Trigj nom Enhault

No de Enhaultslist gonen

 LÄWESJESCHICHT

Von goode Biespels lieren brocht mie väl goodet

Von goode Biespels lieren brocht mie väl goodet

AUS ekj junk wia, foll mie daut prädjen sea schwoa. Un lota kjrieech ekj uk ieremol eene Oppgow un docht, daut ekj dee goanich doonen kunn. Ekj wudd junt jieren mol von een poa Breeda vetalen, waut goode Biespels fa mie wieren. Dee holpen mie, met miene Angst foadich to woaren un en miene 58 Joa em Voltietdeenst väl wundascheenet to beläwen.

Ekj wort en de Staut Quebec jebuaren, waut en de Prowins Quebec en Kanada es. Doa räden se Fraunzeesisch. Miene Elren, Louis un Zélia, behaundelden mie emma leeftolich. Mien Voda wia bleed un jleicht sea to läsen. Mie jinkj daut schriewen sea scheen, un ekj hopt, daut ekj doamet noch mol kunn mien Läwen moaken.

Aus ekj ojjefäa 12 Joa wia, kjeemen Rodolphe Soucy un sien Frint no ons. Dee wieren Jehova siene Zeijen un Rodolphe schauft met miene Pape toop. Ekj wist nich väl von Jehova siene Zeijen un wia uk nich sea nieschierich doatoo. Oba mie foll daut opp, daut dee onse Froagen soo dietlich un leeftolich met de Schreft beauntwuaten kunnen. Miene Elren jleichten daut uk un wie fungen aun de Bibel to studieren.

To jane Tiet jinkj ekj no eene katoolsche School. Eenjemol vetald ekj miene Schoolpoatna, waut ekj bie daut Bibelstudium lieed. Met de Tiet worden uk de Lierasch daut en. Daut wieren Priestasch un enne Städ daut see mie enne Schreft weesen, wua ekj orrajcht wia, säd eena von dee ver de aundre Schoolkjinja, daut ekj bloos jäajenaun sennen wull. Daut jinkj nich scheen, oba fa mie wia daut toom gooden, wiels ekj enwort, daut daut, waut ekj doa lieed, nich met de Schreft stemd. Mie wort kloa, daut dit nich de rajchte School fa mie wia. Doawäajen jeewen miene Elren mie Frieheit no eene aundre School to gonen.

EKJ LIA, DÄN DEENST EMMA MEA TO RÄAKJNEN

Ekj studieed wieda de Bibel, oba ekj kjeem em jeisteljen mau sacht wieda, wiels ekj Angst haud von Hus to Hus prädjen to gonen. De katoolsche Kjoakj haud sea väl Macht un schauft sea jäajen ons Prädichtwoakj. Maurice Duplessis, de Väaschta von de Prowins Quebec, schauft sea met de katoolsche Kjoakj toop un deed Menschen unjastetten, waut sikj toopstunden  un met Jehova siene Zeijen groff omjinjen un dee mau rajcht proowden waut auntodoonen. To jane Tiet brukt eena väl Moot toom prädjen.

Een Brooda, waut mie holp met miene Angst foadich to woaren, wia John Rae. Hee wia en de näajende Klauss von de Gilead-School jewast. John haud väl Erfoarunk, wia leeftolich, deemootich un eena kunn leicht met dän räden. Hee jeef mie mau wietleftich Rot, oba ekj lieed väl von sien goodet Biespel. Wiels am daut schwoa foll, Fraunzeesisch to räden, wia ekj foaken met am toop em Deenst un holp am met de Sproak. Daut ekj met dän toop wia, holp mie, mootich fa de Woarheit entostonen. Tieen Joa nodäm aus ekj Jehova siene Zeijen kjanen jelieet haud, leet ekj mie dan deepen. Daut wia aum 26. Mei 1951.

