Trigj nom Enhault

No de Enhaultslist gonen

 26. ARTIKJEL FA DAUT STUDIUM

Halp aundre met Schwierichkjeiten foadich to woaren

Halp aundre met Schwierichkjeiten foadich to woaren

“Jie motten junt . . . em Jeist eenich sennen, metlieden haben, breedalich goot sennen un von Hoaten deemootich sennen” (1. PET. 3:8)

LEET 109 Siet junt von Hoaten goot

WAUT WIE SEENEN WOAREN *

1. Woo kjenn wie onsen leeftoljen Voda Jehova nodoonen?

JEHOVA leeft ons sea (Joh. 3:16). Wie wellen onsen leeftoljen Voda nodoonen. Doawäajen well wie met aulem Metleet haben un “breedalich goot sennen”, oba besonda “dee, dee met ons toop em Gloowen stonen” (1. Pet. 3:8; Gal. 6:10). Wan onse Gloowesbreeda Trubbels haben, dan well wie dee biestonen.

2. Waut woa wie en disen Artikjel seenen?

2 Aul dee, waut to Jehova siene Famielje jehieren wellen, woaren schwoaret derchgonen (Mar. 10:29-30). Un je noda daut Enj von dise Welt kjemt, je mea Trubbels woa wie woomäajlich haben. Woo kjenn wie ons unjarenaunda biestonen? See wie mol, waut wie von Loot, Hiob un Noomi äare Jeschicht lieren kjennen. Wie woaren uk von eenje Schwierichkjeiten räden, waut onse Breeda un Sestren vondoag dän Dach derchmoaken un woo wie dee doamet halpen kjennen.

JEDULDICH SENNEN

3. (a) Waut fa eene schlajchte Entscheidunk muak Loot, soo aus 2. Petrus 2:7-8 sajcht? (b) Woo kjeem daut ut?

3 Daut wia eene schlajchte Entscheidunk, daut Loot no Sodom trock, wua de Menschen een sea orreinet Läwen fieeden (läs 2. Petrus 2:7-8). De Menschen hauden doa een goodet Wiedakomen, oba Loot kjrieech väl Trubbels, wäajen see doa  hantrocken (1. Mo. 13:8-13; 14:12). Daut späat sikj soo, daut siene Fru de Staut Sodom ooda eenje Menschen doa soo sea jleicht, daut see Jehova nich jehorcht. See kjeem todood, aus Gott doa Fia un Schwäwelblitt vom Himmel räajnen leet. Un denkj mol aun Loot siene twee Dajchta. De Mana, waut sikj met dee befrieen wullen, storwen en Sodom. Loot velua uk sien Hus un sien Hab un Goot, un daut schlemste wia, daut siene Fru storf (1. Mo. 19:12-14, 17, 26). Velua Jehova siene Jedult met Loot, aus hee dit schwoare derchmuak? Nä.

Jehova schekjt Enjel, om Loot un siene Famielje to raden, wäajen hee om dee bekjemmat wia (See Varsch 4)

4. Woo wia to seenen, daut Jehova jeduldich met Loot wia? (See daut Bilt oppe väaschte Sied.)

4 Wan Loot sikj daut uk selfst wäld, en Sodom to läwen, haud Jehova doch Metleet met am un siene Famielje un schekjt Enjel toom dee raden. Oba enne Städ fuaz no dee to horchen un Sodom to veloten, schluad Loot. De Enjel musten am bie de Haunt nämen un am un siene Famielje halpen, sikj von de Staut fuattobrinjen (1. Mo. 19:15-16). De Enjel säden to am, see sullen no de Boaj ranen. Oba enne Städ Jehova to jehorchen, fruach Loot, aus see no eene Staut doa dicht bie ranen kunnen (1. Mo. 19:17-20). Jehova wia jeduldich met Loot un leet daut too. Lota kjrieech Loot Angst en dise Staut un trock no de Boaj – krakjt doahan, wua Jehova am aul ea hanjeschekjt haud (1. Mo. 19:30). Jehova wia sea jeduldich met Loot! Woo kjenn wie am nodoonen?

5-6. Woo kjenn wie Gott nodoonen un daut doonen, waut 1. Tessalonicha 5:14 sajcht?

5 Soo aus Loot deit een Gloowesbrooda sikj veleicht nich rajcht entscheiden un rieet sikj doaderch Trubbels en. Waut doo wie dan? Veleicht wudd ons dän dan jankren to sajen, daut hee nu daut arnt, waut hee jeseit haft, un daut wudd je uk stemmen (Gal. 6:7). Oba daut wudd bäta sennen, wan wie dän krakjt soo halpen wudden, aus Jehova Loot deed. Woo kjenn wie daut?

