Trigj nom Enhault

No de Enhaultslist gonen

Lot “jun Licht . . . schienen”, om Jehova to ieren

Lot “jun Licht . . . schienen”, om Jehova to ieren

“Lot . . . jun Licht ver de Menschen schienen, daut see . . . jun Voda em Himmel doafäa lowen” (MAT. 5:16)

LEEDA: 77, 111

1. Waut fa eene besondre Uasoak hab wie toom ons freien?

WOO scheen es daut nich, daut Gott siene Deena äa Licht äwa de gaunze Welt schienen loten! Daut latste Joa fieed wie räajelmässich äwa 10 Millionen Bibelstudiums. Un miere Millionen Intressieede kjeemen no daut Owentmol un lieeden, woo väl Leew Jehova ons derch daut Leesjelt wees (1. Joh. 4:9).

2-3. (a) Waut kaun ons nich doavon aufhoolen, “aus Lichta” to schienen? (b) Waut woa wie en disen Artikjel seenen?

2 Jehova siene Deena oppe gaunze Welt räden väl veschiedne Sproaken. Oba wie deenen doawäajen veeent onsen Voda Jehova (Opb. 7:9). Krakjt endoont waut onse Muttasproak es ooda wua wie wonen, wie kjennen “aus Lichta . . . en dise Welt” schienen (Filip. 2:15).

3 Woo kjenn wie derch onsen Deenst, derch onse Eenichkjeit un doaderch, daut wie waka bliewen, ons Licht schienen loten un Jehova ieren? (Läs Matäus 5:14-16.) Daut woa wie en disen Artikjel seenen.

 AUNDRE HALPEN JEHOVA TO DEENEN

4-5. (a) Woo kjenn wie derch ons Benämen em Deenst ons Licht schienen loten? (b) Waut fa goodet kaun daut brinjen, wan wie frintlich sent? (See daut Bilt aum Aunfank.)

4 En dän Artikjel “Licht em diestren” säd daut aune 1925: “Kjeena kaun dän Harn en dise latste Doag tru bliewen . . . wan eena nich sien Licht schienen lat.” Dan säd daut noch: “Toom daut doonen mott eena aule Velkja oppe Ieed de goode Norecht brinjen un no Jehova siene jerajchte Väaschreften läwen” (The Watch Tower vom 1. Juni 1925). Wie kjennen daut biejlikj doonen, wan wie de goode Norecht prädjen un Jinja moaken (Mat. 28:19-20). Un wie kjennen Jehova uk derch ons christeljet Benämen ieren. Een deel Menschen seenen ons, wan wie prädjen. Wan wie schaftich kjikjen un dee leeftolich bejreessen, dan halpt dee daut veleicht, goot äwa ons un onsen Gott to denkjen.

5 Jesus säd to siene Jinja: “Wan jie en een Hus nenn komen, jäft an jun Frädensgruss” (Mat. 10:12). En de Jäajent, wua Jesus un de Apostel prädjen deeden, kroagden se Framde foaken nenn. Vondoag dän Dach es daut opp väl Städen nich mea Mood. Foaken sent de Menschen een bät besorcht, wan Framde no an komen ooda dee jleichen daut nich sea. Oba wan wie dee leeftolich sajen, no waut wie komen, dan feelen dee sikj woomäajlich bäta. Un wan wie bie daut effentliche prädjen schaftich kjikjen un de Menschen bejreessen, dan woaren dee väl leichta no onsen Bieekjakrota komen un sikj waut toom läsen metnämen. Veleicht wellen dee dan mau rajcht met ons vetalen.

6. Waut holp een elret Poa Lied mea em Deenst to doonen?

6 Een elret Poa Lied en Enjlaunt kjennen nich mea soo väl von Hus to Hus prädjen, wäajen see nich mea jesunt sent. Doawäajen stalden see ver äa Hus eenen Desch met biblische Bieekja opp, daut see opp dee Wajch kunnen äa Licht schienen loten. Doa dicht bie wia eene School un wan de Elren doa vebiekjeemen äare Kjinja holen, neemen väle sikj de Bieekja met Fragen junger Leute — Praktische Antworten, Band 1 un 2 un uk aundre Hefta. Foaken prädijd doa uk eene Pionia-Sesta met dise Lied toop. Wiels dee soo frintlich wia un daut elre Poa de Menschen werkjlich halpen wull, funk de Pape von een Schoolkjint mau rajcht aun, de Bibel to studieren.

7. Woo kjenn wie de Flichtlinja en onse Jäajent halpen?

7 De latste Joaren musten väle äa Launt veloten un dee läwen nu aus Flichtlinja en aundre Lenda. Woo kjenn wie dee halpen, mea äwa Jehova to lieren un äwa daut, waut dee sikj väajenomen haft? Veleicht kunn wie de JW Language-App brucken un lieren, dee opp äare Sproak to bejreessen. Wie kunnen ons uk noch een poa aundre Wieed lieren toom dee nieschierich moaken, soo daut wie dee opp jw.org de veschiedne Videos un Bieekja wiesen kjennen, waut et doa opp äare ieejne Sproak jeft (5. Mo. 10:19).

