Trigj nom Enhault

No de Enhaultslist gonen

Woo wie werkjlich frie sennen kjennen

Woo wie werkjlich frie sennen kjennen

“Wan de Sän junt frie moakt, sent jie werkjlich frie” (JOH. 8:36)

LEEDA: 54, 51

1-2. (a) Waut wiest, daut de Menschen sikj mea Frieheit wenschen? (b) Woo kjemt daut foaken ut, wan de Menschen fa mea Frieheit strieden?

VONDOAG DÄN DACH woat väl von Frieheit jerät un uk doavon, daut aule Menschen sellen äwareen behaundelt woaren. De Menschen opp veschiedne Städen oppe Welt wenschen sikj, daut see nich mea unjadrekjt woaren, nich mea oam sent un daut doa kjeen Unjascheet mea jemoakt woat manke Menschen. Aundre velangen de Frieheit, daut see daut sajen ooda doonen kjennen, waut an jankat, un daut see soo läwen kjennen, aus see daut wellen. Aulawäajen wellen de Menschen frie sennen.

2 Opp väl Städen strieden de Menschen fa mea Frieheit ooda stalen sikj soogoa jäajen de Rejierunk ooda wellen met dee een Enj moaken, daut see mea Frieheit kjrieen. Oba kjemt daut soo ut, aus dee sikj daut wenschen? Nä, wiels foaken motten de Menschen noch mea lieden ooda velieren mau rajcht äa Läwen. Daut es werkjlich soo, aus Gott derch dän Kjennich Salomo oppschriewen leet: “De Mensch [haft] äwa dän Mensch toom Schoden jeharscht” (Liera 8:9, NW).

3. Woo kjenn wie werkjlich schaftich un tofräd sennen?

 3 De Jinja Jakobus wees, woo eena opp iernst kunn schaftich un tofräd sennen. Hee schreef: “Wäa en daut volkomne Jesaz Gottes nenn kjikjt, waut ons frie moakt, wäa doabie blift . . . dee woat bie sienem schaufen tofräd sennen” (Jak. 1:25). Jehova jeef dit volkomne Jesaz, un hee weet daut baste, waut ons fält toom werkjlich schaftich un tofräd sennen. Hee jeef de ieeschte Menschen woare Frieheit un aules, waut dee sest noch fäld, daut dee daut kunn scheen gonen.

AUS DE MENSCHEN NOCH WERKJLICH FRIE WIEREN

4. Von waut wieren Adam un Eva frie? (See daut Bilt aum Aunfank.)

4 En de ieeschte beid Kapitels en 1. Mose kjenn wie seenen, daut Adam un Eva soo frie wieren, aus väle sikj daut vondoag dän Dach wenschen. Dee hauden aules, waut an fäld; dee durwen fa nuscht Angst haben un daut jeef kjeene Ojjerajchtichkjeit. Dee durwen sikj nich sorjen, waut see äten ooda schaufen wudden ooda daut see wudden krank woaren ooda stoawen (1. Mo. 1:27-29; 2:8-9, 15). Oba wieren Adam un Eva en aule Stekjen frie? Well wie mol seenen.

5. Waut denkjen väle, waut daut brukt toom frie sennen, oba waut es doatoo werkjlich needich?

5 Väle denkjen, daut eena mau dan werkjlich frie es, wan eena aules doonen kaun, waut eenem jankat, krakjt endoont woo daut utkjemt. Daut Buak The World Book Encyclopedia sajcht, waut Frieheit bediet. Daut es, “daut eena sikj selfst fa waut entscheiden kaun un daut dan uk doonen kaun”. Oba daut sajcht doa uk, daut de Menschen dan frie sent, wan de Rejierunk an nich soone Jrensen sat, waut onneedich, too strenj ooda orrajcht sent. Daut wiest, daut jewesse Jrensen ooda Jesazen needich sent, daut wie aula kjennen frie sennen. Oba wäa haft daut Rajcht to sajen, woone Jesazen needich, rajcht un nich too strenj sent?

6. (a) Wuarom es Jehova de eensja, waut en aule Stekjen Frieheit haft? (b) Woo wiet jeit de Menschen äare Frieheit, un wuarom?

