Trigj nom Enhault

No de Enhaultslist gonen

Junge Menschen – stot faust jäajen dän beesen Fient

Junge Menschen – stot faust jäajen dän beesen Fient

“Lajcht junt daut Jescher opp, daut Gott fa junt reed haft, daut jie bestonen kjennen, wan de beesa Fient junt aunjript” (EFS. 6:11)

LEEDA: 79, 135

1-2. (a) Wuarom kjennen junge Christen dän Kjrich jäajen de beese Jeista jewennen? (See daut Bilt aum Aunfank.) (b) Waut woa wie nu seenen?

DE Apostel Paulus vejlikjt Christen met Soldoten. Wie sent em Kjrich un haben opp iernst Fiend jäajen ons. Oba ons Kjrich es nich jäajen Menschen; dee es jäajen dän Soton un siene beese Jeista. Daut sent erfoarne Kjrieja, waut goot utjelieet sent. Ons kunn daut schwierich schienen dee to jewennen, besonda wan eena noch junk es. Kjennen junge Menschen dan jäajen soone majchtje Jäajna jewennen? Jo, dee kjennen un dee doonen uk, wiels dee “stoakj woaren derch dee Krauft, dee de Har . . . [an] jeft.” Oba dee veloten sikj nich bloos opp Gott siene Krauft. Biejlikj soo aus Soldoten, waut fein utjelieet sent, lajen dee sikj uk aul daut “Jescher opp, daut Gott fa . . . [an] reed haft” (läs Efeesa 6:10-12).

2 Aus Paulus von dit räd, docht hee veleicht aun de reemische Soldoten äa Kjrichsjereetschoft (Apj. 28:16). Wuarom dit Jlikjnis soo paussent es, woa wie nu seenen. Wie woaren uk seenen, waut eenje junge Menschen fa Schwierichkjeiten hauden un woo dee daut jeholpen haft, jieda Poat von dit Kjrichsjereetschoft to brucken.

Brukst du jieda Poat von dien Kjrichsjereetschoft?

 “DE WOARHEIT . . . AUS EENEN GORT”

3-4. Wuarom es de Woarheit ut de Schreft soo aus eenen reemischen Soldot sien Belt?

3 Läs Efeesa 6:14. De reemische Soldoten hauden eenen Gort, ooda Belt, met hoade Plotjes doa aun, waut dee äare Lint schizt un dee äa schwoaret Brostschilt bowen hilt. Doa wieren eenjemol uk stoakje Hoakes aun fa äa Schwieet un äa Massa. Wan de Soldoten äa Belt faust omhauden, dan feelden dee sikj em Kjrich sechra.

4 Soo aus een Belt schizt de Woarheit ut Gott sien Wuat ons fa faulsche Lieren (Joh. 8:31-32; 1. Joh. 4:1). Je dolla wie de Woarheit ut Gott sien Wuat leewen, je leichta es ons daut, ons “Brostschilt” to droagen, aulsoo no Gott siene jerajchte Väaschreften to läwen (Psa. 111:7-8; 1. Joh. 5:3). Un wan wie dise Woarheit kloa vestonen, dan feel wie ons uk sechra un kjennen dee bäta veteidjen, wan doa wäa jäajen ons es (1. Pet. 3:15).

5. Wuarom sell wie de Woarheit räden?

5 Wan wie de Woarheit ut de Schreft soo aus een Belt om ons haben, dan woa wie daut nokomen, waut de Schreft sajcht, un emma de Woarheit räden. Wuarom lieej wie nich? Wiels Läajes sent eent von daut, wua de Fient daut baste met schaufen kaun. Wäa licht, dee schot sikj selfst un uk deejanje, waut de Läajes jleewen (Joh. 8:44). Doawäajen strenj wie ons aun, nienich to lieejen, wan wie uk onvolkomen sent (Efs. 4:25). Oba daut haft eenjemol noch waut opp sikj. Abigail, waut 18 Joa es, sajcht: “Eenjemol späat sikj daut soo, daut loont sikj goanich, bie de Woarheit to bliewen, besonda wan eena sikj met Läajes kunn utem Ruak brinjen.” Wuarom prooft see doawäajen, emma de Woarheit to räden? See sajcht: “Wan ekj bie de Woarheit bliew, dan hab ekj een frieet Jewessen ver Jehova. Un miene Elren un Frind weeten, daut see mie vetruen kjennen.” Victoria, waut 23 Joa es, sajcht: “Wan eena de Woarheit rät un fa sienen Gloowen ensteit, dan behaundlen se eenem veleicht schlajcht. Oba daut es doawäajen emma goot, wiels eena woat dan äwanämenda un feelt sikj Jehova noda un woat dolla jeacht von dee, waut eenem leewen.” Daut es daut goot wieet, de Woarheit emma om ons to haben, soo aus een Belt!