6 Jehova schekjt siene Enjel nich bloos toom Loot woarnen. Dee sullen am uk halpen ut Sodom ruttokomen. Krakjt soo mott wie onse Breeda woarnen, wan wie seenen, daut dee waut doonen wellen, waut dee Trubbels brinjen kaun. Wie motten met dee mau rajcht dan jeduldich sennen, wan dee dän biblischen Rot nich fuaz aunnämen, waut wie dee jäwen. Wie wellen soo sennen aus de twee Enjel un wieda proowen, dee opp irjenteene Wajch to halpen, enne Städ ons von dee trigjtotrakjen (1. Joh. 3:18). Veleicht mott wie dee aunbeeden, dee soo to sajen bie de Haunt to nämen un dee to halpen, dän gooden Rot notokomen, waut dee jekjräajen haben (läs 1. Tessalonicha 5:14).

7. (a) Woo docht Jehova äwa Loot? (b) Woo kjenn wie Jehova nodoonen?

7 Jehova haud kunt no Loot siene Schwakheiten kjikjen. Oba enne Städ daut leet hee dän Apostel Petrus lota oppschriewen, daut Loot een jerajchta Maun wia. Woo scheen es daut nich, daut Jehova nich no onse Fäla kjikjt! (Psa. 130:3). Wudd wie Jehova en dän Stekj kjennen nodoonen? Wan wie no de goode Sieden von onse Breeda un Sestren kjikjen, dan woa wie jeduldja met dee sennen. Un fa dee woat et dan secha leichta sennen, sikj von ons halpen to loten.

METFEELENT SENNEN

8. Waut woa wie doonen, wan wie metfeelent sent?

8 Bie Hiob wia daut aundasch aus bie Loot, wiels hee nich wäajen eene schlajchte Entscheidunk lieden must. Hiob haud groote Schwierichkjeiten: Hee velua sien Hab un Goot, sienen gooden Nomen un siene Jesuntheit. Noch schlemma wia, daut aul äare Kjinja  storwen. Doa kjeemen uk dree schlajchte Frind un räden hoat to am. Wuarom hauden dee nich Metleet met Hiob? Eene Uasoak wia, daut dee nich werkjlich vesochten to vestonen, waut doa aunjinkj. Doawäajen dochten see schlajcht äwa Hiob un deeden am strenj rechten. Waut kjenn wie doonen, daut wie nich uk soone Fäla moaken? Denkj doaraun, daut bloos Jehova aule Omstend kjant. Horch dänjanjen oppmoakjsom too, waut Schwierichkjeiten haft, un proow to vestonen, woo dee sikj feelt. Bloos soo woascht du dienen Brooda ooda Sesta kjennen opp iernst Metjefeel wiesen.

9. (a) Waut woa wie nich doonen, wan wie Metjefeel haben? (b) Wuarom woa wie daut nich doonen?

9 Wan wie Metjefeel haben, dan woa wie äwa aundre äare Trubbels nich pludren. Wäa pludat, but de Breeda enne Vesaumlunk nich opp, oba brinjt dee rauf (Spr. 20:19; Reem. 14:19). Soona es nich leeftolich, oba onväasechtich un kaun aundre met siene Wieed weedoonen, waut daut aulmols aul schwoa haben (Spr. 12:18; Efs. 4:31-32). Daut es väl bäta, wan wie no aundre äare goode Sieden kjikjen un äwalajen, woo wie dee met äare Trubbels halpen kjennen.

Horch jeduldich too, wan een Gloowesbrooda “onbedochte Räd” haft, un spräakj dän to de rajchte Tiet Moot too (See Varsch 10-11) *

10. Waut lieet Hiob 6:2-3 ons?

10 Läs Hiob 6:2-3. Hiob haud eenjemol “onbedochte Räd”. Lota stunt hee too, daut eenjet nich rajcht wia, waut hee säd (Hiob 42:6). Menschen, waut Schwierichkjeiten haben, kjennen uk vondoag dän Dach onbedocht räden un soont sajen, waut dee lota beschoden, soo aus Hiob. Waut sell wie dan doonen? Wie sellen metfeelent sennen, enne Städ dee uttogrunzen. Jehova haft kjeenmol wult, daut wie sullen Trubbels un Sorjen haben. Doawäajen  es daut nich toom wundren, wan wäa von Jehova siene true Deena onbedocht rät, wan dee groote Schwierichkjeiten haft. Wie sellen ons nich fuaz oajren ooda dän wäajen siene Wieed rechten, wan dee veleicht uk waut orrajchtet äwa Jehova ooda äwa ons sajcht (Spr. 19:11).

