Trigj nom Enhault

No de Enhaultslist gonen

 29. ARTIKJEL FA DAUT STUDIUM

“Got . . . un moakt an to Lieelinja”

“Got . . . un moakt an to Lieelinja”

“Got nu no de Velkja von de Welt un moakt an to Lieelinja” (MAT. 28:19)

LEET 60 Daut jeit om Läwen ooda Doot

WAUT WIE SEENEN WOAREN *

1-2. (a) Waut es no Jesus sien Jeboot en Matäus 28:18-20 no de wichtichste Oppgow von de Christenvesaumlunk? (b) Woone Froagen woa wie en disen Artikjel beauntwuaten?

DE Apostel wieren secha gaunz oppjeräacht, aus dee bie eenen Boajch toopkjeemen. Jesus haud no sien oppstonen vom Doot bestalt, daut dee am doa trafen sullen (Mat. 28:16). Woomäajlich wia daut doa, aus “hee sikj von äwa 500 Breeda opp eemol seenen” leet (1. Kor. 15:6). Wuarom haud Jesus jesajcht, daut see doa toopkomen sullen? Hee wull an een besondret Jeboot jäwen. Hee säd: “Got nu no de Velkja von de Welt un moakt an to Lieelinja”, ooda Jinja (läs Matäus 28:18-20).

2 De Jinja, waut Jesus siene Wieed hieeden, worden Poat von de ieeschtemmasche Christenvesaumlunk. De wichtichste Oppgow von jane Christenvesaumlunk wia, mea Jinja to moaken. * Vondoag dän Dach jeft daut oppe gaunze Welt tieendusende Vesaumlungen von woare Christen un dee haben noch aula deeselwje Oppgow. En disen Artikjel woa wie vea Froagen beauntwuaten: Wuarom es daut soo wichtich Jinja to moaken? Waut es doa aules met en? Kaun jieda Christ doa waut too doonen? Un wuarom brukt daut Jedult?

 WUAROM ES DAUT JINJA MOAKEN SOO WICHTICH?

3. Wuarom es daut no Johanes 14:6 un 17:3 no soo wichtich Jinja to moaken?

3 Wuarom es daut Jinja moaken soo wichtich? Wäajen bloos Christus siene Jinja kjennen Frind met Gott sennen. Un dee, waut Christus nofoljen, woat daut nu aul scheena gonen un dee woaren noch mol kjennen eewich läwen (läs Johanes 14:6; 17:3). Jesus haft ons eene wichtje Oppgow jejäft, oba wie brucken dee nich auleen doonen. De Apostel Paulus schreef von sikj selfst un von siene Poatna: “Wie sent Gott siene Metoabeida” (1. Kor. 3:9). Es daut nich eene groote Iea, daut onvolkomne Menschen kjennen met Jehova un Christus toopschaufen?

4. Waut kjenn wie von daut lieren, waut Ivan un Matilde beläwden?

4 Daut Jinja moaken kaun ons väl Freid brinjen. Daut beläwden Ivan un siene Fru Matilde en Kolumbien. Dee prädijden eenen jungen Maun, waut Davier heet. Dee säd to an: “Ekj well mien Läwen endren, oba ekj kaun daut nich.” Davier wia een Boksa un brukt Droggs un drunk sea väl un wond met siene Mejal Erika toop. Ivan sajcht: “Wie wankten emma no sien Darp toom met am studieren. Daut wia wiet auf un wie musten stundenlank met de Beisikjels opp blotje Wäaj foaren, bat wie bat doa wieren. Aus Erika enwort, daut Davier siene Jesennunk un sien Vehoolen endad, wull see uk studieren.” Met de Tiet leet Davier de Droggs, daut drinkjen un daut boksen toch. Un hee befried sikj uk met Erika. Matilde sajcht: “Aus Davier un Erika sikj aune 2016 deepen leeten, docht wie doaraun, daut Davier emma säd: ‘Ekj well mien Läwen endren, oba ekj kaun daut nich.’ Un dan must wie eefach roaren.” Onen Twiewel frei wie ons sea, wan wie Menschen halpen, Christus siene Jinja to woaren.

WAUT ES DOA MET EN, JINJA TO MOAKEN?