De Woarheit aus een Belt (See Varsch 3-5)

“DE JERAJCHTICHKJEIT . . . AUS EEN BROSTSCHILT”

6-7. Wuarom es de Jerajchtichkjeit soo aus een Brostschilt?

6 Eene Sort Brostschilt, waut de reemische Soldoten ieeschtemma brukten, wia von jeboagne Iesasträmels jemoakt, waut dedwäa äware Brost kjeemen. De Iesasträmels worden met Ladareemes faustjemoakt, wua Hoakes un Schnalen aun wieren. Äware Schulren hauden dee uk noch Iesasträmels, waut met Lada faustjemoakt worden. Met daut Brostschilt kunnen de Soldoten sikj nich soo goot bewäajen. Dee musten uk emma wada noseenen, aus de Iesasträmels doa noch faust oppe rajchte Städ wieren. Oba wan dee dit Brostschilt brukten, dan wia äa Hoat un aundret bäta fa de Feilen un Schwieets jeschizt.

7 Daut es een feinet Jlikjnis doafäa, woo Jehova siene jerajchte Väaschreften ons Hoat, ooda waut wie ennalich sent, beschitzen kjennen (Spr. 4:23). Een Soldot wudd nienich sien iesanet Brostschilt fa een aundret tuschen, waut schwaka jemoakt wia. Krakjt soo wudd wie nienich Jehova siene Väaschreften fa onse ieejne Iedeeen tuschen, wiels wie eefach nich selfst emstaunt sent, ons Hoat to beschitzen (Spr. 3:5-6). Doawäajen mott wie emma wada kjikjen, aus ons Brostschilt, waut wie von Jehova haben, noch faust äwa ons Hoat es.

8. Wuarom loont sikj daut, no Jehova siene Väaschreften to läwen?

 8 Feelst du die eenjemol soo, daut Jehova siene jerajchte Väaschreften die doldrekjen ooda die de Frieheit wajchnämen? Daniel, waut 21 Joa es, sajcht: “De Lierasch un de Schoolpoatna hauden sikj domm äwa mie, wiels ekj no de Schreft läwen wull. Een Stootje feeld ekj mie onsecha un wia sea bedrekjt.” Woo feelt hee sikj nu? Hee sajcht: “Met de Tiet sach ekj, woo goot daut utkjeem no Jehova to horchen. Eenje von miene Schoolfrind fungen aun Droggs to brucken un aundre kjeemen nich mea no de School. Daut wia truarich to seenen, woo sikj daut met dee romneem. Jehova schizt ons werkjlich.” Madison, waut 15 es, sajcht: “Daut es schwoa fa mie, daut to doonen, waut Jehova fa rajcht talt, un nich daut, waut de aundre junge Menschen fa Scheengonen talen.” Woo woat see doamet foadich? “Ekj denkj emma doaraun, daut ekj Jehova sienen Nomen droag un daut de Vesieekjungen von dän Soton komen. Un wan ekj nich biejäw, feel ekj mie froo.”

De Jerajchtichkjeit aus een Brostschilt (See Varsch 6-8)

“DAUT EVANGELIUM, DAUT DÄN FRÄD BRINJT, TRAKJT AUN SOO AUS SCHOO”

9-11. (a) Waut fa besondre Schoo haben Christen? (b) Woo kjenn wie ons sechra feelen, wan wie de goode Norecht bekauntmoaken?

9 Läs Efeesa 6:15. Een reemischa Soldot wia nich reed em Kjrich to gonen, wan dee nich siene Schoo aunhaud. De Schoo wieren dreeschichtich von Lada jemoakt, soo daut dee duarhauft un stoakj wieren. Oba dee wieren uk maklich, soo daut eena fein gonen kunn un nich hanjlept.