11. Woo kjennen Eltestasch Elihu nodoonen, wan dee Rot jäwen?

11 Soone, waut Schwierichkjeiten haben, fält eenjemol uk Rot ooda mott leeftolich trajchtjewäsen (Gal. 6:1). Woo kjennen de Eltestasch dee halpen? Dee sellen Elihu nodoonen, waut Metjefeel haud un Hiob toohorcht (Hiob 33:6-7). Aus Elihu ieescht vestonen kunn, woo Hiob sikj feeld, jeef hee am Rot. Eltestasch, waut Elihu nodoonen, woaren oppmoakjsom toohorchen un proowen to vestonen, woo dän aundren daut jeit. Wan dee dän dan Rot jäwen, dan woat deejanja daut woomäajlich ea aunnämen.

AUNDRE TREESTEN

12. Waut deed daut aun Noomi, daut äa Maun un äare beid Säns storwen?

12 Noomi wia eene true Fru, waut Jehova leewd. Oba aus äa Maun un äare beid Säns storwen, wull see nich mea Noomi heeten, oba “Mara”, waut “betta” bediet (Rut 1:3, 5, 20, Fn., 21). Noomi äare Schwieedochta Rut stunt ar en äare Trubbels bie. Rut holp ar un spruak ar Moot too. Met eefache un opprechtje Wieed leet Rut Noomi weeten, daut see ar leewd un halpen wull (Rut 1:16-17).

13. Wuarom brucken deejanje, waut äaren Ehepoatna veloaren haben, onse Help?

13 Wan de Ehepoatna von eenen Brooda ooda von eene Sesta stoaft, dan brukt dee onse Help. Een Poa Lied es biejlikj soo aus twee Beem, waut dicht toop oppjewossen sent. Met de Joaren sent dee äare Wartlen toopjedroselt. Wan dan eena von dee utjeräten woat, dan kaun daut dän aundren sea toosaten. Biejlikj soo kaun eenem daut joarenlank sea toosaten, wan de Ehepoatna stoaft. Paula * äa Maun storf plazlich. See sajcht: “Mien Läwen dreid gaunz äwakopp un ekj feeld mie helploos. Ekj haud mienen basten Frint veloaren. Ekj kunn met mienen Maun äwa aules räden. Hee freid sikj emma met mie toop un holp mie, wan mie daut schlajcht jinkj. Ekj kunn mie emma bie am utschedden. Aus hee storf, feeld ekj mie soo, aus wudd de Halft von mie fälen.”

Woo kjenn wie dee unjastetten, waut äaren Poatna veloaren haben? (See Varsch 14-15) *

14-15. Woo kjenn wie wäm treesten, wäms Ehepoatna jestorwen es?

14 Woo kjenn wie wäm treesten, wäms Ehepoatna jestorwen es? Daut ieeschte sull wie met dän räden, mau rajcht wan wie ons nich sea maklich feelen ooda nich secha sent, waut wie sajen sellen. Paula, wua wie aul von räden, sajcht: “Ekj kaun vestonen, daut de Menschen sikj nich sea maklich feelen, wan doa wäa jestorwen es. Dee haben Angst, daut see opp eemol waut orrajcht sajen woaren. Oba daut es schlajchta, verheipts nuscht to sajen, aus irjentwaut onpaussendet.” Eene Persoon, waut truaren deit, velangt jeweenlich nich, daut wie irjentwaut butajeweeneljet to dee sajen. Paula sajcht: “Mie wia daut väl wieet, wan miene Frind eefach säden: ‘Daut jaumat mie, daut dien Maun storf.’”

15 William siene Fru storf een poa Joa trigj. Hee sajcht: “Ekj jleich daut, wan aundre mie irjentwaut goodet vetalen von miene Fru. Daut wiest mie, daut see ar leewden un achten. Soont es een groota Troost fa mie. Daut halpt mie sea, wiels miene Fru wia mie soo väl wieet un wie jehieeden eefach toop.” Eene Wätfru, waut Bianca heet, sajcht: “Mie jeft  daut Moot, wan aundre met mie toop bäden un mie eent ooda twee Bibelvarzh väaläsen. Mie halpt daut uk, wan dee von mienen Maun vetalen un toohorchen, wan ekj von am vetal.”

16. (a) Woo sell wie deejanje unjastetten, waut äwa wäm truaren? (b) Waut fa eene Veauntwuatunk hab wie no Jakobus 1:27 no?

