Trigj nom Enhault

No de Enhaultslist gonen

Dän Gloowen un Jehuarsom von Noah, Daniel un Hiob nodoonen

Dän Gloowen un Jehuarsom von Noah, Daniel un Hiob nodoonen

“Noah, Daniel un Hiob . . . wudden . . . derch äa ieejnet jerajcht sennen bloos äare ieejne Läwes raden” (HES. 14:14)

LEEDA: 89, 119

1-2. (a) Wuarom kaun ons daut Biespel von Noah, Daniel un Hiob halpen? (b) En waut vonne Omstend schreef Hesekiel de Wieed von Hesekiel 14:14?

HAST du Trubbel met de Jesuntheit, met daut Jelt, met Vefoljunk ooda sestwaut? Felt die daut eenjemol schwoa, diene Freid en Jehova sienen Deenst nich to velieren? Wan jo, dan kaun die daut Biespel von Noah, Daniel un Hiob halpen. Dee wieren uk onvolkomen un hauden väl soone Schwierichkjeiten aus wie, un eenjemol wia mau rajcht äa Läwen en Jefoa. Oba dee bleewen doawäajen tru. Wäajen äaren Gloowen un Jehuarsom tald Gott dee fa goode Väabilda (läs Hesekiel 14:12-14).

2 Hesekiel schreef de Wieed von onsen Teemavarsch aune 612 v. Chr. en Babel * (Hes. 1:1; 8:1). De Venichtunk, waut äwa daut aufjefolne Jerusalem verutjesajcht wia, wia dicht bie un erfeld sikj 607 v. Chr. Mau weinich weesen dee Ieejenschoften, waut Noah, Daniel un Hiob hauden, un kjrieejen daut Tieekjen  toom äwaläwen (Hes. 9:1-5). Mank dee poa wieren Jeremia, Baruch, Ebed-Melech un de Rechabita.

3. Von waut haundelt dis Artikjel sikj?

3 Soo es daut uk vondoag dän Dach; bloos dee, waut Jehova fa schultloos talt un soo sent aus Noah, Daniel un Hiob, woaren daut Tieekjen kjrieen toom äwaläwen, wan dise Welt venicht woat (Opb. 7:9, 14). Well wie mol seenen, wuarom Jehova dise Mana fa jerajcht un fa een goodet Väabilt tald. Wie woaren unjasieekjen, (1) waut fa Schwierichkjeiten jieda eena haud un (2) woo wie dee äaren Gloowen un Jehuarsom nodoonen kjennen.

NOAH WIA 900 JOA TRU UN JEHUARSOM

4-5. (a) Waut fa Schwierichkjeiten haud Noah? (b) Wuarom wia daut soo besonda, daut hee staunthauft bleef?

4 Waut Noah fa Schwierichkjeiten haud. En de Tiet von Noah siene Groospape Henoch wieren de Menschen sea gottloos jeworden. Dee säden mau rajcht “frajche Wieed” äwa Jehova (Jud. 14-15). De Jewault neem emma mea too un en Noah siene Tiet wia “de Ieed voll von orrajchtet . . . Läwen”. De beese Enjel befrieden sikj met Frues un hauden Kjinja, waut grausom wieren un nich soo aus jeweenelje Menschen (1. Mo. 6:2-4, 11-12). Oba Noah wia gaunz aundasch; hee “wia goot aunjeseenen biem HARN. . . . Kjeena kunn am en siene Tiet beschuljen. Noah läwd en Jemeenschoft met Gott” (1. Mo. 6:8-9).

5 Denkj mol doaräwa no, waut dise Wieed ons äwa Noah sajen. Hee deend Gott nich bloos soo lang, aus de Menschen bie dise Tiet läwen – 70 ooda 80 Joa. Hee deend dän en de schlajchte Welt ver de groote Äwaschwamunk soo bie 600 Joa (1. Mo. 7:11). Oba hee haud nich Gloowesbreeda, soo aus wie vondoag dän Dach enne Vesaumlunk haben. Daut feelt sikj soo, nich mol sien ieejnet Jeschwista stunt am em jeisteljen bie. *

6. Woo wees Noah, daut hee äwanäment wia?

6 Noah fieed nich bloos een goodet Läwen. Hee wia uk eena, “dee doa [äwanäment] Jerajchtichkjeit prädijd” un sienen Gloowen aun Jehova ver aulem bekjand (2. Pet. 2:5). De Apostel Paulus schreef: “Derch dän Gloowen jeef hee de Welt äa Uadeel” (Heb. 11:7). Daut es goot mäajlich, daut Noah vespott wort un Wadastaunt haud, un daut se am veleicht mau rajcht dreiwden, waut auntodoonen. Oba hee haud nich Menschenforcht (Spr. 29:25). Hee haud dän Moot, waut Jehova siene true Deena jeft.

