Trigj nom Enhault

No de Enhaultslist gonen

 EEN BERECHT VON IEESCHTEMMA

Woo de Sot von daut Kjennichrikj en Portugal jeseit wort

Woo de Sot von daut Kjennichrikj en Portugal jeseit wort

AUS George Young oppem Schepp hinjawäajes no Europa wia, docht hee äwa aul daut goode no, waut hee en Brasilien biem prädjen beläft haud. * Aus daut Schepp doa äwa daut Atlantik-Mäa fua, docht hee uk aun siene niee Oppgow, waut hee ver sikj haud. Hee reisd no Spaunien un Portugal, wua se noch meist nuscht von de goode Norecht jehieet hauden. Doa wull hee aul väaoabeiden fa de biblische Räden, waut Brooda J. F. Rutherford doa haben wudd, un 300 000 Zeichnisbläda utdeelen.

George Young reisd foaken äwa daut Mäa toom aundatwäajen prädjen

Aus Brooda Young aune 1925 no Lissabon kjeem, wia de Loag en Portugal schlemm. Aune 1910 hauden se doa dän Kjennich raufjesat un eene aundre Sort Rejierunk oppjestalt – daut Launt wort eene Republikj. Un de katoolsche Kjoakj velua doa uk väl Macht. De Menschen hauden mea Frieheit, oba daut wia noch sea orruich en daut Launt.

Krakjt dan, aus Brooda Young aules reedmuak fa Brooda Rutherford siene Räd, wia de Loag jefäadlich, wäajen eenje jeprooft hauden, de Rejierunk auftoschaufen un eene fresche opptostalen. De Schriewa von de British and Foreign Bible Society (de brietische un utlendsche Bibeljesalschoft) woarnd Brooda Young, daut hee secha wudd väl Jäajenstaunt kjrieen, oba Brooda Young leet sikj nich opphoolen. Hee fruach bie de Camões-School, aus see daut Hus, wua de Schoolkjinja bennen spälden, fa de Räd brucken kunnen un dee jeewen daut frie.

Dan kjeem de Dach, wua Brooda Rutherford siene Räd wudd haben met daut Teema “Woo eena fa emma oppe Ieed läwen kaun”. Daut wia de 13. Mei. De Breeda hauden de Räd en de Post bekauntjemoakt un uk irjentwua Zadels aunjebakt. De Menschen doa worden sea nieschierich. De Jäajna schreewen uk noch schwind en äare Post nenn, daut de Menschen sullen oppaussen fa de “faulsche Profeeten”, waut jekomen wieren. Ver daut Hus, wua de Räd wia, deelden de Jäajna uk dusende Hefta ut, waut säden, daut Brooda Rutherford waut orrajchtet lieed.

Oba doa hieeden doawäajen soo bie 2 000 Menschen de Räd un noch eemol soo väl musten se wajchschekjen, wäajen doa nich jenuach Settich wia. Eenje wullen soo jieren toohorchen, daut see opp de Strankladren noppklautaden, waut doa aune Waunt hongen, un aundre saden sikj opp daut Ekserseis-Jereetschoft dol.

Doa rand nich aules jlei, wäajen de Jäajna sikj doa romschrieejen un Steela tweibruaken. Oba Brooda Rutherford bleef ruich un stieech opp eenen Desch nopp, daut se am bäta hieren kunnen. Siene Räd dieed meist bat Klock twalf de Nacht, un äwa 1 200 Menschen bestalden sikj biblische Bieekja. Dän näakjsten Dach wia en de Post O Século een Artikjel bennen äwa Brooda Rutherford siene Räd.

