Trigj nom Enhault

No de Enhaultslist gonen

 17. ARTIKJEL FA DAUT STUDIUM

Lot die von Jehova halpen, de beese Jeista to wadastonen

Lot die von Jehova halpen, de beese Jeista to wadastonen

“Wie haben . . . to kjamfen . . . jäajen jewaultje, beese Jeista von de Himmelswelten” (EFS. 6:12)

LEET 55 Fercht junt nich fa dee!

WAUT WIE SEENEN WOAREN *

1. Waut es no Efeesa 6:10-13 no eent, woo Jehova wiest, daut hee leeftolich om ons bekjemmat es? Laj daut ut.

EENT, woo Jehova wiest, daut hee leeftolich om ons bekjemmat es, es, daut hee ons halpt onse Fiend to wadastonen. Onse jratste Fiend sent de Soton un de beese Jeista. Jehova woarnt ons fa dee un hee jeft ons aules, waut ons fält, daut wie dee wadastonen kjennen (läs Efeesa 6:10-13). Wan wie ons von Jehova halpen loten un ons gaunz opp am veloten, dan kaun de beesa Fient ons nich jewennen. Wie kjennen ons krakjt soo opp Gott veloten aus de Apostel Paulus. Hee schreef: “Wan Gott opp onse Sied es, wäa kaun dan jäajen ons sennen?” (Reem. 8:31).

2. Waut woa wie en disen Artikjel betrachten?

2 Aus woare Christen sent wie nich nieschierich to dän Soton un de beese Jeista. Ons es väl dolla doarom todoonen, daut wie von Jehova lieren un am deenen (Psa. 25:5). Oba wie motten weeten, woo de Soton schauft. Wuarom? Daut dee ons nich veleiden kaun (2. Kor. 2:11). En disen Artikjel woa wie betrachten, met waut de Soton un de beese Jeista väl Menschen veleiden wellen un woo wie dee wadastonen kjennen.

WOO DE BEESE JEISTA DE MENSCHEN VELEIDEN

3-4. (a) Waut es Zaubarie? (b) Woo väl Menschen jleewen aun Zaubarie?

3 Eent von daut, waut de Soton un de beese Jeista daut mieeschte brucken toom de Menschen veleiden, es Zaubarie. Soone, waut Zaubarie driewen, sajen, daut see Sachen doonen ooda weeten kjennen, waut aundre nich kjennen. Eenje sajen biejlikj, daut see daut derch Woasajarie ooda  Stierndiedarie weeten kjennen, waut noch komen woat. Aundre jleewen veleicht, daut see met soone räden kjennen, waut aul jestorwen sent. Un wada aundre zaubren un proowen veleicht, eenen Fluch opp eenen aundren Mensch to saten. *

4 Woo väl Menschen jleewen aun Zaubarie? En 18 Lenda en Latien-Amerika un en de Karibik fruagen se de Menschen un ojjefäa een Dreddel von dee säden, daut dee aun Zaubarie ooda Hakjsarie jleewden un meist soo väle jleewden, daut et mäajlich wia, met de Jeista to räden. Un aus se en 18 Lenda en Afrika de Menschen fruagen, säden em Derchschnett äwa de Halft, daut see aun Hakjsarie jleewden. Oba krakjt endoont wua wie wonen – wie motten oppaussen fa Zaubarie, wiels de Soton “de gaunze Welt” veleiden well (Opb. 12:9).

5. Woo denkjt Jehova äwa Zaubarie?

5 Jehova es de “Woarheits Gott” (Psa. 31:5, Reimerbibel). Woo denkjt hee äwa Zaubarie? Hee haust dee! Jehova säd to de Israeliten: “Kjeena saul sienen ieejnen Sän ooda siene ieejne Dochta aus een Opfa vebrennen. Kjeena saul derch Tieekjens sajen, waut noch emol woaren woat, ooda von Hakjsen forschen, met de Jeista räden, een Fluch opp eenen aundren saten, ooda von vestorwne Menschen no Rot froagen. Soont sent bie däm HARN aules oppscheiselje Dinja” (5. Mo. 18:10-12). Christen sent nich unja daut Jesaz, waut Jehova de Israeliten jeef. Oba wie weeten, daut hee noch krakjt soo äwa Zaubarie denkjt aus ea (Mal. 3:6).

6. (a) Woo brukt de Soton Zaubarie toom de Menschen schoden? (b) Waut es de Woarheit äwa de Doodes no Liera 9:5 no?

