Trigj nom Enhault

No de Enhaultslist gonen

 1. ARTIKJEL FA DAUT STUDIUM

“Got nu . . . un moakt an to Lieelinja”

“Got nu . . . un moakt an to Lieelinja”

ONS VARSCH FA DAUT JOA 2020: “Got nu . . . un moakt an to Lieelinja un deept an” (MAT. 28:19)

LEET 79 Lieet dee fausttostonen

WAUT WIE SEENEN WOAREN *

1-2. Waut säd de Enjel bie Jesus sien Grauf to de Frues, un waut säd Jesus to dee?

AUM 16. Nissan aune 33, twee Doag nodäm aus se Jesus Christus sienen Kjarpa em Grauf nenjelajcht hauden, wankten eenje gottesferchtje Frues tiedich zemorjes doahan. Dee wullen dän met Kjriedarie un scheenrikjende Eelj besorjen un wundaden sikj, aus see sagen, daut daut Grauf ladich wia. Een Enjel säd to an, daut Jesus vom Doot oppjestonen wia, un säd noch: “Hee [woat] ver junt no Galiläa gonen . . . Doa woa jie am seenen” (Mat. 28:1-7; Luk. 23:56; 24:10).

2 Aus de Frues von daut Grauf wajchjinjen, bejäajenden see Jesus. Dee säd to an: “Got un sajcht miene Breeda, daut see sellen no Galiläa gonen. Doa woaren see mie seenen” (Mat. 28:10). Daut ieeschte, waut Jesus no sien oppstonen deed, wia, dit Toopkomen en Galiläa auntostalen. Secha wudd hee siene Nofolja doa waut wichtjet sajen!

WÄM WORT DIT JEBOOT JEJÄFT?

No sien oppstonen vom Doot kjeem Jesus met de Apostel un aundre en Galiläa toop un säd to dee: “Got . . . un moakt an to Lieelinja” (See Varsch 3-4)

3-4. Woo weet wie, daut daut Jeboot en Matäus 28:19-20 nich bloos fa de Apostel wia? (See daut Bilt oppe väaschte Sied.)

3 Läs Matäus 28:16-20. Bie daut Toopkomen, waut Jesus aunstald, räd hee von daut wichtje Woakj, waut siene Jinja to jane Tiet doonen sullen. Daut es dautselwje Woakj, waut wie vondoag dän Dach noch doonen. Jesus säd: “Got nu no de Velkja von de Welt un moakt an to Lieelinja un . . . lieet an aules to doonen, waut ekj junt befolen hab.”

4 Jesus well, daut siene Nofolja aula prädjen sellen. Hee jeef nich bloos de alf true Apostel dit Jeboot. Waut fa eenen Bewies jeft et doafäa? Aus Jesus opp eenen Boajch en Galiläa daut Jeboot jeef, Lieelinja to moaken, wieren doa nich bloos  de Apostel bie. Woo weet wie daut? De Enjel säd je to de Frues: “Doa [en Galiläa] woa jie am seenen.” No daut no wieren secha uk dise gottesferchtje Frues bie dit Toopkomen. Oba daut jeft noch mea Bewies.

5. Wuarom jleew wie, daut 1. Korinta 15:6 von dautselwje Toopkomen en Galiläa rät aus Matäus, Kapitel 28?

5 De Apostel Paulus sajcht, daut Jesus “sikj von äwa 500 Breeda opp eemol seenen [leet]” (1. Kor. 15:6). Wua wia daut? Wie haben väl Uasoak to jleewen, daut Paulus hia von krakjt daut Toopkomen en Galiläa rät, wua uk Matäus, Kapitel 28 von rät. Wuarom? Ieeschtens kjeemen je de mieeschte von Jesus siene Jinja von Galiläa. Doawäajen wudd daut leichta sennen, een grootet Toopkomen met väl Toohiera opp eenen Boajch en Galiläa to haben aus en een Hus en Jerusalem. Tweedens haud je Jesus no sien oppstonen vom Doot aul en een Hus en Jerusalem met siene alf Apostel jerät. Wan hee bloos haud wult de Apostel daut Jeboot jäwen, daut see sullen prädjen un Jinja moaken, dan haud hee daut goot kunt en Jerusalem doonen, enne Städ an un de Frues un aundre no Galiläa to schekjen (Luk. 24:33, 36).