7. Waut fa Trubbels haud Noah, aus hee dän Kausten bud?

7 Aus Noah Jehova ieescht mea aus 500 Joa jedeent haud, säd Jehova to am, hee sull eenen Kausten buen toom Menschen un Tieren raden (1. Mo. 5:32; 6:14). Dise Oppgow leet secha sea schwierich, un nich bloos wäajen daut buen. Noah wist secha, daut de Menschen doaderch noch dolla spotten un jäajen am sennen wudden. Oba hee haud Gloowen un jehorcht Jehova. “Hee deed daut krakjt soo” (1. Mo. 6:22, NW).

8. Woo wees Noah, daut hee doaropp vetrud, daut Jehova fa am sorjd?

8 Eene aundre Schwierichkjeit fa Noah wia, fa siene Famielje to sorjen. Ver de Sintflut musten de Menschen sea schwoa schaufen, daut see jenuach kjrieejen toom läwen, un bie Noah wia daut secha nich aundasch (1. Mo. 5:28-29). Oba fa am wia doawäajen nich daut tietelje daut wichtichste, oba Gott. Un uk aus  hee dän Kausten bud, waut veleicht soo bie 40 ooda 50 Joa dieed, wia Noah emma jeistlich jesonnen. Un daut wia hee uk noch 350 Joa no de Äwaschwamunk (1. Mo. 9:28). Daut es een goodet Väabilt fa Gloowen un Jehuarsom.

9-10. (a) Woo kjenn wie Noah sienen Gloowen un Jehuarsom nodoonen? (b) Woo denkjt Jehova äwa dee, waut sikj aun sien Wuat hoolen?

9 Woo wie Noah sienen Gloowen un Jehuarsom nodoonen kjennen. Wie kjennen daut, wan wie fa Jehova siene Jerajchtichkjeit enstonen, kjeen Poat von dän Soton siene Welt sent un daut ieeschte no Gott sien Rikj sieekjen (Mat. 6:33; Joh. 15:19). Bie de Welt woa wie wäajen daut secha nich goot aunjeseenen sennen. Doaderch, daut wie biejlikj äwa de Ehe un daut Jeschlajchtsläwen soo denkjen, aus de Schreft daut sajcht, woat en eenje Lenda schlajcht äwa ons jerät (läs Maleachi 3:17-18). Oba soo aus Noah fercht wie Jehova un nich de Menschen. Wie weeten, bloos hee kaun ons eewjet Läwen jäwen (Luk. 12:4-5).

10 Woo steit daut met die? Woascht du wieda Gott deenen, wan aundre äwa die spotten? Woascht du doaropp vetruen, daut Jehova fa die sorjen woat, wan die daut knaup jeit? Wan du Noah sienen Gloowen un Jehuarsom nodeist, dan kaust du die secha sennen, daut Jehova fa die sorjen woat (Filip. 4:6-7).

DANIEL WIA EN EENE SCHLAJCHTE STAUT TRU UN JEHUARSOM

11. Waut fa Schwierichkjeiten hauden Daniel un siene dree Frind en Babel? (See daut Bilt aum Aunfank.)

11 Waut Daniel fa Schwierichkjeiten haud. Daniel läwd aus een Jefangna en Babel. Daut wia eene Staut, wua väl Aufjettarie un Zaubarie wia. Un dan noch veachten un vespotten de Babelonia de Juden un dee äaren Gott Jehova (Psa. 137:1, 3). Dit mott de true Juden, soo aus Daniel, sea toojesat haben. De Babelonia hauden Daniel un siene dree Frind Hananja, Mischael un Asarja jeneiw em Uag, wiels dee utjelieet worden toom dän Kjennich deenen. Dee säden mau rajcht väa, waut dee äten sullen. Un daut wia een Trubbel, wiels Daniel wull sikj nich met daut Äten veorreinjen, waut de Kjennich emma eet (Dan. 1:5-8, 14-17).

12. (a) Waut fa goode Ieejenschoften wees Daniel? (b) Woo docht Jehova äwa Daniel?

