Trigj nom Enhault

No de Enhaultslist gonen

 10. ARTIKJEL FA DAUT STUDIUM

Wuarom sull ekj mie nich deepen loten?

Wuarom sull ekj mie nich deepen loten?

“Filippus un de Maun stieejen beid rauf em Wota nenn, un hee deept am” (APJ. 8:38)

LEET 51 Wie haben ons die hanjejäft

WAUT WIE SEENEN WOAREN *

1. (a) Waut vespälden Adam un Eva? (b) Woo kjeem daut ut?

WAUT jleefst du, wäa kaun daut bestemmen, waut goot un waut schlajcht es? Aus Adam un Eva von dän Boom eeten, waut daut Vestentnis jäwen kunn, waut goot un waut schlajcht wia, weesen dee kloa, daut see sikj nich opp Jehova un siene Jebooten veleeten. Dee wullen selfst bestemmen, waut goot un waut schlajcht wia (1. Mo. 3:22). Woo kjeem daut ut? Dee kunnen nich mea Jehova siene Frind sennen. Un dee vespälden uk daut eewje Läwen, un aul äare Nokomen orwen de Sind un dän Doot met (Reem. 5:12). Waut Adam un Eva deeden, kjeem sea schlajcht ut.

De ätiopischa Beaumta well sikj soo schwind aus mäajlich deepen loten, nodäm daut hee Jesus aunjenomen haft (See Varsch 2-3)

2-3. (a) Waut deed de ätiopischa Beaumta, aus Filippus am prädijd? (b) Waut fa goodet kjrie wie, wan wie ons deepen loten? (c) Woone Froagen woa wie nu derchgonen?

2 Daut, waut Adam un Eva deeden, wia gaunz aundasch aus daut, waut de ätiopischa Beaumta deed, aus Filippus dän prädijd. De Beaumta räakjend daut, waut Jehova un Jesus fa am jedonen hauden, soo väl, daut hee sikj fuaz deepen leet (Apj. 8:34-38). Wan wie ons Gott hanjäwen un ons deepen loten, soo aus de Beaumta daut deed, dan wies wie, daut wie daut väl räakjnen, waut Jehova un Jesus fa ons jedonen haben. Wie wiesen uk, daut wie ons opp Jehova veloten un daut wie weeten, daut hee daut Rajcht haft to bestemmen, waut goot un waut schlajcht es.

3 Denkj mol aun daut goode, waut wie kjrieen, wan wie Jehova deenen. Eent es, daut wie dan de Hopninj haben, noch mol aul daut to kjrieen, waut Adam un Eva vespälden, un doa es uk daut eewje Läwen met en. Wiels wie aun  Jesus Christus jleewen, vejeft Jehova ons onse Fäla un jeft ons een goodet Jewessen (Mat. 20:28; Apj. 10:43). Wie woaren uk Poat von Jehova siene jeistelje Famielje, waut am tru deent un noch mol väl scheenet beläwen woat (Joh. 10:14-16; Reem. 8:20-21). Daut brinjt aulsoo väl goodet, sikj deepen to loten, soo aus de ätiopischa Maun daut deed. Oba eenje hoolen sikj doawäajen trigj, sikj deepen to loten. Aun waut kaun daut ligjen? Un woo kjennen dee met dise Schwierichkjeiten foadich woaren?

WUAROM EENJE SIKJ TRIGJHOOLEN

Schwierichkjeiten, waut eenje haben, ea dee sikj deepen loten

Sikj onsecha feelen (See Varsch 4-5) *

4-5. (a) Waut vonne Schwierichkjeiten haud Avery? (b) Waut vonne Schwierichkjeiten haud Hannah?

4 Dee feelen sikj onsecha. Avery siene Elren sent Jehova siene Zeijen. Sien Voda es doafäa bekaunt, daut hee een gooda Voda un een gooda Eltesta es. Oba doawäajen hilt Avery sikj trigj sikj deepen to loten. Wuarom? Hee sajcht: “Ekj jleewd, daut ekj kjeenmol wudd soo goot sennen aus mien Voda.” Avery docht uk, daut hee nich wudd kjennen de Oppgowen nokomen, waut dee am no de Doop veleicht jäwen wudden. Hee sajcht: “Ekj sorjd mie, daut se mie wudden froagen, opp ludes to bäden, Räden to hoolen ooda een Toopkomen fa dän Deenst to leiden un de Breeda entodeelen.”

5 Hannah, waut 18 Joa es, feeld sikj sea onsecha. Äare Elren deenden Jehova, oba see twieweld, aus see wudd kjennen soo läwen, aus Jehova daut haben wull. Wuarom? Hannah docht, daut et met ar nuscht enhilt. Eenjemol feeld see sikj soo schlajcht, daut see sikj selfst velazt. Un no daut feeld see sikj noch weinja wieet. See sajcht: “Ekj säd daut to kjeenem, waut ekj deed, nich mol to miene Elren. Un ekj docht, daut Jehova mie kjeenmol wudd jleichen wäajen daut, waut ekj mie selfst aundeed.”

