Trigj nom Enhault

No de Enhaultslist gonen

 5. ARTIKJEL FA DAUT STUDIUM

Waut wiest daut äwa ons, wan wie bie de Toopkomes sent?

Waut wiest daut äwa ons, wan wie bie de Toopkomes sent?

“Doamet [saj jie], daut de Har jestorwen es, un daut, soo lang bat hee wada kjemt” (1. KOR. 11:26)

LEET 18 Dankboa fa daut Leesjelt

WAUT WIE SEENEN WOAREN *

1-2. (a) Waut sitt Jehova, wan doa jieda Joa millionende Menschen nom Owentmol komen? (See daut Bilt oppe väaschte Sied.) (b) Äwa waut woa wie en disen Artikjel räden?

STAL die mol väa, waut Jehova sitt, wan oppe gaunze Welt millionende Menschen toopkomen toom daut Owentmol fieren. Hee sitt nich bloos de groote Maussen Menschen, oba hee kjikjt no jieda eenselnen, waut doa es. Hee sitt biejlikj dee, waut tru jieda Joa doa hankomen. Mank dee sent veleicht soone, waut komen, wan dee uk sea vefolcht woaren. Aundre sent nich räajelmässich bie de Toopkomes, oba daut Owentmol es fa dee soo wichtich, daut dee doa hankomen. Jehova kjikjt uk no dee, waut toom ieeschte Mol biem Owentmol sent, wäajen dee veleicht nieschierich sent.

2 Jehova freit sikj sea doaräwa, daut soo väle nom Owentmol komen (Luk. 22:19). Oba hee es nich daut dolste doarom bekjemmat, woo väl Menschen doa sent. Jehova intressieet sikj dolla doafäa, wuarom dee doa hankomen. En disen Artikjel woa wie äwa de wichtje Froag räden: Wuarom go wie uk no dee Toopkomes, waut Jehova jieda Wäakj fa deejanje reedmoakt, waut am leewen, un nich bloos jieda Joa no daut Owentmol?

Oppe gaunze Welt woaren millionende Menschen bie daut Owentmol oppjenomen (See Varsch 1-2)

DEEMOOT HALPT ONS, DOA TO SENNEN

3-4. (a) Wuarom sent wie bie de Toopkomes? (b) Waut wiest daut äwa ons, wan wie bie de Toopkomes sent? (c) Wuarom sell wie no 1. Korinta 11:23-26 no nich daut Owentmol utloten?

3 Wie gonen hauptsechlich doawäajen no de Toopkomes, wäajen dee Poat von onsen Deenst fa Jehova sent. Wie wanken doa uk han, wiels Jehova ons doa lieet. Stolte Menschen  denkjen, an brukt nuscht jelieet (3. Joh. 9). Oba bie ons es daut aundasch. Wie wellen, daut Jehova un de Organisazion, waut hee doatoo brukt, ons belieren (Jes. 30:20; Joh. 6:45).

4 Daut wie bie de Toopkomes sent, wiest, daut wie deemootich un reed sent toom lieren. Wan wie bie daut Owentmol sent, es daut nich bloos, wäajen wie doa sennen motten, oba uk, wiels wie deemootich Jesus sien Jeboot nokomen. Hee säd: “Doot daut, om aun mie to denkjen” (läs 1. Korinta 11:23-26). Dit Toopkomen stoakjt onse Hopninj un halpt ons denkjen, woo sea Jehova ons leeft. Oba Jehova weet, daut ons mea aus bloos eemol daut Joa fält Moot tootospräakjen. Doawäajen sorcht Jehova doafäa, daut wie jieda Wäakj de Toopkomes haben, un rot ons too, doa to sennen. Deemoot halpt ons to jehorchen. Wie brucken jieda Wäakj miere Stund, om ons fa de Toopkomes reedtomoaken un doa to sennen.

