Trigj nom Enhault

No de Enhaultslist gonen

 4. ARTIKJEL FA DAUT STUDIUM

Waut ons eene eefache Moltiet äwa eenen himlischen Kjennich lieet

Waut ons eene eefache Moltiet äwa eenen himlischen Kjennich lieet

“Dit es mien Kjarpa. . . . Dit es mien Bloot en dän nieen Bunt” (MAT. 26:26-28)

LEET 17 “Ekj well”

WAUT WIE SEENEN WOAREN *

1-2. (a) Wuarom kunn wie ons daut soo denkjen, daut Jesus doafäa sorjen wudd, opp eene eefache Wajch sienen Doot to jedenkjen? (b) Äwa woone Ieejenschoften von Jesus woa wie räden?

WEETST du, waut jieda Joa biem Owentmol jedonen woat? Secha weeten de mieeschte von ons de Eenselheiten, waut doa jedonen woaren. Wuarom? Wäajen daut soo eefach oppjestalt es. Oba daut es doawäajen sea besonda. Veleicht denkj wie nu soo: “Wuarom es dise Moltiet dan soo eefach?”

2 Aus Jesus sienen Deenst oppe Ieed derchfieed, wia hee doafäa bekaunt, daut hee wichtje Sachen soo lieed, daut dee eefach, kloa un leicht to vestonen wieren (Mat. 7:28-29). Biejlikj soo haft hee doafäa jesorcht, daut wie daut Aundenkjen * aun sienen Doot opp eene eefache, oba besondre Wajch fieren kjennen. Unjasieekj wie mol daut Owentmol un eenjet von daut, waut Jesus säd un deed. Dan woa wie daut noch dolla schazen, woo deemootich un leeftolich Jesus es un woo väl Moot hee haft. Wie woaren uk lieren, woo wie am noch bäta nodoonen kjennen.

JESUS ES DEEMOOTICH

Daut Broot un de Wien oppem Owentmol halpen ons denkjen, daut Jesus sien Läwen fa ons jeef un daut hee nu ons Kjennich em Himmel es un rejieet (See Varsch 3-5)

3. (a) Woo eefach fieed Jesus daut Owentmol en, soo aus Matäus 26:26-28 sajcht? (b) Waut bediet daut Broot un de Wien?

3 Jesus fieed daut Owentmol en met siene 11 true Apostel. Hee neem von daut, waut bie daut Passafast äwajebläwen wia un fieed dit eefache Aundenkjen aun sienen Doot en (läs Matäus 26:26-28). Jesus neem eefach von daut ojjesuade  Broot un dän Wien, waut see doa hauden. Jesus säd to siene Apostel, daut dise beid Sachen sienen volkomnen Kjarpa un sien Bloot bedieden, waut hee boolt fa an hanjäwen wudd. De Apostel wundaden sikj veleicht goanich doaräwa, woo eefach dise niee wichtje Moltiet wia. Wuarom nich?

4. Wan wie aun dän Rot denkjen, waut Jesus Marta jeef, woo halpt ons daut to vestonen, wuarom Jesus daut Owentmol gaunz eefach derchfieed?

4 Kjikj mol, waut en daut dredde Joa en Jesus sienen Deenst aunjinkj, een poa Moonat ea hee daut Owentmol enfieed. Hee wia bie siene goode Frind Lazarus, Marta un Maria to Gaust. Aus hee doa wia, funk hee aun, an to lieren. Marta wia oba sea drock met väl Äten reedmoaken fa äaren besondren Gaust. Aus Jesus daut sach, jeef hee ar leeftolich Rot, daut et nich emma needich wia, een besondret Äten to moaken (Luk. 10:40-42). Eene Tiet lota, een poa Stund ver sienen Doot, kjeem Jesus sienen ieejnen Rot selfst no. Hee fieed daut Owentmol gaunz eefach. Waut wiest ons dit äwa Jesus?

5. (a) Waut wiest ons de eefache Moltiet äwa Jesus? (b) Woo paust daut met Filippa 2:5, 7-8 toop?