Orrajchte Frind (See Varsch 6) *

6. Wuarom leet Vanessa sikj nich deepen?

6 Dee haben schlajchte Frind. Vanessa, waut 22 Joa es, sajcht: “Ekj haud eene sea goode Frind, waut ekj aul meist tieen Joa kjand.” Oba dise Frind intressieed sikj nich fa äaren Gloowen un dee muak Vanessa nich Moot, sikj deepen to loten. Daut wia Vanessa sea schwoa. See sajcht: “Ekj hab nich leicht Frind un ekj docht, wan ekj dise Frind tochleet, dan wudd ekj kjeenmol mea soone feine Frind haben.”

Angst fa orrajchtet doonen (See Varsch 7) *

7. (a) Fa waut haud Makayla Angst? (b) Wuarom haud see Angst?

7 Dee haben Angst, waut orrajchtet to doonen. Makayla wia fief Joa, aus äa Brooda utjeschloten wort. Aus see jrata  wort, wort see en, woo truarich äare Elren daut muak, waut äa Brooda deed. Makayla sajcht: “Ekj haud Angst, daut ekj no de Doop wudd eenen Fäla moaken un uk utjeschloten woaren un miene Elren noch truaja moaken.”

Angst fa Jäajenstaunt (See Varsch 8) *

8. Waut beduad Miles?

8 Dee haben Angst fa Jäajenstaunt. Miles siene Elren leeten sikj scheeden. Sien Voda deent Jehova, oba siene Mutta nich. Miles sajcht: “Ekj wond 18 Joa bie miene Mame un ekj wuach mie ar daut nich to sajen, daut ekj mie wull deepen loten, wiels ekj jeseenen hab, woo see to miene Pape wia, aus dee eent von Jehova siene Zeijen wort. Ekj haud Angst, daut see mie daut uk wudd schwoa moaken.”

MET SOONE SCHWIERICHKJEITEN FOADICH WOAREN

9. Woo woat daut secha utkomen, wan du lieescht, woo leeftolich un jeduldich Jehova es?

9 Adam un Eva worden sikj eenich, Jehova nich to deenen, wiels dee nich eene groote Leew fa am hauden. Oba Jehova leet dee doawäajen soo lang läwen, daut see kunnen Kjinja haben un dee soo opptrakjen, aus see daut fa rajcht talden. Daut Adam un Eva sikj von Jehova loosmuaken, kjeem sea schlajcht ut, un daut bewiest, woo onkluak äare Entscheidunk wia. Dee äa elsta Sän muak dän jinjren doot, un met de Tiet wia de Ieed voll von grausome Menschen, waut bloos fa sikj streeden (1. Mo. 4:8; 6:11-13). Oba Jehova haud eene Wajch, aul deejanje von Adam un Eva äare Nokomen to raden, waut am deenen wullen (Joh. 6:38-40, 57-58). Wan du mea doaräwa lieescht, woo jeduldich un leeftolich Jehova es, dan woat diene Leew fa am secha jrata woaren. Du woascht dan wellen aundasch sennen aus Adam un Eva un die Jehova hanjäwen.

Woo kaust du doamet foadich woaren?

(See Varsch 9-10) *

10. Woo kaun Psalm 19:8 die halpen, Jehova to deenen?

10 Lia wieda äwa Jehova. Je mea du äwa Jehova lieescht, je sechra woascht du die sennen, daut du am soo deenen kaust, aus hee daut haben well. Avery, wua wie aul ea von räden, sajcht: “Ekj feeld mie nich mea soo onsecha, aus ekj daut Vespräakjen en Psalm 19:8 läsd un doaräwa  nodocht.” (Läs.) Aus Avery enwort, daut Jehova krakjt daut deed, waut hee vespruak, wort siene Leew fa am jrata. De Leew halpt ons, ons sechra to feelen. Un dee halpt ons uk, Jehova em Uag to hoolen un daut to doonen, waut hee haben well. Hannah, von dee wie aul ea räden, sajcht: “Aus ekj fa mie selfst de Bibel läsd un studieed, wort ekj en, daut uk Jehova daut weedeed, wan ekj mie selfst velazt” (1. Pet. 5:7). Hannah deed dan daut, waut Gott sien Wuat säd (Jak. 1:22). Woo kjeem daut ut? See sajcht: “Aus ekj daut utfunk, woo goot daut utkjeem Jehova to jehorchen, kjrieech ekj eene groote Leew fa am. Nu sie ekj mie secha, daut Jehova mie emma biestonen woat, wan mie Help fält.” Hannah kunn schlieslich doamet opphieren, sikj selfst to velazen. See jeef sikj Jehova han un leet sikj deepen.