6. Woo wiest Matäus 28:20, daut daut Jeboot, Lieelinja to moaken, vondoag dän Dach noch jeltich es, un woo woat dit Jeboot nojekomen?

6 Dreddens mott wie em Denkj hoolen, daut Jesus nich bloos de Christen en siene Tiet daut Jeboot jeef, Lieelinja to moaken. Woo weet wie daut? Wäajen daut, waut Jesus no daut to siene Nofolja säd. Hee säd: “Ekj sie emma bie junt, batem Enj von de Welt” (Mat. 28:20). Soo aus Jesus säd, es dit Woakj vondoag dän Dach soo rajcht em Schwunk. Stal die mol väa: Jieda Joa loten sikj meist 300 000 Menschen aus Jehova siene Zeijen deepen un woaren Christus siene Nofolja!

7. Von waut woa wie nu räden, un wuarom?

7 Väle, waut de Bibel studieren, komen veraun un loten sikj deepen. Oba daut späat sikj soo, daut eenje, waut pinkjlich studieren, sikj nich doatoo kjrieen, Jesus notofoljen. Dee jeit daut scheen, wan wie met dee studieren, oba dee loten sikj nich deepen. Wan du een Bibelstudium hast, dan west du dänjanjen secha halpen, daut notokomen, waut dee lieet, un Christus notofoljen. En disen Artikjel woa wie doavon räden, woo wie de Bibelschiela to Hoaten räden un halpen kjennen, em jeisteljen verauntokomen. Wuarom es daut soo wichtich? Wiels wie eenjemol äwalajen motten, aus wie opphieren sellen met wäm to studieren ooda nich.

PROOW, DÄNJANJEN TO HOATEN TO RÄDEN

8. Wuarom kaun daut schwoa sennen, wäm to halpen, Jehova to leewen?

8 Jehova well, daut de Menschen am ut Leew deenen. Doawäajen well wie onse Bibelschiela halpen to vestonen, woo sea Jehova om jieda eenen von an bekjemmat es un woo väl hee an räakjent. Wie wellen, daut dee enwoaren, daut Jehova “een Voda [es] fa dee onen Voda, un eena, dee no de Wätfrues äa rajcht sitt” (Psa. 68:6). Wan dee enwoaren, woo väl Jehova an räakjent, dan jeit an daut secha to Hoaten un äare Leew fa am woat jrata woaren. Eenje kjennen sikj daut veleicht goanich väastalen, daut Jehova een leeftolja Voda es, wäajen äa ieejna Voda an nich Leew jewäsen haft (2. Tim. 3:1, 3). Wan du met wäm studieescht, dan räd emma wada von Jehova siene goode Ieejenschoften. Halp dän to vestonen, daut ons leeftolja Gott well, daut dee daut eewje Läwen kjricht, un daut hee dän wellich doabie halpt. Waut kjenn wie sest noch doonen?

9-10. Woone Bieekja sell wie brucken, wan wie met wäm de Bibel studieren, un wuarom?

 9 Bruck de Bieekja “Waut lieet de Schreft werkjlich?” un “Blieft en Gott siene Leew”. Dise Bieekja sent doatoo jemoakt, daut wie de Menschen leichta kjennen to Hoaten räden. En daut 1. Kapitel von daut Schreft-lieet-Buak woaren biejlikj de Froagen beauntwuat: Es Gott om ons bekjemmat ooda es hee onen Jefeel? Deit Gott daut waut, wan Menschen lieden motten? Un kjenn wie Jehova noda komen? Daut “Gott-siene-Leew”-Buak wiest deejanje, waut studieren, daut see Jehova kjennen noda komen un een scheenret Läwen haben, wan see sikj no biblische Gruntsauzen rechten. Moak die emma goot reed fa jieda Studium un denkj doaräwa no, woo du dänjanjen krakjt halpen kaust, wan du dise Bieekja uk aul met aundre studieet hast.