John Rae (A) sien goodet Biespel holp mie (B), daut ekj nich mea soo väl Angst haud, von Hus to Hus to prädjen

De mieeschte von onse kjliene Vesaumlunk en de Staut Quebec wieren Pionia. Dee wieren soon goodet Biespel, daut mie uk jankad, Pionia to woaren. Ieeschtemma brukt wie bloos de Schreft, wan wie von Hus to Hus prädijden. Doawäajen must wie lieren, dee noch bäta to brucken, un ekj socht mie soone Bibelvarzh, waut mie holpen fa de Woarheit entostonen. Oba wan daut nich soone Bibel wia, waut met de katoolsche Kjoakj äare Frieheit jedrekjt wia, wullen väl Menschen doa nich mol bennen läsen.

Aune 1952 befried ekj mie met eene true Sesta von miene Vesaumlunk, waut Simone Patry heet. Wie trocken no Montreal un benna een Joa haud wie een Bäbe, waut eene Lise wia. Ea wie ons befrieden, haud ekj met dän Pioniadeenst oppjehieet, oba ekj un Simone wullen wieda een eefachet Läwen fieren, daut onse Famielje soo väl aus mäajlich fa Jehova doonen kunn.

De näakjste tieen Joa docht ekj nich väl äwa dän Pioniadeenst no. Oba aune 1962 wia ekj fa eene Moonat em Betel en Kanada en de Kjennichrikjsdeenst-School fa Eltestasch. Doa haud ekj met Brooda Camille Ouellette toop eene Stow. Hee hilt sea opp prädjen, un daut deed väl aun mie, besonda wiels dee uk befriet wia un Kjinja haud. Ieeschtemma jeef daut en Quebec mau sea weinich Breeda un Sestren, waut Pionia wieren un Kjinja hauden. Oba Camille wull met dän Pioniadeenst aunfangen un hee spruak mie uk Moot too, äwa miene Loag notodenkjen. Un mau een poa Moonat nodäm wort ekj en, daut ekj wada wudd kjennen Pionia woaren. Eenje  sach daut nich moakhauftich, oba ekj deed daut, wiels ekj mie secha wia, daut Jehova mie halpen wudd mea em Deenst to doonen.

WIE KOMEN AUS SONDAPIONIEREN TRIGJ NO QUEBEC

Aune 1964 worden ekj un Simone aus Sondapionieren no de Staut Quebec jeschekjt, wua wie oppjewossen wieren. Doa deend wie dan fa de näakjste poa Joa. To jane Tiet wia de Deenst doa aul leichta, oba daut jeef noch emma Jäajenstaunt.

Eenen Sinowent no Meddach wort ekj en eene kjliene Staut faustjenomen, waut Sainte-Marie heet un dicht bie de Staut Quebec wia. Een Beaumta brocht mie no de Poliezen-Offiz un stopt mie doa en, wäajen ekj onen Frieheit von de Rejierunk von Hus to Hus prädjen deed. Lota brochten se mie dan ver eenen Rechta, waut Baillargeon heet un wua eena sikj leicht fa ferchten kunn. Hee fruach mie, wäa mien Ofkot sennen wudd. Ekj säd, daut wudd Glen How * sennen; een Brooda, waut een sea bekaunda Ofkot wia. De Rechta wort gaunz oppjeräacht un säd: “Oh, nä! Doch nich dee!” Aule wisten, daut Glen How een sea feina Ofkot wia, waut Jehova siene Zeijen aul foaken biejestonen haud. Nich lang no daut leet daut Jerecht mie dan weeten, daut ekj met nuscht mea beschulcht wort.

Wäajen daut en Quebec soo väl Jäajenstaunt jeef, wia daut nich leicht, eene feine Städ fa de Toopkomes to renten. Doawäajen kjeem onse kjliene Vesaumlunk en eene oole, kolde Garazh toop. De Breeda brukten eenen Eelj-Owen, daut et doa en de ieskolde Winta weens een bät woam wia. Foaken kjeem wie aul een poa Stund ver de Toopkomes un sauten doa rom dän Owen un vetalden ons scheene Erfoarungen.

