Trigj nom Enhault

No de Enhaultslist gonen

“Veschauf die Woarheit un lot dee nich loos”

“Veschauf die Woarheit un lot dee nich loos”

“Veschauf die Woarheit un lot dee nich loos; besorj die uk Weisheit, Belierunk un Vestentnis” (SPR. 23:23)

LEEDA: 88, 97

1-2. (a) Waut es daut wieetvolste en ons Läwen? (b) Woone Glooweslieren sent ons väl wieet? (See de Bilda aum Aunfank.) (c) Wuarom sent ons dee soo väl wieet?

WAUT es daut wieetvolste en dien Läwen? Fa ons aus Jehova siene Deena es daut daut wieetvolste, daut wie kjennen met am Frind sennen. Wie wudden daut fa nuscht vetuschen. Wie räakjnen uk de Woarheit ut de Schreft sea väl, wiels wan wie dee nich hauden kjanen jelieet, dan haud wie nich kunt Frind met onsen himlischen Voda woaren (Kol. 1:9-10).

2 Jehova es een feina Liera un lieet ons derch sien Wuat sea väl. Hee lat ons de Woarheit weeten äwa sienen besondren Nomen un äwa siene goode Ieejenschoften. Un hee sajcht ons, daut hee ons soo sea leeft, daut hee sienen leewen Sän fa ons jeef. Jehova lieet ons uk von sien Kjennichrikj met dän Messias aus Kjennich un jeft de Jesaulwde de Hopninj, lota em Himmel to läwen, un de “aundre Schop” de Hopninj, noch mol em Paradies oppe Ieed to läwen (Joh. 10:16). Hee lieet ons, woo wie läwen sellen. Aul dise Lieren sent fa ons sea wieetvoll, wiels derch dee  kjenn wie onsen Schepfa noda komen un eenen Senn em Läwen haben.

3. Well Jehova, daut wie Jelt betolen toom de Woarheit kjanen lieren? Laj daut ut.

3 Jehova es een friejäwaja Gott. Hee jeef mau rajcht sienen ieejnen Sän fa ons. Wan Jehova daut sitt, daut wäa no de Woarheit sieekjt, dan halpt dee dän uk, dee to finjen. Hee well nich, daut wie betolen motten toom dee kjanen lieren. Een Maun, waut Simon heet, wull dän Apostel Petrus mol Jelt betolen, daut hee uk de Krauft kjrieech, aundre dän heiljen Jeist to jäwen. Petrus wees dän fuaz, daut daut orrajcht wia, un säd: “Muchst du met dien Jelt toop vedaumt woaren, wiels du dochst, daut Gott siene Gow kunn met Jelt jekoft woaren” (Apj. 8:18-20).

WAUT BEDIET DAUT, SIKJ DE WOARHEIT TO VESCHAUFEN?

4. Waut woa wie en disen Artikjel lieren?

4 Läs Spricha 23:23. Wie motten ons aunstrenjen toom de Woarheit ut Gott sien Wuat finjen un uk reed sennen, aundre Sachen fa dee opptojäwen. Un soo aus daut en Spricha sajcht, mott wie oppaussen, daut wie dee nich wada loosloten, wan wie ons dee veschauft haben. Well wie mol seenen, waut daut meent, ons de Woarheit to veschaufen un waut wie veleicht doafäa jäwen motten. Daut woat ons halpen, daut wie dee noch väl mea räakjnen un daut wie ons gaunz eenich sent, dee nich loostoloten. Wie woaren uk lieren, wuarom de Woarheit von Jehova väl mea wieet es aus irjent sestwaut.

5-6. (a) Woo kjenn wie ons onen Jelt de Woarheit veschaufen, ooda kjeepen? Met waut jeit daut to vejlikjen? (b) Woo kjemt de Woarheit ons togood?

5 Mau rajcht, wan waut emsonst es, mott eena doawäajen veleicht waut doonen toom daut kjrieen. Daut hebräische Wuat, waut en Spricha 23:23 met “veschaufen” äwasat es, kaun uk “kjeepen” bedieden. De beid Wieed jäwen auntovestonen, daut eena sikj aunstrenjt ooda waut oppjeft toom sikj waut wieetvollet veschaufen. Woo kjenn wie ons de Woarheit veschaufen? Saj wie mol, bie een Stua jäwen se Bananen wajch. Wudden dee dan von veselfst bat opp onsen Desch komen? Nä. Wie motten ons dee ieescht vom Stua holen. Sent de Bananen emsonst? Jo, oba wie motten ons doawäajen aunstrenjen un Tiet nämen toom dee holen. Biejlikj soo bruck wie nich Jelt toom de Woarheit kjanen lieren, oba wie motten ons doawäajen aunstrenjen.