10 Waut, wan deejanja, waut de Bibel studieet, to waut nieschierich es, wua een aundret Buak von rät, waut nich en ons Jereetschoft fa dän Deenst es? Dan wurscht du dän kjennen tooroden, dit Buak selfst to läsen, daut jie kunnen wieda met eent  von dee Bieekja studieren, wua wie jroz von räden.

Fang daut Studium met een Jebäd aun (See Varsch 11)

11. Wanea sell wie aunfangen, ver un no jieda Studium to bäden, un woo kjenn wie daut doonen?

11 Fang daut Studium met een Jebäd aun. Wan wie een Studium aunjefongen haben, dan es et jeweenlich daut baste, soo boolt aus mäajlich ver un no jieda Studium to bäden, veleicht aul no een poa Wäakj. Wie motten dänjanjen lieren, daut wie Gott sien Wuat bloos dan vestonen kjennen, wan sien Jeist ons halpt. Eenje brucken Jakobus 1:5 toom wäm dietlich moaken, wuarom eena bie daut Studium bäden saul. Doa sajcht et: “Wan daut bie irjentwäm von junt aun Weisheit fält, dan saul hee Gott doano froagen.” Dan sajen dee: “Woo kjenn wie Gott no Weisheit froagen?” Secha woat deejanja dan uk sajen, daut wie to Gott bäden sellen.

12. Woo kaust du Psalm 139:2-4 brucken, wan du wäm lieren west, woo eena bäden saul?

12 Lia dienen Bibelschiela, woo eena bäden saul. Laj dän daut ut, daut Jehova wellich no siene opprechtje Jebäda horcht. Erkjläa dän uk, daut eena Jehova en eenem siene Jebäda aules sajen kaun, waut eenem oppem Hoaten licht, mau rajcht soont, waut eena sest kjeenem vetalen wudd. Jehova kjant je aulmols onse deepste Jedanken (läs Psalm 139:2-4). Wie kjennen dänjanjen uk tooroden, Gott no Help to froagen, daut dee sikj kaun loosmoaken von orrajchtet denkjen un schlajchte Jewanheiten. Saj wie mol, eena, waut aul een Stoot de Bibel studieet haft, es noch emma sea faust aun eenen Heljedach, waut nich biblisch es. Dee weet, daut daut orrajcht es, dän to hoolen, un doch jeit am jewesset scheen, waut se dän Dach doonen. Dan wudd wie dän kjennen tooroden, Jehova daut krakjt to sajen, woo hee sikj äwa dise Sach feelt, un dän to prachren, daut dee am halpen saul, bloos soont to leewen, waut Gott jefelt (Psa. 97:10).

Kroag dänjanjen no de Toopkomes (See Varsch 13)

13. (a) Wuarom sell wie onse Bibelstudiums soo boolt aus mäajlich no de Toopkomes kroagen? (b) Waut kjenn wie doonen, daut de Bibelschiela sikj em Vesaumlungshus nich soo framd feelen?

13 Kroag diene Bibelstudiums soo boolt aus mäajlich no de Toopkomes. Daut, waut dee doa hieren un seenen, kaun dee to Hoaten gonen un halpen, em jeisteljen verauntokomen. Wies dee daut Video Woo es daut en de Vesaumlungshiesa von Jehova siene Zeijen? un saj dee, woo sea du die freien wurscht, wan see doa uk hankjeemen. Wan daut mäajlich es, dan halp dee uk, daut dee doa kjennen hankomen. Daut wudd goot sennen, veschiedne Vekjindja met no dien Studium to nämen. Dan lieet dee uk aundre von de Vesaumlunk kjanen un feelt sikj doa woomäajlich nich soo framd, wan dee ieescht no de Toopkomes kjemt.

