Trigj nom Enhault

No de Enhaultslist gonen

 LÄWESJESCHICHT

Wie fungen de “sea wieetvolle Parl”

Wie fungen de “sea wieetvolle Parl”

WINSTON un Pamela (Pam) Payne deenen en daut Betel von Australasien. Dee haben toop aul väl scheenet beläft, oba uk eenje Schwierichkjeiten. Biejlikj musten see sikj to daut Läwen en veschiedne Lenda wanen un wieren sea truarich, aus Pam eene Stelp haud. Oba doawäajen hilden see äare Leew fa Jehova un fa sien Volkj un äare Freid em Deenst. Wie fruagen dee, aus dee ons mol wullen waut vetalen von daut, waut see beläft hauden.

Winston, vetal ons mol, woo du aunfungst no Gott to sieekjen.

Ekj woss opp eenen Foarm opp en Queensland en Australien. Miene Famielje jehieed to kjeene Jemeent, un wäajen wie soo wiet auf wonden, haud ekj weinich met aundre Menschen to doonen. Aus ekj ojjefäa 12 Joa wia, funk ekj aun no Gott to sieekjen. Ekj bäd to am, daut hee mie sull halpen, de Woarheit äwa am to finjen. Met de Tiet veleet ekj dän Foarm un funk Oabeit en Adelaide en Sied-Australien. Aus ekj 21 Joa wia, reisd ekj no Sydney un doa lieed ekj Pam kjanen. See vetald mie von dän brietisch-israelitischen Gloowen, waut lieet, daut de brietische Menschen von Stam häakomen, waut se “de veloarne Stam von Israel” nanen. Dee sajen, daut sent de tieen Stam von daut Nuadkjennichrikj Israel, waut en daut achte Joahundat v. Chr. äa Launt veloten musten. Aus ekj dan trigj en Adelaide wia, vetald ekj eenen Oabeitspoatna doavon, waut met Jehova siene Zeijen de Bibel studieed. Hee vetald mie von dee äare Glooweslieren. Ekj räd mau een poa Stund met am, aus ekj enwort, daut daut, waut hee säd, de Auntwuat opp daut Jebäd wia, waut ekj aus Kjint jesajcht haud. Ekj lieed de Woarheit von mienen Schepfa un von sien Kjennichrikj! Ekj funk de “sea wieetvolle Parl”, wua Jesus von räd (Mat. 13:45-46).

Pam, du sochst uk aul bie junk no dise Parl. Woo fungst du dee?

Ekj woss opp en de Staut Coffs Harbour en Nie-Sied-Wales. Miene Elren un Grootelren neemen dän brietisch-israelitischen Gloowen aun un ekj un mien jinjra Brooda un miene elre Sesta un väl Nichten un Vadasch lieeden von kjlien aun, daut Gott besonda dee Menschen jleicht, waut von de Brieten aufstaumden. Oba ekj wia mie nich secha, aus daut soo wia, un feeld mie Gott  nich no aun. Aus ekj 14 Joa wia, wankt ekj no veschiedne Kjoakjen en miene Staut, biejlikj no de anglikanische Kjoakj un no de Baptisten-Kjoakj un no de Sabata äare. Oba ekj bleef em jeisteljen hungrich.

Lota trock miene Famielje no Sydney, wua ekj Winston kjanen lieed, waut doa hanjereist wia. Soo aus hee aul säd, räd wie von Gloowessachen un soo kjeem daut, daut hee schlieslich met Jehova siene Zeijen studieed. Von doa aun wieren siene Breew emma voll Bibelvarzh! Ekj mott toostonen, daut ekj mie aum Aunfank Sorjen muak un mau rajcht doll wort. Oba met de Tiet wort mie daut kloa, daut et de Woarheit wia, waut hee mie schreef.

Aune 1962 trock ekj no Adelaide toom dichta bie Winston sennen. Hee haud daut berät, daut ekj bie een Ehepoa bliewen kunn, waut Jehova siene Zeijen wieren. Daut wieren Thomas un Janice Sloman, waut ea Missionoaren en Papua-Nie-Guinea wieren. Dee wieren sea leeftolich to mie. Ekj wia dan noch mau 18 Joa, un dee holpen mie sea em jeisteljen. Ekj funk uk aun de Bibel to studieren un boolt wia ekj mie secha, daut ekj de Woarheit jefungen haud. Nodäm daut ekj un Winston ons befrieden, fung wie fuaz met dän Voltietdeenst aun. Daut wia nich emma leicht, oba wie haben soo väl goodet beläft, daut wie de wieetvolle Parl, waut wie jefungen hauden, emma mea räakjenden.

