Trigj nom Enhault

No de Enhaultslist gonen

Vondoag dän Dach no de Trompeeten horchen

Vondoag dän Dach no de Trompeeten horchen

WIE aula jleewen, daut Jehova “en de latste Doag” siene Deena leiden deit un dee halpt, em Gloowen stoakj to bliewen (2. Tim. 3:1). Un wie aula motten no am horchen, krakjt soo aus de Israeliten en de Wiltnis no de Trompeeten horchen musten.

Jehova säd, daut Moses twee Trompeeten von jeprastet Selwa moaken sull, “om de Vesaumlunk tooptoroopen” un wan de Israeliten sikj sullen “reedmoaken toom loosreisen” (4. Mo. 10:2). Doano woo de Priestasch met de Trompeeten blosen deeden, wisten de Menschen, waut see doonen sullen (4. Mo. 10:3-8). Waut kjenn wie von daut lieren? Vondoag dän Dach sellen Gott siene Deena uk veschiednet doonen. Un en disen Artikjel woa wie dreeatlei doavon seenen: Wie woaren no groote Toopkomes jekroacht, de Eltestasch woaren utjelieet un eenjemol endat sikj daut, woo Sachen en de Vesaumlunk jedonen sellen.

WAN WIE GROOTE TOOPKOMES HABEN

Wan Jehova ieeschtemma wull, daut “de [gaunze] Jemeent” sikj aun de oostne Sied von daut Vesaumlungszelt bie dän Engank vesaumeld, dan blosden de Priestasch met de beid Trompeeten (4. Mo. 10:3). De Stam wieren en vea Gruppen enjedeelt un jieda Grupp haud äare Zelten opp eene aundre Sied von daut Vesaumlungszelt. Soo kunnen aule daut hieren, wan dee met de Trompeeten blosden. Eenje wonden dicht bie dän Engank un kunnen doa fuaz hankomen. Bie aundre haud daut noch waut opp sikj, wiels dee wieda auf wonden un daut lenja dieed, bat dee doa wieren. Oba Jehova wull, daut aule doa hankjeemen un horchten, waut hee an to sajen haud.

Vondoag dän Dach vesaumel wie ons nich bie een Vesaumlungszelt, oba wie woaren no aundre Toopkomes jekroacht. Wie haben biejlikj dreedoagsche Kongressen un aundre besondre Toopkomes, wua wie wichtje Sachen lieren un Aunwiesungen kjrieen. Oppe gaunze Welt kjennen Jehova siene Deena doa dautselwje lieren. Aule, waut doa hankomen, jeit daut scheen, doa met äare Gloowesbreeda toop to sennen. Eenje motten sea wiet reisen. Oba dee, waut doa hankomen, sajen, daut sikj daut loont.

Woo es daut bie soone Breeda, waut wiet auf wonen un sikj mau en kjliene Gruppen vesaumlen kjennen? Väle von dee komen de groote Toopkomes uk togood, wäajen dee oppjeschnakt woaren un see dee seenen un hieren kjennen. Un daut es dan meist soo, aus wan see doa uk sennen wudden. Soo wia daut biejlikj, aus een Veträda von de Hauptoffiz no daut Betel von Benin  kjeem. Daut jeef een grootet Toopkomen, wua met aules toop 44 131 Toohiera wieren. Un daut kjeem mau rajcht de Breeda en de Sahara-Wieste en daut Launt Niger togood. Doa en de Staut Arlit kunnen 21 Persoonen daut Program seenen un hieren. Dee wieren wiet auf, oba dee feelden sikj met äare Gloowesbreeda veeent. Een Brooda schreef: “Sea dankscheen, daut wie dit Program uk haben kunnen. Daut haft ons wada dietlich jemoakt, woo väl jie ons räakjnen.”

WAN DE ELTESTASCH UTJELIEET WOAREN

Wan de israelitische Priestasch bloos met eene Trompeet blosden, dan musten “de Staumleida, waut Hauptmana äwa dusende” wieren, no daut Vesaumlungszelt komen (4. Mo. 10:4). Doa kunn Moses dee dan waut sajen un dee utlieren. Daut holp dise Mana, äare Oppgowen noch bäta notokomen. Wurscht du die nich uk haben aunjestrenjt toom doa hankomen un fein toohorchen, wan du wieescht soon Staumleida jewast?

