wie lieren kjennen, uk soo to denkjen aus hee.

JEHOVA SIEN DENKJEN ES GOOT FA ONS

5. Wuarom wellen eenje sikj nich loten von aundre väasajen?

5 Eenje Menschen wellen nich, daut irjentwäa an väasajcht, woo see denkjen sellen. Dee sajen: “Ekj denkj soo, aus ekj well.” Doamet wellen dee woomäajlich sajen, daut see fa sikj selfst entscheiden wellen un daut see uk daut Rajcht haben, daut to doonen. See wellen sikj nich foaren loten von aundre un uk nich soo sennen aus aule aundre. *

6. (a) Woone Frieheit lat Jehova ons? (b) Hab wie en aule Stekjen Frieheit?

6 Wan wie soo denkjen aus Jehova, dan meent daut nich, daut wie verheipts nuscht selfst entscheiden kjennen. En 2. Korinta 3:17 (NW) sajcht daut: “Wua Jehova sien Jeist es, doa es Frieheit.” Jehova velangt nich von ons, daut wie aula krakjt äwareen sent. Hee haft ons soo jemoakt, daut wie ons selfst utsieekjen kjennen, waut ons intressieet ooda scheen jeit. Oba wie haben nich en aule Stekjen Frieheit (läs 1. Petrus 2:16). Wan wie entscheiden motten, aus irjentwaut rajcht ooda orrajcht es, dan well Jehova haben, daut wie ons no sien Wuat rechten toom seenen, woo hee äwa de Sach denkjt. Nemt ons daut de Frieheit wajch ooda es daut goot fa ons?

7-8. Wuarom nemt ons daut nich de Frieheit wajch, wan wie soo denkjen sellen aus Jehova? Saj, met waut daut to vejlikjen jeit.

7 See wie mol, met waut daut to vejlikjen jeit. Elren proowen jeweenlich, äare Kjinja soo to lieren, daut dee lota goode Menschen woaren. Dee lieren dee veleicht, opprechtich un flietich un om aundre bekjemmat to sennen. Daut nemt de Kjinja nich de Frieheit wajch. Enne Städ daut moakt dee daut reed, daut dee lota kjennen een tofrädnet Läwen haben. Wan  de Kjinja ieescht groot sent un von tus gonen, dan haben dee selfst äare Wellen. Wan dee daut nokomen, waut de Elren an jelieet haben, dan woat dee daut halpen, sikj soo to entscheiden, daut see daut lota nich beschoden motten, un sikj väl Trubbels un Sorjen to spoaren.

8 Soo aus goode Elren well Jehova, daut siene Kjinja daut baste Läwen haben (Jes. 48:17-18). Doawäajen jeft hee ons jewesse Gruntsauzen, woo wie läwen un met aundre omgonen sellen. Hee well haben, daut wie en soone Stekjen soo denkjen aus hee un daut wie daut fa rajcht talen, waut hee fa rajcht talt. Daut nemt ons nich de Frieheit wajch, oba daut halpt ons, mea Weisheit to kjrieen un bätre Entscheidungen to trafen (Psa. 92:6; Spr. 2:1-5; Jes. 55:9). Jehova well ons halpen, daut wie opp iernst kjennen schaftich sennen, oba hee sajcht ons nich en aule Stekjen väa (Psa. 1:2-3). Soo to denkjen aus Jehova es werkjlich sea goot fa ons!

JEHOVA SIEN DENKJEN ES HECHA

9-10. Waut wiest, daut Jehova sien denkjen hecha es aus de Welt äat?

9 Een aundra Grunt, wuarom wie soo denkjen wellen aus Jehova, es, wiels sien denkjen väl hecha es aus de Welt äat. En de Welt kjricht eena väl Rot, woo eena läwen saul, woo eena eene schaftje Famielje haben kaun, eene goode Oabeit un aundret. Väl von daut paust nich met Jehova sien denkjen toop. Toom Biespel sajen se foaken, eena saul bloos fa sikj strieden ooda veschiedne Sorten Huararie nich fa schlajcht talen. Eenjemol sajen se uk, Befriede sellen wäajen irjenteene Uasoak uteneengonen ooda sikj scheeden loten, wan see jleewen, daut an daut schaftja moakt. Soon Rot stemt nich met de Schreft. Oba wudd eenjet von daut ons doawäajen bäta halpen kjennen aus de Schreft äa Rot?

10 Jesus säd: “De Weisheit [rajchtfoadicht] sikj derch daut waut see deit” (Mat. 11:19). De Welt woat emma foadja, oba de Menschen kjennen nich een Enj moaken met dee Trubbels, waut de Menschen daut mieeschte toosaten, biejlikj Kjrich, Raussenstolt un Jesazloosichkjeit. Un foaken talen dee uk Huararie nich fa schlajcht. Oba väle sent enjeworden, daut soont Famieljes uteneenritt un Krankheiten un aundre Trubbels veuasoakt. Oba Christen, waut soo denkjen aus Jehova, haben een scheenret Famieljenläwen, sent jesunda un woaren fein foadich met äare Gloowesbreeda oppe gaunze Welt (Jes. 2:4; Apj. 10:34-35; 1. Kor. 6:9-11). Wiest daut nich, daut Jehova sien denkjen hecha es aus de Welt äat?

