Trigj nom Enhault

No de Enhaultslist gonen

 LÄWESJESCHICHT

Jehova leet mie nienich em Stäakj

Jehova leet mie nienich em Stäakj

Ekj wia eent von vea kjliene Mejales, waut Adolf Hitler no eene von siene Räden Bloomen brinjen sullen. Woo kjeem daut? Miene Pape deed sea fa de Nazi-Rejierunk strieden un wia de Foara von dän Väaschten von de Nazi-Partei en onse Jäajent. Miene Mame wia sea katoolsch un wull haben, ekj sull eene Nonn woaren. Un doch wort ekj nich een Nazi uk nich eene Nonn. Lot mie junt mol vetalen, woo daut kjeem.

EKJ woss en Graz en Oostareich opp. Aus ekj säwen Joa wia, schekjten se mie no eene School, wua eena uk väl von Kjoakjensachen lieed. Oba miene Mame neem mie benna een Joa wada ut dise School rut, wiels ekj sach, daut de Priesta un Nonnen doa unja sikj schwienschet väahauden.

Onse Famielje; Pape haft Soldotenkjleeda aun

Lota jinkj ekj dan no eene School, wua ekj uk wond. Eenen Zeowes kjeem miene Pape un hold mie doa fuat, wäajen Graz vebomt wort. Wie brochten ons fuat no de Staut Schladming, un aus wie bat doa wieren, bomden se de Brigj opp, wua wie jroz äwa wieren. Een aundret Mol wieren ekj un Groosmame em Goaden un dan fluagen doa Äarpläns läach äwa un schooten no ons. Aus de Kjrich dan ieescht äwa wia, feeld sikj ons daut soo, daut de Kjoakj un uk de Rejierunk ons em Stäakj jeloten hauden.

EEN HELPA, WAUT EENEM NIENICH EM STÄAKJ LAT

Aune 1950 funk eene von Jehova siene Zeijen aun, met miene Mame von de Schreft to räden. Ekj horcht emma, wan dee vetalden, un eenjemol jinkj ekj uk met miene Mame met no de Toopkomes. Miene Mame wort daut en, daut Jehova siene Zeijen de Woarheit lieeden, un leet sikj aune 1952 deepen.

To dee Tiet späad sikj mie daut soo, daut doa en de Vesaumlunk bloos oole Frues wieren. Oba lota fua wie dan mol no eene Vesaumlunk, wua daut gaunz aundasch wia. Doa wieren een deel junge Menschen. Aus wie wada trigj en Graz wieren, wankt ekj no aule Toopkomes un boolt wort ekj uk en, daut et de Woarheit wia, waut ekj doa lieed. Ekj lieed uk, daut Jehova Gott siene Deena nienich em Stäakj lat. Hee steit ons mau rajcht dan bie, wan wie auleen un gaunz aune Enj sent (Psa. 3:6-7).

Mie jankad sea, met aundre äwa de Woarheit to räden. Daut ieeschte räd ekj met mien  Jeschwista doaräwa. Miene vea elste Sestren wieren aul von tus un wieren Schoolliera. Ekj reisd doahan, wua dee wonden, un deed dee uk tooroden, de Bibel to studieren. Tolatst studieed aul mien Jeschwista un worden Jehova siene Zeijen.

De tweede Wäakj, waut ekj von Hus to Hus prädijd, lieed ekj eene Fru enne 30 kjanen un ekj funk een Bibelstudium met dee aun. Dit wia mau rajcht fa mie selfst goot, wiels met mie haud kjeena studieet, aus ekj de Woarheit kjanen lieed. Ekj must mie jiedatsmol sea fein reedmoaken, daut ekj dee waut lieren kunn. Daut holp mie, daut ekj de Woarheit emma mea räakjend, un dan jeef ekj mie Jehova han un leet mie en Aprell 1954 deepen. Lota leet mien Bibelstudium sikj uk deepen un nohäa uk dee äa Maun un äare beid Junges.

“VEFOLCHT, OBA NIEMOLS VELOTEN”

Aune 1955 wia ekj opp internazionale Kongressen en Dietschlaunt, Frankreich un Enjlaunt. En London bejäajend ekj Albert Schroeder. Daut wia een Liera en de Gilead-Bibelschool un lota wia hee em Väastaunt von Jehova siene Zeijen. Eemol wees Brooda Schroeder ons em Brietischen Museum oole Schreften von de Bibel, wua Gott sien Nomen opp Hebräisch bennen wia, un hee erkjläad ons, woo besonda dee wieren. Daut jinkj mie sea to Hoaten un stoakjt mie em Gloowen un ekj wull noch väl dolla doaropp schaufen, de Woarheit ut de Schreft bekaunttomoaken.

