Trigj nom Enhault

No de Enhaultslist gonen

 22. ARTIKJEL FA DAUT STUDIUM

Vebäta die em studieren!

Vebäta die em studieren!

“Jie [sellen] fauststalen lieren, waut daut aulabaste es” (FILIP. 1:10)

LEET 35 Hool daut wichtichste em Uag

WAUT WIE SEENEN WOAREN *

1. Wuarom jankat eenje veleicht nich to studieren?

BIE dise Tiet haft daut väl opp sikj sien Läwen to moaken. Een deel Breeda motten sea väl schaufen, daut äare Famielje bloos daut needichste haft. Un väl aundre motten jieda Dach een poa Stund foaren, bat see bie de Oabeit un wada tus sent. Väle motten schwoare Hauntoabeit doonen. Un wan de Dach ieescht derch es, dan sent aul dise flietje Breeda un Sestren sea meed un väle von dee haben nich mea väl Lost toom studieren.

2. Wanea nemst du die Tiet toom studieren?

2 Oba wie motten ons de Tiet nämen, om Gott sien Wuat un onse biblische Bieekja jescheit to studieren. Aus wan nich, kjenn wie nich Frind met Jehova bliewen un uk nich daut eewje Läwen kjrieen! (1. Tim. 4:15, NW). Eenje stonen jieda Dach tiedich opp un studieren, wan noch aules stell es un see vereift sent. Aundre wada nämen sikj zeowes een bät Tiet toom ruich studieren un nodenkjen.

3-4. (a) Waut vonne Endrungen worden doa jemoakt? (b) Wuarom worden dee Endrungen jemoakt?

3 Secha wurscht du uk sajen, daut wie ons Tiet toom studieren nämen motten. Oba waut sell wie studieren? Veleicht denkjst du soo: “Ekj kaun daut goanich nokomen, aules to läsen, waut wie kjrieen.” Eenje kjennen sikj daut soo enrechten, daut see aule Bieekja läsen un aule Videos kjikjen, waut wie kjrieen, oba fa väl Breeda es daut schwoa, jenuach Tiet doafäa to haben. De Väastaunt weet daut un doawäajen säden dee een Stoot trigj, daut et nu weinja jedrekjte un ellektroonische Bieekja jäwen wudd.

4 Biejlikj jeft daut nich mea jieda Joa daut Jahrbuch der Zeugen Jehovas, wäajen doa emma väl scheene Erfoarungen  opp jw.org® un en de Moonatsprograms von JW Broadcasting® sent. Dän Woaktorm (Utgow fa aulemaun) un daut Woat waka! jeft daut nu bloos noch dreemol daut Joa. Dise Endrungen sent nich doatoo, daut wie nu mea Tiet fa sestwaut haben, oba doatoo, daut wie ons mea met daut aufjäwen kjennen, “waut daut aulabaste es” (Filip. 1:10). Well wie mol seenen, woo eena entscheiden kaun, waut daut aulabaste, ooda ieeschte, es, un woo eena daut mieeschte doabie haben kaun, wan eena de Schreft studieet.

ÄWALAJEN, WAUT DAUT IEESCHTE KJEMT

5-6. Waut sell wie fein studieren?

5 Waut sell wie daut ieeschte studieren? Wie sellen ons jieda Dach Tiet nämen toom Gott sien Wuat studieren. Daut wie mea Tiet haben toom äwa daut nodenkjen, waut wie läsen, un toom bowenenn noch waut nosieekjen, sent fa de Toopkomes jieda Wäakj nu weinja Kapitels fa daut Bibelläsen väajeseenen aus ea. Wie sellen nich bloos de Kapitels fa jieda Wäakj läsen, oba ons daut uk to Hoaten nämen, waut de Schreft sajcht, daut wie Jehova noda komen (Psa. 19:15).

6 Waut sell wie noch fein studieren? Secha well wie ons reedmoaken fa daut Woaktorm-Studium un fa daut Bibelstudium von de Vesaumlunk un fa de aundre Poat von daut Toopkomen enne Wäakj. Wie sellen uk jieda Woaktorm un Woat waka! läsen.