11. (a) No wäm sien denkjen recht Moses sikj? (b) Woo kjeem daut ut?

11 Jehova siene true Deena von de Bibeltiet wisten, daut siene Weisheit hecha wia. Moses biejlikj “wort de Ägipta äare Weisheit aula jelieet”, oba hee wist, daut “een weiset Hoat” von Gott kjeem (Apj. 7:22; Psa. 90:12, Friesenbibel). Hee bäd to Jehova: “Lot mie . . . weeten, waut diene Wäaj sent” (2. Mo. 33:13). Moses lieed, soo to denkjen aus Jehova, un doawäajen brukt Jehova dän opp eene besondre Wajch toom sienen Wellen doonen un ieed am doaderch, daut hee daut en de Schreft nenschriewen leet, waut von stoakjen Gloowen dee haud (Heb. 11:24-27).

12. No waut recht de Apostel Paulus sikj?

12 De Apostel Paulus wia kluak un sea jelieet un kunn oppet weinichste twee Sproaken (Apj. 5:34; 21:37, 39; 22:2-3). Oba wan hee entscheiden must, aus jewesse Sachen rajcht ooda orrajcht wieren, recht hee sikj nich no de Welt äare  Weisheit, oba no Gott sien Wuat (läs Aposteljeschicht 17:2; 1. Korinta 2:6-7, 13). Doawäajen brocht Paulus en sienen Deenst väl tostaund un kunn sikj to eene eewje Beloonunk freien (2. Tim. 4:8).

13. Wäa haft de Veauntwuatunk, doaropp to schaufen, daut wie soo denkjen aus Jehova?

13 Daut es kloa to seenen, daut Gott sien denkjen hecha es aus dise Welt äat. Wan wie soo läwen, aus hee daut fa rajcht talt, dan woa wie opp iernst schaftich un tofräd sennen. Oba Jehova bemott ons nich, soo to denkjen aus hee. Un “de trua, weisa Kjnajcht” un de Eltestasch doonen daut uk nich (Mat. 24:45; 2. Kor. 1:24). Jieda Christ mott selfst doaropp schaufen, daut sien denkjen soo es aus Jehova sient. Woo kjenn wie daut doonen?

NICH SOO DENKJEN AUS DISE WELT

14-15. (a) Äwa waut mott wie nodenkjen, daut wie soo denkjen kjennen aus Jehova? (b) Wuarom sell wie ons nich met weltelje Iedeeen aufjäwen? Met waut jeit daut to vejlikjen?

14 Reema 12:2 sajcht: “Stalt junt nich soo han aus dise Welt deit. Jie sellen derch june niee Jesennunk veendat woaren, daut jie weeten kjennen, waut Gott sien Wellen, waut goot, aunjenäm un volkomen es.” Dise Wieed wiesen, daut wie daut lieren kjennen, dolla soo to denkjen aus Gott, wan wie veleicht uk aundasch jedocht haben, ea wie de Woarheit kjanden. Daut es soo, daut daut, waut wie metjeorwen ooda beläft haben, waut aun ons deit, oba daut es doawäajen mäajlich, ons denkjen to endren. Woo ons denkjen es haft väl doamet to doonen, äwa waut wie nodenkjen. Wan wie ons met Jehova siene Jedanken aufjäwen, dan woa wie enwoaren, daut hee emma em rajchten es. Un dan woa wie emma dolla wellen soo denkjen aus hee.

15 Daut wie lieren kjennen, soo to denkjen aus Jehova, mott wie opphieren, ons “soo han[tostalen] aus dise Welt deit”. Wie motten opphieren, ons met soone Iedeeen auftojäwen, waut nich met daut tooppaussen, waut Gott fa rajcht talt. Well wie mol een Biespel seenen, waut ons wiest, woo wichtich daut es. Veleicht well eena jesunda äten, wäajen daut goot fa de Jesuntheit es. Oba daut wudd nich väl halpen, wan eena doawäajen uk foaken soont eet, waut aul schlajcht jeworden wia. Biejlikj soo wudd ons daut nich väl halpen, wan wie ons met Jehova sien denkjen aufjeewen, oba to deeselwje Tiet uk met weltelje Iedeeen.

16. Waut mott wie doonen toom ons fa de Welt äa denkjen schitzen?

16 Kjenn wie daut weltelje denkjen gaunz utem Stich gonen? Nä, wiels wie motten en dise Welt läwen (1. Kor. 5:9-10). Mau rajcht wan wie prädjen, woa wie eenjemol orrajchte Iedeeen hieren. Wie kjennen dee nich gaunz utem Stich gonen, oba doawäajen mott wie nich emma doaräwa nodenkjen ooda dee aunnämen. Krakjt soo aus Jesus sell wie soone Iedeeen, waut dän Soton siene Welt ons enbillen well, fuaz tosied schuwen. Un wie kjennen uk oppaussen, daut wie ons nich onneedich met de Welt äa denkjen aufjäwen (läs Spricha 4:23).