HALP DÄNJANJEN, EM JEISTELJEN VERAUNTOKOMEN

14. Waut woat een Bibelschiela doonen, wan dee Jehova leeft?

14 Wie wellen onse Bibelschiela halpen, em jeisteljen verauntokomen (Efs. 4:13). Wan doa wäa aunfangt de Bibel to studieren, dan deit dee daut veleicht, wiels hee denkjt, daut am daut waut halpt. Oba wan siene Leew fa Jehova ieescht jrata woat, dan woat hee secha uk doaräwa nodenkjen, woo hee aundre halpen kaun, mau rajcht deejanje, waut aul to de Vesaumlunk jehieren (Mat. 22:37-39). Hool die nich trigj, dänjanjen daut bie eene paussende Jeläajenheit to sajen, daut hee uk Gowen jäwen kaun fa daut Kjennichrikjswoakj.

Lia dän, woo dee met Trubbels omgonen kaun (See Varsch 15)

15. Woo kjenn wie eenen Bibelschiela halpen, met Trubbels rajcht omtogonen?

15 Lia dänjanjen, waut dee doonen kaun,  wan een Trubbel oppkjemt. Saj wie mol, du studieescht met eenen ojjedeepten Vekjindja un dee vetalt die, daut am wäa von de Vesaumlunk beleidicht haft. Woo wurscht du dän halpen kjennen? Saj dän nich, wäa em rajchten es, oba laj dän ut, waut hee no de Schreft no wudd doonen kjennen. Hee wudd dän Brooda kjennen vejäwen un von de Sach vejäten. Oba wan hee doa nich von vejäten kaun, dan wudd hee sellen leeftolich met dän räden un vesieekjen, dän to jewennen, aulsoo Fräd met dän to moaken (see uk Matäus 18:15). Halp dienen Bibelschiela, sikj doaropp reedtomoaken, waut hee sajen kaun. Wies am, woo hee en de JW Library®-App, en de Help toom nosieekjen fa Jehova siene Zeijen un opp jw.org® waut finjen kaun, waut am met sienen Trubbel halpt. Je bäta du dän utlieescht, ea dee sikj deepen lat, je bäta woat dee lota met aundre von de Vesaumlunk foadich woaren.

16. Wuarom es daut goot, wan wie aundre met no onse Bibelstudiums nämen?

16 Nemm aundre von de Vesaumlunk met no dien Bibelstudium ooda dän Kjreisoppsechta, wan dee doa es. Wuarom? Nich bloos wäajen daut, waut wie aul ea säden. Aundre Vekjindja kjennen dänjanjen veleicht en jewesse Stekjen bäta halpen aus du. Veleicht haft deejanja, waut studieet, aul ieremol wult daut schmieekjen tochloten un dee haft daut nich kunt. Dan wurscht du kjennen wäm met no daut Bibelstudium nämen, waut mol dänselwjen Trubbel haud. Dee kaun dän woomäajlich krakjt soonen Rot jäwen, waut dän fält. Wan die daut nich maklich es, daut Studium to leiden, wan doa een erfoarna Brooda bie es, dan froag dän Brooda, aus hee daut leiden kaun. Wan du aundre met no dien Bibelstudium nemst, dan kaun deejanja väl von dee lieren. Un wie wellen je, daut de Bibelschiela em jeisteljen veraunkomen.

SAUL EKJ DAUT STUDIUM TOCHLOTEN?

17-18. Woo kjenn wie weeten, aus wie een Bibelstudium tochloten sellen?

17 Wan deejanja, wua du met studieescht, em jeisteljen nich veraunkjemt, dan motst du irjentwanea seenen, aus du dit Studium leewa tochloten sust. Wan du äwa soont nodenkjst, dan hool em Denkj, woo dänjanjen siene Omstend sent. Eenje dieet daut lenja verauntokomen aus aundre. Du wurscht kjennen äwalajen: “Kjemt deejanja soo bosich veraun, aus dän siene Loag daut toolat?” “Prooft dee, daut ‘to doonen’, waut hee lieet?” (Mat. 28:20). Eenje Bibelschiela komen veleicht mau sachelkjes veraun, oba daut sull doawäajen to seenen sennen, daut dee emma wieda veraunkomen.