7. Sell wie mootloos woaren, wan wie nich aules läsen ooda kjikjen kjennen, waut daut opp onse Websied ooda opp JW Broadcasting jeft? Laj daut ut.

7 Veleicht denkjst du nu: “Oba waut es met aul daut, waut opp onse Websied jw.org un opp JW Broadcasting es? Doa sent soo väl Artikjels un Videos!” See wie mol een Biespel: En een Restaraunt jeft daut eenen grooten Desch voll veschiednet Äten. Daut es goanich mäajlich, daut de Kunden von aules schmakjen, waut et doa jeft. Doawäajen nämen dee bloos von jewesset Äten. Woomäajlich kaust du uk nich aules opp onse Websied ooda opp JW Broadcasting kjikjen ooda läsen. Wan daut soo es, woa doawäajen nich mootloos. Läs un kjikj soo väl, aus du kaust. Well wie nu mol unjasieekjen, waut biem studieren aules met en es un woo ons daut daut mieeschte halpen kaun.

TOOM STUDIEREN MOTT EENA SIKJ AUNSTRENJEN

8. (a) Woo kjenn wie ons fa daut Woaktorm-Studium reedmoaken? (b) Woo kjemt ons daut togood, wan wie ons soo aus dit reedmoaken?

8 Studieren bediet, daut eena dän Kopp bie daut haft, waut eena läst, toom doa waut von lieren. Daut bediet nich, daut eena sikj bloos bosich waut äwaläst un sikj de Auntwuaten tieekjent. Wan du die toom Biespel reedmoakst fa daut Woaktorm-Studium, dan besee die dän Varsch “Waut wie seenen woaren” aum Aunfank von dän Artikjel. Dan besee die dän Tietel un de kjliene Äwaschreften von dän Artikjel un uk de Wadaholungsfroagen. Läs dän Artikjel sacht un oppmoakjsom derch. Kjikj en jieda Varsch von dän Artikjel besonda no dän Sauz, waut wiest, von waut de Varsch sikj haundelt. Jeweenlich es daut de ieeschta Sauz von dän Varsch. Wan du dän Artikjel läst, dan kjikj doano, woo jieda Varsch met de Äwaschreft un met daut Teema von dän Artikjel tooppaust. Schriew die de Wieed opp, waut du nich kjanst, un uk aul daut aundre, wua du mea äwa weeten west, un sieekj die daut no.

9. (a) Wuarom sell wie besonda no de Bibelvarzh kjikjen, wan wie dän Woaktorm studieren? (b) Woo kjenn wie daut doonen? (c) Waut sell wie no Josua 1:8 no noch doonen, wan wie de Bibelvarzh läsen?

9 Daut Woaktorm-Studium halpt ons de Schreft bäta to vestonen. Doawäajen kjikj no aul de Bibelvarzh, waut doa sent, besonda  no dee, waut bie daut Toopkomen jeläst woaren. Pauss opp, woo de Wieed von de Bibelvarzh met daut tooppaussen, waut de Varsch em Woaktorm sajcht. Nemm die uk Tiet toom äwa de Bibelvarzh nodenkjen, waut du läst, un see, woo du dee en dien Läwen nokomen kaust (läs Josua 1:8).

Elren, lieet june Kjinja, woo eena studieren saul (See Varsch 10) *

10. Wuarom sellen de Elren no Hebräa 5:14 no äare Kjinja lieren, woo eena studieet un sikj waut nosieekjt, wan see aus Famielje studieren?