8-9. (a) Woo kjennen de Toopkomes enne Wäakj ons halpen? (b) Woo kjennen Elren äare Kjinja halpen, feine Auntwuaten to jäwen?

8 Jehova lieet ons en de School fa Läwen un Deenst, woo wie noch bäta prädjen kjennen. Waut wie doa lieren, halpt väle von ons, daut wie ons kjennen sechra feelen, wan wie Wadabesuchs moaken un Bibelstudiums leiden.

9 De Niee es daut foaken oppfaulent, daut en onse Toopkomes uk de Kjinja metmoaken. Jie Elren kjennen june Kjinja halpen, äa Licht schienen to loten, wan  jie dee lieren, met äare ieejne Wieed Auntwuaten to jäwen. Eenje Menschen sent aul en de Woarheit nenjekomen, wäajen dee hieeden, woo Kjinja met eefache Wieed un von Hoaten äwa äaren Gloowen räden (1. Kor. 14:25).

NO EENICHKJEIT STRÄWEN

10. Woo kaun daut Famieljenstudium halpen, daut de Famielje sikj eenich es?

10 Wie kjennen ons Licht uk schienen loten, wan wie en onse Famielje un en de Vesaumlunk no Eenichkjeit sträwen. Elren kjennen daut biejlikj doonen, wan dee pinkjlich aus Famielje studieren. Väle kjikjen uk toop daut Moonatsprogram opp JW Broadcasting un nodäm vetalen dee doaräwa, waut dee doavon lieren kjennen. Deejanja, waut daut Studium met de Famielje leiden deit, saul em Denkj hoolen, daut een kjlienet Kjint em jeisteljen veleicht waut aundret brukt aus een Jugentlicha. Schauft doaropp, daut jieda eena von de Famielje doa waut bie haft, wan jie toop studieren (Psa. 148:12-13).

Daut es ons toom gooden, met elre Menschen toop to sennen (See Varsch 11)

11-13. Woo kjenn wie aula methalpen, daut doa mea Eenichkjeit en de Vesaumlunk es un daut aundre kjennen äa Licht schienen loten?

11 Waut kjennen junge Menschen doatoo doonen, daut en de Vesaumlunk Eenichkjeit es un daut aundre kjennen äa Licht schienen loten? Wan du een Jugentlicha best, wurscht du kjennen Frint woaren met de elre Breeda un Sestren en de Vesaumlunk? Du wurscht dee kjennen leeftolich froagen, waut see aul em Deenst fa Jehova beläft haben. Daut woat die väl Moot jäwen un junt beid halpen, daut jie daut Licht von de Woarheit noch dolla schienen loten. Un wie aula kjennen doano sträwen, daut wie deejanje fein oppnämen, waut nom Vesaumlungshus komen. Soo kjenn wie methalpen, daut doa mea Eenichkjeit es un daut de Niee uk wellen äa Licht schienen loten. Wie kjennen dee biejlikj bejreessen un schaftich kjikjen un dee halpen, eenen Plauz toom setten to finjen. Daut wudd uk fein sennen, dee met aundre bekaunttomoaken, daut dee sikj doa tusich feelen.

12 Wan du een Toopkomen fa dän Prädichtdeenst leiden deist, dan kaust du de elre Breeda daut leichta moaken to prädjen. Kjikj doano, daut dee een Jebiet haben, waut fa an paussent es. Eenjemol wurscht du dee uk kjennen met eenen jinjren Poatna toop prädjen schekjen,  waut dee halpen kunn. Du kaust uk soone halpen, waut nich jesunt sent un waut nich soo väl em Deenst doonen kjennen, wan du an wiest, daut du om an bekjemmat best. Wan du leeftolich om de Jinjre un Elre un om de Erfoarne un Niee bedocht best, dan kaust du dee halpen, flietich de goode Norecht to prädjen (3. Mo. 19:32).

13 De Psalmenschriewa säd: “Woo goot un scheen es daut doch, wan Breeda en Eenichkjeit toop läwen!” (Läs Psalm 133:1-2.) De Israeliten wia daut sea toom gooden, met soone toop to sennen, waut Jehova uk deenden. Daut wia soo aus “Balsam Eelj”, waut scheen rikjt un dee oppfrescht. Wie kjennen onse Breeda un Sestren uk oppfreschen, wan wie frintlich un leeftolich sent. Doaderch woat de Vesaumlunk dolla veeent. Wudd wie kjennen onse “Hoaten wiet [opmoaken]” un de Breeda von onse Vesaumlunk noch bäta kjanen lieren? (2. Kor. 6:11-13).

