Trigj nom Enhault

No de Enhaultslist gonen

 LÄWESJESCHICHT

Fa Jehova es aules mäajlich

Fa Jehova es aules mäajlich

“DOA woat kjeen Doot mea sennen un mau rajcht de Vestorwne woaren oppstonen.” Dise Wieed hieed Mairambjubju, miene Fru, aus see met eene Boss metfua. See wia nieschierich un wull mea weeten. Aus de Boss ieescht stellhilt un de Menschen buten wieren, rand see de Fru hinjaraun, waut daut jesajcht haud. Dee heet Apun Mambetsadikowa un wia eent von Jehova siene Zeijen. To dee Tiet wia daut jefäadlich, met de Zeijen to räden, oba waut wie lota von Apun lieeden, veendad ons gaunzet Läwen.

VON TIEDICH ZEMORJES BAT DIESTA SCHAUFEN

Ekj wort aune 1937 jebuaren bie eene Kolchoose (een Foarm, wua väle toopschauften) dicht bie Tokmok en Kirgiesien. Onse Famielje es von de Kirgiesen un wie räden Kirgiesisch. Miene Elren schauften von tiedich zemorjes bat diesta opp de Kolchoose. De Oabeida doa kjrieejen räajelmässich Ätwoa, oba betolt kjrieejen dee bloos een Mol daut Joa. Fa miene Mame wia daut sea schwoa, fa mie un miene jinjre Sesta to sorjen. Ekj jinkj bloos fief Joa no de School un dan funk ekj uk aun, fa voll bie de Kolchoose to schaufen.

De Terskej-Alatau-Boaj

En de Jäajent, wua ekj wond, wieren sea väl oame Menschen, un wie musten schwoa schaufen toom ons Läwen moaken. Aus ekj junk wia, docht ekj nich väl doaräwa no, waut de Senn em Läwen wia ooda äwa de Tookunft. Ekj haud kjeenmol jedocht, daut de wundascheene Woarheit äwa Jehova Gott un sien Väanämen mien Läwen gaunz veendren wudd. Woo dise Norecht no Kirgiesien kjeem, es eene intressaunte Jeschicht. Aules funk em Nuaden von Kirgiesien aun, wua ekj oppjewossen wia.

SOONE, WAUT FRIEKJEEMEN, BROCHTEN DE WOARHEIT NO KIRGIESIEN

De Woarheit äwa Jehova Gott vebreed sikj en de 1950ja Joaren en Kirgiesien. Oba daut wia nich leicht. Dee must ieescht mol eene stoakje Sort Denkjen äwakomen. Wuarom? Kirgiesien jehieed don to daut Launt, waut Sowjetunion (UdSSR) heet. En de gaunze UdSSR mischten Jehova siene Zeijen sikj nich en de Politikj nenn (Joh. 18:36). Doawäajen tald de kommunistische Rejierunk dee  fa Fiend un vefoljd dee. Oba nuscht kunn daut opphoolen, daut opprechtje Menschen Gott sien Wuat nich aunneemen. Eent von daut wieetvolste, waut ekj en mien Läwen jelieet hab, es, daut fa Jehova “aules mäajlich” es (Mar. 10:27).

Emil Janzen

De Vefoljunk brocht daut bat doa, daut Jehova siene Zeijen en Kirgiesien emma mea worden. Wuarom? De Rejierunk brocht äare Fiend no Sibirien, waut uk to de UdSSR jehieed. Aus dee lota dan frie worden, kjeemen väle von dee no Kirgiesien, un eenje brochten de Woarheit met. Eena von dee, waut doa trigjkjeemen, heet Emil Janzen. Dee wia aune 1919 en Kirgiesien jebuaren. Emil wia en een Oabeitsloaga jewast un haud Jehova siene Zeijen doa kjanen jelieet. Hee neem de Woarheit aun un kjeem 1956 trigj un trock dicht bie Sokuluk han – no dee Omjäajent, wua ekj tus jehieed. En dise Staut wort aune 1958 de ieeschte Vesaumlunk von Kirgiesien oppjestalt.

