Trigj nom Enhault

No de Enhaultslist gonen

Jie junge Menschen, jun Schepfa well, daut jie schaftich sent

Jie junge Menschen, jun Schepfa well, daut jie schaftich sent

Hee stalt die “met goodet tofräd . . ., soolang aus du läfst” (PSA. 103:5)

LEEDA: 135, 48

1-2. Wuarom sell wie no onsen Schepfa horchen, wan wie entscheiden, waut wie em Läwen doonen wellen? (See de Bilda aum Aunfank.)

WAN du een junga Mensch best, hast du secha aul väl Rot von diene Lierasch ooda aundre Rotjäwa jekjräajen, waut du lota doonen saust. Dee haben die woomäajlich toojerot, daut du die hecha utlieren saust un die eene Oabeit sieekjen, wua du väl Jelt vedeenen kaust. Oba Jehova jeft die aundren Rot. Hee well, daut du die en de School aunstrenjst, daut du lota kaust dien Läwen moaken (Kol. 3:23). Un hee weet, daut du en diene Jugenttiet wichtje Entscheidungen trafen motst fa dien gaunzet Läwen. Doawäajen jeft hee die Gruntsauzen, wua du die aun hoolen kaust, daut du nu en de latste Tiet soo läwen kaust, aus am daut jefelt (Mat. 24:14).

2 Denkj doaraun, daut Jehova aules weet. Hee weet krakjt, waut noch komen woat un woo dicht bie daut Enj von dise Welt es (Jes. 46:10; Mat. 24:3, 36). Jehova weet uk krakjt om ons om. Hee weet, waut ons schaftich moakt un waut ons toom Schoden es. De Menschen äa Rot hieet sikj veleicht goot, oba  wan dee nich met Gott sien Wuat stemt, dan helt dee nuscht en (Spr. 19:21).

“DOA ES KJEENE WEISHEIT, . . . DEE JÄAJEN DÄN HARN STONEN KAUN”

3-4. Woo kjeem daut met Adam un Eva un äare Nokomen ut, wäajen see no schlajchten Rot horchten?

3 Schlajchta Rot kjeem aul lang trigj opp. De Soton wia de ieeschta, waut de Menschen schlajchten Rot jeef. Dee säd to Eva, daut see un Adam wudden schaftja sennen, wan see selfst entscheiden wudden, woo see läwen wullen (1. Mo. 3:1-6). Oba de Soton docht bloos aun sikj selfst. Dee wull, daut Adam un Eva un äare Nokomen am jehorchen un deenen sullen enne Städ Jehova. Oba de Soton haud nuscht fa de Menschen jedonen. Aules, waut dee hauden, hauden dee von Jehova, biejlikj kunnen dee en eenen wundascheenen Goaden wonen, hauden eenen volkomnen Kjarpa, waut eewich läwen kunn, un kunnen toop sennen.

4 Oba Adam un Eva jehorchten Gott nich un muaken sikj von am loos. Soo aus wie weeten, kjeem daut sea schlajcht ut. Dee worden langsom oolt un storwen, soo aus eene Bloom, dee eena von de Plaunt loosmoakt. Un uk äare Nokomen musten wäajen dee äare Sind lieden (Reem. 5:12). Oba de mieeschte Menschen vondoag dän Dach wellen Gott noch emma nich jehorchen un wellen soo läwen, aus an daut jankat (Efs. 2:1-3). Daut kjemt sea schlajcht ut, wäajen doa “kjeene Weisheit [es], . . . dee jäajen dän HARN stonen kaun” (Spr. 21:30).

5. (a) Opp waut veleet Gott sikj? (b) Kjeem daut soo ut?

5 Oba Jehova wist, daut eenje Menschen no am sieekjen un am deenen wudden, uk soogoa väl junge Menschen (Psa. 103:17-18; 110:3). Hee räakjent dee sea väl! Best du uk eent von dee? Dan kjrichst du secha väl “goodet” von Gott, waut die halpt schaftich to sennen (läs Psalm 103:5; Spr. 10:22). Waut es doa aules met en? Soo aus wie nu seenen woaren, jeft Jehova die jeisteljet Äten, goode Frind, woare Frieheit un lieet die, no waut du sträwen saust.

