Trigj nom Enhault

No de Enhaultslist gonen

 15. ARTIKJEL FA DAUT STUDIUM

Woo denkjst du äwa de Arnt?

Woo denkjst du äwa de Arnt?

“Moakt eemol de Uagen op un kjikjt no de Arnt, dee es aul riep un reed toom arnten” (JOH. 4:35)

LEET 64 Wie schaufen met Freid bie de Arnt met

WAUT WIE SEENEN WOAREN *

1-2. Von waut räd Jesus en Johanes 4:35-36?

OPP siene Reis sach Jesus Stapen, wua woomäajlich kjliena Joascht woss (Joh. 4:3-6NW). Daut wudd noch soo bie vea Moonat dieren, bat dee reed toom arnten wia. Un doch säd Jesus: “Moakt eemol de Uagen op un kjikjt no de Arnt, dee es aul riep un reed toom arnten” (läs Johanes 4:35-36). Waut meend Jesus doamet?

2 Daut sitt soo, daut Jesus von Menschen räd, waut doa sullen toopjebrocht woaren. Woo weet wie daut? Jeweenlich hilden de Juden sikj oppoat von de Samarita. Oba Jesus haud jroz eene samaritische Fru jeprädicht un dee haud no am jehorcht. Un nu säd hee, daut de Arnt “riep un reed toom arnten” wia. Äwadäm wieren aul väl Samarita hinjawäajes opptoo no am. Dise Fru haud dee von Jesus vetalt un nu wullen dee mea lieren (Joh. 4:9, 39-42). Een Buak, waut de Schreft utlajcht, sajcht: “De Menschen kjeemen fuaz un wullen no Jesus horchen . . . daut wees, daut dee soo aus Jeträajd wieren, waut reed wia toom arnten.”

Waut sell wie doonen, wan wie denkjen, daut onse Arnt “riep un reed toom arnten” es? (See Varsch 3)

3. Wuarom woa wie bäta prädjen kjennen, wan wie soo äwa de Menschen denkjen aus Jesus?

3 See wie de Menschen, waut wie de goode Norecht prädjen, soo aus eene Arnt, waut reed es toom enbrinjen? Wan jo, dan woa wie ons (1) noch dolla aunstrenjen toom prädjen. De Arnttiet woat je irjentwanea to Enj sennen un wie wellen onse Tiet nich vekwosen. Wie woaren (2) uk schaftich sennen, wan wie seenen, woo de Menschen no de goode Norecht horchen. De Schreft sajcht je, daut eena sikj äwa “eene groote  Arnt” freit (Jes. 9:2). Un wie woaren (3) bie jieda Mensch doaraun denkjen, daut dee wudd kjennen de Woarheit aunnämen. Doawäajen woa wie proowen, von soont to räden, waut dänjanjen intressieet.

4. Waut woa wie nu von dän Apostel Paulus lieren?

4 Eenje von Jesus siene Nofolja dochten woomäajlich, daut de Samarita kjeenmol de Woarheit aunnämen wudden. Oba Jesus docht aundasch. Wie motten uk doaraun denkjen, daut deejanje, waut wie prädjen, woomäajlich de Woarheit aunnämen kjennen. Een aundret goodet Väabilt es de Apostel Paulus. Waut kjenn wie von am lieren? En disen Artikjel woa wie ons unjastonen, woo hee (1) enwort, waut de Menschen jleewden, un woo hee (2) rutfunk, waut dee intressieed, un daut hee (3) doaraun docht, daut dee noch mol kunnen Jesus siene Jinja woaren.

WAUT JLEEWEN DEE?

5. Wuarom wist Paulus, woo de Menschen daut en de Judenschool hauden?

5 Paulus deed foaken en de Judenschoolen prädjen, biejlikj en Tessalonich. Doa räd hee met de Juden “aun dree Sabaten ut de Schreft” (Apj. 17:1-2). Secha feeld Paulus sikj doa maklich, wäajen hee aus een Jud oppjewossen wia (Apj. 26:4-5). Paulus wist, woo de Juden daut hauden, un doaderch kunn hee dee fein prädjen (Filip. 3:4-5).

6. Waut vonne Menschen prädijd Paulus en de Judenschool un waut vonne oppem Moakjtplauz?

6 Wäajen Paulus en Tessalonich un Beria vefolcht wort, reisd hee no Ateen. Doa jinkj hee wada no de Judenschool un räd “to de Juden un de gottesferchtje Griechen” (Apj. 17:17). Oba aus Paulus dan “opp däm Moakjtplauz” prädijd, räd hee to gaunz aundre Menschen. Mank dee wieren Jelieede un aundre Nichjuden, waut dochten, daut Paulus an eene “niee Lia” brinjen wull. Dee säden: “Wie hieren waut gaunz framdet von die” (Apj. 17:18-20).