16 Krakjt soo aus Rut de Wätfru Noomi nich em Stäakj leet, sell wie deejanje wieda biestonen, waut äwa wäm truaren. Paula, wua wie aul ea von räden, sajcht: “Fuaz nodäm aus mien Maun jestorwen wia, kjrieech ekj een deel Help. Oba een Stootje lota jinkj de aundre Menschen äa Läwen wada soo wieda aus ea, oba mien Läwen wia nich mea soo aus ea. Daut es väl wieet, wan aundre seenen, daut eena uk Moonaten ooda Joaren lota noch Help brukt, wan doa wäa jestorwen es.” Jieda Mensch es veschieden. Eenje woaren daut veleicht haustich jewant, wan sikj en äa Läwen waut endat. Oba fa aundre es daut jiedatsmol sea schwoa, wan dee waut doonen, waut see ea met äaren Ehepoatna toop deeden. De Menschen truaren sea veschieden. Wie wellen emma doaraun denkjen, daut Jehova ons de Iea un de Veauntwuatunk jejäft haft, ons om deejanje to kjemren, waut äaren Ehepoatna veloaren haben (läs Jakobus 1:27).

17. Wuarom sell wie deejanje biestonen, waut von äaren Ehepoatna sent veloten worden?

17 Eenje motten doamet foadich woaren, daut äa Ehepoatna an velat. Soont kaun sea schwoa sennen. Joyce äa Maun veleet ar wäajen eene aundre Fru. See sajcht: “Daut wie ons scheeden leeten, deed meist wea, aus wan  mien Maun jestorwen wia. Wan hee derch een Ojjlekj ooda wäajen eene Krankheit jestorwen wia, dan haud hee nich Schult doaraun. Oba mien Ehemaun wort sikj selfst eenich, mie to veloten. Ekj feeld mie aufjewäsen un tonuscht.”

18. Woo kjenn wie deejanje halpen, waut nich mea eenen Ehepoatna haben?

18 Wan wie waut goodet doonen fa dee, waut nich mea eenen Ehepoatna haben, dan wies wie an, daut wie an leewen. Wiels dee nu auleen sent, fälen dee goode Frind (Spr. 17:17). Woo kjenn wie wiesen, daut wie äare Frind sent? Wie kjennen dee hankroagen fa eene eefache Moltiet. Wie wudden dee uk kjennen aunbeeden, met ons toop Tietvedrief to haben ooda toop to prädjen. Ooda wie kjennen dee bieaun froagen, aus see wellen met ons toop Famieljenstudium haben. Wan wie daut doonen, dan moak wie Jehova schaftich, wiels hee es “aul dee no aun, dee een jebroaknet Hoat haben”, un hee sitt “no de Wätfrues äa rajcht” (Psa. 34:19; 68:6).

19. Waut west du doonen, soo aus 1. Petrus 3:8 sajcht?

19 Boolt woat Gott sien Kjennichrikj äwa de Ieed rejieren un dan woaren “de Trubbels . . . vejäten” sennen. Wie freien ons aul to de Tiet, wan aun daut, “waut verhäa wia, . . . nich mea [woat] aun jedocht woaren” un wan daut “nich mea em Jeräd komen” woat (Jes. 65:16-17). Bat daut soo wiet es, well wie ons unjarenaunda biestonen un met onse Wieed un Woakjen bewiesen, daut wie onse Gloowesbreeda aula leewen (läs 1. Petrus 3:8).

LEET 111 Wie haben väl Jrind, ons to freien

^ Varsch 5 Loot, Hiob un Noomi deenden tru Jehova, oba dee hauden doawäajen uk Schwierichkjeiten. En disen Artikjel woa wie seenen, waut wie von daut lieren kjennen, waut dee beläft haben. Wie woaren uk seenen, wuarom daut needich es, met onse Breeda un Sestren jeduldich un metfeelent to sennen un dee to treesten, wan dee met Schwierichkjeiten foadich woaren motten.

^ Varsch 13 De Nomes hab wie hia jeendat.

^ Varsch 57 BILTBESCHRIEWUNK: Een Brooda es sea vedrislich un haft “onbedochte Räd”, un een Eltesta horcht dän jeduldich too. Aus de Brooda sikj ieescht beruicht haft, jeft de Eltesta am leeftolich Rot.

^ Varsch 59 BILTBESCHRIEWUNK: Een junget Poa Lied sent met eenen Brooda toop, dän korz de Fru jestorwen es. Dee räden von daut goode, waut see met ar toop beläft haben.