Wiktor Winter

Ojjefäa een Joa lota trock Wiktor Winter no Sokuluk. Dis trua Brooda haud väl schwoaret beläft: Wäajen sienen Gloowen wort hee tweemol fa dree Joa enjestopt. No daut must hee noch mol fa tieen Joa em Jefenkjnis nenn un dan brocht de Rejierunk am fa fief Joa aundatwäajen han. Oba de Vefoljunk kunn nuscht doajäajen doonen, daut et met de woare Aunbädunk nich emma wiedajinkj.

DE WOARHEIT KJEMT EMMA NODA NO MIEN TUS

Eduard Warter

Aune 1963 jeef daut en Kirgiesien soo bie 160 Zeijen, un väle kjeemen von Dietschlaunt, Ukraine un Russlaunt. Mank dise wia Eduard Warter, waut sikj 1924 en Dietschlaunt deepen leet. En de 1940ja Joaren wort hee von de Nazis en een Loaga fa Faustjenomne enjestopt. Een poa Joa lota schekjten de Kommunisten von de UdSSR am no Sibirien. Dis trua Brooda trock aune 1961 no de Staut Kant – gaunz dicht bie wua ekj tus jehieed.

Elisaweta Fot; Aksamai Sultanalijewa

En Kant wond uk de true Sesta Elisaweta Fot, waut äa Läwen met neien muak. Wäajen see sea goot wia en äare Oabeit, kjeemen huach Utjelieede, soo aus Doktasch un Lierasch, toom sikj Kjleeda bestalen. Eene von äare Kunden wia Aksamai Sultanalijewa, waut met eenen Huachbeaumten befriet wia. Aksamai kjeem no Elisaweta wäajen waut Kjleeda. See haud väl Froagen doaräwa, wuarom wie aum läwen sent un waut met de Menschen woat, wan dee stoawen. Elisaweta beauntwuad äare Froagen bloos met de Bibel. Aksamai wort eene Sesta, waut flietich de goode Norecht bekauntmuak.

Nikolai Tschimpojesch

Ojjefäa en dee Tiet wort Nikolai Tschimpojesch von Moldawien een Kjreisoppsechta un hee wia daut meist fa 30 Joa. Hee besocht nich bloos de Vesaumlungen, oba kjemmad sikj uk doarom, daut von de Bieekja, waut wie hauden, mea jemoakt un veschekjt worden. Oba siene Oabeit wort bie de Rejierungsbeaumte bekaunt. Doawäajen kjrieech Nikolai von Eduard Warter gooden Rot. Dee säd: “Wan de Rejierungsbeaumte die froagen, dan saj dee eefach, daut wie de Bieekja von de Hauptoffiz en Brooklyn kjrieen. Kjikj dän Poliez jlikj enne Uagen. Du brukst fa nuscht Angst haben” (Mat. 10:19).

Nich lang no dit must Nikolai no de Poliezen-Offiz en Kant komen. Hee sajcht: “De Beaumta fruach mie, von wua wie onse Bieekja hauden. Ekj säd, wie hauden dee von Brooklyn. Dee wist nuscht doatoo to sajen. Hee leet mie eefach gonen, un ekj brukt uk kjeenmol mea doa hankomen.” Soone forchtloose Zeijen aus dit deeden em Nuaden von  Kirgiesien, wua ekj wond, uk fa wieda väasechtich de goode Norecht bekauntmoaken. En de 1980ja Joaren lieed onse Famielje dan de Woarheit äwa Jehova kjanen, un miene Fru Mairambjubju hieed dee daut ieeschte.

MIENE FRU WIST SCHIA FUAZ, DAUT ET DE WOARHEIT WIA

Mairambjubju wia von de Naryn-Jäajent von Kirgiesien. En August 1974 kjeem see no miene Sesta spazieren, wua ekj ar dan toom ieeschte Mol sach. Ekj jleicht Mairambjubju von fuaz aun. Wie befrieden ons noch dänselwjen Dach.

Apun Mambetsadikowa

En Jaunewoa 1981 fua Mairambjubju met de Boss no eenen Moakjt un hieed de Unjahoolunk, wua ekj aum Aunfank von räd. See wull mea weeten un fruach de Fru no äaren Nomen un äare Adrass. Dee säd oba bloos äaren Nomen; dee heet Apun. Dee wia väasechtich, wäajen en de 1980ja Joaren wia Jehova siene Zeijen äa Woakj doa noch veboden. Enne Städ daut see miene Fru de Adrass jeef, schreef Apun sikj onse Adrass opp. Miene Fru kjeem gaunz oppjeräacht no Hus.