5 Bie aules, waut Jesus säd un deed, wia hee deemootich. Doawäajen es daut nich toom wundren, daut hee dän latsten Owent ver sienen Doot väl Deemoot wees (Mat. 11:29). Hee wist, daut hee daut jratste Opfa jäwen wudd, waut jeemols wäa jejäft haud, un daut Jehova am wudd vom Doot oppwakjen toom aus Kjennich em Himmel läwen. Wan hee daut uk wist, fieed hee oba nich een butajeweeneljet Aundenkjen fa sienen Doot en, daut aule am sullen bewundren. Enne Städ daut säd hee to siene Jinja, daut see eemol daut Joa sullen daut Owentmol gaunz eefach fieren (Joh. 13:15; 1. Kor. 11:23-25). Dise eefache, oba paussende Moltiet wiest, daut Jesus nich stolt wia. Wie kjennen schaftich sennen, daut Deemoot eent von de besondre Ieejenschoften von onsen himlischen Kjennich es (läs Filippa 2:5, 7-8).

6. Woo kjenn wie uk soo deemootich sennen aus Jesus, wan wie Schwierichkjeiten haben?

6 Woo kjenn wie uk soo deemootich sennen aus Jesus? Wan wie dolla om de aundre bedocht sent aus om ons selfst (Filip. 2:3-4). Denkj wie noch mol aun dän latsten Owent ver Jesus sienen Doot. Hee wist, daut hee boolt wudd eenen  kjemmalichen Doot haben, un doch wia hee sea bekjemmat om siene true Apostel, waut boolt wudden äwa am truaren. Doawäajen brukt hee siene latste Nacht doatoo, an to lieren un Moot tootospräakjen (Joh. 14:25-31). Jesus wees deemootich, daut hee dolla om aundre besorcht wia, aus om sikj selfst. Hee es werkjlich een besondret Väabilt fa ons.

JESUS HAFT MOOT

7. Woo wees Jesus väl Moot, fuaz nodäm aus hee daut Owentmol enfieed?

7 Fuaz nodäm aus Jesus daut Owentmol enjefieet haud, wees hee sea väl Moot. Wuarom? Jesus deed aul daut, waut sien Voda von am haben wull, wan daut uk bedied, daut hee wudd schaundhauft dootjemoakt woaren, wäajen se am beschuljden, een Lastra to sennen (Mat. 26:65-66; Luk. 22:41-42). Jesus bleef volstendich tru, om Jehova sienen Nomen to ieren, Gott sien Rajcht aus hechsta Harscha huachtohoolen un deejanje, waut omkjieren, de Mäajlichkjeit to jäwen, eewich to läwen. To deeselwje Tiet muak Jesus siene Nofolja opp daut reed, waut see boolt wudden beläwen.

8. (a) Waut säd Jesus to siene true Apostel? (b) Woo deeden Jesus siene Jinja Joaren lota sien Biespel von Moot no?

8 Jesus wees uk doaderch Moot, daut hee siene Sorjen, waut hee veleicht haud, tosied leet, un sikj doarom kjemmad, waut siene true Apostel fäld. De eefache Moltiet, waut Jesus enfieed, nodäm daut hee Judas gonen leet, wudd dee, waut lota siene jesaulwde Nofolja wudden sennen, aun dän Nutzen von sien vegotnet Bloot denkjen halpen un daut see Poat von dän nieen Bunt wieren (1. Kor. 10:16-17). Jesus säd to siene Nofolja, waut hee un sien Voda von an haben wullen, om an doamet to  halpen tru to bliewen, daut see kunnen met am toop em Himmel sennen (Joh. 15:12-15). Jesus räd uk met siene Apostel äwa de Vefoljunk, waut see lota haben wudden. Dan wees hee opp sien ieejnet Biespel han un säd: “Siet jetroost” (Joh. 16:1-4a, 33). Väl Joaren lota deeden siene Jinja sien besondret Biespel noch emma no un wieren wellich reed, waut fa aundre to doonen soo aus Jesus, un wieren äwanäment. Wan see uk lieden musten, stunden see sikj unjarenaunda en äare Trubbels bie (Heb. 10:33-34).

9. Woo kjenn wie Moot wiesen soo aus Jesus?

9 Vondoag dän Dach doo wie Jesus sien Biespel uk no un wiesen Moot. Daut brukt biejlikj Moot, onse Breeda bietostonen, waut wäajen äaren Gloowen vefolcht woaren. Eenjemol woaren onse Breeda ojjerajcht enjestopt. Wan soont passieet, dan mott wie soo väl fa dee doonen aus wie kjennen, mau rajcht dee veteidjen (Filip. 1:14; Heb. 13:19). Een aundra Wajch, woo wie kjennen Moot wiesen, es, wan wie “brow” prädjen (Apj. 14:3). Soo aus Jesus sent wie ons gaunz eenich, de Norecht von daut Kjennichrikj to prädjen, mau rajcht wan de Menschen jäajen ons sent un ons vefoljen. Oba eenjemol feel wie ons veleicht soo, daut ons Moot fält. Waut kjenn wie dan doonen?