(See Varsch 11) *

11. (a) Waut deed Vanessa, om goode Frind to finjen? (b) Waut kjenn wie doavon lieren?

11 Sieekj die de rajchte Frind. Vanessa, von dee wie aul ea räden, wort met de Tiet en, daut äare Frind ar trigjhilt Jehova to deenen. Doawäajen hieed see opp, met ar Frint to sennen. Oba Vanessa deed noch mea. See strenjd sikj aun, fresche Frind en de Vesaumlunk to sieekjen. See vetald, daut daut Biespel von Noah un siene Famielje ar sea holp. See säd: “Dee wieren medden mank Menschen, waut Jehova nich leewden, oba dee hauden unjarenaunda goode Jesalschoft.” Nodäm daut Vanessa sikj deepen leet, wort see Pionia. Nu sajcht see: “Daut haft mie jeholpen, nich bloos en miene Vesaumlunk goode Frind to kjrieen, oba uk en aundre.” Du kaust uk goode Frind haben, wan du soo väl aus mäajlich bie daut Woakj methalpst, waut Jehova ons oppjejäft haft (Mat. 24:14).

(See Varsch 12-15) *

12. (a) Woone Forcht hauden Adam un Eva nich? (b) Woo kjeem daut ut?

12 Hab Gottesforcht. Wie motten ons doafäa ferchten, daut Jehova ontofräd met ons es (Psa. 111:10). Wan Adam un Eva Gottesforcht jehaut hauden, dan hauden dee sikj nich jäajen Jehova jestalt. Oba dee deeden daut. Dan jinjen an de Uagen op un see kunnen vestonen, daut see Sinda wieren. See kunnen aun äare Nokomen sest nuscht wiedajäwen aus de  Sind un dän Doot. Wäajen see daut enworden, schämden see sikj, daut see noaktich wieren, un bedakjten sikj (1. Mo. 3:7, 21).

13-14. (a) Wuarom bruck wie ons no 1. Petrus 3:21 no nich äwamotich fa dän Doot ferchten? (b) Waut fa Uasoak hab wie, Jehova to leewen?

13 Wie motten Gottesforcht haben, oba wie brucken ons nich äwamotich fa dän Doot ferchten. Jehova haft daut mäajlich jemoakt, daut wie noch mol eewich läwen kjennen. Wan wie sindjen un ons daut opp iernst leet deit, dan woat hee ons daut togoodhoolen. Hee woat ons vejäwen, wiels wie aun daut Leesjelt jleewen, waut sien Sän betolt haft. Eent von daut wichtichste, woo wie onsen Gloowen wiesen kjennen, es, wan wie ons Gott hanjäwen un deepen loten (läs 1. Petrus 3:21).

14 Wie haben väl Uasoak Jehova to leewen. Hee jeft ons aul daut goode, waut wie jieda Dach haben, un hee lieet ons uk de Woarheit von sikj un waut hee sikj väajenomen haft (Joh. 8:31-32). Hee haft ons de Christenvesaumlunk jejäft toom ons leiden un unjastetten. Hee halpt ons, met de Trubbels foadich to woaren, waut wie nu haben, un jeft ons de Hopninj, noch mol en eene volkomne niee Welt to läwen (Psa. 68:20; Opb. 21:3-4). Wan wie doaräwa nodenkjen, woo väl Jehova jedonen haft, om ons siene Leew to wiesen, dan woa wie am uk leewen. Un wan wie am leewen, dan woa wie de rajchte Sort Forcht haben: Wie woaren ons doafäa ferchten, Jehova truarich to moaken, dän wie soo sea leewen.

15. Woo kunn Makayla äare Angst äwakomen, waut orrajchtet to doonen?

15 Makayla, von dee wie aul ea räden, äwakjeem äare Angst, waut orrajchtet to doonen, aus see vestunt, woo wellich Jehova vejäwen deit. See sajcht: “Mie wort daut kloa, daut wie aula onvolkomen sent un Fäla moaken. Oba ekj lieed uk, daut Jehova ons leeft un daut dee ons derch daut Leesjelt vejeft.” Äare Leew fa Jehova brocht ar bat doa, daut see sikj am hanjeef un deepen leet.