10 De Elren wellen, daut äare Kjinja daut scheen jeit, wan see jieda Wäakj aus Famielje studieren. Dee sellen sikj fa jieda Wäakj waut väanämen, waut see derchnämen wellen, oba dee motten doa nich jiedatsmol waut gaunz besondret doonen. Eena kaun bie daut Famieljenstudium daut Moonatsprogram opp JW Broadcasting kjikjen un uk mol met de Kjinja toop waut besondret doonen, soo aus eenen kjlienen Noahkausten buen. Oba eena saul de Kjinja doa uk lieren, woo eena studieet. Dee motten toom Biespel lieren, sikj fa de Toopkomes reedtomoaken ooda sikj waut notosieekjen, wan doa enne School een Trubbel oppkjemt (läs Hebräa 5:14). Wan dee daut von tus aul jewant sent, jewesse Teemasch to studieren, dan woaren dee bie de Toopkomes un Kongressen dolla oppmoakjsom sennen, wan doa uk nich Videos jewäsen woaren. Woo lang eena met de Kjinja studieet es doano, woo oolt dee sent ooda woo väl dee opp eemol venämen kjennen.

11. Wuarom sell wie onse Bibelschiela lieren, woo see selfst deep studieren kjennen?

11 Onse Bibelschiela motten uk lieren, woo eena studieet. Wan dee aunfangen to studieren, dan sent wie aul schaftich, wan dee sikj de Auntwuaten jetieekjent haben fa daut Studium ooda fa de Toopkomes. Oba wie motten dee lieren, woo dee sikj selfst kjennen waut nosieekjen un deep studieren. Soo woaren dee selfst kjennen en onse Bieekja nosieekjen un Rot finjen, wan een Trubbel oppkjemt, enne Städ fuaz wäm von de Vesaumlunk no Help froagen.

WEETEN, WUAROM WIE STUDIEREN

12. Wuarom studia wie?

12 Wan die daut studieren nich sea en es, dan jleefst du veleicht, die woat daut kjeenmol scheen gonen. Oba daut kaun die scheen gonen. Aum Aunfank kaust du een bät opp eemol studieren un soo bie sacht emma mea. Hool em Denkj, wuarom du studieescht. Daut wichtichste es, daut du doaderch Jehova emma noda kjemst. Oba daut studieren halpt die uk, daut du Froagen beauntwuaten kaust, waut se die stalen, ooda daut du die waut nosieekjen kaust, wan du Trubbels hast.

13. (a) Laj daut ut, woo een junga Mensch en de School fa sienen Gloowen enstonen kaun. (b) Woo kaust du dän Rot ut Kolossa 4:6 nokomen?

 13 Best du een junga Mensch, waut noch no de School jeit? Diene Schoolpoatna jleewen woomäajlich aula aun de Ewoluzion. Veleicht wurscht du dee wellen utlajen, wuarom du jleefst, daut Gott ons jemoakt haft, oba du denkjst, du kaust daut nich. Waut kaun die dan halpen? Studieren! Biem studieren kaust du no tweeatlei sträwen: 1. Du kaust dienen Gloowen doaraun stoakjen, daut Gott aules jemoakt haft. Un 2. kaust du lieren, de Woarheit ut Gott sien Wuat noch bäta to veteidjen (Reem. 1:20; 1. Pet. 3:15). Daut ieeschte kaust du äwalajen: “Waut sajen miene Schoolpoatna, wuarom dee aun de Ewoluzion jleewen?” Un dan kaust du onse Bieekja brucken toom deep äwa dit Teema nosieekjen. Veleicht es daut väl leichta, aus du jleefst, dienen Gloowen to veteidjen. De mieeschte jleewen bloos doawäajen aun de Ewoluzion, wäajen Menschen, waut see väl achten, jesajcht haben, daut daut soo es. Wan du biem studieren bloos eent ooda twee Sachen finjst, waut du dee wiesen kaust, es daut veleicht jenuach toom soone halpen, waut werkjlich de Woarheit weeten wellen (läs Kolossa 4:6).

EENEN INTRESSAUNT KJRIEEN TOOM STUDIEREN

14-16. (a) Woo kjenn wie mea von een Bibelbuak lieren, waut wie veleicht noch nich soo goot kjanen? (b) Woo kjennen de Bibelvarzh, waut hia aunjejäft sent, ons halpen daut Buak Amos noch bäta to vestonen? Laj daut ut. (See uk dän Kausten “ Lot die en de biblische Jeschichten nenn!”)