JEHOVA JEFT DIE JEISTELJET ÄTEN

6. (a) Wuarom sell wie no daut kjikjen, waut ons em jeisteljen fält? (b) Woo sorcht Jehova fa ons?

6 Tieren fält daut nich aun daut jeistelje, oba ons fält daut, daut wie onsen Schepfa kjanen lieren (Mat. 4:4). Wan du no Gott horchst, dan kjrichst du Vestentnis, Weisheit un woascht schaftich sennen. Jesus säd: “Jlekjlich sent dee, dee sikj doaräwa em kloaren sent, daut an daut jeistelje fält” (Mat. 5:3, NW). Gott jeft ons aules, waut ons em jeisteljen fält. Hee deit daut derch sien Wuat un derch aul daut jeistelje Äten, waut wie derch dän truen, weisen Kjnajcht kjrieen (Mat. 24:45). Un woo väl jeisteljet Äten doa nich es! (Jes. 65:13-14).

7. Woo kaun daut jeistelje Äten die halpen?

7 Daut jeistelje Äten kaun die halpen, Weisheit to kjrieen un väasechtich to sennen, un dise Ieejenschoften kjennen die fa väl schitzen (läs Spricha 2:10-14). Biejlikj woaren dee die halpen, nich aun de faulsche Lieren to jleewen, daut et kjeenen Gott jeft ooda daut Jelt un tieteljet die schaftich moakt. Un dee woaren die uk halpen, soone Wenschen un Jewanheiten utem Stich to gonen, waut die schoden. Doawäajen es daut needich, daut du die bemieechst emma weisa un väasechtja to woaren. Dan woascht du utfinjen, daut Jehova die väl räakjent un daut baste fa die well (Psa. 34:9; Jes. 48:17-18).

8. (a) Wuarom sell wie Gott nu noda komen? (b) Woo woat ons daut lota togood komen?

 8 Boolt woat aules, waut to dän Soton siene Welt jehieet, venicht woaren. Dan woat bloos Jehova ons halpen un schitzen kjennen. Veleicht woa wie onen am nich mol weeten, von wua wie daut näakjste Äten häanämen sellen (Hab. 3:2, 12-19). Doawäajen mott wie nu onsen himlischen Voda noda komen un lieren, ons noch dolla opp am to veloten (2. Pet. 2:9). Wan wie daut doonen, dan woat ons daut krakjt soo gonen aus dän Psalmenschriewa David, endoont waut doa passieet. Hee schreef: “Ekj hab dän HARN emma ver de Uagen; wiels hee mie to rajchte Haunt steit, woa ekj secha stonen” (Psa. 16:8).

JEHOVA JEFT DIE DE BASTE FRIND

9. (a) Waut deit Jehova no Johanes 6:44 no? (b) Waut es soo besonda, wan eena wäm von Jehova siene Zeijen traft?

9 Wan du wäm toom ieeschte Mol trafst, waut nich en de Woarheit es, woo väl weetst du dan von dän? Veleicht weetst du dan bloos dän sienen Nomen un woo dän lat. Oba daut es gaunz aundasch, wan du wäm trafst, waut en de Woarheit es. Du weetst, daut dee Jehova leeft un daut Jehova waut goodet bie dän jeseenen haft un dän jetrocken haft, daut dee uk to siene Deena jehieren kaun (läs Johanes 6:44). Du weetst aul väl von dän un dee von die, endoont von wua dee kjemt ooda woo dee oppjewossen es.

Jehova well, daut wie de baste Frind haben un no jeisteljet sträwen (See Varsch 9-12)

10-11. (a) Waut es bie Jehova siene Deena äwareen? (b) Woo kjemt ons daut togood?

10 Wan du wäm von Jehova siene Zeijen trafst, dan weetst du aul, daut jie äwa de wichtichste Sachen äwareen denkjen. Endoont waut vonne Sproak dee rät, jie beid kjanen de “reine Sproak” von de Woarheit (Zef. 3:9, NW). Jie beid jleewen aun Jehova, jie läwen no deeselwje Jebooten un Gruntsauzen un haben deeselwje Hopninj. Daut halpt, daut jie junt unjarenaunda vetruen kjennen un fa emma goode Frind woaren.

