Trigj nom Enhault

No de Enhaultslist gonen

 3. ARTIKJEL FA DAUT STUDIUM

Jehova, dien Gott, räakjent die väl

Jehova, dien Gott, räakjent die väl

“Hee docht aun ons, aus wie mootloos wieren” (PSA. 136:23, NW)

LEET 38 Hee moakt die stoakj

WAUT WIE SEENEN WOAREN *

1-2. Waut beläwen väl von Jehova siene Deena, un waut kaun daut aun dee doonen?

WELL wie mol dreeatlei seenen, waut doa passieren kaun: Een Dokta sajcht to eenen jungen Brooda, daut hee eene schlemme Krankheit haft, waut am emma schwaka moaken woat. Een flietja Brooda, waut aul nich mea gaunz junk es, velist siene Oabeit. Hee sieekjt sea no eene fresche, oba hee finjt kjeene. Un eene true elre Sesta woat en, daut see emma weinja fa Jehova doonen kaun.

2 Wan wie uk soont beläwen, dan späat sikj ons daut woomäajlich soo, daut wie to nuscht mea to brucken sent. Dan kjenn wie leicht de Freid velieren un ons nuscht mea wieet feelen un ons kaun daut schwanda faulen, met aundre fein foadich to woaren.

3. Woo denkjen de Soton un deejanje, waut dee en siene Macht haft, äwa daut Läwen?

3 Dise Welt es krakjt soo jesonnen aus de Soton. Dee haft de Menschen noch emma soo behaundelt, aus wan dee nuscht wieet wieren. Dee säd to Eva utem schlajchten Senn, daut see wudd frie sennen, wan see nich no Gott horcht, wan dee uk goot wist, daut see dan wudd stoawen motten. De Soton haft de Haundelswelt un de polietische Machten un de veschiedne Gloowes von dise Welt en siene Macht. Doawäajen es daut nich toom wundren, daut soo väl Haundelsmana, Rejierungsmana un Gloowesleidasch krakjt soo äwa daut Läwen denkjen aus de Fient un doa nuscht om romjäwen, woo aundre sikj feelen.

4. Waut woa wie en disen Artikjel seenen?

4 Oba Jehova well, daut wie ons waut wieet feelen, un hee  halpt ons, daut wie ons wäajen onse Trubbels nich gaunz tonuscht feelen (Psa. 136:23NW; Reem. 12:3NW). En disen Artikjel woa wie seenen, woo Jehova ons halpt, wan wie krank sent, wan ons daut knaup jeit un wan wie denkjen, daut wie wäajen ons Ella nich mea väl fa Jehova doonen kjennen. Oba daut ieeschte well wie seenen, wuarom wie ons kjennen secha sennen, daut Jehova jieda eenem von ons väl räakjent.

JEHOVA RÄAKJENT ONS VÄL

5. Aun waut es to seenen, daut Jehova de Menschen väl räakjent?

5 Wie sent von Ieed jemoakt un doch sent wie väl mea wieet aus een bät Stoff (1. Mo. 2:7). See wie mol eenjet, waut ons wiest, daut Jehova ons väl räakjent. Hee haft ons soo jemoakt, daut wie am nodoonen kjennen (1. Mo. 1:27). En disen Stekj sent wie aulet aundre äwaläajen, waut hee oppe Ieed muak, un hee stald ons uk aun, daut wie no de Ieed un no de Tieren oppaussen sullen (Psa. 8:5-9).

6. Aun waut es daut noch to seenen, daut Jehova onvolkomne Menschen väl räakjent?

6 Aus Adam sindijd, hieed Jehova nich opp, de Menschen väl to räakjnen. Wie sent bie am soo väl wieet, daut hee sienen leewen Sän Jesus jeef aus een Leesjelt fa onse Sinden (1. Joh. 4:9-10). Doaderch kaun Jehova “de jerajchte uk de ojjerajchte” vom Doot oppwakjen, waut wäajen Adam siene Sind stoawen musten (Apj. 24:15). Gott sien Wuat wiest, daut wie emma fa am wieetvoll sent, endoont aus wie krank, oam ooda oolt sent (Apj. 10:34-35).