5. Waut doo wie daut ieeschte, wan wie Jinja moaken?

5 Wan wie wellen Jinja moaken, dan mott wie ons daut ieeschte no soone romseenen, waut een opprechtjet Hoat haben (Mat. 10:11). Wan wie aulem Zeichnis jäwen, waut wie trafen, dan bewies wie, daut wie werkjlich Jehova siene Zeijen sent. Wie sent woare Christen, wan wie Christus sien Jeboot jehorchen un prädjen.

6. Woo kjenn wie de Menschen em Deenst halpen?

6 Eenje Menschen wellen de Woarheit ut de Schreft kjanen lieren, oba väle sent aum Aunfank endoontich doaräwa. Wie motten dee ieescht nieschierich moaken doatoo. Daut wie de Menschen em Deenst halpen kjennen, mott wie ons fein reedmoaken. Wie motten ons Teemasch utläsen, waut dee intressieren, un dan äwalajen, woo wie aunfangen kjennen, von dise Teemasch to räden.

7. (a) Woo kjenn wie met wäm eene Vetal aunfangen? (b) Wuarom es daut wichtich, de Menschen tootohorchen un to respakjten?

7 Wie kunnen biejlikj to de Menschen sajen: “Wudd ekj die mol kjennen waut froagen? Aulawäajen haben de Menschen sea soone Trubbels aus wie. Jleefst du, daut dise Trubbels kunnen jeleest woaren, wan daut bloos eene Rejierunk oppe gaunze Welt jeef?” Dan kjenn wie met dee äwa Daniel 2:44 räden. Ooda wie kjennen to wäm sajen: “Waut denkjst du, woo kaun eena Kjinja lieren, daut dee sikj  fein benämen? Waut wurscht du sajen?” Dan kjenn wie met dän äwa 5. Mose 6:6-7 räden. Bie aule Teemasch, waut wie ons utläsen, sell wie emma äwa de Menschen nodenkjen, met dee wie räden woaren. Stal wie ons daut väa, woo dee daut togood kjemt, wan dee enwoaren, waut de Schreft werkjlich lieet. Daut es uk wichtich, daut wie dee toohorchen un daut iernst nämen, waut dee sajen. Dan woa wie dee bäta vestonen kjennen un dee woaren ea no ons horchen.

8. Wuarom mott wie ons aunstrenjen, Wadabesuchs to moaken?

8 Ea een Mensch aunfangt de Bibel to studieren, mott wie ons veleicht aunstrenjen un väl Tiet nämen, Wadabesuchs to moaken. Wuarom? Wäajen de Menschen foaken nich tus sent, wan wie ons dee wada oppsieekjen wellen. Un veleicht mott wie mieremol met dee räden, ea dee reed sent de Bibel to studieren. Denkj doaraun, daut eene Plaunt leichta waust, wan dee pinkjlich jewessat woat. Biejlikj soo es daut met de Leew, waut een Intressieeda fa Jehova un fa Christus haft. Dee woat woomäajlich leichta waussen, wan wie pinkjlich met dän von Gott sien Wuat räden.

KAUN JIEDA CHRIST DOA WAUT TOO DOONEN, JINJA TO MOAKEN?

Jehova siene Zeijen oppe gaunze Welt halpen met, opprechtje Menschen to sieekjen (See Varsch 9-10) *

9-10. Wuarom kjenn wie sajen, daut jieda woara Christ methalpt soone to finjen, waut Jinja woaren wellen?

9 Jieda Christ haft Poat doaraun, daut opprechtje Menschen jefungen woaren. Daut es biejlikj soo, aus wan een Kjint sikj vebeiselt haft un jesocht woat. Wuarom? Opp eene Sauz vebeiseld een dreejoaschet Junkje sikj un ojjefäa 500 Menschen sochten no daut. Soo bie 20 Stund nodäm aus de Jung sikj vebeiselt haud,  funk een Helpa dän opp een Kornflekj. De Helpa wull nich haben, daut se am doafäa lowen sullen. Hee säd: “Doa haben hundade Menschen metjeholpen dän to finjen.”