6 Jehova woarnt ons fa Zaubarie, wäajen hee weet, daut de Soton Zaubarie brukt toom de Menschen schoden. Dee brukt dee, om Läajes to vebreeden, biejlikj daut de Menschen nom Doot noch aundatwäajen wiedaläwen (läs Liera 9:5). Un hee brukt dee uk toom de Menschen enenjsten un dee von Jehova aufbrinjen. Hee well, daut deejanje, waut Zaubarie driewen, sikj opp de beese Jeista veloten enne Städ opp Jehova.

WOO WIE DE BEESE JEISTA WADASTONEN KJENNEN

7. Waut sajcht Jehova ons?

7 Soo aus wie ea aul jeseenen haben, lat Jehova ons aules weeten, waut ons fält, daut de Soton un de beese Jeista ons nich veleiden kjennen. Well wie mol eenjet seenen, waut wie doonen kjennen, daut de Soton un de beese Jeista ons nich kjennen opp äare Sied kjrieen.

8. (a) Woont es de baste Help toom de beese Jeista wadastonen? (b) Woo wiest Psalm 146:4, daut daut nich soo es, waut de Soton von de Doodes sajcht?

8 Läs Gott sien Wuat un denkj doaräwa no. Daut es de baste Help, om de beese Jeista äare Läajes to wadastonen. Gott sien Wuat es soo aus een schoapet Schwieet, waut dän Fient siene Läajes tonuscht moaken kaun (Efs. 6:17). Biejlikj lieet Gott sien Wuat ons, daut et nich soo es, daut de Vestorwne met wäm räden kjennen (läs Psalm 146:4). Un daut lieet ons uk, daut bloos Jehova verutsajen kaun, waut noch komen woat (Jes. 45:21;  46:10). Wan wie pinkjlich en Gott sien Wuat läsen un doaräwa nodenkjen, dan woa wie kjennen de Läajes haussen un wadastonen, waut de beese Jeista ons enbillen wellen.

9. Von waut bliew wie wajch, wäajen daut met Zaubarie to doonen haft?

9 Bliew wajch von aules, waut met Zaubarie to doonen haft. Aus woare Christen doo wie nienich waut, waut met irjent Zaubarie to doonen haft. Wie sieekjen biejlikj nich Jeistabefroaga opp un proowen uk äwajens nich, met de Doodes to räden. Soo aus wie en dän väajen Artikjel jelieet haben, doo wie bie een Bejrafnis kjeenmol soont, waut met de Lia to doonen haft, daut de Vestorwne noch wua wiedaläwen. Un wie proowen uk nich derch Woasajarie ooda Stierndiedarie to weeten, waut noch komen woat (Jes. 8:19, NW). Wie weeten, daut aul soont sea jefäadlich es un daut wie ons doabie kunnen met dän Fient un de beese Jeista aufjäwen.

Doo de ieeschte Christen no un sto aules auf, waut met Zaubarie to doonen haft, un hab uk nich Tietvedrief, waut met soont to doonen haft (See Varsch 10-12)

10-11. (a) Waut deeden eenje en de Aposteltiet, aus see de Woarheit kjanen lieeden? (b) Wuarom sell wie de Christen von de Aposteltiet nodoonen, soo aus 1. Korinta 10:21 sajcht? (c) Woo kjenn wie daut doonen?

10 Sto Sachen auf, waut met Zaubarie to doonen haben. Eenje von de Menschen, waut en de Aposteltiet en Efesus wonden, hauden met Zaubarie to doonen. Aus dee de Woarheit kjanen lieeden, deeden see fuaz waut. “Väle, dee sikj met Zaubakrauft aufjejäft hauden, brochten äare Zaubabieekja toop un vebrenden dee, wua aulemaun daut seenen kunn” (Apj. 19:19). Dee deeden aules, waut dee kunnen, toom de beese Jeista wadastonen. Dee äare Zaubabieekja wieren sea dia. Oba enne Städ daut see dee wajchjeewen ooda vekoften, venichten see dee. An wia dolla doarom todoonen Jehova to jefaulen aus doarom, woo dia de Bieekja wieren.

11 Woo kjenn wie de Christen en Efesus nodoonen? Wan wie aules aufstonen,  waut met Zaubarie to doonen haft. Doa sent biejlikj aule Sachen met en, waut de Menschen bie sikj metdroagen ooda sikj omhenjen, daut an daut saul Jlekj brinjen ooda fa de beese Jeista beschitzen (läs 1. Korinta 10:21).

12. Äwa waut vonne Froagen sell wie nodenkjen?