12 Un doa wia noch eene Jefoa fa Daniel, waut nich soo kloa to seenen wia. Hee wia butajeweenlich begoft un kjrieech doaderch besondre Amta (Dan. 1:19-20). Hee haud leicht kunt stolt woaren un sikj groot doonen, oba hee bleef deemootich un bescheiden un jeef emma Jehova de Iea (Dan. 2:30). Aus Jehova Daniel fa jerajcht un fa een goodet Väabilt tald, soo aus hee daut bie Noah un Hiob deed, wia hee noch mau junk. Wia Jehova sien Vetruen opp Daniel butarem Sträakj? Nä. Daniel wia sien gaunzet Läwen tru un jehuarsom. Aus hee aul hinjen enne 90 wia, säd Gott sien Enjel leeftolich to am: “Daniel, du best huach aunjeseenen” (Dan. 10:11).

13. Woo es Daniel fa de aundre Juden veleicht een Säajen jewast?

13 Wäajen Gott eenen Jefaulen aun Daniel haud, wort hee een Huachbeaumta en de Rejierunk von Babel un en Medien un Persien (Dan. 1:21; 6:2-3). Veleicht lenkjt Jehova daut soo, daut Daniel fa sien Volkj een Säajen wia, soo aus Josef en Ägipten un Ester un Mordechai en Persien * (Dan. 2:48). Waut fa een Troost mott daut nich fa de jefangne Juden un  uk fa Hesekiel jewast sennen, daut Jehova an opp dee Wajch halpen deed.

Deejanje, waut Jehova tru bliewen, sent bie am huach aunjeseenen (See Varsch 14-15)

14-15. (a) En waut likjnen onse Omstend sikj met Daniel siene? (b) Waut kjennen Elren von Daniel siene Elren lieren?

14 Woo wie Daniel sienen Gloowen un Jehuarsom nodoonen kjennen. Vondoag dän Dach läw wie soo to sajen uk aus Framde en eene schlajchte Welt. Wuarom jeft et doa soo väl faulsche Lieren un Gottloosichkjeit? Daut es wäajen daut groote Babel, waut eene “Behusunk fa de beese Jeista” es un aule faulsche Gloowes oppe Welt väastalt (Opb. 18:2). Wäajen wie aundasch sent, woa wie toom Spott jebrukt (Mar. 13:13). Oba soo aus Daniel well wie onsen Gott Jehova noda komen. Wan wie deemootich un jehuarsom sent un opp am vetruen, woa wie bie am uk huach aunjeseenen sennen (Hag. 2:7, NW).

15 Elren kjennen väl von Daniel siene Elren lieren. Wuarom? En Daniel siene Kjintheit wia en Juda eene sea schlajchte Tiet, oba hee lieed doawäajen, Gott to leewen. Daut wia secha nich von veselfst. Daut wiest, daut de Elren am goot opptrocken (Spr. 22:6). Sien Nomen bediet “Gott es mien Rechta” (Dan. 1:6, NW, Fn.). Doaraun es to seenen, daut hee gottesferchtje Elren haud. Jie Elren, bemieecht junt wieda, june Kjinja jeduldich to belieren (Efs. 6:4). Bät uk fa dee un met dee toop. Wan jie junt bemieejen, june Kjinja de Woarheit to lieren, dan woat Jehova junt sea säajnen (Psa. 37:5).

HIOB BLEEF EN VESCHIEDNE OMSTEND TRU

16-17. En waut fa Omstend bleef Hiob tru?

16 Waut Hiob fa Schwierichkjeiten haud. Hiob beläwd sea scheenet, oba uk sea schwoaret. Ea hee oppe Proow jestalt wort, wia hee “jrata aus sest wäa em Oosten” (Hiob 1:3). Hee wia rikj un wiet bekaunt un wort sea jeacht (Hiob 29:7-16). Wan Hiob dit uk aula haud, deed hee sikj oba nich groot un docht uk nich, daut am daut nich aun Gott fäld. Jehova nand am “mien Deena”. Hee säd uk: “Däm es met nuscht to beschuljen un deit emma waut rajcht es; dee haft Forcht fa Gott, un deit nuscht schlajchtet” (Hiob 1:8).

17 Oba Hiob sien Läwen endad sikj sea bosich. Hee wort prachaoam un wia gaunz vetwiewelt. Daut wia, wiels de Soton, de Vekjläaja, Hiob beschulcht, daut hee Gott bloos deend, wiels hee doa waut bie haud – oba daut wia jeloagen  (läs Hiob 1:9-10). Jehova leet dise Beschuldjunk nich vebiegonen. Jehova jeef Hiob de Jeläajenheit to bewiesen, daut hee am met een opprechtjet Hoat deend un nich, wiels hee doa waut bie haud.

18. (a) Waut es fa die oppfaulent, woo tru Hiob wia? (b) Waut wiest ons daut äwa Jehova, woo hee met Hiob omjinkj?