14. Woo kjenn wie ons Licht doa schienen loten, wua wie wonen?

14 Kjenn wie doa, wua wie wonen, daut Licht von de Woarheit noch dolla schienen loten? Veleicht wellen onse Nobasch wäajen onse leeftolje Wieed un goode Woakjen uk waut von Jehova weeten. Äwalaj mol: “Woo denkjen miene Nobasch äwa mie? Es mien Hus un mien Hoff rein un oppjeriemt? Sitt aundre daut moakhauftich? Sie ekj reed, de Nobasch to halpen?” Wan wie met aundre Breeda vetalen, dan kunn wie dee veleicht froagen, waut see met äa Frintschoft, Nobasch, Oabeitspoatna ooda Schoolpoatna beläft haben, wäajen see leeftolich un een goodet Väabilt wieren. Secha woaren see ons väl goodet vetalen kjennen (Efs. 5:9).

WAKA BLIEWEN

15. Wuarom es daut onbedinjt needich, daut wie waka bliewen?

15 Waut mott wie doonen, daut ons Licht noch dolla schienen kaun? Jesus säd ieremol to siene Jinja: “Woakt” (Mat. 24:42; 25:13; 26:41). Wan wie jleewen, daut de “groote Triebsaul” noch wiet auf es un daut wie dee aul goanich beläwen woaren, dan woa wie veleicht nich mea soo waka bliewen un nich jieda Jeläajenheit toom prädjen utnutzen (Mat. 24:21, Reimerbibel). Dan woat ons Licht nich mea dach schienen, oba flemren ooda mau rajcht utgonen.

16-17. Woo kjenn wie waka bliewen?

16 Nu es daut besonda needich, daut wie waka bliewen. En de Welt woat daut emma schlemma, oba wie weeten, daut Jehova to de rajchte Tiet daut Enj brinjen woat (Mat. 24:42-44). Bat daut Enj kjemt, mott wie jeduldich sennen un waka bliewen, jieda Dach Gott sien Wuat läsen un nich opphieren met bäden (1. Pet. 4:7, NW). Wie kjennen uk von Breeda un Sestren lieren, waut met Freiden äa Licht schienen leeten un waka bleewen. Biejlikj kjenn wie dee äare Läwesjeschicht läsen. Een Biespel doafäa es en dän Artikjel “Sieben Jahrzehnte am ‘Rocksaum’ eines ‘Juden’” em Wachtturm vom 15. Aprell 2012 opp de Sied 18-21.

17 Wan wie ons em Deenst fa Jehova drock hoolen, aundre halpen un goode Jesalschoft haben, woa wie väl Freid haben un de Tiet woat bosich vegonen (Efs. 5:16). Hundat Joa trigj wieren onse Breeda sea drock un volbrochten väl. Oba vondoag dän Dach jeft et en Jehova sien Woakj noch väl mea to doonen. Wie loten ons Licht nu dolla schienen, aus wie ons daut jeemols jedocht hauden.

De Eltestasch kjennen ons halpen, weisen Rot ut Gott sien Wuat to kjrieen (See Varsch 18-19)

18-19. Woo kjennen de Eltestasch ons halpen, waka to bliewen un Jehova flietich to deenen? Jeff een Biespel.

 18 Daut jeft ons Moot, daut Jehova onsen Deenst aunnemt, wan wie uk onvolkomen sent. Toom ons halpen haft Jehova ons Gowen jejäft; daut sent de Eltestasch (läs Efeesa 4:8, 11-12). Wan de Eltestasch no ons komen toom met ons räden, dan well wie von dee äare Weisheit lieren un dee äaren Rot aunnämen.

19 Een Poa Lied en Enjlaunt fruagen de Eltestasch no Help, wäajen dee Trubbels em Ehestaunt hauden. De Fru späad sikj daut soo, daut äa Maun de Famielje em jeisteljen nich veroppjinkj. Un de Maun docht, daut hee nich een gooda Liera wia, un doawäajen deed hee nich pinkjlich met siene Famielje studieren. De Eltestasch holpen an, aun Jesus sien Biespel to denkjen. Jesus kjemmad sikj om siene Jinja un wia doarom todoonen, waut dee fäld. De Eltestasch säden, de Maun sull proowen Jesus notodoonen un de Fru sull proowen jeduldich met am to sennen. See jeewen dee uk gooden Rot, woo see kunnen toopschaufen, om met äare beid Kjinja toop daut Famieljenstudium to haben (Efs. 5:21-29). No daut bemieejd de Maun sikj sea, siene Famielje em jeisteljen väatostonen. De Eltestasch lowden am dan un säden, hee sull nich oppjäwen un sikj wieda opp Jehova sienen Jeist veloten. De Eltestasch äare Leew un dee äa gooda Rot holp dise Famielje, äa Licht schienen to loten.

20. Waut woat doabie rutkomen, wan wie ons Licht schienen loten?

20 De Psalmenschriewa säd: “Jesäajent sent aul dee, dee dän HARN ferchten, dee en siene Wäaj waundlen” (Psa. 128:1). Wan wie ons Licht schienen loten, dan woa wie jesäajent sennen, ooda Freid haben. Doawäajen sell wie aundre von Gott lieren un no Eenichkjeit sträwen un waka bliewen. Dan woaren aundre onse goode Woakjen seenen un onsen Voda Jehova doafäa lowen (Mat. 5:16).