Trigj nom Enhault

No de Enhaultslist gonen

Jie junge Menschen, schauf jie opp jeisteljet?

Jie junge Menschen, schauf jie opp jeisteljet?

“Äwajeff daut däm HARN, waut du aun Haunt hast, un die woat daut met diene Plons jlekjen” (SPR. 16:3)

LEEDA: 135, 127

1-3. (a) En waut vonne Loag sent aule junge Menschen, un met waut kaun eena daut vejlikjen? (See daut Bilt aum Aunfank.) (b) Waut kaun christelje Jugentliche en soone Loag halpen?

SAJ wie mol, du west wiet auf no eene Staut foaren, wiels du doa waut wichtjet to doonen hast. Toom bat doa komen motst du met eene Boss metfoaren. Aus du dan bat daut Boss-Stäschen kjemst, best du derchenaunda, wäajen doa soo väl Menschen un Bossen sent. Oba daut goode Dinkj es, daut du krakjt weetst, wua du hanwest. Nu motst du bloos noch de Boss finjen, waut doa hanfoat. Du wurscht nich met irjenteene Boss metfoaren, wiels dan wurscht du nich no de rajchte Städ komen.

2 Daut Läwen es biejlikj soo aus eene Reis un jie Jugentliche sent soo aus de Menschen bie daut Boss-Stäschen. Eenjemol jeft daut soo väl Mäajlichkjeiten, waut eena doonen kaun, daut eena gaunz derchenaunda es. Oba wan eena krakjt weet, wua eena hanwell, dan es daut väl leichta. Waut vonne Rechtunk wurscht du sellen nämen?

3 Daut woa wie en disen Artikjel seenen. Doa woat junge Menschen toojerot, daut see doano sträwen sellen Jehova to  jefaulen. Daut meent, daut eena bie aules en sien Läwen Jehova met entalt, biejlikj wan eena plont, fa waut eena sikj utlieren well, waut vonne Oabeit eena doonen well ooda aus eena sikj befrieen saul un Kjinja haben. Un doa es uk met en, daut eena no jeisteljet sträft. Wan junge Menschen doarom todoonen sent Jehova to deenen, dan kjennen dee sikj secha sennen, daut hee an halpen woat een tofrädnet Läwen to haben (läs Spricha 16:3).

WUAROM SAUL EENA NO JEISTELJET STRÄWEN?

4. Waut woa wie en disen Artikjel seenen?

4 Wuarom loont sikj daut, von junk aun opp jeisteljet to schaufen? Well wie mol dreeatlei unjasieekjen. Bie daut ieeschte un tweede woa wie seenen, daut eena sikj noch väl dolla met Jehova vebungen feelt, wan eena no jeisteljet sträft. Un bie daut dredde woa wie seenen, daut eenem daut togood kjemt, wan eena von junk aun opp jeisteljet schauft.

5. Waut es daut ieeschte, wuarom wie sellen no jeisteljet sträwen?

5 Daut ieeschte, wuarom wie sellen no jeisteljet sträwen, es, wiels wie Jehova dankboa sent fa siene Leew un fa daut, waut hee fa ons jedonen haft. Een Psalmenschriewa säd: “Daut es goot dän HARN to danken . . . HAR, du hast mie derch diene Woakjen froo jemoakt, un ekj sinj met Freid von dien Hauntwoakj” (Psa. 92:2, 5). Denkj mol doaräwa no, waut Jehova die aules jejäft haft: daut Läwen, dienen Gloowen, de Schreft, de Vesaumlunk un de Hopninj, eewich em Paradies to läwen. Wan du no jeisteljet sträfst, dan wiest du Jehova diene Dankboakjeit fa aul daut, un soo kjemst du dän noda.

6. (a) Waut hab wie doabie, wan wie no jeisteljet sträwen? (b) Waut kaun eena sikj aul von junk aun väanämen?

6 Daut tweede, wuarom wie opp jeisteljet schaufen, es, daut wie ons doaderch eenen gooden Nomen bie Jehova moaken un am noch noda komen. De Apostel Paulus säd: “Gott es nich ojjerajcht, daut hee june Woakjen un june Leew vejäten deit, dee jie en sienen Nomen beweesen” (Heb. 6:10). Eena es kjeenmol too junk toom no jeisteljet sträwen. Christine wia biejlikj tieen Joa, aus see sikj eenich wort, pinkjlich de Läwesjeschichten von true Breeda un Sestren to läsen. Toby wia twalf, aus hee sikj väaneem, de Bibel gaunz derchtoläsen, ea hee sikj wudd deepen loten. Maxim wia alf un siene Sesta Noemi wia tieen, aus dee sikj deepen leeten. Beid neemen sikj väa, noch mol em Betel to schaufen. Daut see doa nich von vegauten, bakten see tus aune Waunt eenen Zadel naun toom sikj fa dän Beteldeenst aunjäwen. Woo steit et met die? Waut wurscht du die kjennen väanämen toom doa nu aul opp schaufen? (läs Filippa 1:10-11).

7-8. (a) Wuarom es daut leichta, sikj fa waut to entscheiden, wan eena weet, no waut eena sträwen well? (b) Wuarom leet eene Sesta sikj nich bie de Uniwersität utlieren?