7. Waut wiest ons noch, daut Jehova siene Deena väl räakjent?

7 Waut wiest ons noch, daut Jehova ons väl räakjent? Hee haft jekjikjt, aus wie de goode Norecht aunnämen wudden, un haft ons no sikj jetrocken (Joh. 6:44). Aus wie noda no Jehova kjeemen, kjeem hee uk noda no ons (Jak. 4:8). Jehova nemt sikj uk väl Tiet un strenjt sikj aun, om ons to lieren. Daut wiest, daut wie bie am waut wieet sent. Hee weet, woo wie nu sent un woo wie ons noch vebätren kjennen. Un hee belieet ons, wäajen hee ons leeft (Spr. 3:11-12). Es daut nich een kloara Bewies, daut Jehova ons väl räakjent?

8. Woo kjennen de Varzh ut Psalm 18, waut hia aunjejäft sent, ons halpen, rajcht äwa onse Trubbels to denkjen?

8 Eenje dochten, daut et met dän Kjennich David nuscht enhilt, oba hee wist, daut Jehova am leewd un am biestunt. Soo kunn David uthoolen un rajcht äwa siene Loag denkjen (2. Sam. 16:5-7). Wan wie mootloos sent ooda Trubbels haben, dan kaun Jehova ons uk halpen, doa rajcht äwa to denkjen un aule Trubbels to äwakomen, wan dee uk soo aus eene Waunt sent (läs Psalm 18:27, Reimerbibel *; 18:29-30). Wan hee ons biesteit, dan kjenn wie am emma met Freiden deenen (Reem. 8:31). Well wie nu mol von dree Loagen räden, wua daut besonda needich es nich to vejäten, daut Jehova ons leeft un väl räakjent.

WAN EENA KRANK ES

Jehova sien Wuat to läsen halpt eenem, bäta met de Sorjen foadich to woaren, waut eena wäajen siene Krankheit haft (See Varsch 9-12)

9. Woo kaun eena sikj feelen, wan eena krank es?

9 Eene Krankheit kaun ons sea toosaten un bat doa brinjen, daut wie jleewen, daut wie to nuscht to brucken sent. Veleicht schämt sikj ons daut, wan aundre enwoaren, woo krank wie sent, ooda wan wie Help brucken. Un uk wan aundre daut nich weeten, daut wie krank sent, es ons daut veleicht nich goodjenuach, wan wie nich  mea daut doonen kjennen waut ea. Woo sprakjt Jehova ons en soone schwoare Tieden Moot too?

10. Waut kaun ons no Spricha 12:25 no halpen, wan wie krank sent?

10 Eenen Kranken kaun daut väl Moot jäwen, wan dee “jetreest woat” (läs Spricha 12:25). Jehova haft doano jeseenen, daut en sien Wuat väl bennen steit, waut ons treest un ons wiest, daut wie bie am väl wieet sent, wan wie uk krank sent (Psa. 31:20; 41:4). Wan wie soone Bibelvarzh emma wada läsen, dan woat hee ons halpen, met de Sorjen foadich to woaren, waut wie wäajen onse Krankheit haben.

11. Woo holp Jehova eenen Brooda?

11 Well wie mol een Biespel seenen. Jorge docht, daut et met am nuscht mea enhilt, wiels hee bie junk eene Krankheit kjrieech, waut bosich schlemma wort. Hee säd: “Ekj haud mie daut nich väajestalt, woo schlajcht ekj mie wäajen daut feelen wudd un woo sea sikj mie daut schämen wudd, wan de Menschen no mie kjikjten. Miene Krankheit wort emma schlemma un ekj docht doaräwa no, woo mien Läwen sikj endren wudd. Ekj feeld mie gaunz tonuscht un prachad Jehova no Help.” Woo holp Jehova am? Jorge säd: “Wiels mie daut schwoa foll, met mienen Kopp bie de Sach to bliewen, kjrieech ekj dän Rot, een poa Varzh von de Psalmen to läsen, waut wiesen, daut Jehova om siene Deena bekjemmat es. Ekj läsd dise Varzh jieda Dach un dee treesten mie un jeewen mie Moot. Met de Tiet worden de aundre en, daut ekj foakna schaftich kjikjt. Dee säden mau rajcht, daut ekj an met miene Freid oppmuntad. Ekj wort en, daut Jehova miene Jebäda erhieet haud! Hee holp mie, miene Loag von eene aundre Sied to seenen. Ekj docht dan dolla doaraun, daut sien Wuat  wiest, daut hee mie väl räakjent, wan ekj uk krank sie.”