Daut es bloos wundascheen, woo daut Prädichtwoakj met de Joaren wiedajekomen es. En de 1960ja Joaren jeef et mau een poa kjliene Vesaumlungen en de Staut Quebec un doa dicht bie un en de Jäajent von Côte-Nord un Gaspé. Oba nu jeft et doa sea väl Breeda un Sestren un dee haben schmocke Vesaumlungshiesa.

DE DEENST AUS REISENDA OPPSECHTA

Aune 1977 wia ekj bie een Toopkomen fa reisende Oppsechta en Toronto, Kanada

Aune 1970 worden ekj un Simone fa dän Kjreisdeenst enjelot. Un aune 1973 wort ekj dan Distrikjtoppsechta. En dise Joaren lieed ekj väl von soone Breeda aus Laurier Saumur * un David Splane, * waut beid feine reisende Oppsechta wieren. No jieda Kongress jeewen David un ekj ons omzajcht Rot toom ons em lieren vebätren. Mie denkjt daut noch, daut David mol to mie säd: “Léonce, ekj jleicht diene latste Räd. Daut wia fein, oba ekj wudd doa haben dree Räden von jemoakt!” Ekj deed foaken too väl Eenselheiten en miene Räden nenn un must lieren, mie doarenn to vebätren.

Ekj deend opp veschiedne Städen en Oost-Kanada

De Distrikjtoppsechta sullen de Kjreisoppsechta Moot toospräakjen. Oba foaken, wan ekj aus Distrikjtoppsechta en Quebec wia, wullen de  Vekjindja doa met mie toop prädjen, wäajen dee mie goot kjanden. Daut jinkj sea scheen, oba ekj neem mie dan nich jenuach Tiet fa dän Kjreisoppsechta. Doawäajen säd een leeftolja Kjreisoppsechta mol to mie: “Daut es goot, daut du die fa de Breeda Tiet nemst, oba denkj doaraun, daut du hia best toom mie besieekjen. Mie fält daut uk aun Moot!” Von disen leeftoljen Rot lieed ekj väl.

Aune 1976 wort doa onverhofs waut schlemmet, waut mie sea truarich muak. Miene leewe Fru Simone wort krank un storf. See wia eene sea feine Ehefru, wäajen see Jehova sea leewd un emma reed wia, waut fa aundre to doonen. Wiels ekj mie em Deenst drock hilt, kunn ekj met dit truaje foadich woaren, un ekj sie Jehova opp iernst dankboa, daut hee mie en dise schwoare Tiet emma biestunt. Lota befried ekj mie dan met Carolyn Elliott, eene flietje Pionia-Sesta, waut Enjlisch rät. Dee wia no Quebec jekomen toom doa prädjen, wua mea Help fäld. Daut es leicht, met Carolyn to räden, un dee es opprechtich om aundre bekjemmat, besonda om dee, waut bleed sent ooda sikj auleen feelen. See wia eene groote Help fa mie, aus ekj een reisenda Oppsechta wia.

EEN BESONDRET JOA

En Jaunewoa 1978 wia de ieeschte Pioniadeenst-School en Quebec un ekj sull doa een Liera sennen. Ekj wia sea nerwees, wäajen de School fa mie krakjt soo nie wia aus fa de Schiela. Daut goode Dinkj wia, daut doa en de ieeschte Klauss een deel erfoarne Pionieren wieren. Ekj lieed väl von dee, wan ekj doa uk de Liera wia!

Een poa Moonat lota wia dan en daut Olympia-Stadion en Montreal de internazionala Kongress met daut Teema “Gloowen, waut jewent”. Noch kjeenmol ea haud daut en Quebec soonen grooten Kongress jejäft. Doa wieren mea aus 80 000 Menschen. Ekj kjrieech de Oppgow, met soone to räden, waut fa de Zeitungen  schreewen, un wia sea schaftich, wäajen dee lota soo väl goodet äwa dän Kongress schreewen. Doa worden hundade Artikjels jeschräwen un dee muaken uk Programs em Tellewizhen un äwa Rädio, wua dee ons befruagen un waut met aules toop äwa 20 Stund dieeden. Daut wia een sea grootet Zeichnis!