18 De Soton jreep Hiob opp veschiedne Wäaj aun. Hee deed daut soo, daut Hiob denkjen sull, Gott haud de Schult (Hiob 1:13-21). Dan kjeemen doa noch dree faulsche Frind un räden hoat met am un meenden, Gott bestroft am fa daut, waut hee veschulcht haud (Hiob 2:11; 22:1, 5-10). Oba Hiob bleef gaunz tru. Na jo, Hiob räd bieaun onbedocht, oba Jehova kunn vestonen, woo Hiob sikj feeld (Hiob 6:1-3). Jehova sach, daut dis deep betriepta Maun am kjeenmol dän Rigjen dreid, wan de Soton dän soo to sajen uk no de Ieed schmeet un dän met schlajchte Wieed schluach. Aus Hiob siene Proowen äwa wieren, jeef Jehova am dobbelt soo väl, aus hee ea haud, un leet am noch 140 Joa lenja läwen (Jak. 5:11). Un uk dan läwd Hiob bloos fa Jehova. Woo weet wie daut? Wiels aus Hesekiel de Wieed schreef, waut en onsen Teemavarsch sent, wia Hiob aul miere hundat Joa doot.

19-20. (a) Woo kjenn wie Hiob sienen Gloowen un Jehuarsom nodoonen? (b) Woo kjenn wie aundre soo Metleet wiesen aus Jehova?

19 Woo wie Hiob sienen Gloowen un Jehuarsom nodoonen kjennen. Jehova sull bie ons emma daut ieeschte sennen, endoont woo onse Omstend sent. Wie wellen uk emma opp am vetruen un am gaunz jehuarsom sennen. Wie haben noch jratre Uasoak, daut to doonen aus Hiob, wiels wie weeten väl mea äwa dän Soton un woo hee schauft (2. Kor. 2:11). Daut Buak Hiob es eent, waut ons halpt to vestonen, wuarom Gott daut Lieden toolat. Un Daniel siene Profezeiunk jeft ons auntovestonen, daut Gott sien Kjennichrikj met Jesus aus Kjennich äwa de gaunze Ieed harschen woat (Dan. 7:13-14). Wie weeten uk, daut dit Rikj boolt woat met aulet Lieden een Enj moaken.

20 Waut Hiob beläwd, wiest uk, daut wie sellen Metleet haben, wan onse Breeda schwoare Tieden derchgonen. Soo aus Hiob räden eenje veleicht onbedocht (Liera 7:7, NW). Oba enne Städ dee to rechten, well wie Vestentnis haben un Metleet wiesen. Soo woa wie onsen Voda Jehova nodoonen, waut leeftolich un metliedent es (Psa. 103:8).

JEHOVA WOAT DIE STOAKJEN

21. Woo paust 1. Petrus 5:10 met daut toop, waut Noah, Daniel un Hiob beläwden?

21 Wan Noah, Daniel un Hiob uk en veschiedne Tieden läwden un gaunz veschiedne Omstend hauden, bleewen dee staunthauft en äare Trubbels. Waut dee beläwden, halpt ons aun daut to denkjen, waut Petrus schreef. Hee säd: “Wan jie hia ieescht een stootje jeläden haben, woat de jnodenvolla Gott . . . junt selfst opprechten un wada häastalen un stoakjen” (1. Pet. 5:10).

22. Waut woa wie en dän näakjsten Artikjel seenen?

22 De Wieed von 1. Petrus 5:10 talen uk fa Gott sien Volkj vondoag dän Dach. Jehova vesprakjt, daut hee siene Deena opprechten un stoakjen woat. Wie haben aula dän Wunsch, daut Jehova ons stoakjt un daut wie kjennen tru un bestendich bliewen. Doawäajen well wie dän Gloowen un Jehuarsom von Noah, Daniel un Hiob nodoonen. Soo aus wie en dän näakjsten Artikjel seenen woaren, wieren dee tru, wäajen dee Jehova goot kjanden. Dee wisten krakjt, waut Jehova von an haben wull (Spr. 28:5). Un wie kjennen daut uk.

^ Varsch 2 Hesekiel kjeem aune 617 v. Chr. enne Jefangenschoft. Hesekiel 8:1–19:14 wort “en daut 6. Joa” von de Jefangenschoft oppjeschräwen, aulsoo aune 612 v. Chr.

^ Varsch 5 Noah sien gottesferchtja Voda Lamech storf soo bie fief Joa ver de Sintflut. Wan Noah siene Mutta un Jeschwista noch läwden, aus de Sintflut kjeem, storwen dee.

^ Varsch 13 Dautselwje kunn uk bie Daniel siene dree Frind jewast sennen, waut uk huach aunjestalt wieren (Dan. 2:49).