11 Daut es nich äwadräwen to sajen, daut du de baste Frind hast, waut daut jeft, wan du Jehova deenst. Dise Frind wonen romme gaunze Welt, wan du dee  uk noch nich hast kjanen jelieet. Wäa sest kaun soon scheenet beläwen, aus Jehova siene Deena?

JEHOVA HALPT DIE NO GOODET TO STRÄWEN

12. Waut kaust du die em jeisteljen väanämen?

12 Läs Liera 11:9–12:1. Hast du die waut em jeisteljen väajenomen, waut du doonen west? Veleicht hast du die väajenomen, jieda Dach de Bibel to läsen ooda bätre Auntwuaten bie de Toopkomes to jäwen ooda die noch dolla auntostrenjen, wan du eene Oppgow oppem Plautform hast. Woo feelst du die, wan du enwoascht, daut du daut emma bäta vesteist, ooda wan aundre die lowen? Secha best du doa sea schaftich äwa, un daut es uk nich onen Uasoak, wiels du weetst, daut du daut deist, waut Jehova von die haben well, soo aus Jesus daut deed (Psa. 40:9; Spr. 27:11).

13. Wuarom es daut bäta, Gott to deenen aus no irdischet to sträwen?

13 Wan du no jeisteljet sträfst, dan woat die daut opp iernst schaftich moaken, wiels daut werkjlich waut enhelt. De Apostel Paulus schreef: “Miene leewe Breeda, stot faust, lot junt nich omschmieten, nämt emma too en june Oabeit fa dän Harn. Denkjt doaraun, daut june Oabeit fa onsen Harn nich vejäfs es” (1. Kor. 15:58). Oba wan eena no irdische Sachen sträft, dan woat eena nich opp iernst schaftich sennen. Wan eena uk goot wiedakjemt, woat eena sikj doawäajen foaken ladich feelen (Luk. 9:25). Daut kjenn wie aun dän Kjennich Salomo seenen (Reem. 15:4).

14. Waut kaust du von daut lieren, waut Salomo beläwd?

14 Salomo wia eent von de rikjste un majchtichste Mana, waut et jeef. Eemol wull hee “opp iernst seenen, waut eena ut scheen gonen un sikj väl jennen haft” (Liera 2:1-10). Hee bud Hiesa, muak schmocke Goades un Parks un deed aules, waut am jankad. Muak am daut schaftich un tofräd? Aus hee äwa aul daut nodocht, waut hee jedonen haud, schreef hee, “daut et nich to vestonen wia [ooda nuscht enhilt]. . . . Doa wia nuscht . . ., waut eenem oppe Lenjd waut holp” (Liera 2:11). Woascht du die daut to Kopp nämen, waut Salomo utfunk?

15. (a) Wuarom bruck wie Gloowen? (b) Woo kjemt ons daut togood, wan wie Gloowen haben, soo aus Psalm 32:8 sajcht?

15 Eenje lieren bloos dan, wan see Fäla moaken un daut schlajcht utkjemt. Oba Jehova well nich, daut die daut uk soo jeit. Hee well, daut du no am horchst. Daut brukt Gloowen, oba wie woaren daut kjeenmol beschoden, wan Gott sien Wellen en ons Läwen daut ieeschte kjemt. Un Jehova woat kjeenmol onse “Leew vejäten”, dee wie “en sienen Nomen beweesen” (Heb. 6:10). Doawäajen sell wie ons bemieejen, daut ons Gloowen stoakj woat. Dan woa wie rajcht entscheiden kjennen un seenen, daut ons himlischa Voda emma daut baste fa ons well (läs Psalm 32:8).

GOTT JEFT DIE WOARE FRIEHEIT

16. Wuarom sell wie onse Frieheit väl räakjnen un rajcht brucken?

16 Paulus schreef: “Wua Jehova sien Jeist es, doa es Frieheit” (2. Kor. 3:17NW). Jehova räakjent de Frieheit väl un haft ons uk soo jemoakt, daut wie dee väl räakjnen. Oba hee well haben, daut wie onse Frieheit rajcht brucken. Daut es een Schutz fa ons. Veleicht kjanst du junge Menschen, waut noaktje Bilda kjikjen, Huararie driewen, jefäadeljen Sport moaken, Droggs brucken ooda supen. Aum Aunfank jeit dee daut veleicht  scheen, oba soont kjemt foaken schlajcht ut, wiels eena kaun doavon aufhenjich woaren, Krankheiten kjrieen ooda mau rajcht stoawen (Gal. 6:7-8). Wäa soont deit, es nich werkjlich frie (Tit. 3:3).