6 Wie sellen em Denkj hoolen, daut Jehova Gott de eensja es, waut en aule Stekjen Frieheit haft. Wuarom? Wäajen hee aules jemoakt haft un wäajen hee de aulmajchtja Harscha äwa Himmel un Ieed es (1. Tim. 1:17; Opb. 4:11). De Kjennich David brukt wundascheene Wieed, om dietlich to moaken, woo huach un woo besonda Jehova es (läs 1. Chronik 29:11-12). Aule aundre em Himmel un oppe Ieed sent mau en jewesse Stekjen frie. Dee motten daut vestonen, daut bloos Jehova Gott daut Rajcht haft to sajen, woone Jesazen needich, rajcht un nich too strenj sent. Un hee jeef de Menschen aul von Aunfank aun Jesazen.

7. Waut jeit ons scheen, wan wie daut uk doonen motten?

7 Adam un Eva hauden väl Frieheit, oba doa wieren uk Jesazen, wua dee sikj no rechten musten. Eenje Jesazen wieren dee enjejäft; biejlikj wisten dee, daut see bloos wudden läwen bliewen, wan see odmen, äten un schlopen wudden. Meend daut, daut dee dan nich frie wieren? Nä, wäajen Jehova haud daut soo enjerecht, daut de Menschen daut scheen jinkj un tofräd muak, wan see daut deeden (Psa. 104:14-15; Liera 3:12-13). Ons jeit daut aula scheen, wan wie fresche Loft kjrieen, ons leefstet Äten äten un scheen schlopen kjennen. Un wie doonen daut wellich un denkjen nich mol, daut soont ons de Frieheit wajchnemt. Secha wia daut bie Adam un Eva krakjt soo.

8. Waut fa een Jeboot jeef Gott de ieeschte Menschen, un wuarom?

 8 Jehova jeef Adam un Eva daut Jeboot, Kjinja to haben un sikj äwa de gaunze Ieed to vemieren un no de Ieed opptopaussen (1. Mo. 1:28). Neem an dit Jeboot äare Frieheit wajch? Secha nich! Daut jeef an de Jeläajenheit, bie daut mettohalpen, waut Gott sikj väajenomen haud. Hee wull haben, daut de gaunze Ieed to een Paradies wort, wua see un äare volkomne Kjinja fa emma läwen kunnen (Jes. 45:18). Vondoag dän Dach es daut nich jäajen Jehova sienen Wellen, wan wäa sikj nich befriet ooda nich Kjinja haft. Oba väle befrieen sikj doawäajen un haben Kjinja, wan daut uk waut opp sikj haft (1. Kor. 7:36-37, NW; 7:38). Wuarom? Wäajen de Menschen daut jeweenlich scheen jeit un tofräd moakt, wan see eene Famielje haben (Psa. 127:3). Wan Adam un Eva jehorcht hauden, dan hauden dee kunt fa emma eene scheene Ehe un Famielje haben.

WOO DE WOARE FRIEHEIT VELOAREN JINKJ

9. Wuarom wia Gott sien Jeboot en 1. Mose 2:17 nich onneedich, too strenj ooda ojjerajcht?

9 Jehova jeef Adam un Eva noch een aundret Jeboot un hee säd dietlich, woo daut utkomen wudd, wan see nich jehorchten: “Von däm Boom, dee daut Vestentnis jäwen kaun, waut goot un schlajcht es, von däm saust du nich äten, wiels daut woat onbedinjt dienen Doot brinjen” (1. Mo. 2:17). Wia dit Jeboot onneedich, too strenj ooda ojjerajcht? Neem Adam un Eva daut de Frieheit wajch? Nich mol veleicht. Een deel Bibeljelieede sajen, daut an daut dietlich es, wuarom Gott dit Jeboot jeef, un daut daut sea weis wia. Een Jelieeda schrift biejlikj: “De Jebooten en [1. Mose 2:16-17] lieren ons, daut bloos Gott weet, waut fa de Menschen goot . . . es un waut fa dee schlajcht . . . es. Daut dee daut ‘goot’ gonen kaun, motten dee opp Gott vetruen un dän jehorchen. Wan dee nich jehorchen, dan motten see selfst entscheiden, waut goot . . . un waut schlajcht es.” Dise Veauntwuatunk es fa de Menschen too schwoa.