Winston, waut beläwd jie en de ieeschte Joaren, aus jie Jehova deenden?

A Eene Launtkoat met de Städen, wua wie em Kjreisdeenst wieren

B Post-Stampels von eenje Inslen doa. Kiribati un Tuvalu wieren ieeschtemma bekaunt aus de Gilbert- un Ellice-Inslen

C De wundascheene Koralen-Insel Funafuti, waut to Tuvalu jehieet. Daut wia eent von de väl Inslen, wua wie wieren, ea doa Missionoaren hanjeschekjt worden

Nich lang nodäm aus ekj un Pam ons befriet hauden, leet Jehova toom ieeschte Mol fa ons “eene Däa [opgonen]” toom noch mea fa am doonen un lota jeef daut noch väl mea Jeläajenheiten doafäa (1. Kor. 16:9). Brooda Jack Porter, waut onse kjliene Vesaumlunk aus Kjreisoppsechta besocht, wees ons de ieeschte von dise Däaren. (Ekj un hee sent nu beid en daut Betelkommitee von Australasien.) Jack un siene Fru Roslyn rooden ons too Pionia to woaren. Wie kunnen dan fief Joa Pionia sennen, un aus ekj 29 Joa wia, schekjten se ons no de Inslen em Sied-Pazifik, wua ekj Kjreisoppsechta wort. Wie besochten Amerikaunisch-Samoa, Samoa, Kiribati, Nauru, Niue, Tokelau, Tonga, Tuvalu un Vanuatu. To jane Tiet kjemmad daut Betel von Fidschi sikj om de Inslen doa.

De Menschen opp eenje von dise Inslen, waut sea wiet auf wieren, wieren to dee Tiet mestrusch äwa Jehova siene Zeijen. Doawäajen must wie kluak un väasechtich sennen (Mat. 10:16). De Vesaumlungen wieren kjlien un eenjemol kunn wie doa nich bie de Breeda to Nacht bliewen. Dan fruag wie de Menschen en de Darpa, aus wie doa kunnen bliewen, un dee wieren emma sea leeftolich to ons.

Woo kjemt daut, Winston, daut du soonen grooten Intressaunt fa daut äwasaten hast?

En Samoa; bie eene School fa Eltestasch

To dee Tiet hauden de Breeda en Tonga mau een poa Zeichnisbläda un Hefta opp de polineesische Sproak Tongaunisch. Em Deenst brukten dee daut Buak Die Wahrheit, die zu ewigem Leben führt opp Enjlisch, wan dee met wäm studieeden. Aus wie mol eene School fa Eltestasch hauden, waut vea Wäakj dieed, wieren dree Eltestasch von doa reed, daut Wahrheits-Buak opp Tongaunisch to äwasaten, wan dee uk nich sea goot Enjlisch kunnen. Pam deed daut teipen un aus daut ieescht foadich wia, schekjt wie daut no daut Betel en de Stäts toom drekjen. Daut dieed acht Wäakj, daut Buak to äwasaten. Wan daut uk nich de baste Äwasatunk wia, lieeden doch väl Menschen, waut Tongaunisch räden, derch dit Buak de Woarheit kjanen. Ekj un Pam sent nich Äwasata, oba derch dise Erfoarunk kjrieej wie eenen grooten Intressaunt fa daut äwasaten.

Wia daut Läwen opp de Inslen aundasch aus daut Läwen en Australien, Pam?

Eent von de Städen, wua wie Nacht bleewen, aus wie em Kjreisdeenst wieren

Daut wia gaunz aundasch. Opp eenje Städen jeef et een deel Migjen ooda Rauten, daut wia sea heet un feicht, jeef Krankheiten un eenjemol wia uk daut Äten knaup. Oba zeowes wia daut emma sea aunjenäm, wan wie en ons Fale wieren un daut Mäa seenen kunnen. Fale es de samoaunischa Nomen fa de Hiesa, waut se en Polineesien  haben. Dee haben bloos Stroodäakja, oba nich Wenj. Bie Moneschien kunn wie de Paulmbeem seenen un de Mon spieejeld sikj em Mäa. Daut wieren emma sea scheene Tieden, wua wie nodenkjen un bäden kunnen, un daut holp ons, dolla aun daut goode to denkjen, waut wie beläwden, aus aun daut, waut schwoa wia.