12 Pauss goot opp, waut von Tietvedrief du hast. Denkj äwa de Froagen no: “Läs ekj Bieekja, Tietschreften ooda Artikjels em Internet, waut sikj von Zaubarie haundlen? Woo steit daut met daut Spell, waut ekj horch, un met de Films un Programs em Tellewizhen, waut ekj kjikj, un met de Komputaspäls un Gäms, waut ekj späl? Es doa bie irjentwaut, waut ekj fa Tietvedrief doo, Zaubarie met en? Haundelt sikj daut biejlikj von Jeistawäsen ooda Hakjsarie? Woat de Menschen doa enjebilt, daut et nuscht waut schlemmet es to zaubren ooda eenen Fluch opp wäm to saten?” Oba nich aule oppjemoakte Jeschichten en Bieekja ooda Films haben met Zaubarie to doonen. Sie die eenich, bloos soonen Tietvedrief to haben, waut die halpt gaunz von daut wajchtobliewen, waut Jehova haust. Wie wellen ons bastet doonen, om ver Gott “een reinet Jewessen to haben” (Apj. 24:16). *

13. Waut well wie nich doonen?

13 Doo nich Jeschichten von de beese Jeista romräden. Wie wellen daut krakjt soo doonen aus Jesus (1. Pet. 2:21). Ea Jesus no de Ieed kjeem, läwd hee em Himmel un wist väl äwa dän Soton un de beese Jeista. Oba hee vetald nich, waut de beese  Jeista aul aules aunjerecht hauden. Jesus wull fa Jehova Zeichnis jäwen, nich fa dän Fient. Wie kjennen Jesus nodoonen, wan wie nich Jeschichten von de beese Jeista romräden. Onse Wieed sellen wiesen, daut ons Hoat äwavoll es “fonn ne goode Sach”, aulsoo von de Woarheit (Psa. 45:1, Reimerbibel).

Wie brucken nich fa de beese Jeista Angst haben. Jehova, Jesus un de Enjel sent väl stoakja aus dee (See Varsch 14-15) *

14-15. (a) Wuarom bruck wie nich äwamotich Angst haben fa de beese Jeista? (b) Waut fa Bewies jeft daut, daut Jehova sien Volkj beschizt?

14 Hab nich äwamotich Angst fa de beese Jeista. En dise schlajchte Welt kaun leicht mol waut passieren. Eena kaun onverhofs een Ojjlekj haben ooda krank woaren ooda mau rajcht stoawen. Sull wie dan denkjen, daut daut von de beese Jeista kjemt? De Schreft sajcht, daut “Tiet un Jlekj” jiedrem eenen trafen kaun (Liera 9:11). Jehova haft bewäsen, daut hee väl stoakja es aus de beese Jeista. Hee leet daut toom Biespel nich too, daut de Soton Hiob dootmoaken kunn (Hiob 2:6). Un en Moses siene Tiet muak Jehova dietlich, daut hee väl mea Macht haud aus de Hakjsenmeistasch von Ägipten (2. Mo. 8:14; 9:11). Un aus Jesus wada em Himmel wia, jeef Jehova am de Macht äwa dän Soton un de beese Jeista, daut hee dee utem Himmel rutschmieten kunn. Sea boolt woaren dee en dän Aufgrunt nenjeschmäten woaren, wua dee kjeenem woaren Schoden aundoonen kjennen (Opb. 12:9; 20:2-3).

15 Daut es kloa to seenen, daut Jehova vondoag dän Dach sien Volkj beschizt. Wie doonen biejlikj oppe gaunze Ieed de Woarheit prädjen un lieren (Mat. 28:19-20). Doaderch woaren de Menschen en, waut fa schlajchtet de Fient deit. Wan dee daut kunn, dan wudd dee ons secha doavon aufhoolen. Oba dee kaun daut goanich. Doawäajen bruck wie nich äwamotich Angst haben fa de beese Jeista. Wie weeten, daut Jehova “de gaunze Ieed em Uag [helt], om dee bietostonen, waut am met een onjedeeldet Hoat vetruen” (2. Chr. 16:9). Wan wie Jehova tru sent, dan kjennen de beese Jeista ons nich soonen Schoden aundoonen, waut fa emma blift.

 SÄAJNUNGEN FA DEE, WAUT JEHOVA SIENE HELP AUNNÄMEN

16-17. Brukt daut Moot, de beese Jeista to wadastonen? Jeff een Biespel.