14 Saj wie mol, wie woaren bie een Toopkomen eent von de kjlandre profeetische Bibelbieekja derchgonen, waut wie noch nich soo goot kjanen. Daut ieeschte mott wie eenen Intressaunt doafäa kjrieen, waut de Profeet oppjeschräwen haft. Woo kjenn wie daut?

15 Daut ieeschte wudd wie kjennen äwalajen: “Waut weet ekj von dän, waut daut Buak jeschräwen haft? Wäa wia daut, wua wond dee un waut schauft dee?” Wan wie mea äwa dän Schriewa weeten, dan kjenn wie bäta vestonen, wuarom dee en sien Buak jewesse Wieed ooda Jlikjnisen brukt. Wan du de Schreft läst, dan pauss opp, woo aun de Wieed entowoaren es, woo deejanja wia, waut daut schreef.

16 Dan wudd daut goot sennen notosieekjen, wanea daut Buak jeschräwen wort. Daut kaust du finjen en de List “Verzeichnis der Bücher der Bibel”, waut hinjen en de Neue-Welt-Übersetzung der Heiligen Schrift es. * Du kaust die uk de List von de Profeeten un Kjennichs beseenen, waut en daut Heft Help fa daut Bibelstudium oppe Sied 14-15 un 16-17 es. Wan doa en daut Bibelbuak, waut du studieescht, Profezeiungen bennen sent, dan wudd daut goot sennen to unjasieekjen, woo de Omstend von de Menschen wieren, aus dit Buak jeschräwen wort. Woo wieren dee jesonnen un waut fa schlajchte Jewanheiten hauden dee, daut doa een Profeet no an must jeschekjt woaren? Woone Menschen läwden to deeselwje Tiet aus de Profeet, waut dit Buak schreef? Veleicht motst du noch en aundre Bibelbieekja nosieekjen, daut du daut bäta vestonen kaust. Wan du biejlikj bäta vestonen west, woo de Omstend wieren, aus de Profeet Amos läwd, dan wurscht du kjennen de Varzh en 2. Kjennichs un 2. Chronik läsen, waut en Amos 1:1 en de Neue-Welt-Übersetzung bie de Varzh toom wiedaschlonen aunjejäft sent. Du kaust die uk daut unjastonen, waut Hosea schreef, dee woomäajlich to deeselwje Tiet läwd aus Amos. Aul daut woat die halpen bäta to vestonen, woo daut Läwen en  Amos siene Tiet wia (2. Kjen. 14:25-28; 2. Chr. 26:1-15; Hos. 1:1–2:2; Amos 1:1).

NO EENSELHEITEN KJIKJEN

17-18. Woo wiesen de Biespels von dise Varzh ooda aundre Biespels, daut eenem daut studieren noch scheena gonen kaun, wan eena no Eenselheiten kjikjt?

17 Daut es goot nieschierich to sennen, wan wie de Schreft läsen. Stal die biejlikj mol väa, daut du daut 12. Kapitel von Sacharja siene Profezeiunk läst, wua dän Messias sien Doot verutjesajcht es (Sach. 12:10). En Varsch 12 läst du, daut “Natan siene Nokomen” sea truarich sennen wudden äwa dän Messias sienen Doot. Enne Städ bloos wiedatoläsen, wurscht du kjennen eene Pause moaken un äwalajen: “Waut haben Natan siene Nokomen met dän Messias to doonen? Woo wudd ekj kjennen mea äwa daut finjen?” Du wurscht die daut kjennen nosieekjen. Bie de Varzh toom wiedaschlonen es en de Neue-Welt-Übersetzung 2. Samuel 5:13-14 aunjejäft, wua daut sajcht, daut Natan eent von dän Kjennich David siene Säns wia. Un doa es uk Lukas 3:23, 31 aunjejäft, wua daut sajcht, daut Jesus siene Mame Maria von Natan häastaumd. (See de Aungowen fa daut Schoolheft fa Läwen un Deenst, Juni 2018, S. 4 “Wäa wia Josef sien Voda?”) Nu wundascht du die sea! Du wist je, daut verutjesajcht wia, daut Jesus von David häastaumen wudd (Mat. 22:42). Oba David haud je mea aus 20 Säns. Es daut nich oppfaulent, daut Sacharja verutsäd, daut besonda Natan siene Nokomen äwa Jesus sienen Doot truaren wudden?