Dän 1. Jaunewoa 1956 wort ekj Pionia un vea Moonat lota wort ekj dan Sondapionia en Mistelbach en Oostareich. To dee Tiet wieren en dee Staut noch kjeene Zeijen. Un doa wia uk noch waut, wua ekj mie to wanen must. Ekj un miene Pioniapoatna wieren sea veschieden. Ekj wia meist 19 Joa un kjeem von eene groote Staut un see wia 25 un von een Darp. Ekj jleicht, lot opptostonen un see tiedich. Wan daut ieescht to zeowes kjeem, dan wull ekj emma lang oppbliewen un see wull tiedich schlopen gonen. Oba de Rot ut de Schreft holp ons, daut wie doawäajen goot foadich worden un aus Pionieren fein toopschauften.

Ekj un miene Pioniapoatna (rajchtsch) aus Sondapionieren en Mistelbach, Oostareich

Oba aundret wia doa schwoa fa ons. Wie worden “vefolcht, oba niemols veloten” (2. Kor. 4:7-9). Eemol aus wie en een Darp prädijden, leeten de Menschen äare Hunj loos. Meist fuaz wieren de groote Hunj aula rom ons un balden un weesen äare Tänen. Wie footen ons aune Haunt un ekj bäd mau rajcht: “Jehova, toom Jefaulen, wan de Hunj ons kjrieen, dan lot ons bosich stoawen!” Aus de Hunj ieescht gaunz dicht bie wieren, hilden dee stell, weifelden met äare Zäajel un jinjen wajch. Wie feelden, daut Jehova ons beschizt haud. No daut deed wie en daut gaunze Darp prädjen un wie freiden ons, daut de Menschen soo fein horchten. Veleicht wundaden dee sikj, daut de Hunj ons nuscht jedonen hauden ooda daut wie nich oppjejäft hauden, nodäm daut wie ons soo grulden. Eenje von dee worden lota Jehova siene Zeijen.

Opp eene aundre Sauz gruld wie ons wada. Ons Huswieet kjeem besopen no Hus un säd, daut wie de Menschen doa stieeden un daut hee ons dootmoaken wudd. Siene Fru wull am berujen, oba see kunn daut nich. Wie wieren bowen en onse Stow un hieeden daut aula.  Dan sad wie bosich Steela vere Däa, daut dee doa nich nenkunn, un pakten onse Sachen toop. Aus wie de Däa opmuaken, stunt de Huswieet met een grootet Massa oppe Trapen un wie randen dan schwind met aul onse Sachen to de Hinjadäa rut un derch dän grooten Goaden un kjeemen nienich wada trigj.

Wie wankten no een Hotel un fruagen no eene Stow. Daut neem sikj soo rom, daut wie doa fa meist een Joa bleewen, un daut wia sea goot fa dän Deenst. Daut Hotel wia medden en de Staut, un waut von onse Bibelstudiums wullen doa studieren. Boolt kjeemen jieda Wäakj soo bie 15 Menschen en onse Stow toop fa daut Buakstudium un daut Woaktorm-Studium.

Wie bleewen äwa een Joa en Mistelbach. Dan wort ekj no Feldbach jeschekjt, waut em Siedoosten von Graz es. Ekj haud doa eene aundre Pioniapoatna un doa jeef et uk noch kjeene Vesaumlunk. Wie wonden en een Holthus un hauden doa eene kjliene Stow oppem tweeden Stock. Doa pust de kolda Wint sea nenn un wie proowden daut met Papia dichttostoppen. Wota toom brucken must wie vom Borm holen. Wan daut uk schwoa wia, loond sikj daut, doa uttohoolen, wiels en een poa Moonat jeef et doa eene Grupp. Wie studieeden doa met eene Famielje un met de Tiet kjeemen soo bie 30 von dee en de Woarheit.

Derch dise Erfoarungen wort mie daut noch väl kloara, daut Jehova kjeenmol dee em Stäakj lat, waut fa sien Kjennichrikj strieden. Mau rajcht wan doa sest kjeena es toom ons halpen, Jehova es emma met ons (Psa. 121:1-3).

GOTT SIENE “JERAJCHTE RAJCHTE HAUNT” UNJASTETT MIE

Aune 1958 sull en New York City bie daut Yankee-Stadion un bie de Polo Grounds een internazionala Kongress sennen. Ekj wull doa hanfoaren, un daut Betel en Oostareich fruach mie, aus ekj wudd jleichen, no de 32. Klauss von de Gilead-School to gonen. Daut wull ekj mie nich loten derchgonen! Ekj säd fuaz, daut ekj wull.

En de Gilead-School saut ekj biesied Martin Pötzinger. Hee haud en de Nazi-Tiet en veschiedne Loaga fa Faustjenomne väl schwoaret derchjemoakt un wia lota em Väastaunt von Jehova siene Zeijen. Eenjemol fruach  Martin mie en de School opp stelles: “Erika, waut meent dit opp Huachdietsch?”