10. Waut sell wie en de Wäakjen ver daut Owentmol doonen un wuarom?

10 Wie kjennen onsen Moot stoakjen, wan wie äwa de Hopninj nodenkjen, waut wie derch Jesus sien Leesjelt haben (Joh. 3:16; Efs. 1:7). En de Wäakjen ver daut Owentmol hab wie eene goode Jeläajenheit, noch dankboara to woaren fa daut Leesjelt. Läs en dise Tiet daut Poat en de Bibel fa daut Owentmol un denkj opp iernst doaräwa no, waut en de latste Tiet  en Jesus sien Läwen passieed. Wan wie dan biem Owentmol sent, woa wie bäta vestonen kjennen, waut daut Broot un de Wien bedieden un uk daut butajeweenelje Opfa, waut dee väastalen. Wan wie dankboa sent fa daut, waut Jesus un Jehova fa ons jedonen haben, un vestonen, woo ons un onse Famielje daut togood kjemt, dan woat onse Hopninj stoakja un wie woaren Moot haben, batem Enj uttohoolen (Heb. 12:3).

11-12. Aun waut halpt ons daut Owentmol denkjen?

11 Daut Owentmol halpt ons aulsoo, aun Jesus sien wieetvollet Leesjelt to denkjen un uk aun siene goode Ieejenschoften, soo aus Deemoot un Moot. Wie kjennen sea dankboa sennen, daut Jesus, aus ons Huaga Priesta, dise Ieejenschoften noch emma wiest un fa ons ensteit (Heb. 7:24-25). Om onse Dankboakjeit to wiesen, mott wie Jesus sienen Doot krakjt soo jedenkjen, aus hee daut haben well (Luk. 22:19-20). Wie doonen daut aun dän Dotem, waut krakjt de 14. Nissan es. Dit es de wichtichsta Dach em Joa.

12 Daut Owentmol, waut Jesus enfieed, wiest ons noch eene Ieejenschoft, waut hee haud, waut am bat doa brocht, fa ons to stoawen. Aus hee oppe Ieed läwd, wia hee fa dise Ieejenschoft bekaunt. Waut wia daut fa eene?

JESUS WIEST LEEW

13. (a) Woo beschriewen Johanes 15:9 un 1. Johanes 4:8-10 de Leew, waut Jehova un Jesus weesen? (b) Wäa haft aula eenen Nutzen von dee äare Leew?

13 Jesus wees en aules, waut hee deed, Jehova siene Leew (läs Johanes 15:9; 1. Johanes 4:8-10). Hee jeef von Hoaten sien Läwen fa ons han. Aus wie nu von de Jesaulwde ooda von de “aundre Schop” sent, wie haben aula eenen Nutzen von de Leew, waut Jehova un sien Sän ons derch daut Leesjelt weesen (Joh. 10:16; 1. Joh. 2:2). Soo aus daut Owentmol oppjestalt es, wiest uk, daut Jesus siene Jinja leewd un om dee bekjemmat wia. Wuarom?

Jesus fieed leeftolich soon eefachet Toopkomen toom Aundenkjen en, daut et mäajlich wia, daut fa hundade Joaren to fieren, un daut en veschiedne Omstend (See Varsch 14-16) *

14. Woo wees Jesus siene Nofolja Leew?

14 Jesus wees siene Leew fa siene jesaulwde Nofolja doaderch, daut hee eene gaunz eefache Moltiet enfieed toom Aunjedenkj. Dee musten jieda Joa daut Owentmol fieren un met de Tiet uk en veschiedne Omstend, mau rajcht em Jefenkjnis (Opb. 2:10). Kunnen dee Jesus sien Jeboot nokomen? Jo, dee kunnen.

15-16. Woo haben eenje kunt en schwoare Omstend daut Owentmol haben?