5. Wuarom nämen deemootje Menschen Jehova siene Enlodunk aun?

5 Jieda Joa nämen een deel deemootje Menschen Jehova siene Enlodunk aun, om von am to lieren (Jes. 50:4). Dee jleichen daut, bie daut Owentmol to sennen, un fangen uk aun, no onse aundre Toopkomes to komen (Sach. 8:20-23). Aulatoop sent wie schaftich, ons von Jehova belieren un leiden to loten, wiels hee es dee, waut ons “halpt un rat” (Psa. 40:18). Waut kunn scheena gonen un wichtja sennen, aus de Enlodunk auntonämen, om von Jehova un sienen Sän Jesus, dän hee soo sea leeft, belieet to woaren? (Mat. 17:5; 18:20; 28:20).

6. Woo holp Deemoot eenen Maun, no daut Owentmol to komen?

6 Wie strenjen ons aun, jieda Joa soo väl Menschen aus mäajlich fa daut Aundenkjen aun Jesus sienen Doot entoloden. Een deel deemootje Menschen es onse Enlodunk aul togood jekomen. See wie mol een Biespel. Miere Joa trigj kjrieech een Maun eene Enlodunk fa daut Owentmol, oba hee säd to dän Brooda, waut am dee jeef, daut hee nich wudd kjennen komen. Oba dän Zeowes, aus daut Owentmol wia, wia de Brooda äwarauscht, aus hee sach, daut dis Maun doa hankjeem. De Maun wia soo vewundat, woo leeftolich dee aula to am wieren, daut hee aunfunk, no onse Toopkomes to wanken. En daut Joa leet hee mau dree Toopkomes ut. Waut holp am, bie aule Toopkomes to sennen? Hee wia reed, siene Enstalunk to endren. De Brooda, waut am enjelot haud, säd lota: “Hee es een sea deemootja Maun.” Onen Twiewel trock Jehova disen Maun toom am deenen, un nu es hee ons Brooda (2. Sam. 22:28; Joh. 6:44).

7. Woo kjennen de Toopkomes un daut Bibelläsen ons halpen, deemootich to sennen?

7 Daut, waut wie enne Toopkomes lieren un waut wie enne Bibel läsen, kaun ons halpen, deemootich to sennen. De Toopkomes en de Wäakjen ver daut Owentmol haundlen sikj foaken von Jesus sien Biespel un siene Deemoot, waut hee wees, aus hee sien Läwen aus Leesjelt jeef. Un de Doag ver daut Owentmol woat ons toojerot, de Poat enne Bibel to läsen, waut von de Tiet räden, wua Jesus dootjemoakt wort un wada oppstunt. Waut wie en soone Toopkomes lieren un waut wie en de Poat enne Bibel läsen, halpt ons, noch dankboara fa Jesus sien Opfa to sennen, waut hee fa ons jeef. Daut brinjt ons bat doa, Jesus siene deemootje Enstalunk notodoonen un Jehova sienen Wellen to doonen, mau rajcht dan, wan daut fa ons schwoa es (Luk. 22:41-42).

 MOOT HALPT ONS, DOA TO SENNEN

8. Woo wees Jesus Moot?

8 Wie doonen Jesus uk no, wan wie Moot wiesen. Denkj mol doaraun, woo väl Moot Jesus de Doag ver sienen Doot wees. Hee wist krakjt, daut siene Fiend am boolt wudden deemootjen, vekjielen un dootmoaken (Mat. 20:17-19). Oba doawäajen jinkj hee dän Doot nich utem Stich. Aus de Tiet ieescht doa wia, säd hee to siene true Apostel, waut met am toop en Getsemane wieren: “Stot opp, well wie gonen! Dee es hia, dee mie veroden deit” (Mat. 26:36, 46). Un aus de Häad dolle Menschen met äare Jewäaren kjeemen Jesus fausttonämen, jinkj hee dee entjäajen un jeef sikj to erkjanen. Hee säd to de Soldoten, daut see de Apostel sullen gonen loten (Joh. 18:3-8). Woo väl Moot Jesus nich wees! Vondoag dän Dach schaufen de jesaulwde Christen un de aundre Schop uk doaropp, derch äaren Moot Jesus notodoonen. Woo doonen dee daut?