10 De reemische Soldoten äare Schoo holpen dee em Kjrich. Wie aus Christen haben soo to sajen uk Schoo, oba dee halpen ons, aundre eene Frädensnorecht to brinjen (Jes. 52:7; Reem. 10:15). Eenjemol brukt daut Moot, wan eena aundre prädjen well. Bo, waut 20 Joa es, sajcht: “Ekj haud Angst, miene Schoolpoatna Zeichnis to jäwen. Ekj jleew, mie schämd sikj daut. Oba nu weet ekj, doa wia kjeene Uasoak toom mie schämen. Nu jeit mie daut scheen, aundre en mien Ella to prädjen.”

11 Een deel junge Menschen haben utjefungen, daut dee sikj sechra feelen biem prädjen, wan dee sikj fein reedmoaken. Woo kaun eena daut doonen? Julia, waut 16 es, sajcht: “Ekj hab emma waut von onse Bieekja enne Schooltausch, un ekj kjikj doano, waut miene Schoolpoatna jleewen un sajen. Dan kaun ekj mie äwalajen, waut dee halpen woat. Wan ekj mie soo reedmoak, dan kaun ekj met dee krakjt von soont räden, aus dee fält.” Makenzie, waut 23 es, sajcht: “Wan eena leeftolich es un goot toohorcht, dan woat eena en, waut aundre junge Menschen fa Sorjen haben. Ekj see doano, daut ekj aules läs, waut wie fa junge Menschen haben. Soo kaun ekj dee waut ut de Schreft ooda von jw.org wiesen, waut dee halpt.” Waut wiest ons dit? Wan eena sikj fein reedmoakt toom prädjen, dan es daut soo aus wan eena Schoo aunhaft, waut eenem fein paussen.

Daut Evangelium aus Schoo (See Varsch 9-11)

“DÄN GLOOWEN AUS EENEN SCHILT”

12-13. Waut sent eenje von dän Soton siene “brennende Feilen”?

12 Läs Efeesa 6:16. De reemische Soldoten hauden een grootet Schilt, waut lenja aus breet wia un von de Schulren bat de Kjneeen rieekjt. Daut schizt dee fa Schwieets, Spiessen un Feilen.

13 Waut vonne “brennende Feilen” kunn de Fient no die scheeten? Veleicht well hee die Läajes äwa Jehova enbillen, biejlikj daut Jehova die nich leeft un daut kjeena waut om die romjeft. Ida, waut 19 Joa es, feelt sikj eenjemol nuscht wieet. See sajcht: “Mie haft sikj aul foaken soo jespäat, daut  Jehova wiet auf wia un nich wull mien Frint sennen.” Woo woat see doamet foadich? Ida sajcht: “De Toopkomes stoakjen mienen Gloowen sea. Ea jeef ekj nienich eene Auntwuat; ekj saut doa bloos un docht, daut kjeena daut hieren wull, waut ekj to sajen haud. Oba nu moak ekj mie reed fa de Toopkomes un vesieekj, twee ooda dree Auntwuaten to jäwen. Daut es nich leicht, oba ekj feel mie väl bäta, wan ekj daut doo. De Breeda un Sestren spräakjen mie väl Moot too. Wan ekj von de Toopkomes trigjkom, dan kaun ekj emma späaren, daut Jehova mie leeft.”

14. Waut kjenn wie von Ida äare Jeschicht lieren?

14 Von Ida äare Jeschicht kjenn wie waut wichtjet lieren. Daut Schilt von eenen Soldot haft eene fauste Mot. Oba met onsen Gloowen es daut nich soo – dee kaun jrata ooda kjlanda woaren. Daut es gaunz en onse Henj (Mat. 14:31; 2. Tess. 1:3). Doawäajen mott wie onsen Gloowen emma jrata un stoakja moaken.

Dän Gloowen aus een grootet Schilt (See Varsch 12-14)

“JUNE RADUNK . . . AUS EENEN HOOT”

15-16. En waut fa Stekjen es onse Hopninj soo aus een Schutzhelm?

15 Läs Efeesa 6:17. De Hoot, ooda Schutzhelm, von de reemische Soldoten schizt dän Kopp, daut Jenekj un daut Jesecht. Eenje Schutzhelms hauden eene Jräp, daut de Soldoten dee uk enne Henj droagen kunnen.

16 Krakjt soo aus de Schutzhelm dän Soldot sien Vestaunt schizt, soo schizt “de  Hopninj opp onse Seelichkjeit” ons Vestaunt, ooda ons denkjen (1. Tess. 5:8; Spr. 3:21). De Hopninj halpt ons Gott siene Vespräakjungen em Uag to hoolen un nich mootloos to woaren wäajen onse Trubbels (Psa. 27:1, 14; Apj. 24:15). Oba wan ons Helm ons schitzen saul, dan mott wie dän oppem Kopp haben un nich enne Henj.