6 Läs Jesaja 55:1-3. Waut Jehova von Jesaja oppschriewen leet, halpt ons noch bäta to vestonen, waut daut meent, sikj de Woarheit to veschaufen. Doa vejlikjt Jehova sien Wuat met Wota, Malkj un Wien. De Woarheit ut sien Wuat frescht ons soo opp aus koldet Wota. Un dee stoakjt ons uk un halpt ons, em jeisteljen to waussen, soo aus Malkj de Kjinja halpt stoakja to woaren. Jehova sien Wuat es uk soo aus Wien. Wuarom? Wäajen de Schreft sajcht, daut Wien de Menschen froo moakt (Psa. 104:15). Wan Jehova to ons sajcht: “Kjeept Wien”, dan wiest ons daut, daut wie froo un schaftich sennen woaren, wan wie no sien Wuat läwen (Psa. 19:9). Jehova brukt dise Biespels, daut wie vestonen kjennen, woo goot daut utkjemt, wan wie de Woarheit kjanen lieren un doano läwen. Oba wie motten ons aunstrenjen toom ons dee veschaufen. Well wie mol fief Sachen seenen, waut wie doafäa veleicht oppjäwen motten.

 WAUT HAST DU FA DE WOARHEIT OPPJEJÄFT?

7-8. (a) Wuarom brukt daut Tiet, de Woarheit kjanen to lieren? (b) Waut wia eene junge Fru reed to doonen? (c) Woo kjeem daut met ar ut?

7 Tiet. Daut brukt Tiet, no de Norecht vom Kjennichrikj to horchen, de Schreft un biblische Bieekja to läsen, fa ons selfst to studieren un ons fa de Toopkomes reedtomoaken un doa hantowanken. Toom daut aula nokomen, mott wie de Tiet utnutzen, aulsoo Sachen tochloten, waut nich soo wichtich sent (läs Efeesa 5:15-16). Woo lang dieet daut, de wichtichste Lieren ut de Schreft kjanen to lieren? Daut es nich bie aulem äwareen. Un wie woaren emma kjennen noch mea lieren äwa Jehova siene Weisheit, siene Wäaj un siene Woakjen (Reem. 11:33). De ieeschta enjlischa Woaktorm, waut rutkjeem, vejlikjt de Woarheit met “een eefachet kjlienet Bloomkje” un säd: “Sieekj die nich bloos eene Bloom von de Woarheit. Wan eene toorieekjen wudd, dan wudd daut nich noch mea von dee jäwen. Sieekj die emma mea un hia nich opp doamet.” Wie wudden kjennen äwalajen: “Woo väl hab ekj aul von Jehova jelieet?” Wie woaren eewich kjennen mea von am lieren. Vondoag dän Dach mott wie onse Tiet goot utnutzen toom soo väl aus mäajlich von de Woarheit lieren. Well wie mol een Biespel seenen von wäm, waut daut deed.

8 Eene junge Fru von Jaupaun, waut Mariko * heet, kjeem no New York City en de Stäts toom sikj doa en eene School utlieren loten. Eenen Dach kjeem eene Pionia-Sesta no äa Hus un räd met ar äwa de goode Norecht. Mariko jehieed aul to eenen Gloowen, oba doawäajen wia see envestonen, daut de Sesta met ar de Bibel studieed. See jleicht daut soo sea, waut see lieed, daut see fruach, aus see tweemol de Wäakj studieren kunnen. Mariko wia sea drock met äare School un must uk noch schaufen, oba doawäajen funk see fuaz aun, no de Toopkomes to wanken. Un daut see mea Tiet haud, von Jehova to lieren, neem see sikj weinja Tiet toom Scheengonen haben. Aul daut holp ar, em jeisteljen bosich verauntokomen, un benna een Joa leet see sikj deepen. Aune 2006, mau sas Moonat lota, wort see Pionia un daut es see noch emma.

9-10. (a) Waut kaun daut doaraun doonen, woo wie äwa tietelje Sachen denkjen, wan wie de Woarheit kjanen lieren? (b) Waut jeef eene junge Fru opp? (c) Woo denkjt see doaräwa?

9 Tietelje Sachen. Toom de Woarheit kjanen lieren mott eena eenjemol eene Oabeit oppjäwen, wua eena kaun väl vedeenen ooda sea bekaunt woaren. Aus Jesus to de Fescha Petrus un Andreas säd, see sullen “Menschenfescha” woaren, veleeten see äa Nat (Mat. 4:18-20). Doamet es nich jesajcht, daut eena siene Oabeit tochloten mott, wan eena de Woarheit kjanen lieet. Eena mott je schaufen un fa siene Famielje sorjen (1. Tim. 5:8). Oba wan Menschen de Woarheit kjanen lieren, dan motten dee foaken äa denkjen äwa tietelje Sachen endren un lieren, waut em Läwen daut ieeschte komen saul. Jesus säd gaunz kloa: “Saumelt junt nich Schaza oppe Ieed, . . . oba saumelt junt Schaza em Himmel” (Mat. 6:19-20). See wie mol, waut eene junge Fru deed, waut Maria heet.