12. Waut kaust du doonen, daut Jehova die halpt, wan du krank best?

12 Wan du krank best, dan kaust du die secha sennen, daut Jehova weet, waut du derchmoakst. Pracha am no Help, daut du rajcht äwa diene Loag denkjen kaust. Un sieekj die en de Schreft dän Troost, waut Jehova doa fa die haft oppschriewen loten. Denkj äwa soone Bibelvarzh no, waut wiesen, woo väl hee siene Deena räakjent. Dan woascht du seenen, woo leeftolich Jehova met deejanje omjeit, waut am tru deenen (Psa. 84:12).

WAN EENEM DAUT KNAUP JEIT

Wan wie nich fuaz Oabeit finjen, dan treest ons daut, daut Jehova vesproaken haft fa ons to sorjen (See Varsch 13-15)

13. Woo kaun daut Haupt von de Famielje sikj feelen, wan se am de Oabeit aufsajen?

13 Jieda Haupt von eene Famielje well fa siene Famielje sorjen. Oba saj wie mol, eenen Brooda sajen se de Oabeit auf, wan hee uk nuscht orrajchtet jedonen haft. Hee sieekjt sea no eene fresche Oabeit, oba hee finjt kjeene. Dan kaun hee leicht denkjen, daut et nuscht met am enhelt. Woo kaun am daut halpen, wan hee äwa daut nodenkjt, waut Jehova vesproaken haft?

14. Wuarom deit Jehova daut, waut hee vesproaken haft?

14 Jehova deit emma daut, waut hee vesproaken haft (Jos. 21:45; 23:14). Wuarom? Ieeschtens deit hee daut, om sienen gooden Nomen to hoolen. Wiels Jehova vesproaken haft, fa siene true Deena to sorjen, wudd daut fa am orrajcht sennen, daut nich to doonen (Psa. 31:2-4). Tweedens weet Jehova, daut wie ons sea aunschmäaren wudden, wan hee nich om deejanje bekjemmat wia, waut to siene Famielje jehieeden. Hee haft daut vesproaken, daut hee em tieteljen un em jeisteljen fa ons sorjen woat, un nuscht kaun am  doavon aufhoolen, daut uk to doonen (Mat. 6:30-33; 24:45).

15. (a) Waut beläwden de Christen ieeschtemma? (b) Woo treest Psalm 37:18-19 ons?

15 Wan wie doaraun denkjen, wuarom Jehova Wuat helt, dan woa wie ons opp am veloten, wan ons daut knaup jeit. Aus de Vesaumlunk en Jerusalem sea vefolcht wort, worden de Breeda “äwa gaunz Judäa un Samaria vestreit, buta de Apostel” (Apj. 8:1). Woo jinkj dee daut dan? Woomäajlich veluaren dee äare Hiesa un äare Oabeit ooda Jeschafta un dee jinkj daut knaup. Oba Jehova leet dee nich em Stäakj un dee veluaren nich de Freid (Apj. 8:4; Heb. 13:5-6; Jak. 1:2-3). Jehova stunt dise true Christen bie un hee woat ons uk biestonen (läs Psalm 37:18-19).