7. Woo stald Paulus sikj fa de Menschen en, soo aus Aposteljeschicht 17:22-23 wiest?

7 Läs Aposteljeschicht 17:22-23. Paulus prädijd de Nichjuden en Ateen gaunz aundasch aus de Juden en de Judenschool. Secha docht hee doaräwa no, waut de Menschen jleewden. Dan beoobacht hee dee un kjikjt, waut fa Jewanheiten dee hauden toom Gott aunbäden. Un dan räd hee daut ieeschte von soont, wua dee woomäajlich soo äwa dochten aus hee. Een Bibeljelieeda sajcht von Paulus: “Hee wia een judischa Christ un wist, daut de heidnische  Griechen nich dän ‘woaren’ Gott aunbäden deeden, soo aus de Juden un de Christen. Oba hee wull de Menschen von Ateen dietlich moaken, daut hee an nich eenen framden Gott prädjen wull.” Paulus recht sikj no de Menschen. En Ateen säd hee, daut siene Norecht von “dän onbekaunden Gott” kjeem, waut see aulmols aul aunbäden wullen. De Menschen doa wieren Nichjuden, waut nuscht von de Schreft wisten, oba Paulus jeef nich opp. Hee sach dee soo aus eene Arnt, waut reed wia toom enbrinjen, un stald sikj fa dee en.

Sie soo aus de Apostel Paulus. Beoobacht de Menschen un recht die no dee un denkj doaraun, daut dee wudden kjennen de Woarheit aunnämen (See Varsch 8, 12, 18) *

8. (a) Woo kjenn wie daut rutfinjen, waut de Menschen en onse Jäajent jleewen? (b) Waut wudd wie kjennen sajen, wan doa wäa säd, daut dee siene ieejne Kjoakj haft?

8 Beoobacht de Menschen, soo aus Paulus daut deed. Kjikj doano, waut dee jleewen. Woo sitt biejlikj dee äa Hus ooda äa Foatich? Es daut aun irjentwaut to kjanen, no woone Kjoakj dee foaren – biejlikj aun dee äare Nomes, Kjleeda ooda woo dee sikj oppfiksen ooda woo dee räden? Veleicht sajen dee mau rajcht, daut see äare ieejne Kjoakj haben. Dan wudd wie krakjt daut doonen kjennen, waut eene Sondapionia-Sesta deit, waut Flutura heet. See sajcht to soone: “Ekj well junt nich bemotten, soo to jleewen aus ekj. Oba ekj well met junt äwa daut Teema . . . räden.”

9. Äwa waut wurscht du kjennen räden, wan doa wäa aun Gott jleeft?

9 Wan doa wäa aun Gott jleeft, äwa waut wurscht du met dän dan kjennen räden? Veleicht äwa waut, en waut jie beid äwareen denkjen. Woomäajlich jleeft dee uk bloos aun eenen Gott un weet, daut Jesus ons Rada es un daut onse schlajchte Tiet boolt een Enj haben woat. Wan du met soont aunfangst, dan kaust du dän de goode Norecht ut de Schreft woomäajlich soo prädjen, daut dän daut intressieet.

10. Waut well wie rutfinjen, un wuarom?

10 Denkj doaraun, daut de Menschen veleicht nich aules krakjt soo jleewen, aus see daut en äare Kjoakj lieren. Doawäajen well wie rutfinjen, waut jieda eena selfst jleeft. David, een Sondapionia en Australien, sajcht: “Väle vemischen vondoag dän Dach äare Glooweslieren met menschelje Iedeeen.” Donalta von Albaunien sajcht: “Eenjemol sajen de Menschen ons, daut see to eene jewesse Kjoakj jehieren, oba lota sajen see dan, daut see nich opp iernst aun Gott jleewen.” En Argentinien säden aul eenje to eenen Missionoa, daut see aun de Dree-Eenichkjeit jleewden. Oba dee jleewden daut rajcht jesajcht nich, daut de Voda, de Sän un de heilja Jeist aulatoop mau een Gott wieren.  Hee sajcht: “Wan eena daut weet, dan kaun eena leichta met dee von soont räden, wua eena met dee stemt.” Doawäajen well wie rutfinjen, waut de Menschen werkjlich jleewen. Dan kjenn wie Paulus nodoonen, wiels hee “wort eenem jiedren soo aus hee wia” (1. Kor. 9:19-23).

WAUT INTRESSIEET DEE?

11. Waut deed Paulus no Aposteljeschicht 14:14-17 no, daut de Menschen en Liestra to de goode Norecht nieschierich worden?

11 Läs Aposteljeschicht 14:14-17. Paulus sach, waut de Menschen intressieed, un dan brukt hee daut toom prädjen. De Menschen en Liestra biejlikj wisten schia nuscht von de Schreft. Doawäajen räd Paulus soo, daut dee daut vestunden. Hee räd to dee von groote Arnten un daut eena kunn Freid aum läwen haben. Un hee brukt Wieed un Jlikjnisen, waut dee fein vestonen kunnen.