10 Maria späld aul Golf, ea see aunfunk, no de School to gonen. See eewd emma wieda un en äare latste Schooljoaren vestunt see daut soo fein, daut see kunn no eene Uniwersität gonen. See jleicht Golf spälen soo sea, daut see doamet äa Läwen moaken wull un een deel Jelt vedeenen.  Dan funk Maria aun de Bibel to studieren un see jleicht daut sea, waut see lieed. See säd: “Je dolla ekj mie no de Schreft recht, je schaftja wort ekj.” Maria wort en, daut see nich no daut jeistelje un no daut Rikjtum tojlikj sträwen kunn (Mat. 6:24). Doawäajen wort see sikj eenich, daut see nu nich mea doaropp schaufen wull, met Golf spälen rikj un bekaunt to woaren. Maria es nu Pionia un sajcht, see haft “daut baste Läwen un es sea schaftich”.

11. Waut kaun met onse Frind un Frintschoft passieren, wan wie de Woarheit kjanen lieren?

11 Frind un Frintschoft. Wan wie soo läwen wellen, aus de Schreft daut sajcht, dan es daut met onse Frind ooda Frintschoft veleicht nich mea soo aus ea. Wuarom? Jesus fruach en een Jebäd fa siene Nofolja: “Heilj an en de Woarheit, dien Wuat es de Woarheit” (Joh. 17:17). “Wäm heiljen” kaun uk bedieden “wäm oppoat saten”. Wan wie aunfangen, no de Woarheit to läwen, dan sat ons daut oppoat von de Welt, wäajen wie nich mea soo läwen aus dee. Wie bemieejen ons wieda, daut wie met onse Frind un Frintschoft fein foadich woaren, oba eenje räakjnen ons veleicht nich mea soo väl aus ea un sent mau rajcht jäajen onsen nieen Gloowen. Daut wundat ons uk nich, wäajen Jesus säd: “Een Mensch siene Fiend woaren ut sien ieejnet Hushault sennen” (Mat. 10:36). Oba Jesus vespruak uk, daut wie väl mea trigjkjrieen wudden, aus waut wie wäajen de Woarheit oppjäwen wudden (läs Markus 10:28-30).

12. Waut must een judischa Maun fa de Woarheit oppjäwen?

12 Eenen judischen Maun, waut Aaron heet, hauden se von junk aun jelieet, daut Gott sien Nomen nich jesajcht must. Oba Aaron wull de Woarheit äwa Gott weeten. Doawäajen wia hee sea schaftich, aus eent von Jehova siene Zeijen am wees, woo hee Gott sienen Nomen utspräakjen kunn. Gott sien Nomen woat opp Hebräisch met vea stelle Buakstowen jeschräwen, un wan eena doa lude Buakstowen biedeit, dan kaun eena “Jehova” sajen. Hee jinkj gaunz oppjeräacht no de Judenschool toom de Rabis vetalen, waut hee jelieet haud. Hee docht, dee wudden sikj freien, de Woarheit äwa Gott sienen Nomen to lieren, oba daut wia gaunz aundasch. Dee bespieejen am un schekjten am fuat. Siene Famielje wia uk ontofräd met am. Oba doawäajen hieed hee nich opp, mea äwa Jehova to lieren, un wort eent von Jehova siene Zeijen un deend Jehova sien Läwen lank tru. Wan wie soo aus Aaron no de Woarheit läwen wellen, dan mott wie ons uk doaropp reedmoaken, daut et met onse Frind ooda Frintschoft veleicht nich mea soo sennen woat aus ea.

13-14. En waut fa Stekjen mott wie ons denkjen un Vehoolen endren, wan wie de Woarheit kjanen lieren? Jeff een Biespel.

13 Orrajchte Jedanken un orrajchte Woakjen. Toom de Woarheit kjanen lieren un soo läwen, aus de Schreft daut velangt, mott wie reed sennen, ons denkjen un ons Vehoolen to endren. De Apostel Petrus schreef: “Jehorcht Gott nu, wiels jie siene Kjinja sent, un lot junt nich wada von de Lost metrieten, wuarenn jie läwden ea jie bäta wisten. . . . Jie [sellen] uk en aul june Wäaj heilich sennen” (1. Pet. 1:14-15). En de ieeschtemmasche Staut Korint fieeden väle een orreinet Läwen, oba aus see de Woarheit kjanen lieeden, musten see äa Läwen gaunz endren (1. Kor. 6:9-11). Un väle, waut en onse Tiet de Woarheit kjanen lieren, doonen daut uk. Petrus säd to de Christen: “Lot de Tiet, dee jie hinja junt haben, toorieekjen, soo jeläft to haben aus de Velkja daut gootjeit, en Jeschlajchtssinden,  Lost, drinkjen, fräten, supen, un onbandjen Aufjettadeenst” (1. Pet. 4:3).