10 Een deel Menschen jeit daut soo aus dit Junkje. Dee feelen sikj auleen, weeten nich, woo daut wiedagonen saul, un dee wellen Help (Efs. 2:12). Äwa acht Millionen von ons halpen met, dee to sieekjen. Veleicht finjst du kjeenem, waut met die de Bibel studieren well, oba aundre, waut en deeselwje Jäajent prädjen, finjen veleicht wäm, waut de Woarheit von Gott sien Wuat kjanen lieren well. Wan een Brooda ooda eene Sesta wäm finjt, waut een Jinja von Christus woat, kjennen aul dee sikj freien, waut bie daut sieekjen metjeholpen haben.

11. Woo kjenn wie methalpen Jinja to moaken, wan wie nu uk nich een Bibelstudium haben?

11 Wan wie nu uk nich een Bibelstudium haben, kjenn wie doawäajen opp eene aundre Wajch methalpen, Jinja to moaken. Wie kjennen biejlikj de Niee leeftolich oppnämen un halpen, waut no daut Vesaumlungshus komen. Wan wie dee soone Leew wiesen, dan kjenn wie methalpen, dee to wiesen, daut wie woare Christen sent (Joh. 13:34-35). Onse Auntwuaten bie de Toopkomes derwen nich lank sennen, oba dee kjennen de Niee wiesen, woo see respakjtvoll un von Hoaten von äaren Gloowen räden kjennen. Wie kjennen uk met eenen nieen Vekjindja toop em Deenst gonen un dän halpen, de Menschen met de Schreft to lieren. Wan wie daut doonen, dan woa wie dänjanjen lieren Christus notodoonen (Luk. 10:25-28).

12. Mott wie sea jelieet sennen, om Jinja to moaken? Laj daut ut.

12 Kjeena von ons saul denkjen, daut dee too prost jelieet es toom Jinja moaken. Wuarom nich? Daut wiest Faustina äa Biespel, waut en Bolivien wont. Aus see Jehova siene Zeijen kjanen lieed, kunn see nich läsen, oba nu kaun see aul een bät. See es nu jedeept un jleicht aundre to lieren un jeweenlich haft see jieda Wäakj fief Bibelstudiums. Wan Faustina noch uk nich soo goot läsen kaun aus de mieeschte von äare Bibelschiela, haft see aul sas Menschen jeholpen, daut dee sikj kunnen deepen loten (Luk. 10:21).

13. Waut fa Säajnungen kjenn wie bie daut Jinja moaken beläwen, wan wie uk sea drock sent?

13 Väl Christen sent sea drock, wiels see väl wichtjet to doonen haben. Oba dee nämen sikj doawäajen Tiet Bibelstudiums to leiden un daut jeft dee groote Freid. Soo wia daut biejlikj bie Melanie, waut en Alaska wond. See trock äare achtjoasche  Dochta auleen opp un must fa voll schaufen un holp äaren Voda, waut Kjräft haud. Melanie wia de eensje von Jehova siene Zeijen en dise Staut, waut wiet auf von aules wia. See wenscht sikj opp iernst een Bibelstudium, un doawäajen bäd see emma om Krauft, daut see bie daut kolde Wada rutgonen kunn, om to prädjen. Met de Tiet lieed see Sara kjanen, waut sikj sea freid, aus see lieed, daut Gott eenen Nomen haud, un kunn lota met ar de Bibel studieren. Melanie sajcht: “Aum Friedach zeowes wia ekj emma sea meed, oba daut wia sea goot fa mie un miene Dochta, daut wie no dit Bibelstudium wankten. Ons jinkj daut scheen, de Auntwuaten fa Sara äare Froagen notosieekjen, un wie freiden ons to seenen, daut see Frint met Jehova wort.” Sara haud Jäajenstaunt, oba see wia brow un veleet äare Kjoakj un leet sikj deepen.

WUAROM DAUT JEDULT BRUKT, JINJA TO MOAKEN

14. (a) Wuarom jeit daut Jinja moaken met feschen to vejlikjen? (b) Waut lia wie von Paulus siene Wieed en 2. Timotäus 4:1-2?