Adam un Eva äare Entscheidunk kjeem sea schlajcht ut (See Varsch 9-12)

10. Wuarom es de friea Wellen nich dautselwje aus daut Rajcht to entscheiden, waut goot ooda schlajcht es?

10 Eenje denkjen, daut Jehova Adam nich de Frieheit leet, daut to doonen, waut hee wull. Oba dee vestonen nich, daut de friea Wellen nich dautselwje es, aus daut Rajcht haben to entscheiden, waut goot ooda schlajcht es. Wäa eenen frieen Wellen haft, dee kaun selfst entscheiden, waut dee doonen well. Adam un Eva kunnen sikj entscheiden, aus see wullen Gott jehorchen ooda nich. Oba Jehova es de eensja, waut en aule Stekjen daut Rajcht haft to entscheiden, waut goot ooda schlajcht es. De “Boom [en dän Goaden Eden], dee Vestentnis jäwen kunn waut goot un schlajcht es”, wia een Jlikjnis doafäa (1. Mo. 2:9). Wan wie ons to waut eenich woaren, dan weet wie nich emma, woo daut utkomen woat ooda aus daut werkjlich toom gooden sennen woat. Doawäajen es daut foaken soo, daut doa wäa utem gooden Senn waut deit, un lota kjemt daut doch schlajcht ut un brinjt väl Lieden ooda Trubbels (Spr. 14:12, NW). Wie Menschen kjennen nich aules lenkjen. Aus Jehova Adam un Eva daut Jeboot jeef, nich von dän Boom to äten, wull hee an lieren, daut see am musten jehorchen toom werkjlich frie sennen. Oba waut deeden Adam un Eva?

11-12. Wuarom kjeem Adam un Eva äare Entscheidunk soo schlajcht ut? Met waut jeit daut to vejlikjen?

11 Soo aus wie weeten, worden Adam un Eva sikj eenich, Jehova nich to jehorchen. Eva horcht no dän Fient, aus dee säd: “June  Uagen [woaren] op sennen, un jie woaren soo aus Gott sennen, un weeten, waut goot un waut schlajcht es” (1. Mo. 3:5). Wort Adam un Eva äare Frieheit no daut werkjlich jrata, soo aus de Fient daut vesproaken haud? Nä. Dee worden boolt en, woo schlajcht daut utkjeem, daut see nich no Jehova horchten (1. Mo. 3:16-19). Wuarom kjeem daut soo schlajcht ut? Wäajen Jehova de Menschen nich de Frieheit jeef, selfst to entscheiden, waut goot un waut schlajcht wia (läs Spricha 20:24 un Footnoot, NW *; Jeremia 10:23, NW *).

12 Daut es biejlikj soo aus met eenen, waut eenen Äarplän flicht. Daut dee jlekjlich doahan kjemt, wua dee hanwell, mott dee dän rajchten Wajch flieejen. Toom dän finjen jeft daut uzhent Jereetschoft en sienen Äarplän un doa sent uk Menschen, waut am von oppe Ieed Aunwiesungen jäwen. Oba wan hee sikj nich doano recht un eefach soo flicht, aus am daut jankat, dan kaun daut sea schlajcht utkomen. Krakjt soo wia daut bie Adam un Eva. Dee wullen daut doonen, waut an jankad, un horchten nich no Gott. Daut kjeem sea schlajcht ut, wiels doaderch kjeem de Sind un de Doot äwa an un äare Nokomen (Reem. 5:12). Aus Adam un Eva selfst entscheiden deeden, waut goot un waut schlajcht wia, wort äare Frieheit nich jrata. Enne Städ daut veluaren see de woare Frieheit, waut Jehova an jejäft haud.

WOO EENA WOARE FRIEHEIT KJRIEEN KAUN

13-14. Woo kjenn wie werkjlich frie woaren?