Miene Fru säd to mie: “Ekj hab waut sea besondret jehieet. Eene Fru säd to mie, daut de Menschen boolt nich mea stoawen woaren. Mau rajcht de wille Tieren woaren mak sennen.” Mie hieed sikj daut no eene utjedochte Jeschicht. Ekj säd to ar: “Well wie ieescht mol wachten, bat see kjemt un ons mea von daut vetalt.”

Dree Moonat lota kjeem Apun dan no ons. Lota kjeemen uk waut von de ieeschte kirgiesische Sestren no ons. Derch dee lieed wie, wäa Jehova werkjlich wia un waut hee sikj fa de Menschen väajenomen haud. Dee läsden ons daut Buak Vom verlorenen Paradies zum wiedererlangten Paradies * väa. Soon Buak jeef daut bloos eent en Tokmok, doawäajen must wie ons daut selfst aufschriewen.

Eent von daut ieeschte, waut wie studieeden, wia de Profezeiunk en 1. Mose 3:15. Dee wudd sikj derch Jesus, Gott sienen jesaulwden Kjennich, erfellen. Dise wichtje Norecht must jieda eena hieren! Doawäajen wull wie methalpen, dee bekaunttomoaken (Mat. 24:14). Boolt veendad de biblische Woarheit ons gaunzet Läwen.

TOOPKOMES UN DOOP ENNE VEBODNE TIET

Een Gloowesbrooda en Tokmok kroagd ons to eene Kjast. Ekj un miene Fru kunnen seenen, daut  de Zeijen äa Benämen aundasch wia. Dee hauden doa kjeen Alkohol un daut Fast wia sea ordentlich. Dit wia eene gaunz aundre Kjast, aus wie daut jewant wieren. Dee stalden sikj doa nich domm opp, besoopen sikj nich un hauden nich schlajchte Räd.

Wie wieren uk bie waut Toopkomes en Tokmok. Dee worden em Woolt aufjehoolen, wan daut Wada sest scheen wia. De Breeda wisten, daut de Poliezen ons sea beoobachten, doawäajen stalden dee emma wäm aun toom oppaussen. De Winta haud wie de Toopkomes en een jeweeneljet Hus. Eenjemol kjeemen de Poliezen no daut Hus un bemusten ons to sajen, waut wie doa deeden. Aus ekj un Mairambjubju ons em Juli 1982 en dän Tschui-Riefa deepen leeten, must wie sea väasechtich sennen (Mat. 10:16). De Breeda kjeemen en kjliene Gruppen un vesaumelden sikj doa em Woolt. Wie sungen een Kjennichrikjsleet un horchten ons de Doopräd aun.

WIE DOONEN MEA EM DEENST

Aune 1987 fruach een Brooda mie, aus ekj en Baliktschi wäm besieekjen wull, waut intressieet wia. Metem Zuach dieed daut vea Stund, doa hanfoaren. Aus wie doa ieescht mieremol jewast wieren toom prädjen, kunn wie seenen, daut de Menschen doa sea nieschierich wieren. Dit wia eene goode Jeläajenheit toom mea em Deenst doonen.

Ekj un Mairambjubju fuaren foaken no Baliktschi. Wie bleewen doa meist jieda Utgangswäakj un jinjen em Deenst un hauden Toopkomes. Doa fälden emma mea Bieekja un toom dee von Tokmok doa hanbrinjen, brukt wie mischok ooda Ieedschockensakj. Twee Sakj voll Bieekja de Moonat rieekjten meist nich too. Mau rajcht wan wie metem Zuach hinjawäajes wieren, kunn wie de Menschen prädjen.

Aune 1995 jeef daut en Baliktschi dan eene Vesaumlunk; acht Joa nodäm aus wie doa toom ieeschte Mol wieren. Daut wie joarenlank emma opp un dol reisden von Tokmok no Baliktschi kjeem dia, un wie hauden nich väl Jelt. Woo kunn wie daut dan? Een Brooda jeef ons pinkjlich Jelt toom ons unjastetten. Jehova wist, daut wie mea em Deenst doonen wullen, un hee muak dän Himmel fa ons op (Mal. 3:10). Ekj weet, fa Jehova es aules mäajlich!