Wie jleichten de Kjinja doa sea. Dee wieren sea sposich un uk nieschierich, wan dee ons witte Utlenda sagen. Aus wie mol opp de Insel Niue wieren, foot een kjliena Jung Winston sienen hoajen Oarm aun un säd: “Ekj jleich diene Fadren.” Secha haud dee noch kjeenmol ea soone hoaje Oarms jeseenen un wist nich krakjt, waut daut nu wia!

Eenjemol wia wie truarich, wan wie sagen, woo oam väl Menschen doa wieren. De Jäajent sach sea schmock, oba daut jeef nich jenuach Doktasch un mau weinich Wota toom drinkjen. Onse Breeda muaken sikj doa oba nich too väl Sorjen äwa, wiels dee wieren daut jewant. Dee freiden sikj, daut see met äare Famielje toop wieren un daut see Jehova deenen kunnen un eene Städ hauden toom am aunbäden. Dee äa Biespel holp ons, een eefachet Läwen to fieren un daut em Uag to hoolen, waut werkjlich tald.

Pam, du must eenjemol selfst jun Wota holen un kust nich soo Äten moaken, aus du daut jewant wieescht. Woo wortst du doamet foadich?

En Tonga; Pam wauscht onse Kjleeda

Ekj sie sea dankboa, daut miene Pape mie bie junk aul väl nutzboaret jelieet haud, biejlikj woo eena buten kunn Fia moaken toom koaken un woo eena met weinich kunn foadich woaren. Aus wie mol en Kiribati wieren, bleew wie bie een kjlienet Hus met een Stroodak. De Flua wia von Koralen un daut haud Stakjawenj. Daut ekj doa kunn Äten moaken, must ekj een Loch growen un met Kokonätschal Fia moaken. Toom Wota holen must ekj no dän Borm gonen un wachten, bat daut bat mie wia. De Frues doa brukten eenen Stock, waut biejlikj soo aus eene Angel wia, toom doa Wota rutholen. De Stock wia ojjefäa sas Schoo lank un doa wia een denna Baunt aun. Oppem Enj haud dee eene Blajchdoos enne Städ eenen Hoaken. Eene Fru no de aundre leet äare Angel rauf un krakjt to de rajchte Tiet tekjt see met de Haunt, daut de Blajchdoos oppe Sied foll un voll Wota wort. Ekj docht, daut wudd leicht sennen, bat ekj daut ieescht selfst utfunk. Ekj leet miene Angel mieremol rauf, oba bie mie schwomm de Doos bloos oppem Wota! De Frues lachten sea un dan fruach mie eene, aus see mie halpen sull. Dee wieren emma sea behelplich un leeftolich.

Jie beid jleichten daut met de Tiet sea, oppe Inslen to deenen. Waut fa besondret hab jie doa noch beläft?

Winston: Daut dieed ons een Stootskje, bat wie lieeden, woo dee daut doa hauden. Wan de Breeda ons biejlikj to eene Moltiet kroagden, jeewen dee ons aul daut Äten, waut see hauden. Aum Aunfank wist wie daut nich, daut wie fa an uk sullen waut loten, un eeten aules opp! Oba aus wie dan enworden, woo daut wia, dan leet wie uk waut fa an. Wie deeden nich emma fuaz aules rajcht, oba de Breeda neemen ons daut nich fa schlemm auf. Un dee freiden sikj, wan wie doa ojjefäa aule sas Moonat aus Kjreisoppsechta hankjeemen. Wie wieren de eensje Zeijen, waut dee to seenen kjrieejen, buta de Breeda von äare Vesaumlunk.

Opp de Insel Niue; met eene Grupp em Prädichtdeenst

Daut wie dee doa besochten, wia uk een goodet Zeichnis. Väl Menschen jleewden, daut de Breeda doa sikj äaren ieejnen Gloowen oppjemoakt hauden. Oba aus dee sagen, daut wie Utlenda doa hankjeemen toom dee besieekjen un daut wie krakjt dänselwjen Gloowen hauden, wundaden dee sikj sea.