14 Devynn un Jasmine wieren joarenlank Supa. Devynn wia een feina Buakfiera, oba se säden am emma wada de Oabeit auf, wiels hee soo sea drunk. Un Jasmine wia emma sea wuttich un hunjsch to aundre. Eenen Dach aus see besopen wia, bejäajend see oppe Gauss twee Missionoaren von Jehova siene Zeijen. Dee vespruaken ar, see wudden de näakjste Wäakj no ar komen un met ar de Bibel studieren. Aus dee dan doa hankjeemen, wieren Jasmine un Devynn besopen. Dee hauden nich jedocht, daut de Missionoaren jenuach om an romjäwen wudden toom no an komen. Oba daut näakjste Mol, aus de Missionoaren doa hankjeemen, wia daut gaunz aundasch. Jasmine un Devynn wullen jieren de Woarheit ut de Schreft kjanen lieren un see kjeemen daut bosich no, waut see lieeden. Daut dieed nich mol dree Moonat, daut see opphieeden met drinkjen, un lota befrieden dee sikj. Een deel Menschen doa em Darp worden daut en, woo dee sikj jeendat hauden, un wullen dan uk de Bibel studieren.

15. (a) Waut kaun eent von daut schwanste sennen, wan eena de Woarheit kjanen lieet? (b) Wuarom es daut soo schwoa?

15 Sitten un Mooden, waut Gott nich jefaulen. Fa eenje es daut nich sea schwoa, jewesse Sitten un Mooden tochtoloten, wan see enwoaren, daut Gott dee nich jefaulen. Aundre wada felt daut sea schwoa. Dee sorjen sikj, waut äare Famielje, äare Oabeitspoatna ooda äare Frind doatoo sajen woaren, wiels dee weeten, daut eenje sea faust sent aun jewesse Sitten, besonda wan daut doa en de Jäajent Mood es, daut Frintschoft to veieren, waut aul jestorwen es (5. Mo. 14:1). Waut kaun ons halpen, soone Sitten tochtoloten, waut Gott nich jefaulen? Wie kjennen von de goode Biespels von ieeschtemma lieren, biejlikj von de Christen en Efesus.

16. Waut deeden eenje en Efesus, aus see de Woarheit kjanen lieeden?

16 En de oole Staut Efesus wia daut sea Mood, Zaubarie to driewen. Waut deeden eenje Menschen doa, aus see Christen worden? De Schreft sajcht: “Väle, dee sikj met Zaubakrauft aufjejäft hauden, brochten äare Zaubabieekja toop un vebrenden dee, wua aulemaun daut seenen kunn, un see räakjenden ut, daut dee 50.000 Selwastekja wieet wieren. Opp disen Wajch vespreed daut Wuat sikj wiet, un neem de äwahaunt” (Apj. 19:19-20). Dise true Christen wieren reed, äare diere Bieekja auftostonen, un Jehova säajend dee doafäa.

17. (a) Waut hab wie veleicht fa de Woarheit oppjejäft? (b) Waut woa wie en dän näakjsten Artikjel seenen?

17 Waut jeefst du opp, aus du de Woarheit kjanen lieezhd? Ons kost daut aula Tiet. Eenje leeten sikj de Jeläajenheit derchgonen rikj to woaren ooda kjrieejen Trubbel met äare Frind ooda Frintschoft. Un väle musten äa denkjen un Vehoolen endren un uk Mooden ooda Sitten tochloten, waut Gott nich jefollen. Oba wie sent ons secha, daut de Woarheit ut de Schreft väl mea wieet es aus irjent sestwaut, waut wie haben oppjejäft. Derch de Woarheit kjenn wie Frind met Jehova sennen, un daut es daut wieetvolste, waut wie em Läwen haben kjennen. Wan wie aun aul daut goode denkjen, waut wie derch de Woarheit jekjräajen haben, dan es daut schwoa to bejriepen, wuarom eenje de Woarheit loosloten. Wuarom doonen dee daut? Un woo kjenn wie daut väabieejen, daut wie nich dänselwjen grooten Fäla begonen? Daut woa wie en dän näakjsten Artikjel seenen.

^ Varsch 8 Eenje Nomes hab wie hia jeendat.