17. Waut kjenn wie doonen, daut wie ons nich onneedich met de Welt äa denkjen aufjäwen?

17 Wie sellen biejlikj oppaussen, wäm wie ons aus goode Frind utwälen. De Schreft sajcht, wan wie väl met soone toop sent, waut nich Jehova deenen, dan woa wie aunfangen, soo to denkjen aus dee (Spr. 13:20; 1. Kor. 15:12, 32-33). Wie sellen uk oppaussen, waut fa Tietvedrief wie haben. Wan wie Tietvedrief tochloten, waut de Ewoluzion, Grausomkjeit ooda een orreinet Läwen fa goot hanstalt, dan kjenn wie daut väabieejen,  daut ons denkjen nich met Iedeeen enjeschwient woat, waut jäajen de “Erkjantnes fonn Gott” sent (2. Kor. 10:5, Reimerbibel).

Halp wie onse Kjinja, schlajchten Tietvedrief tochtoloten? (See Varsch 18-19)

18-19. (a) Wuarom mott wie oppaussen, daut wie ons nich met weltelje Iedeeen aufjäwen, onen daut wie daut soo rajcht enwoaren? (b) Waut sell wie äwalajen? (c) Wuarom sell wie daut äwalajen?

18 Wie motten uk oppaussen, daut wie ons nich met weltelje Iedeeen aufjäwen, onen daut wie daut soo rajcht enwoaren. Biejlikj jeft daut Norechten, waut soo toopjestalt sent, daut dee eene jewesse polietische Iedee unjastetten. Un daut jeft uk aundre Jeschichten, waut ons Sachen enjankren, wua de Welt no hinjaraun es. Un eenje Films un Bieekja wiesen, daut eena daut ieeschte aun sikj selfst ooda aun siene Famielje denkjen saul un daut daut kluak, goot un rajcht es, wan eena daut deit. Oba daut paust nich met de Schreft toop. De Schreft sajcht, daut wie un onse Famielje dan schaftich sent, wan wie Jehova dolla leewen aus aulet aundre (Mat. 22:36-39). Un daut jeft uk Jeschichten fa Kjinja, waut mau jrodsoo goanich soo schlajcht sent, oba wua de Kjinja sikj soo bie sacht to soont wanen, waut Jehova nich fa rajcht talt.

19 Daut bediet nich, daut daut orrajcht es, gooden Tietvedrief to haben. Oba doawäajen es daut goot, wan wie äwalajen: “Woa ekj daut en, wan mie de Welt äare Iedeeen enjejankat woaren, wan daut uk nich jlikjtoo es? Schitz ekj mie un miene Kjinja fa jewesse Programs em Tellewizhen ooda Bieekja? Halp ekj miene Kjinja soo to denkjen aus Jehova, daut dee nich daut aunnämen, waut see en de Welt seenen ooda hieren?” Wan wie dän Unjascheet kjanen tweschen Gott sien denkjen un de Welt äat, dan kjenn wie daut väabieejen, daut wie ons “nich soo han[stalen] aus dise Welt deit”.

NO WÄM RECHST DU DIE?

20. Waut brinjt daut bat doa, daut eena sikj no de Welt äa denkjen ooda no Gott sient recht?

20 Wie motten em Denkj hoolen, daut aules, waut wie hieren un seenen, entwäda von Jehova kjemt ooda von de Welt, waut en dän Soton siene Macht es. No wäm recht wie ons? Daut es doano, met waut vonne Iedeeen wie ons aufjäwen. Wan wie ons met de Welt äare Iedeeen aufjäwen, dan woa wie aunfangen soo to denkjen un to haundlen aus de mieeschte Menschen en de Welt. Doawäajen mott wie sea oppaussen, waut wie kjikjen, läsen, horchen un äwa waut wie nodenkjen.

21. Waut woa wie en dän näakjsten Artikjel lieren?

21 En disen Artikjel hab wie jelieet, woo wie kjennen soo denkjen aus Jehova. Doatoo mott wie mea doonen aus bloos de schlajchte Iedeeen utem Stich gonen. Wie motten uk äwa Gott siene Jedanken nodenkjen, daut wie emma dolla soo denkjen aus hee. Un en dän näakjsten Artikjel woa wie noch mea doaräwa lieren.

^ Varsch 5 En Werkjlichkjeit rechten mau rajcht soone Menschen sikj en jewesse Stekjen no aundre, waut emma äaren ieejnen Wajch gonen wellen. Dee doonen daut biejlikj, wan dee äwa soone groote Sachen nodenkjen, aus von wua daut Läwen häakjemt, ooda wan dee soone kjliene Sachen entscheiden, aus waut see sikj auntrakjen wellen. Oba jieda eena kaun utwälen, no wäm dee sikj rechten well.