12. Woo kjenn wie rutfinjen, waut eenen Mensch intressieet, un met daut eene Vetal aunfangen?

12 Kjikj doano, waut de Menschen intressieet, un pauss daut, waut du sajchst, doano aun. Wan du wua hankjemst, woo kaust du dan weeten, waut de Menschen doa intressieet? Kjikj, waut dee jroz doonen. Veleicht schaufen dee em Goaden, läsen een Buak, repäaren daut Foatich ooda doonen sestwaut. Dan wurscht du woomäajlich kjennen von daut räden toom eene Vetal aunfangen (Joh. 4:7). Eenjemol es daut mau rajcht aun de Kjleeda to seenen, von wua dee komen, waut dee schaufen ooda waut von Sport dee jleichen. Gustavo sajcht: “Ekj vetald met eenen 19-joaschen Jung. Opp dän sien Hamd wia een Bilt bowen von eenen bekaunden Sinja. Wie räden dan von daut, un hee säd to mie, wuarom hee disen Sinja jleicht. Lota studieed hee de Bibel un nu es hee ons Brooda.”

13. Woo kjenn wie wäm to een Bibelstudium nieschierich moaken?

13 Wan wie wäm een Bibelstudium aunbeeden, dan sell wie dän doatoo nieschierich moaken un dän wiesen, woo am daut halpen kaun (Joh. 4:13-15). Opp eene Sauz kroagd eene Fru mol eene Sesta nenn. Doa  sach de Sesta dan een Bilt aune Waunt, wua bowen jeschräwen wia, daut de Fru een Professa wia un studieet haud, woo eena aundre fein utlieren kunn. De Sesta säd dan, daut wie de Menschen uk utlieren deeden derch Bibelstudiums un derch onse Toopkomes. De Fru wull dan uk de Bibel studieren un kjeem fuaz dän näakjsten Dach no een Toopkomen. Nich lang nodäm kjeem see no eenen eendachschen Kongress un een Joa lota leet see sikj deepen. Wie kunnen uk mol äwalajen: “Waut intressieet miene Wadabesuchs? Woo kaun ekj dee nieschierich moaken to een Bibelstudium?”

14. Woo kjenn wie soo met de Menschen studieren, daut dee daut werkjlich waut halpt?

14 Wan du met wäm studieescht, dan moak die jiedatsmol fein reed un hool em Denkj, waut dänjanjen fält un intressieet. Woone Bibelvarzh west du met dän toop läsen? Woone Videos kaust du dän wiesen? Un waut vonne Jlikjnisen kaust du brucken, om dän veschiedne biblische Lieren uttolajen? Denkj uk doaräwa no, waut deejanja besonda jleichen woat un waut dän to Hoaten gonen woat (Spr. 16:23). En Albaunien studieed eene Pionia-Sesta, waut Flora heet, met eene Fru. Dise Fru säd mol to ar: “Ekj kaun daut eefach nich jleewen, daut de Doodes oppstonen woaren!” Flora proowd dan nich fuaz, dee daut entoräden. See säd: “Ekj docht doaraun, daut see ieescht mol dän kjanen lieren must, waut vesproaken haud, de Doodes opptowakjen.” Von dan aun muak Flora de Fru daut bie jieda Studium dietlich, woo väl Leew, Weisheit un Macht Jehova haud. Un lota wia de Fru wellich reed, aun daut oppstonen vom Doot to jleewen. Nu es see eent von Jehova siene Zeijen un deit flietich prädjen.

DEE WUDDEN KJENNEN DE WOARHEIT AUNNÄMEN

15. (a) Woo wieren de Menschen en Ateen no Aposteljeschicht 17:16-18 no? (b) Wuarom deed Paulus dee doawäajen prädjen?

15 Läs Aposteljeschicht 17:16-18. Paulus prädijd de Menschen en Ateen, wan dee uk Aufjetta aunbäden deeden, een orreinet Läwen fieeden un aun menschelje Iedeeen jleewden. Eenje deeden am mau rajcht beleidjen, oba hee wort nich mootloos un docht uk nich, daut dee kjeenmol wudden de Woarheit aunnämen. Hee wia je ieeschtemma uk “een rietenda Vefolja un Lastra” jewast un dan een Christ jeworden (1. Tim. 1:13). Krakjt soo aus Jesus docht, daut Paulus sikj wudd endren kjennen, soo docht Paulus uk, daut de Menschen en Ateen sikj wudden endren kjennen. Un hee schmäad sikj nich aun (Apj. 9:13-15; 17:34).

16-17. Waut bewiest, daut jieda Mensch de Woarheit aunnämen kaun? Jeff een Biespel.