WIE KJRIEJEN EENE NIEE OPPGOW

Aune 1996 endad sikj väl fa mie. Von miene Doop aun haud ekj en Quebec en daut fraunzeesische Jebiet jedeent, oba nu schekjten se mie aus Distrikjtoppsechta no de Jäajent von Toronto, wua se Enjlisch räden. Ekj docht, ekj wudd daut nich kjennen, un haud Angst, doa Räden to hoolen, wäajen ekj nich goot Enjlisch kunn. Ekj must sea bäden un mie gaunz opp Jehova veloten.

Wan ekj soo trigjdenkj, dan kaun ekj werkjlich sajen, daut wie en de Jäajent von Toronto twee wundascheene Joa hauden. Carolyn holp mie jeduldich met de enjlische Sproak un de Breeda doa wieren uk sea behelplich un spruaken mie Moot too. Daut dieed nich lang, bat wie doa een deel Frind hauden.

Foaken deed ekj Friedach jäajen Owent ojjefäa eene Stund von Hus to Hus prädjen, wan doa utgangs Wäakj uk een Kongress wia, wua daut väl reedtomoaken jeef. Eenje wundaden veleicht, wuarom ekj en de drocke Tiet ver dän Kongress noch prädjen jinkj. Oba daut jeef mie väl Krauft, wan ekj em Deenst met wäm fein räden kunn. Un ekj sie uk nu noch emma schaftich, wan ekj jeprädicht hab.

Aune 1998 worden ekj un Carolyn aus Sondapionia wada no Montreal jeschekjt. Doa kunn ekj uk väl Joaren daut besondre effentliche prädjen plonen un soone halpen, waut Programs em Tellewizhen un Rädio muaken ooda fa Zeitungen schreewen, daut see nich soo väl orrajchte Iedeeen äwa Jehova siene Zeijen hauden. Un nu jeit mie un Carolyn daut scheen, Utlenda to prädjen, waut noch nich lang en Kanada sent un sikj foaken sea fa de Schreft intressieren.

Ekj un miene Fru Carolyn

Wan ekj äwa de 68 Joa nodenkj, waut ekj Jehova aul deen, dan woa ekj en, woo väl goodet ekj aul jekjräajen hab. Mie moakt daut sea schaftich, daut ekj jelieet hab, dän Deenst väl to räakjnen, un daut ekj een deel aundre halpen kunn, de Woarheit kjanen to lieren. Un miene Dochta Lise un äa Maun worden Pionia, aus äare Kjinja ieescht groot wieren. Mie freit daut sea, daut see soo flietich em Deenst es. Un ekj sie sea dankboa fa aul de Gloowesbreeda, waut soon goodet Biespel wieren un mie gooden Rot jeewen. Soo kunn ekj em jeisteljen veraunkomen un veschiednet fa Jehova doonen. Ekj hab daut beläft, daut eena siene Oppgowen en Jehova siene Organisazion bloos dan tru nokomen kaun, wan eena sikj opp Jehova sienen stoakjen heiljen Jeist velat (Psa. 51:13). Ekj dank Jehova emma wada, daut hee mie de groote Iea jejäft haft, sienen Nomen to lowen! (Psa. 54:8).

^ Varsch 16 See de Läwesjeschicht von W. Glen How met daut Teema Nicht euer ist die Schlacht, sondern Gottesen daut Erwachet! vom 22. Aprell 2000.

^ Varsch 20 See de Läwesjeschicht von Laurier Saumur met daut Teema Ich fand etwas, wofür zu kämpfen es sich lohntem Wachtturm vom 15. Feebawoa 1977.

^ Varsch 20 David Splane es nu em Väastaunt von Jehova siene Zeijen.