WAN EENA AUL ELLA ES

Wan wie daut doonen, waut wie noch kjennen, dan woa wie enwoaren, daut Jehova ons un onsen flietjen Deenst väl räakjent, wan wie uk aul ella sent (See Varsch 16-18)

16. En woone Loag kjenn wie beduaren, aus Jehova daut noch aun ons fält?

16 Wan wie ella woaren, dan feelt sikj ons daut veleicht soo, daut wie nich mea väl fa Jehova doonen kjennen. Woomäajlich jinkj dän Kjennich David daut krakjt soo (Psa. 71:9). Woo kaun Jehova ons dan halpen?

17. Waut kjenn wie von Jheri lieren?

17 See wie mol, waut eene Sesta beläwd, waut Jheri heet. Dee wia no een Toopkomen jekroacht toom lieren, woo eena daut Vesaumlungshus ooda aundre Jebieda unjahoolen kunn, oba ar jankad doa nich han. See säd: “Ekj sie aul oolt un eene Wätfru un ekj vesto mie nich met soont. Ekj sie doa nich too to brucken.” Dän Dach ver dit Toopkomen bäd see zeowes un säd Jehova krakjt, woo ar daut jinkj. Aus see dan doa hankjeem, beduad see noch emma, aus daut waut holp, daut see doa wia. Oba bie daut Toopkomen säd een Rädna dan,  daut Jehova dolla doano kjikjt, daut wie ons von am lieren loten, aus doano, aus wie ons aul met soone Oabeit vestonen. Jheri säd: “Dan docht ekj: ‘Mie lieren loten, daut kaun ekj!’ Ekj must bloos roaren, aus mie daut opdakjt, daut Jehova mien Jebäd erhieet haud. Hee wees mie, daut ekj noch waut fa am doonen kunn un daut hee mie waut lieren wull!” Dan säd see noch: “Aus ekj no dit Toopkomen wankt, wia ekj jerettelt, mootloos un feeld mie nuscht wieet. Oba aus daut ieescht derch wia, wia ekj nich mea beduat un ekj feeld mie mootich un waut wieet!”

18. Woo wiest de Schreft, daut Jehova siene Deena uk dan noch väl räakjent, wan dee ella woaren?

18 Wie kjennen ons secha sennen, daut wie uk dan noch waut fa Jehova doonen kjennen, wan wie ella woaren (Psa. 92:13-16). Veleicht sitt ons daut nich no väl waut, oba Jesus lieed, daut Jehova daut sea väl räakjent (Luk. 21:2-4). Doawäajen denkj aun daut, waut du noch doonen kaust. Du kaust biejlikj aundre von Jehova vetalen, fa de Breeda bäden un aundre Moot toospräakjen, daut dee kjennen tru bliewen. Du kaust Jehova sien Metoabeida sennen, wan du am wellich jehorchst, endoont woo väl du noch doonen kaust (1. Kor. 3:5-9).

19. Waut fa eenen Troost finj wie en Reema 8:38-39?

19 Sent wie nich sea dankboa, daut wie Jehova deenen kjennen? Hee räakjent siene Deena sea väl! Hee haft ons jemoakt toom sienen Wellen doonen un wan wie am soo deenen, aus hee daut haben well, dan woa wie tofräd sennen (Opb. 4:11). De Welt denkjt veleicht, daut et met ons nich väl enhelt, oba Jehova denkjt nich soo (Heb. 11:16, 38). Wan wie mootloos sent, wiels wie krank sent ooda nich väl haben ooda aul ella sent, dan well wie doaraun denkjen, daut ons nuscht von onsen himlischen Voda siene Leew scheeden kaun (läs Reema 8:38-39).

^ Varsch 5 Hast du uk mol waut beläft, wua du die gaunz tonuscht feelsd? Dis Artikjel woat die wiesen, daut Jehova die sea väl räakjent. Dee haundelt sikj doavon, woo eena sikj waut wieet feelen kaun, endoont waut doa passieet.

^ Varsch 8 Psalm 18:27 (Reimerbibel): “Du woascht diene Betriebte Mensche rade, oba woascht dee Stollte dol brinje.”

LEET 30 Mien Voda, mien Gott un Frint