16 En de Aposteltiet worden gaunz veschiedne Menschen Jesus siene Jinja. Aus Paulus no de Vesaumlunk schreef, waut en de griechische Staut Korint wia, säd hee, daut eenje von dee ea een gottlooset ooda sea orreinet Läwen jefieet hauden. Un dan säd hee: “Oba nu sent jie rein jewoschen” (1. Kor. 6:9-11). Wurscht du jedocht haben, daut soone Menschen sikj endren un de Woarheit aunnämen kunnen?

17 Vondoag dän Dach sent väle reed, sikj to endren un Jesus notofoljen. En Australien biejlikj beläwd eene Sondapionia-Sesta, waut Yukina heet, daut jieda Mensch no de Woarheit horchen un dee aunnämen kunn. See sach mol en eene Offiz eene junge Fru, waut Tatos haud un nich sea frintlich kjikjt. Yukina sajcht: “Ieescht äwaläd ekj een bät, aus ekj met ar räden wull, oba ekj deed. Ekj wort en, daut see de Schreft  soo väl räakjend, daut eenje von äare Tatos soogoa Varzh ut de Psalmen wieren!” De Fru funk aun to studieren un no de Toopkomes to wanken. *

18. Wuarom sell wie de Menschen nich rechten?

18 Wuarom docht Jesus, daut de Arnt reed wia toom enbrinjen? Docht hee, daut de mieeschte am nofoljen wudden? Gaunz secha nich. En de Schreft wia je verutjesajcht, daut nich väle aun am jleewen wudden (Joh. 12:37-38). Un Jesus wist je uk, waut de Menschen dochten (Mat. 9:4). Un doch deed hee aulem flietich prädjen un hilt em Denkj, daut weens eenje aun am jleewen wudden. Oba wie weeten nich, waut de Menschen denkjen. Doawäajen sell wie kjeenmol jleewen, daut jewesse Menschen aulmols nich horchen woaren! Hool wie emma em Denkj, daut dee de Woarheit wudden aunnämen kjennen. Marc, een Missionoa en Burkina Faso, sajcht: “Foaken jleew ekj, daut doa wäa de Woarheit aunnämen woat, oba dan hieet dee wada opp to studieren. Oba deejanje, wua ekj daut bedua, komen fein veraun. Daut wiest mie, daut et emma daut baste es, wan wie ons von Jehova sienen Jeist leiden loten.”

19. Woo sell wie äwa de Menschen denkjen, wan wie prädjen?

19 Wan wie prädjen, dan sitt daut veleicht nich doano, daut wie doa väl Menschen finjen, waut soo aus eene riepe Arnt sent. Oba well wie kjeenmol vejäten, waut Jesus to siene Jinja säd. De Arnt es riep un reed toom arnten! De Menschen kjennen sikj endren un Jesus siene Nofolja woaren. Fa Jehova sent dise Menschen soo wieetvoll aus “Schaza” (Hag. 2:7). Wan wie soo denkjen aus Jehova un Jesus, dan woa wie proowen to vestonen, woo de Menschen daut haben un waut dee intressieet. Wie woaren nich doaraun denkjen, daut daut Framde sent, oba doaraun, daut dee kjennen onse Breeda un Sestren woaren.

LEET 57 Wie wellen aule Sorten Menschen prädjen

^ Varsch 5 Wuarom woa wie bäta prädjen un lieren kjennen, wan wie rajcht äwa de Menschen denkjen? En disen Artikjel woa wie ons unjastonen, woo Jesus un de Apostel Paulus dochten. Dee hilden em Denkj, aun waut de Menschen jleewden, waut dee intressieed un daut dee uk kunnen Jesus siene Jinja woaren. Woo kjenn wie daut uk soo doonen?

^ Varsch 17 En de Artikjels Die Bibel hat ihr Leben verändertfinjt eena noch mea Biespels von Menschen, waut sikj sea jeendat haben. Dee kjeemen bat aune 2017 em Wachtturm rut un nu opp jw.org®. Sieekj en ÜBER UNS > ERLEBNISBERICHTE > DIE BIBEL VERÄNDERT DAS LEBEN. Ooda see de plautdietsche Videos “De Woarheit veendat de Menschen”. Sieekj en BIEEKJA UN MEA > VIDEOS > ERFOARUNGEN.

^ Varsch 57 BILTBESCHRIEWUNK: Eene Lied prädjen von Hus to Hus. Dee seenen (1) een schmocket Hus met Bloomen vere Däa, (2) een Hus, wua eene Famielje met kjliene Kjinja wont, (3) een Hus, waut sea eefach un schwiensch sitt, un (4) een Hus, wua to seenen es, daut dee aul to eene Kjoakj jehieren. Wua woaren se daut ieeschte de Woarheit aunnämen?