18 Waut sell wie doonen, wan wie aul een Stoot met wäm studieren un nich weeten, aus dee doa väl om romjeft? Veleicht es daut wäa, waut aul daut Schreft-lieet-Buak studieet haft un veleicht uk met  daut “Gott-siene-Leew”-Buak aunjefongen haft. Oba dee wia noch kjeenmol bie een Toopkomen – nich mol bie daut Owentmol. Un dän kjemt doa sea leicht waut mank, wan wie berät haben to studieren. Wan wie soon Bibelstudium haben, dan wudd wie mol sellen met dän räden. *

19. (a) Waut kjenn wie to wäm sajen, wan wie nich weeten, aus dee väl om sien Bibelstudium romjeft? (b) Aun waut sell wie denkjen?

19 Wie wudden kjennen froagen: “Waut wudd die daut schwanste faulen, wan du wurscht wellen eent von Jehova siene Zeijen woaren?” Veleicht sajcht deejanja dan: “Ekj jleich daut, de Bibel to studieren, oba ekj woa kjeenmol eent von Jehova siene Zeijen woaren!” Wudd daut dan waut halpen, noch lenja met dän to studieren, wan dee aul een Stoot studieet haft un noch emma soo jesonnen es? Oba veleicht sajcht dee ons dan uk toom ieeschte Mol, wuarom hee bat nu noch nich veraunjekomen es. Woomäajlich denkjt dee, hee wudd kjeenmol kjennen von Hus to Hus prädjen. Un wan wie weeten, waut dän trigjhelt, dan kjenn wie dän väl bäta halpen.

Studia nich met soone, waut nich veraunkomen (See Varsch 20)

20. Woo kaun Aposteljeschicht 13:48 ons halpen to weeten, aus wie noch lenja met wäm studieren sellen?

20 Daut es truarich, daut eenje Bibelschiela soo sent aus de Israeliten en Hesekiel siene Tiet. Jehova säd to Hesekiel: “Du best fa an soo aus eena, dee eene scheene Stemm haft un goot spälen kaun, un Leeda von eenem siene leefste sinjt. See horchen no diene Wieed, oba see läwen doa nich no” (Hes. 33:32). Veleicht felt ons daut schwoa, wäm to sajen, daut wie nich mea met dän studieren woaren. Oba “wie haben aul mau weinich Tiet” (1. Kor. 7:29). Enne Städ daut wie noch lenja met soone studieren, waut nich veraunkomen, mott wie deejanje finjen, waut bewiesen, daut see “to daut eewje Läwen rajcht enjestalt”sent (läs Aposteljeschicht 13:48NW *).

Veleicht bäden aundre en june Jäajent om Help (See Varsch 20)

21. Waut es de Varsch fa daut Joa 2020, un wuarom es dee paussent?

21 Ons Varsch fa daut Joa 2020 woat ons halpen, doaräwa notodenkjen, woo wie noch bäta kjennen Jinja moaken. Dee sajcht: “Got nu . . . un moakt an to Lieelinja un deept an”, un es von dee Wieed jenomen, waut Jesus bie daut besondre Toopkomen opp dän Boajch en Galiläa säd (Mat. 28:19).

Well wie doaropp schaufen, ons em Jinja moaken to vebätren un onse Bibelschiela to halpen, daut dee sikj kjennen deepen loten! (See Varsch 21)

LEET 70 No soone sieekjen, waut daut wieet sent

^ Varsch 5 Ons Varsch fa daut Joa 2020 sajcht: “Moakt . . . Lieelinja”. Daut es een Jeboot fa aule, waut Jehova deenen. Woo kjenn wie deejanje, waut de Bibel studieren, to Hoaten räden, daut dee Christus nofoljen wellen? Dis Artikjel woat ons wiesen, woo wie dee halpen kjennen, Jehova noda to komen. Wie woaren uk seenen, woo wie weeten kjennen, aus wie opphieren sellen met wäm to studieren ooda nich.

^ Varsch 18 Kjikj opp JW Broadcasting® daut Video Dee Bibelstudiums tochloten, waut nich wiedakomen.

^ Varsch 20 Aposteljeschicht 13:48 (NW): “Aus de Nichjuden daut hieeden, freiden see sikj un lowden Jehova sien Wuat, un aul dee, waut to daut eewje Läwen rajcht enjestalt wieren, kjeemen toom Gloowen.”