16 Daut brukt Moot toom de beese Jeista wadastonen, besonda wan de Frind ooda daut Frintschoft utem gooden Senn jäajen ons sent. Oba Jehova säajent dee, waut soonen Moot haben. See wie mol daut Biespel von eene Sesta, waut Erica heet un en Ghana wont. Erica wia 21 Joa, aus see aunfunk de Schreft to studieren. Äa Voda wia een Zaubapriesta, un doawäajen sull see bie eene Jewanheit metmoaken, waut met Zaubarie to doonen haud un wua se Fleesch eeten, waut se de Aufjetta jeopfat hauden. Aus Erica daut nich deed, jleewd äare Famielje, daut daut de Aufjetta beleidjen wudd un daut dee an wudden met eene Krankheit strofen.

17 Erica äare Famielje wull ar bemotten, bie dise Jewanheit mettomoaken, oba see deed daut nich, wan see wäajen daut uk must äa Tus veloten. Eenje Gloowesbreeda neemen ar opp un soo säajend Jehova ar met eene fresche Famielje. De Gloowesbreeda worden soo aus äare Breeda un Sestren (Mar. 10:29-30). Äa Frintschoft wull nuscht mea met ar to doonen haben un dee vebrenden soogoa äare Sachen. Oba Erica bleef Jehova tru un leet sikj deepen un nu es see Pionia. See haft nich äwamotich Angst fa de beese Jeista. Erica sajcht: “Ekj bäd jieda Dach, daut miene Famielje uk mol beläwen kaun, woo scheen daut es, Jehova to kjanen un de Frieheit to haben, waut eena kjricht, wan eena onsen leeftoljen Gott deent.”

18. Waut vonne Säajnungen kjrie wie, wan wie opp Jehova vetruen?

18 Wie woaren nich aula krakjt soo aufjeprooft woaren aus Erica. Oba wie motten aula de beese Jeista wadastonen un ons opp Jehova veloten. Wan wie daut doonen, dan woa wie väl Säajnungen kjrieen un de Fient woat ons nich derch siene Läajes teischen kjennen. Un wie woaren uk nich too Angst fa de beese Jeista haben. Oba daut wichtichste es, daut wie dan kjennen jratre Frind met Jehova sennen. De Jinja Jakobus schreef: “Unjastalt junt Gott. Stalt junt jäajen dän beesen Fient, dan woat hee von junt veschwinjen. Nodat junt no Gott, dan woat hee uk dicht no junt komen” (Jak. 4:7-8).

LEET 149 Jehova jewent siene Fiend

^ Varsch 5 Jehova haft ons leeftolich jewoarnt fa de beese Jeista un fa dän Schoden, waut dee aunrechten kjennen. Woo wellen de beese Jeista de Menschen veleiden? Woo kjenn wie dee wadastonen? En disen Artikjel woa wie betrachten, woo Jehova ons halpt, daut dee ons nich veleiden kjennen.

^ Varsch 3 WIEED UTJELAJCHT: Zaubarie, ooda Hakjsarie, sent Lieren un Jewanheiten, waut met beese Jeista to doonen haben. Doa es biejlikj de Lia met en, daut eenem sien Jeist nom Doot wiedaläft un daut dee dan met de Menschen rät – foaken derch eenen aundren Mensch (eenen Jeistabefroaga). Doa es uk zaubren un woasajen met en un aul soone Sitten un Jewanheiten, waut met Zaubakrauft to doonen haben. Doatoo jehieet uk eenen Fluch opp wäm to saten ooda dän Fluch wajchtonämen. Oba wan doa wäa fa Spos bosich met de Henj waut uteeft, dan es daut nich soont, wua dis Artikjel von rät.

^ Varsch 12 De Eltestasch haben nich de Frieheit Räajlen opptostalen, waut fa Tietvedrief aundre haben kjennen. Jieda Christ mott sien Jewessen met de Schreft oppschoapen un dan selfst entscheiden, waut dee läsen, kjikjen ooda spälen well. Een Famieljenhaupt, waut om siene Famielje todoonen es, woat doano seenen, daut dee soonen Tietvedrief haben, waut met de biblische Gruntsauzen tooppaust. (See opp jw.org® dän Artikjel “Doonen Jehova siene Zeijen jewesse Films, Musikj ooda Bieekja vebeeden?” bie MEA ÄWA ONS > WAUT FOAKEN JEFROACHT WOAT.)

^ Varsch 54 BILTBESCHRIEWUNK: Ons majchtja himlischa Kjennich Jesus leit eene groote Häad Enjel. Bowa an es Jehova sien Troon.