Von Septamba 1925 aun jeef daut en Portugal dän Woaktorm opp Portugiesisch. (En Brasilien jeef  et dän aul ea opp Portugiesisch.) To dee Tiet muak een Bibelforscha en Brasilien Plons toom no Portugal trakjen, om doa bie daut Kjennichrikjswoakj mettohalpen. Dee heet Virgílio Ferguson un dee haud ea met Brooda Young toop en de Bibelforscha äare kjliene Offiz en Brasilien jeschauft. Virgílio un siene Fru Lizzie jeewen sikj boolt oppem Wajch doahan, wua Brooda Young wia. Brooda Ferguson kjeem jroz to rajchte Tiet no Portugal, wäajen se Brooda Young boolt aundatwäajen hanschekjten toom prädjen, biejlikj no de Sowjetunion.

De Papieren von Lizzie un Virgílio Ferguson toom en Portugal bliewen, 1928

Lota muak daut Millitäa een Enj met de Rejierunk en Portugal un daut jeef doa eene fresche Rejierunk, waut sea strenj wia (eene Diktatua). Daut jeef emma mea Wadastaunt, oba Brooda Ferguson leet sikj nich enenjsten un bleef doa. Hee wull de kjliene Grupp Bibelforscha doa schitzen un daut Woakj unjastetten. Hee fruach no Frieheit, daut see bie sien Tus de Toopkomes aufhoolen kunnen un en Oktooba 1927 kjrieech hee dan de Frieheit.

En daut ieeschte Joa von de strenje Rejierunk schreewen ojjefäa 450 Menschen en Portugal sikj en, daut see pinkjlich dän Woaktorm kjrieejen. Un derch Zeichnisbläda un Hefta vespreed de goode Norecht sikj en daut gaunze portugiesische Rikj – en Angoola, opp de Azoren, en Goa, en Kap Verde, opp Madeira, en Mosambik un en Timor-Leste.

Aune 1929 kjeem de portugiesischa Goadenbesorja Manuel da Silva Jordão no Lissabon. Ea haud hee en Brasilien jewont un doa eene Räd von Brooda Young jehieed. Hee wia enjeworden, daut et de Woarheit wia, un wull Brooda Ferguson nu wellich met daut Prädichtwoakj en Portugal halpen. Doawäajen wort Manuel een Kolporteur, soo aus de Pionieren to dee Tiet jenant worden. Aus daut ieescht fein enjerecht wia met biblische Bieekja drekjen un vedeelen, jinkj daut met de niee Vesaumlunk en Lissabon bosich wieda.

Brooda un Sesta Ferguson musten aune 1934 trigj no Brasilien. Oba de Sot von daut Kjennichrikj wia aul jeseit. De Grupp Breeda en Portugal kunn Jehova tru bliewen, wan daut wäajen dän Kjrich en Spaunien un wäajen dän tweeden Weltkjrich uk schwoa en Europa wia. Eene Tietlank wieren dee soo aus Kolen, waut bloos noch jläaden, oba dan aune 1947 funk dee äa Iewa wada dolla aun to brennen, aus de ieeschta Missionoa von de Gilead-School no Portugal kjeem. Daut wia John Cooke. No daut jeef daut bloos emma mea Kjennichrikjsvekjindja. Mau rajcht aus de Rejierunk Jehova siene Zeijen äa Woakj aune 1962 vebeeden deed, worden dee doawäajen bloos mea. Un aus daut Woakj en Dezamba 1974 wada frie wort, wieren doa aul mea aus 13 000 Vekjindja en Portugal.

Nu sent doa äwa 50 000 Vekjindja, waut de goode Norecht von Gott sien Kjennichrikj en Portugal prädjen un uk opp eenje Inslen, wua se Portugiesisch räden, biejlikj opp de Azoren un Madeira. Eenje von dee sent Nokomen von soone, waut aune 1925 bie Brooda Rutherford siene besondre Räd wieren.

Wie sent Jehova sea dankboa un uk de true Breeda un Sestren to jane Tiet, waut aus Christus Jesus siene “Deena aun de Velkja” mootich daut Woakj wiedabrochten (Reem. 15:15-16). (Een Berecht, waut en Portugal toopjestalt es.)

^ Varsch 3 See “Im Erntewerk gibt es noch viel zu tun” em Wachtturm vom 15. Mei 2014, S. 31-32.