17-18. (a) Wuarom moakt ons daut frie, wan wie Gott jehorchen? (b) Wuahäa hauden Adam un Eva mea Frieheit aus de Menschen vondoag dän Dach?

17 Oba woo väl Menschen kjanst du, waut krank worden, wäajen dee sikj no de Schreft rechten? Daut es kloa to seenen, daut et jesunt es un ons frie moakt, wan wie no Jehova horchen (Psa. 19:8-12). Un wan du die aun Gott siene volkomne Jebooten un Gruntsauzen helst, dan brukst du diene Frieheit rajcht un wiest Gott un diene Elren, daut opp die to veloten es un daut see die noch mea Frieheit jäwen kjennen. Gott haft uk vesproaken, daut hee aul siene true Deena boolt de woare Frieheit jäwen woat, waut en de Schreft “de Gotteskjinja äare Frieheit un Harlichkjeit” jenant woat (Reem. 8:21).

18 Adam un Eva hauden dise Frieheit. Em Goaden Eden wia an mau eent aufjesajcht. Gott säd to dee, see sullen bloos von eenen Boom nich äten (1. Mo. 2:9, 17). Wia Gott ojjerajcht ooda too strenj? Nich mol veleicht! Denkj bloos mol doaraun, woo väl Jesazen de Menschen moaken, daut aundre dee jehorchen motten.

19. Waut lieren Jehova un Jesus ons, daut wie kjennen frie woaren?

19 Jehova jeit sea weis met siene Deena om. Enne Städ daut hee ons eenen Klompen Jesazen jeft, lieet hee ons jeduldich, daut wie am un onsen Näakjsten leewen sellen. Hee well, daut wie ons no siene Gruntsauzen rechten un daut haussen, waut schlajcht es (Reem. 12:9). Un Jesus holp ons en siene Räd oppem Boajch to vestonen, wuarom de Menschen schlajchtet doonen (Mat. 5:27-28). Jesus es de Kjennich von Gott sien Kjennichrikj, un hee woat ons uk en de niee Welt lieren, soo äwa rajcht un orrajcht to denkjen, aus hee deit (Heb. 1:9). Jesus woat uk onsen Kjarpa un ons Vestaunt volkomen moaken. Woo scheen woat daut nich sennen! Ons woat daut nich mol mea jankren schlajchtet to doonen un wie woaren nich mea lieden motten, wäajen wie onvolkomen sent. Dan woa wie entlich de “Frieheit un Harlichkjeit” haben, waut Jehova ons vesproaken haft.

20. (a) Woo brukt Jehova siene Frieheit? (b) Woo kjenn wie Gott nodoonen?

20 Oba wie woaren kjeenmol en aule Stekjen Frieheit haben, wiels wie woaren emma motten doano oppaussen, daut wie Gott un onsen Näakjsten Leew wiesen. Opp dee Wajch doo wie Jehova no. Hee deit je aules ut Leew un jeit emma leeftolich met ons om, wan hee uk en aule Stekjen Frieheit haft (1. Joh. 4:7-8). Doawäajen kjenn wie bloos dan werkjlich frie sennen, wan wie am nodoonen.

21. (a) Woo docht David äwa Jehova? (b) Waut woa wie en dän näakjsten Artikjel seenen?

21 Best du dankboa fa aul daut goode, waut Jehova die jejäft haft? Jehova jeft ons väl jeisteljet Äten, goode Frind, de Hopninj opp woare Frieheit un lieet ons, no waut wie sträwen sellen (Psa. 103:5). Secha jeit die daut krakjt soo aus David. Hee säd to Jehova en Psalm 16:11: “Du moakst mie met däm Läwenswajch bekaunt; en diene Jäajenwuat es de Freid soo groot aus dee woaren kaun. Bie die to rajchte Haunt sent eewje Freiden.” En dän näakjsten Artikjel woa wie noch mea jeistelje Schaza seenen, waut wie en dän 16. Psalm finjen. Dee woaren die halpen to vestonen, woo du daut baste Läwen haben kaust, waut et jeft.