Wan wie Moot wiesen toom bie de Toopkomes sennen, dan stoakjt aundre daut em Gloowen (See Varsch 9) *

9. (a) Wuarom bruck wie veleicht Moot toom pinkjlich en de Toopkomes sennen? (b) Waut kaun ons Väabilt aun soone Breeda doonen, waut wäajen äaren Gloowen enjestopt sent?

9 Wan wie Schwierichkjeiten haben, mott wie veleicht Moot wiesen toom pinkjlich en de Toopkomes sennen. Eenje Breeda un Sestren sent en de Toopkomes, wan dee uk truarich, mootloos ooda krank sent. Aundre wiesen Moot un wanken no de Toopkomes, wan dee uk von äare Famielje ooda de Rejierunk sea vefolcht woaren. Denkj wie mol doaraun, waut ons Biespel aun soone Breeda deit, waut wäajen äaren Gloowen enjestopt sent (Heb. 13:3). Wan dee hieren, daut wie Jehova wieda deenen, wan wie uk Trubbels haben, dan woat dee äa Gloowen jestoakjt toom wieda tru bliewen un nich dän Moot velieren. De Apostel Paulus beläwd biejlikj soowaut. Aus hee en Room enjestopt wia, freid hee sikj emma, wan hee hieed, daut siene Breeda Gott tru deenden (Filip. 1:3-5, 12-14). Een Stootje doa ver ooda fuaz nodäm aus Paulus friekjeem, schreef hee sienen Breef aun de Hebräa. En dän Breef rod hee de true Christen too, “faust en de Broodaleew” to bliewen (Heb. 10:24-25; 13:1).

10-11. Wäm wudd wie sellen toom Owentmol enloden? (b) Wuarom sell wie daut no Efeesa 1:7-8 no doonen?

10 Wie wiesen Moot, wan wie ons Frintschoft, Oabeitspoatna un Nobasch to daut Owentmol enloden. Wuarom lod wie dee en? Wie doonen daut, wiels wie Jehova un Jesus soo dankboa sent fa daut, waut dee fa ons jedonen haben. Wie wellen, daut dee lieren, woo an uk kaun Jehova siene “groote Jnod” togood komen, waut derch daut Leesjelt kjemt (läs Efeesa 1:7-8; Opb. 22:17).

11 Wan wie Moot haben toom ons vesaumlen, dan wies wie noch eene aundre besondre Ieejenschoft, waut Gott un sien Sän opp besondre Wäaj wiesen.

 LEEW HALPT ONS, DOA TO SENNEN

12. (a) Woo stoakjen de Toopkomes onse Leew fa Jehova un Jesus? (b) To waut rot 2. Korinta 5:14-15 ons too, om Jesus notodoonen?

12 Onse Leew fa Jehova un Jesus brinjt ons bat doa, bie de Toopkomes to sennen. Un daut, waut wie doa lieren, stoakjt onse Leew fa Jehova un sienen Sän. Doa woat ons uk emma wada denkjen jeholpen, waut dee fa ons jedonen haben (Reem. 5:8). Daut Owentmol wiest ons besonda, woo groot Jehova un Jesus äare Leew es, mau rajcht fa soone, waut fa daut Leesjelt noch nich dankboa sent. Wiels wie soo dankboa sent, proow wie Jesus jieda Dach notodoonen (läs 2. Korinta 5:14-15). Un wäajen Jehova fa daut Leesjelt sorjd, kjenn wie goanich aundasch, aus am doafäa lowen. Eene Mäajlichkjeit, woo wie Jehova lowen kjennen, es, wan wie en de Toopkomes von Hoaten Auntwuaten jäwen.