De Eltestasch vondoag dän Dach sent nich “Staumleida” un dee harschen uk nich äwa Gott siene Häad (1. Pet. 5:1-3). Dee doonen äa bastet, sikj om Gott siene Schop to kjemren. Doawäajen loten dee sikj wellich utlieren, biejlikj en de Kjennichrikjsdeenst-School. Doa lieren de Eltestasch, woo dee sikj noch bäta om de Vesaumlunk kjemren kjennen. Daut halpt an selfst un uk de aundre von de Vesaumlunk, Jehova noch noda to komen. Opp dee Wajch kjemt dise School aulem togood, mau rajcht dee, waut doa nich kjennen hangonen.

WAN DAUT ENDRUNGEN JEFT

Eenjemol deeden de israelitische Priestasch sea lud met de Trompeeten blosen. Daut bedied, daut Jehova wull, daut aule Israeliten wiedatrocken (4. Mo. 10:5-6). Daut jeef Räajlen, woo dee daut krakjt doonen sullen, oba daut wia doawäajen väl Oabeit. Un secha jleichten eenje Israeliten daut nich sea. Wuarom nich?

Veleicht späad eenje sikj daut soo, daut see too foaken omtrakjen musten ooda daut see daut nich lang jenuach em verut wisten. Eenjemol wia “de Wolkj vom Owent bat aum Morjen doa” un hoof sikj dan opp. Un opp aundatsmol dieed daut “twee Doag ooda eene Moonat ooda noch lenja”, bat dee wada omtrakjen sullen (4. Mo. 9:21-22). Woo väl Mol musten de Israeliten wiedatrakjen? 4. Mose, Kapitel 33 rät doavon, daut dee opp ojjefäa 40 veschiedne Städen wieren.

Wan dee wua hantrocken, fungen eenje veleicht eene feine Städ, wua Schauten wia. En “de groote Wiltnis . . . dee rajcht toom enjsten wia”, wia soont secha aunjenäm (5. Mo. 1:19). Eena kaun sikj dietlich moaken, daut dee daut nich sea jankad, von doa to veloten.

Wan de Israeliten wiedatrocken, dan musten dee jeduldich wachten, bat daut ieescht bat äaren Staum wia. Dee kunnen daut aula hieren, wan de Trompeeten sea lud blosden, oba dee kunnen nich aula tojlikj wajchtrakjen. Wan see daut hieeden, dan sullen de dree Stam Juda, Isachar un Sebulon wajchtrakjen, waut aun de oostne Sied von daut Vesaumlungszelt wonden (4. Mo. 2:3-7; 10:5-6). Wan dee ieescht fuat wieren, dan blosden de Priestasch toom tweede Mol, daut de dree Stam wajchtrakjen sullen, waut em Sieden wieren. Un soo deeden de Priestasch daut wieda, bat aule Israeliten veloten hauden.

Veleicht es ons daut uk eenjemol schwoa, wan sikj en Jehova sien Volkj waut endat. Veleicht späat sikj ons daut soo, daut doa too väl opp eemol jeendat woat. Ooda wie jleichen daut soo, aus daut ea wia, un wellen nich, daut sikj daut endren saul. Dan es daut secha nich leicht fa ons, jeduldich to bliewen un ons to daut niee to wanen. Oba wan wie daut doonen, dan woa wie secha enwoaren, daut Gott ons säajent.

En Moses siene Tiet leid Jehova millionende Israeliten derch de Wiltnis un sorjd fa an. Onen siene Help wudden dise Mana, Frues un Kjinja nich äwaläft haben. Vondoag dän Dach deit Jehova ons uk leiden. Hee halpt ons, daut wie en dise schwoare Tiet kjennen em Gloowen stoakj bliewen un siene Frind sennen. Doawäajen well wie am emma jehuarsom sennen, soo aus de true Israeliten daut deeden, wan see de Trompeeten hieeden!