(See Varsch 16) *

16. Waut holp Miles, daut hee nich mea Angst fa Jäajenstaunt haud?

16 Miles, waut Angst haud, daut siene Mame am daut wudd schwoa moaken, wan hee sikj wull deepen loten, fruach dän Kjreisoppsechta no Help. Miles sajcht: “Dee wia uk en eene Famielje oppjewossen, wua nich aule Jehova deenden. Dee holp mie notodenkjen, woo ekj miene Mame daut kunn dietlich moaken, daut et miene ieejne Entscheidunk wia, mie deepen to loten, un daut ekj daut nich wäajen miene Pape deed.” Miles siene Mame wia nich goot jesonnen doaräwa. Tolatst must hee wajchtrakjen, oba hee jeef nich opp. Hee sajcht: “Daut jinkj mie sea to Hoaten, aus ekj enwort, waut Jehova aules fa mie jedonen haud. Aus ekj deep äwa Jesus sien Leesjelt nodocht, wort mie daut kloa, woo sea Jehova mie leewd. Daut brocht mie bat  doa, mie Jehova hantojäwen un deepen to loten.”

AUN DIENE ENTSCHEIDUNK FAUSTHOOLEN

Wie kjennen wiesen, daut wie dankboa sent fa daut, waut Gott fa ons jedonen haft (See Varsch 17)

17. Waut kjenn wie aula wiesen?

17 Aus Eva em Goaden Eden von de Frucht eet, stald see sikj jäajen Jehova. Un aus Adam dautselwje deed, bewees hee, daut hee nich dankboa wia fa aul daut goode, waut Jehova fa am jedonen haud. Wie aula kjennen wiesen, daut wie nich soo jesonnen sent aus Adam un Eva. Wan wie ons deepen loten, dan wies wie Jehova, daut wie jleewen, daut hee daut Rajcht haft to bestemmen, waut goot un waut schlajcht es. Wie bewiesen, daut wie am leewen un daut wie opp am vetruen.

18. Woo kaust du Jehova tru deenen?

18 No de Doop mott wie doano seenen, daut wie jieda Dach soo läwen, aus Jehova daut well, un nich soo, aus wie wellen. Millionende Menschen doonen daut jieda Joa. Du woascht daut uk kjennen, wan du Gott sien Wuat emma bäta kjanen lieescht un pinkjlich met diene Gloowesbreeda toopkjemst un aundre flietich von daut vetalst, waut du von dienen leeftoljen Voda jelieet hast (Heb. 10:24-25). Wan du waut entscheiden deist, dan horch no dän Rot, waut Jehova die derch sien Wuat un siene Organisazion jeft (Jes. 30:21). Dan woat die daut met aules, waut du deist, jlekjen (Spr. 16:3, 20).

19. (a) Aun waut saust du emma denkjen? (b) Wuarom saust du doaraun denkjen?

19 Wan du emma doaraun denkjst, woo goot daut fa die es, wan Jehova die leit, dan woat diene Leew fa am un fa siene Jebooten jrata woaren. Dan woat de Soton die met nuscht kjennen von Jehova wajchlocken. Stal die mol väa, woo die daut dusent Joa wieda gonen woat. Du woascht trigjdenkjen aun diene Doop un denkjen, daut daut de baste Entscheidunk wia, waut du jeemols muakst.

LEET 28 Wäa es Jehova sien Frint?

^ Varsch 5 Daut wichtichste, waut du en dien Läwen entscheiden motst, es, aus du die west deepen loten ooda nich. Wuarom es daut soo wichtich? Daut woa wie en disen Artikjel seenen. Wie woaren uk seenen, woo deejanje, waut äwa de Doop nodenkjen, met de Schwierichkjeiten foadich woaren kjennen, waut an veleicht trigjhoolen.

^ Varsch 56 BILTBESCHRIEWUNK: Sikj onsecha feelen: Een Jung woacht sikj daut nich, eene Auntwuat to jäwen.

^ Varsch 58 BILTBESCHRIEWUNK: Orrajchte Frind: Eene junge Sesta, waut met eene schlajchte Frind toop es, schämt sikj, aus see Gloowesbreeda bejäajent.

^ Varsch 60 BILTBESCHRIEWUNK: Angst, waut orrajchtet to doonen: Eene junge Mejal haft Angst, daut see uk waut orrajchtet doonen woat, aus äa Brooda utjeschloten woat un von tus jeit.

^ Varsch 62 BILTBESCHRIEWUNK: Angst fa Jäajenstaunt: Een Jung haft Angst to bäden, wiels siene Mame tookjikjt, waut Jehova nich deent.

^ Varsch 65 BILTBESCHRIEWUNK: Sikj sechra feelen: Een Jung studieet deepa.

^ Varsch 67 BILTBESCHRIEWUNK: Rajchte Frind: Eene junge Sesta lieet, mootich fa äaren Gloowen entostonen.

^ Varsch 69 BILTBESCHRIEWUNK: Moot, daut rajchte to doonen: Eene junge Mejal kjemt Jehova emma noda un lat sikj deepen.

^ Varsch 71 BILTBESCHRIEWUNK: Nich mea Angst fa Jäajenstaunt: Een Jung fot Moot un lajcht siene Mame, waut Jehova nich deent, sienen Gloowen ut.