Pam: Aus wie mol en Kiribati wieren, beläwd wie waut, waut mie groote Freid jeef. Doa en de Vesaumlunk wieren weinich Breeda un Sestren, un de eensja Eltesta doa wia sea om ons todoonen. Dee heet Itinikai Matera un eenen Dach kjeem hee no ons met eenen Korf, wua bloos een Ei bennen wia. Hee säd: “Daut es fa junt.” Veleicht hieet sikj daut nich no väl, oba to jane Tiet wia daut doa waut gaunz besondret, wan eena  mol een Ei kjrieech. Daut de Brooda ons daut brocht, jinkj ons sea to Hoaten!

Pam, eenje Joaren lota hautst du eene Stelp. Waut holp die doamet foadich to woaren?

Ekj wort aune 1973 schwanga, aus ekj un Winston opp de Inslen em Sied-Pazifik deenden. Wie worden ons eenich trigj no Australien to trakjen, wua ekj vea Moonat lota de Stelp haud. Wie wieren beid sea truarich doaräwa. Met de Tiet jinkj mie daut bäta, oba ekj wia doawäajen noch emma truarich, bat wie dän Wachtturm vom 15. Aprell 2009 kjrieejen. De Artikjel “Fragen von Lesern” haundeld sikj doavon, aus soone Bäbes vom Doot oppstonen woaren, waut ver de Jeburt stoawen. Doa säd daut, daut Jehova sikj om de Sach kjemren woat un daut hee emma daut rajchte deit. Hee haft ut Leew sienen Sän aunjestalt, “dän beesen Fient siene Woakjen kaputt to moaken”, wiels hee aul daut schlemme wada gootmoaken well, waut wie en dise schlajchte Welt derchgonen motten (1. Joh. 3:8). Dis Artikjel holp ons uk, noch dankboara fa de “wieetvolle Parl” to sennen, waut wie aus Jehova sien Volkj haben. Wua wudd wie onen de Hopninj opp daut Kjennichrikj sennen?

Nodäm aus ekj de Stelp haud, fung wie wada met dän Voltietdeenst aun. Wie deenden waut Moonaten em Betel en Australien un lota fung wie wada met dän Kjreisdeenst aun. Aus wie ieescht vea Joa en Nie-Sied-Wales un en Sydney jewast wieren, word wie aune 1981 enjelot em australischen Betel mettohalpen, soo aus daut don heet, un doa sent wie noch emma.

Winston, halpt die daut, waut jie doa opp de Inslen em Sied-Pazifik beläwden, bie diene Oabeit em Betelkommitee von Australasien?

Jo, sea. Daut ieeschte sull daut Betel von Australien sikj uk om Amerikaunisch-Samoa un Samoa kjemren. Dan jeef daut von de Betels en Nie-Seelaunt un Australien een Betel, waut daut Betel von Australasien jenant wort. Dit Betel kjemmat sikj nu om daut Woakj en Australien, en Amerikaunisch-Samoa, en Samoa, opp de Cook-Inslen, en Nie-Seelaunt, opp Niue, en Timor-Leste, en Tokelau un en Tonga. Opp väl von dee Städen kunn ekj aul aus Betelrädna sennen. Daut ekj ea aul met de true Breeda un Sestren doa opp de Inslen toopschaufen kunn, halpt mie nu, wan ekj vom Betel ut met dee toopschauf.

Winston un Pam Payne bie daut Betel von Australasien

Toom Schluss well ekj noch sajen, daut ekj un Pam daut goot weeten, daut uk junge Menschen no Gott sieekjen, soo aus wie daut bie junk deeden. Dee wellen uk de “sea wieetvolle Parl” finjen, mau rajcht wan de aundre en äare Famielje doa nuscht om romjäwen (2. Kjen. 5:2-3; 2. Chr. 34:1-3). Wie sent ons secha, daut Jehova een leeftolja Gott es un aulem eewjet Läwen jäwen well, endoont aus dee junk ooda oolt sent.

Aus ekj un Pam äwa 50 Joa trigj aunfungen no Gott to sieekjen, kunn wie ons daut nich väastalen, waut wie aules beläwen wudden. De Woarheit von daut Kjennichrikj es werkjlich eene sea wieetvolle Parl! Wie sent ons gaunz eenich, dee met aul onse Krauft fausttohoolen!