Aus de School haulf derch wia, säd Nathan Knorr, wua wie wudden hanjeschekjt woaren. Ekj sull no Paraguay. Wäajen ekj noch soo junk wia, brukt ekj de Frieheit von miene Pape, daut ekj doa hankunn. Dee jeef mie Frieheit un soo kjeem ekj en Moaz 1959 en Paraguay aun un wort met eene niee Deenstpoatna toop no een Missionoahus en Asunción jeschekjt.

Nich lang lota lieed ekj Walter Bright kjanen. Dee wia en de 30. Klauss von de Gilead-School jewast. Een Stootje lota befried wie ons un kunnen ons en schwoare Tieden omzajcht biestonen. Emma, wan wie waut schwoaret beläwden, läsd wie daut, waut Jehova en Jesaja 41:10 vesprakjt: “Enjst die nich, wiels ekj sie met die; fercht die nich, wiels ekj sie dien Gott. Ekj woa die stoakj moaken”. Dit vesechad ons, daut Jehova ons kjeenmol wudd em Stäakj loten, wan wie am tru bleewen un daut ieeschte no sien Kjennichrikj trachten wudden.

Lota word wie no eene Jäajent dicht bie Brasilien jeschekjt. De Gloowesleidasch hizten de junge Menschen doa en, daut see Steena no daut oole Hus schmeeten, wua wie wonden. Dan funk Walter aun, de Bibel to studieren met dän Väaschten von de Poliezen. Disa kjikjt doano, daut doa fa eene Wäakj Poliezen dicht bie ons Missionoahus oppausten, un dan leeten de Menschen ons tofräd. Boolt no daut kjrieej wie een bätret Hus un daut wia en Brasilien dicht bie de Jrens. Daut wia sea paussent, wiels soo kunn wie en Paraguay un uk en Brasilien Toopkomes aufhoolen. Ea wie doa wajchtrocken, jeef et doa aul twee kjliene Vesaumlungen.

Ekj un mien Maun Walter aus Missionoaren en Asunción, Paraguay

JEHOVA STEIT MIE NOCH EMMA BIE

De Doktasch säden to mie, ekj wudd nich kjennen Kjinja haben. Doawäajen wia wie aune 1962 sea äwarauscht, aus wie enworden, daut wie doch wudden eent haben. Wie trocken dan no Hollywood, Florida, dicht bie Walter siene Famielje. Wiels wie nu selfst eene Famielje hauden, kunn wie lang nich Pionia sennen. Oba doawäajen wia daut Kjennichrikj fa ons noch emma daut väaschte (Mat. 6:33).

Aus wie en Nowamba 1962 no Florida kjeemen, wundad wie ons, daut de schwoate un de witte Breeda doa oppoat Toopkomes hauden un uk oppoat prädijden, wäajen de Menschen daut doa soo hauden. Oba Jehova moakt kjeenen Unjascheet manke Menschen, un doawäajen dieed daut nich lang, bat doa Breeda von aule Raussen toopkjeemen. Jehova säajend daut sea un nu jeft daut doa sea väl Vesaumlungen.

Ekj wia sea truarich, aus Walter aune 2015 aun Kjräft storf. Hee leewd Jehova sea un holp uk väl Breeda, un wie hauden 55 scheene Joaren toop. Ekj frei mie aul sea, am wadatoseenen, wan hee ieescht woat vom Doot oppstonen un wada jesunt sennen (Apj. 24:15).

Ekj sie sea schaftich, daut ekj kunn fa äwa 40 Joa em Voltietdeenst sennen un soo väl scheenet beläwen. Toom Biespel kunnen ekj un Walter bie de Doop von 136 von onse Bibelstudiums bie sennen. Secha wieren doa uk mol schwoare Tieden. Oba doawäajen deend wie Jehova wieda. Wie hilden ons emma fausta aun am un veleeten ons doaropp, daut hee ons to de rajchte Tiet soo halpen wudd, aus hee daut fa rajcht tald. Un daut deed hee uk (2. Tim. 4:16-17).

Ekj bang mie sea no Walter, oba Pionia sennen jeft mie väl Moot. Besonda halpt mie daut, wan ekj aundre lieren doo un dee mau rajcht von daut Oppstonen vom Doot vetalen kaun. Ekj kaun daut nich mol opprieejen, woo foaken ekj daut beläft hab, daut Jehova mie holp un mie nich em Stäakj leet. Soo, aus hee daut vesproaken haft, stunt hee mie emma bie, jeef mie Krauft un deed mie met siene “jerajchte rajchte Haunt” hoolen un bewoaren (Jes. 41:10).