14 Wie sellen nich oppjäwen, wan wie uk noch kjeenen jefungen haben, waut doa well een Jinja woaren. Denkj doaraun, daut Jesus daut Jinja moaken met feschen vejlikjt. Eenjemol motten de Fescha stundenlank feschen, ea dee waut kjrieen. Foaken schaufen dee lot zeowes ooda tiedich zemorjes un eenjemol motten dee wiet metem Boot foaren (Luk. 5:5). Eenje Menschenfescha motten uk stundenlank opp veschiedne Städen un veschiedne Tieden sieekjen. Wuarom?  Daut dee mea Menschen finjen. Wan dee sikj sea aunstrenjen, dan woaren dee foaken doamet beloont, daut see wäm finjen, waut aun de goode Norecht intressieet es. Wurscht du kjennen soone Tiet ooda opp soone Städ prädjen, wua du veleicht mea Menschen finjst? (Läs 2. Timotäus 4:1-2.)

Halp diene Bibelschiela jeduldich, daut see em jeisteljen wiedakomen kjennen (See Varsch 15-16) *

15. Wuarom brukt daut Jedult, Bibelstudiums to leiden?

15 Wuarom brukt daut Jedult, Bibelstudiums to leiden? Wie motten dän, waut studieet, halpen, daut dee de biblische Lieren kjanen lieet un dee leeft. Un wie motten dän uk halpen, Jehova kjanen to lieren un to leewen, von dän de Bibel kjemt. Wie sellen onse Bibelschiela uk lieren, waut Jesus von siene Jinja velangt un woo see dise Jebooten nokomen kjennen. Wie sellen dee jeduldich biestonen, wan dee lieren sikj no biblische Gruntsauzen to rechten. Eenje dieet daut mau een poa Moonat, äa denkjen un äare Jewanheiten to endren. Aundre wada dieet daut lenja.

16. Waut lia wie von Raúl siene Jeschicht?

16 Een Missionoa en Peru beläwd waut, wuaraun to seenen es, woo goot daut es, jeduldich to sennen. Hee säd: “Ekj haud aul twee Bieekja met eenen Maun studieet, waut Raúl heet. Oba dee haud doawäajen noch groote Schwierichkjeiten. Dee haud väl Trubbels en siene Ehe un brukt Flieekjwieed un siene Kjinja foll daut schwoa, am to respakjten. Oba wiels dee pinkjlich no de Toopkomes kjeem, wankt ekj doa wieda han, om am un siene Famielje to halpen. Daut dieed lenja aus dree Joa von dan, aus ekj am kjanen lieed, bat dee sikj deepen loten kunn.”

17. Waut woa wie en dän näakjsten Artikjel seenen?

17 Jesus säd to ons: “Got . . . no de Velkja von de Welt un moakt an to Lieelinja”. Toom dit Jeboot nokomen mott wie foaken met Menschen räden, waut väl aundasch denkjen aus wie, un uk met soone, waut to kjeene Kjoakj jehieren ooda waut jleewen, daut et nich eenen Gott jeft. En dän näakjsten Artikjel woa wie seenen, woo wie soone kjennen de goode Norecht prädjen.

LEET 58 Wie sieekjen dee, waut Fräd jleichen

^ Varsch 5 De Christenvesaumlunk haft de wichtje Oppgow, de Menschen to halpen, Christus siene Jinja to woaren. En disen Artikjel woa wie gooden Rot kjrieen, woo wie daut doonen kjennen.

^ Varsch 2 WIEED UTJELAJCHT: Christus siene Lieelinja, ooda Jinja, lieren nich bloos daut kjanen, waut Jesus lieed – dee komen daut uk no. Dee proowen soo goot aus mäajlich en Jesus siene Footspoaren to gonen, ooda am notodoonen (1. Pet. 2:21).

^ Varsch 52 BILTBESCHRIEWUNK: Een Maun, waut oppe Reis es, kjricht biem Zhett-Plauz waut toom läsen von Jehova siene Zeijen. Lota opp siene Reis sitt hee aundre Zeijen, waut effentlich prädjen. Nodäm aus hee wada tus es, komen twee Vekjindja no am.

^ Varsch 54 BILTBESCHRIEWUNK: Deeselwja Maun studieet de Bibel. Met de Tiet kaun dee sikj deepen loten.