17-18. (a) Woo well de Soton ons bat doa brinjen, onsen Helm auftonämen? (b) Woo kjenn wie wiesen, daut de Soton ons nich kaun hinjaret Licht fieren?

17 Woo well de Soton ons bat doa brinjen, onsen Helm auftonämen? See wie mol, woo dee Jesus vesocht. De Soton wist secha, daut Jesus noch mol wudd äwa de Menschen rejieren. Oba Jesus wudd motten wachten, bat Jehova am toom Kjennich muak. Un ea wudd hee noch motten lieden un stoawen. Oba de Soton säd to Jesus, hee wudd nu aul kjennen Kjennich woaren. Wan hee am bloos eemol aunbäden wudd, wudd hee fuaz kjennen rejieren (Luk. 4:5-7). De Fient weet, daut Jehova ons fa de niee Welt väl goodet vesproaken haft. Oba wie motten ieescht wachten, bat Gott sien Vespräakjen erfelt, un ea daut bat doa es, hab wie woomäajlich noch väl Schwierichkjeiten. Oba de Soton well ons enbillen, daut wie nu aul kjennen een harlichet Läwen haben, wan wie daut ieeschte no tietelje Dinj sieekjen un dan no Gott sien Kjennichrikj (Mat. 6:31-33).

18 Daut jeft een deel junge Christen, waut de Fient nich kaun hinjaret Licht fieren. Kiana, waut 20 Joa es, sajcht: “Ekj weet, daut bloos Gott sien Kjennichrikj onse Trubbels leesen kaun.” Woo halpt ar dise Hopninj en äa Läwen? See sajcht: “De Hopninj, daut ekj kaun em Paradies läwen, halpt mie, daut ekj nich too sea no tieteljet sträw. Ekj sie nich doano hinjaraun, een deel Jelt to vedeenen ooda en de Oabeit emma wieda no bowen to komen. Enne Städ daut bruck ekj miene Tiet un Krauft toom no jeisteljet sträwen.”

De Radunk aus eenen Schutzhelm (See Varsch 15-18)

“GOTT SIEN WUAT . . . EEN SCHWIEET, DAUT DE JEIST JUNT JEFT”

19-20. Woo kjenn wie lieren, Gott sien Wuat noch bäta to brucken?

19 De reemische Soldoten hauden Schwieets, waut ojjefäa 50 Zentimeeta (20 Zoll) lank wieren. Dee vestunden dee sea fein to brucken, wiels dee jieda Dach eewden.

20 Paulus vejlikjt Gott sien Wuat met een Schwieet. Jehova haft ons daut jejäft, oba wie motten lieren, daut fein to brucken, om onsen Gloowen to veteidjen ooda ons ieejnet denkjen trajchttostalen (2. Kor. 10:4-5; 2. Tim. 2:15). Woo kaun eena sikj doarenn noch vebätren? Sebastian, waut 21 Joa es, sajcht: “Wan ekj de Bibel läs, schriew ekj mie von jieda Kapitel eenen Varsch opp. Ekj stal mie von miene baste Bibelvarzh eene List toop. Daut halpt mie, dolla soo to denkjen, aus Jehova denkjt.” Daniel, von dän wie ea aul räden, sajcht: “Wan ekj de Schreft läs, dan läs ekj mie Varzh ut, waut de Menschen em Deenst kunnen halpen. Ekj hab jemoakjt, daut dee dolla toohorchen, wan eena selfst voll von de Schreft es.”

Daut Schwieet, waut de Jeist ons jeft (See Varsch 19-20)

21. Wuarom bruck wie ons nich fa dän Soton un de beese Jeista grulen?

21 Soo aus wie von de junge Menschen en disen Artikjel jelieet haben, bruck wie ons nich fa dän Soton un de beese Jeista grulen. Dee sent stoakj, oba dee jeit to jewennen. Dee woaren nich fa emma läwen. En Christus sien dusentjoaschet Rikj woaren dee faustjenomen sennen un nuscht doonen kjennen, un no daut woaren dee venicht woaren (Opb. 20:1-3, 7-10). Wie kjanen onsen Fient un wie weeten, woo dee schauft un waut dee em Senn haft. Met Jehova siene Help kjenn wie jäajen dän bestonen!