DROCK MET DE FAMIELJE UN DÄN DEENST

Aune 1992 wort ekj Eltesta; de ieeschta kirgiesischa Eltesta em Launt. En onse Vesaumlunk en Tokmok jeef daut niee Mäajlichkjeiten fa dän Deenst. Wie kunnen bie veschiedne Schoolen met väl junge Menschen de Bibel studieren, waut Kirgiesen wieren. Eena von dee deent nu em Betelkommitee un twee aundre sent Sondapionieren. Wie deeden uk aundre en onse Vesaumlunk halpen. Aum Aunfank von de 1990ja Joaren wieren onse Bieekja un uk de Toopkomes opp Rusch. Oba de Muttasproak von väle enne Vesaumlunk wia Kirgiesisch. Doawäajen deed ekj bie de Toopkomes äwasaten, daut dee de Woarheit leichta vestonen kunnen.

Met miene Fru un acht von onse Kjinja aune 1989

Ekj un Mairambjubju wieren uk sea drock met onse Famielje. Wie neemen onse Kjinja emma met nom Prädichtdeenst un no de Toopkomes. Onse Dochta Gulsaira, waut don 12 Joa wia, jleicht daut, met de Menschen oppe Gauss äwa de Schreft  to räden. Un onse Kjinja jleichten daut sea, sikj Bibelvarzh utwendich to lieren. Soo wieren dee, un lota uk de Grootkjinja, doa emma met bie, wan daut om Sachen von de Vesaumlunk jinkj. Von de 9 Kjinja un 11 Grootkjinja, waut noch läwen, deenen 16 Jehova ooda gonen met äare Elren met no de Toopkomes.

GROOTE VEENDRUNGEN

De leewe Breeda un Sestren, waut daut Woakj en onse Omjäajent en de 1950ja Joaren aunfungen, wudden sea vewundat sennen, wan dee sagen, woo väl sikj hia jeendat haft. Biejlikj hab wie von de 1990ja Joaren aun mea Frieheit toom de goode Norecht prädjen un ons en groote Gruppen vesaumlen.

Met miene Fru toop em Prädichtdeenst

Aune 1991 wieren ekj un miene Fru toom ieeschte Mol opp eenen grooten Kongress. Daut wia en Alma-Ata, waut nu Almaty es, en Kasachstan. Un aune 1993 hauden de Breeda en Kirgiesien daut ieeschte Mol eenen Kongress; daut wia bie daut Spartak-Stadion en Bischkek. Ver dän Kongress muaken de Breeda eene gaunze Wäakj daut Stadion rein. De Aunjestalda wia soo vewundat, daut hee nuscht betolt neem fa daut brucken.

Aune 1994 beläwd wie noch waut besondret: Daut ieeschte Buak wort opp Kirgiesisch jedrekjt. Nu jeft daut eene Äwasata-Grupp en daut Betel en Bischkek, waut onse Bieekja opp Kirgiesisch äwasaten deit. Aune 1998 wort daut Woakj von Jehova siene Zeijen en Kirgiesien jesazlich aunerkjant. De Organisazion es hia jrata jeworden un nu sent wie äwa 5 000 Vekjindja. Vondoag dän Dach hab wie en Kirgiesien 83 Vesaumlungen un 25 Gruppen. Dee sent opp Kjneesisch, Enjlisch, Kirgiesisch, Rusch, Finjasproak (Russlaunt), Turkjsch, Uigurisch un Usbekisch. Aul dise leewe Breeda un Sestren, waut veschieden oppjewossen sent, deenen Jehova en Eenichkjeit. Derch Jehova siene Help wieren aul dise besondre Veendrungen mäajlich.

Jehova haft mien Läwen uk gaunz veendat. Ekj woss en eene eefache Famielje opp, waut oppem Launt läwd, un jinkj bloos 5 Joa no de School. Oba Jehova brukt mie doawäajen aus Eltesta un ekj kunn Menschen, waut hecha utjelieet wieren aus ekj, de wundascheene Woarheit von de Schreft lieren. Jehova muak butajeweeneljet mäajlich. Miene ieejne Erfoarunk jeft mie Moot, wieda tru von Jehova to räden, wiels fa dän “es aules mäajlich” (Mat. 19:26).

^ Varsch 21 Rutjejäft von Jehova siene Zeijen. Daut woat nich mea jedrekjt.