13. Woo kjenn wie wiesen, woo sea wie Jehova un sienen Sän leewen? Laj daut ut.

13 Wie kjennen Jehova un sienen Sän wiesen, woo sea wie dee leewen, wan wie reed sent, Sachen fa dee opptojäwen. Eenjemol mott wie veschiednet oppjäwen, om bie onse Toopkomes to sennen. Een deel Vesaumlungen haben eent von de Toopkomes aum Woakjeldach zeowes, wan eena veleicht meed es. Un daut aundre Toopkomen es utgangs Wäakj, wan aundre Menschen vereiwen. Sitt Jehova daut, wan wie no de Toopkomes wanken, wan wie uk meed sent? Oba jo! Wiels je dolla wie ons aunstrenjen, daut notokomen, je mea räakjent Jehova daut, waut wie ut Leew fa am doonen (Mar. 12:41-44).

14. Woo jeef Jesus daut Biespel, soone Leew to haben, waut daut ieeschte om aundre bedocht es?

14 Jesus jeef daut Biespel, soone Leew to wiesen, waut daut ieeschte om aundre bedocht es. Hee wia reed, fa siene Jinja to stoawen, un wia jieda Dach daut ieeschte om daut bekjemmat, waut dee fäld, un nich om daut, waut am fäld. Hee wia mau rajcht met siene Jinja toop, wan hee uk meed wia ooda daut sea schwoa haud (Luk. 22:39-46). Un hee kjikjt emma doano, waut hee fa aundre doonen kunn, un nich, waut dee fa am doonen kunnen (Mat. 20:28). Wan onse Leew fa Jehova un de Breeda uk soo stoakj es, dan woa wie aules doonen, waut wie kjennen, om bie daut  Owentmol un aul de aundre Toopkomes to sennen.

15. Om woone sent wie besonda bekjemmat?

15 Wie jehieren to de eensje woare Christen, un wie jleichen daut, soo väl Tiet aus mäajlich doatoo to brucken, aundre to halpen, sikj ons auntoschluten. Oba wie sent besonda om dee bekjemmat, waut “met ons toop em Gloowen stonen” un oba nich mea prädjen ooda no de Toopkomes wanken (Gal. 6:10). Wie wiesen onse Leew fa dee, wan wie dee tooroden, no onse Toopkomes to komen, un besonda no daut Owentmol. Soo aus Jehova un Jesus sent wie sea schaftich, wan soone trigj no Jehova komen, no onsen leeftoljen Voda un Hoad (Mat. 18:14).

16. (a) Woo kjenn wie ons unjarenaunda Moot toospräakjen? (b) Wuarom es dit eene goode Tiet em Joa, aun Jesus siene Wieed en Johanes 3:16 to denkjen?

16 Doo en de komende Wäakjen soo väl Menschen aus mäajlich toom Owentmol enloden, waut Friedach, dän 19. Aprell 2019, sennen woat. (See dän Kausten “ Woascht du dee enloden?”) Well wie ons daut gaunze Joa unjarenaunda Moot toospräakjen, doaderch, daut wie pinkjlich bie de Toopkomes sent, waut Jehova fa ons reedmoakt. En de Tiet, wua daut Enj emma noda kjemt, fälen ons de Toopkomes, daut wie kjennen deemootich bliewen un onsen Moot un Leew bewoaren (1. Tess. 5:8-11). Well wie von gaunzen Hoaten wiesen, woo wie doaräwa feelen, daut Jehova un Jesus ons soo sea leewen (läs Johanes 3:16).

LEET 126 Woakt, bät un stot faust

^ Varsch 5 Daut Aundenkjen aun Jesus sienen Doot, waut wie Friedach zeowes, dän 19. Aprell 2019, haben woaren, woat daut wichtichste Toopkomen vom Joa sennen. Wuarom well wie doa sennen? Na, wäajen wie Jehova jefaulen wellen. En disen Artikjel woa wie seenen, waut daut äwa ons wiest, wan wie bie daut Owentmol un uk bie onse aundre Toopkomes sent, waut wie jieda Wäakj haben.

^ Varsch 52 BILTBESCHRIEWUNK: Een Brooda, waut wäajen sienen Gloowen em Jefenkjnis es, kjricht Moot derch eenen Breef von tus. Am moakt daut schaftich to weeten, daut se am nich vejäten haben un daut siene Famielje Jehova uk tru blift, wan daut en äare Omjäajent uk orruich es wäajen de Politikj.