15 Bat vondoag dän Dach haben de woare Christen sikj emma bemieecht, daut Owentmol to fieren. Dee hoolen sikj soo neiw aus mäajlich doaraun, daut soo to fieren, aus Jesus daut deed, mau rajcht en schwoare Omstend. See wie mol een poa Biespels. Aus Brooda Harold King en China auleen em Jefenkjnis wia, must hee seenen, woo hee daut Owentmol fieren kunn. Hee muak sikj väasechtich daut Broot un dän Wien reed un brukt doatoo soont, waut hee doa haud. Hee räakjend sikj uk dän Dotem fa daut Owentmol soo neiw aus mäajlich ut. Aus daut ieescht bat doa wia, sunk hee auleen en siene Stow, bäd un hilt eene biblische Räd.

16 Noch een aundret Biespel es von waut Sestren, waut en dän Tweeden Weltkjrich en een Loaga fa Faustjenomne wieren. Dee saden äa Läwen opp Spell toom daut Owentmol fieren. Oba wäajen daut soo eefach oppjestalt es, kunnen dee daut, onen daut et wäa enwort. De Sestren sajen: “Wie stunden dicht toop rom een Footbenkjskje, wua eene witte Spreed äwa wia, un doa haud wie daut Broot un dän  Wien bowen. Wie hauden bloos Taulchlicht, wiels Bolbenlicht wia too jefäadlich. . . . Wie vespruaken vom nieen, aul onse Krauft to brucken, om fa onsen Voda sienen heiljen Nomen entostonen.” Dise Sestren hauden werkjlich eenen stoakjen Gloowen! Doaderch, daut Jesus daut mäajlich muak, mau rajcht en schwoare Omstend daut Owentmol to haben, wees hee werkjlich siene Leew.

17. Äwa waut vonne Froagen kjenn wie nodenkjen?

17 En de Tiet, wan daut Owentmol noda kjemt, wudd wie kjennen äwa de Froagen nodenkjen: “Woo kaun ekj noch dolla soo Leew wiesen, aus Jesus deed? Denkj ekj mea aun daut, waut miene Gloowesbreeda fält, aus aun daut, waut mie fält? Velang ekj mea von miene Breeda un Sestren, aus dee doonen kjennen ooda denkj ekj aun dee äare Jrensen?” Well wie emma Jesus nodoonen un Metleet haben (1. Pet. 3:8).

HOOL DISE LIEREN EMMA EM DENKJ

18-19. (a) Äwa waut kjenn wie ons secha sennen? (b) Waut sent wie entschloten to doonen?

18 Boolt woat daut nich mea needich sennen, daut Aundenkjen aun Jesus sienen Doot to fieren. Wan Jesus en de groote Triebsaul “kjemt”, woat hee “siene utjewälde”, waut noch oppe Ieed sent, em Himmel vesaumlen. Von doa aun woat daut Owentmol nich mea jefieet woaren (1. Kor. 11:26; Mat. 24:31).

19 Wan daut Owentmol uk nich mea woat jefieet woaren, kjenn wie ons secha sennen, daut Jehova siene Deena dise eefache Moltiet aus een Tieekjen em Denkj hoolen woaren fa de jratste Deemoot, Moot un Leew, waut een Mensch jeemols jewäsen haft. To dee Tiet woaren aul dee, waut dit besondre Owentmol ea jefieet haben, gaunz secha von dän Nutzen vetalen, waut daut fa aul dee haft, waut dan läwen. Oba daut ons daut Owentmol nu aul togood kjemt, mott wie ons eenich sennen, Jesus siene Deemoot, Moot un Leew notodoonen. Wan wie daut doonen, woat Jehova ons secha beloonen (2. Pet. 1:10-11).

LEET 13 Christus es ons Väabilt

^ Varsch 5 Wie woaren boolt daut Owentmol toom Aundenkjen aun Jesus Christus sienen Doot fieren. Dise eefache Moltiet lieet ons väl äwa Jesus siene Deemoot, sienen Moot un siene Leew. En disen Artikjel woa wie seenen, woo wie Jesus siene besondre Ieejenschoften nodoonen kjennen.

^ Varsch 2 WIEED UTJELAJCHT: Een Aundenkjen bediet, waut besondret to doonen, om aun eene jewesse Sach ooda Mensch to denkjen un to ieren.

^ Varsch 56 BILTBESCHRIEWUNGEN: Daut Owentmol woat jefieet von true Christen em ieeschten Joahundat; em Loaga fa Faustjenomne von de Nazis; rom daut Joa 1880; un en onse Tiet en een eefachet Vesaumlungshus, waut von de Sieden op es, en een woamet Launt en Sied-Amerika.