18 See wie noch een Biespel. En daut ieeschte Kapitel von Lukas kjenn wie läsen, daut de Enjel Gabriel no Maria kjeem un to ar säd, waut met dän Sän woaren wudd, waut see haben wudd. Hee säd: “Dee woat groot sennen, un dän Aulahechsten sien Sän jenant woaren; un Gott de Har woat am sien Voda David  sienen Troon jäwen. Un hee woat eewich äwa Israel Kjennich sennen” (Luk. 1:32-33). Jeweenlich acht wie dolla opp daut ieeschte Poat von dän Varsch, wua daut sajcht, daut Jesus wudd “dän Aulahechsten sien Sän” jenant woaren. Oba Gabriel säd uk verut, daut Jesus wudd “Kjennich sennen”. Denkj mol han, waut Maria docht, aus see daut hieed. Docht see, daut Jesus wudd en Israel aus Kjennich rejieren en dän Kjennich Herodes ooda eenen aundren Kjennich siene Städ? Wan Jesus wudd de Kjennich woaren, dan wudd see aus dän Kjennich siene Mutta besonda jeieet woaren un met äare Famielje toop kjennen em Kjennichshus wonen. Oba de Schreft sajcht noanich, daut Maria irjent soowaut to Gabriel säd ooda daut see no eene besondre Städ en daut Kjennichrikj fruach, soo aus twee von Jesus siene Jinja daut deeden (Mat. 20:20-23). Wan wie aun daut denkjen, woat ons daut noch kloara, woo deemootich Maria wia!

19-20. Wuarom studia wie, soo aus Jakobus 1:22-25 un 4:8 sajcht?

19 Well wie em Denkj hoolen, daut wie Gott sien Wuat un onse Bieekja studieren toom Jehova noda komen. Wie doonen daut uk toom weeten, waut fa Menschen wie sent un wua wie ons noch endren motten toom Gott jefaulen (läs Jakobus 1:22-25; 4:8). Doawäajen sell wie Jehova emma no sienen heiljen Jeist froagen, ea wie studieren. Wie sellen am no Help prachren, daut wie soo väl aus mäajlich lieren kjennen un daut wie seenen, wua wie ons noch endren motten.

20 Well wie aula soo sennen aus de trua Maun, von dän de Psalmenschriewa sajcht, daut dee “siene Freid aun däm HARN sien Jesaz haft, un sikj Dach un Nacht doamet beschafticht. . . . Am jelinjt wautemma hee deit” (Psa. 1:2-3).

LEET 88 Wies mie diene Wäaj

^ Varsch 5 Jehova jeft ons sea väl toom kjikjen, läsen un studieren. Dis Artikjel woat ons dietlich moaken, waut wie studieren sellen, un woat ons gooden Rot jäwen, woo ons daut studieren daut mieeschte halpen kaun.

^ Varsch 16 Du wurscht uk opp jw.org de Videos kjikjen kjennen met Eenselheiten äwa de Bibelbieekja. Go no BIEEKJA UN MEA > VIDEOS > DE SCHREFT.

^ Varsch 62 BILTBESCHRIEWUNK: De Elren wiesen äare Kjinja, woo eena sikj jieda Wäakj reedmoaken kaun fa daut Woaktorm-Studium.

^ Varsch 64 BILTBESCHRIEWUNK: Een Brooda sieekjt sikj waut no äwa dän Bibelschriewa Amos. Opp de Bilda hinja dän Brooda es daut to seenen, waut dee sikj väastalt, aus dee de Bibelvarzh läst un doaräwa nodenkjt.