13 Eenje denkjen, daut wudd daut baste sennen, wan eena en aule Stekjen Frieheit haud. Oba es daut werkjlich soo? Frieheit es waut goodet, oba woo wudd de Welt sennen, wan jieda eena krakjt daut doonen kunn, waut am jankad? Daut Buak The World Book Encyclopedia wiest, daut et aulawäajen, wua Menschen toopläwen, Jesazen jäwen mott. Un dee motten soo jemoakt, daut kjeenem de Frieheit jenomen woat un daut  uk kjeena too väl Frieheit kjricht. Daut es nich emma leicht un doawäajen jeft daut vondoag dän Dach soo väl Jesazen un uk Ofkoten un Rechtasch, waut dee proowen uttolajen un doano to seenen, daut dee jehoolen woaren.

14 Jesus läd daut ut, woo wie woare Frieheit haben kunnen. Hee säd: “Wan jie bie dee Wieed bliewen, waut ekj junt jelieet hab, sent jie woarhauftich miene Jinja. Dan woa jie weeten waut Woarheit es, un de Woarheit woat junt frie moaken” (Joh. 8:31-32). Jesus wiest, daut wie tweeatlei doonen motten. Ieeschtens mott wie de Woarheit aunnämen, waut hee lieed, un tweedens mott wie siene Jinja woaren. Wan wie daut doonen, dan woa wie werkjlich frie sennen. Oba von waut? Jesus säd: “Wäa doa sindicht, es aun de Sind veskloft. . . . Wan de Sän junt frie moakt, sent jie werkjlich frie” (Joh. 8:34, 36).

15. Wuarom kaun de Frieheit, waut Jesus vesprakjt, ons “werkjlich frie” moaken?

15 De Frieheit, waut Jesus siene Nofolja vesprakjt, es väl bäta aus de Frieheit, waut de mieeschte Menschen sikj vondoag dän Dach wenschen. Jesus säd je: “Wan de Sän junt frie moakt, sent jie werkjlich frie”. Doa räd hee doavon, daut eena nich mea wudd “aun de Sind veskloft” sennen. Daut es de schlemste Sort Sklowarie, waut et jeft. De Sind brinjt ons bat doa, schlajchtet to doonen, un helt ons eenjemol veleicht uk doavon auf, daut rajchte to doonen ooda ons bastet to doonen. Aul daut wiest, daut wie aun de Sind veskloft sent, un daut brinjt ons väl Lieden, Weedoag, Trua un to goodalatst dän Doot (Reem. 6:23). De Apostel Paulus wist goot, woo schlemm daut wia (läs Reema 7:21-25). Bloos wan wie ieescht gaunz von de Sind loos sent, woa wie werkjlich frie sennen, soo aus Adam un Eva aum Aunfank wieren.

16. Woo kjenn wie werkjlich frie woaren?

16 Wan wie wellen, daut Jesus ons frie moakt, dan mott wie ons Poat doatoo doonen. Jesus säd je, wie sullen “bie dee Wieed bliewen”, waut hee ons jelieet haud. Daut meent, wie motten ons Gott hanjäwen, von ons selfst vejäten un soo läwen, aus daut von Jesus siene Nofolja velangt es (Mat. 16:24). Soo aus Jesus daut vespruak, woa wie noch mol werkjlich frie woaren, wan wie aul daut goode beläwen, waut sien Leesjelt mäajlich moaken woat.

17. (a) Woo kjenn wie werkjlich schaftich un tofräd sennen? (b) Waut woa wie en dän näakjsten Artikjel seenen?

17 Wan wie Jesus nofoljen un daut nokomen, waut dee jelieet haft, dan woa wie werkjlich eenen Senn em Läwen haben un tofräd sennen. Dan woa wie eenen Dach gaunz frie sennen von de Sind un dän Doot äare Sklowarie (läs Reema 8:1-2, 20-21). En dän näakjsten Artikjel woa wie seenen, woo wie de Frieheit, waut wie nu aul haben, rajcht brucken kjennen. Soo kjenn wie fa emma Jehova ieren, wäajen von am kjemt de woare Frieheit.

^ Varsch 11 Spricha 20:24 un Footnoot (NW): “Jehova leit dän Mensch siene Schräd; woo kaun een Mensch vestonen, woonen Wajch hee gonen saul?”

^ Varsch 11 Jeremia 10:23 (NW): “Ekj weet goot, oo Jehova, daut dän Mensch sien Wajch nich am jehieet. Dän Maun, dee doa wankt, jehieet daut nich mol, sienen Schrett to rechten.”