7 Waut es daut dredde, wuarom wie sellen von junk aun no jeisteljet sträwen? Wan eena junk es, dan mott eena välet entscheiden, biejlikj fa waut eena sikj utlieren lat ooda waut vonne Oabeit eena aunnemt. Wan du soont entscheiden motst, dan es daut soo, aus wan du opp eene Reis best un bat eenen Kjriezwajch kjemst. Wan du krakjt weetst, wua du hanwest, dan es daut leicht, dän rajchten Wajch to nämen. Krakjt soo es daut en dien Läwen. Wan du weetst, no waut du sträwen west, dan es daut leichta, die fa daut rajchte to entscheiden. Spricha 21:5 sajcht: “Väasechtich plonen, brinjt eenem Vedeenst”. Je ea du plonst, no waut fa goodet du sträwen west, je ea woat die daut togood komen. Daut es, waut Damaris  beläwd, aus see en äare junge Joaren must waut wichtjet entscheiden.

8 Damaris wia eent von de wieekjlierichste en äare Klauss. Aus see met de School derch wia, haud see sikj kunt emsonst bie de Uniwersität utlieren loten toom biejlikj Ofkot ooda Rechta woaren, oba enne Städ daut schauft see enne Bank. Wuarom? See sajcht: “Ekj neem mie aul bie junk väa, noch mol Pionia to woaren. Aus Pionia kaun eena nich fa voll schaufen. Wan ekj bie de Uniwersität studieet haud, haud ekj kunt väl Jelt vedeenen, oba daut wudd sea schwoa jewast sennen, bloos een poa Doag de Wäakj to schaufen.” Damaris es nu aul 20 Joa Pionia. Beschot see äare Entscheidunk, waut see en äare junge Joaren muak? Nä. See sajcht: “Enne Bank hab ekj väl met Ofkoten to doonen. Dee doonen deeselwje Oabeit, waut ekj wudd jedonen haben, wan ekj mie huach utjelieet haud. Oba väle von dee sent sea ommootich met äare Oabeit. Wäajen ekj Pionia wort, haud ekj aul väl scheene Joaren em Deenst un wia nich soo mootloos bie de Oabeit aus dee.”

9. Wuarom sent onse junge Menschen sea to lowen?

9 En de Vesaumlungen oppe gaunze Welt sent dusende junge Menschen, waut sea to lowen sent, wäajen fa dee Jehova un daut jeistelje daut ieeschte em Läwen es. Dee haben väl Freid en äa Läwen un dee lieren uk, emma Jehova sienen Rot notokomen, biejlikj, wan daut om de School, de Oabeit un daut Famieljenläwen jeit. Salomo schreef: “Velot die opp däm HARN met dien gaunzet Hoat . . . Denkj aun am en aules waut du deist, un hee woat die dän rajchten Wajch wiesen” (Spr. 3:5-6). Jie junge Menschen sent sea väl wieet bie Jehova. Dee leeft junt sea un dee woat junt beschitzen, leiden un säajnen.

MOAK DIE GOOT REED TOOM MET AUNDRE VON JEHOVA RÄDEN

10. (a) Wuarom saul de Deenst eent von daut väaschte en ons Läwen sennen? (b) Waut kaun ons halpen, noch bäta Zeichnis to jäwen?

10 Wan daut fa die daut ieeschte es, Jehova to jefaulen, dan woascht du wellen met aundre von dän vetalen. Jesus Christus sajcht: “Daut Evangelium [mott] . . . jeprädicht woaren” (Mar. 13:10). Daut Prädichtwoakj mott onbedinjt jedonen, doawäajen saul daut en ons Läwen eent von daut väaschte sennen. Wurscht du die kjennen väanämen, foakna to prädjen? Kust du Pionia woaren? Oba waut es, wan du nich väl Freid hast biem prädjen? Un woo kaust du noch bäta Zeichnis jäwen? Doa es tweeatlei, waut die halpen kaun: die goot reedmoaken un nich opphieren, met aundre äwa daut to räden, waut du jelieet hast. Veleicht woascht du die wundren, woo scheen die daut prädjen dan gonen woat!

Woo moakst du die reed toom aundre Zeichnis jäwen? (See Varsch 11-12)

11-12. (a) Woo kjennen junge Menschen sikj doaropp reedmoaken Zeichnis to jäwen? (b) Woo neem een Jung de Jeläajenheit woa, en de School von Jehova to räden?

11 Du wurscht die kjennen fa daut reedmoaken, waut diene Schoolpoatna die foaken froagen, toom Biespel: “Wuarom jleefst du aun Gott?” Opp onse Websied jw.org sent Artikjels, waut die halpen kjennen, soone Froagen to beauntwuaten. Sieekj en BIBEL & PRAXIS > TEENAGER. Doa woascht du daut Blaut finjen Darum glaube ich an Gott . . .Daut woat die halpen, diene ieejne Auntwuat reedtomoaken. Doa sent uk dree Bibelvarzh bennen, waut die halpen woaren, daut uttolajen: Hebräa 3:4, Reema 1:20 un Psalm 139:14. Daut jeft doa uk noch aundre Bläda, waut du brucken kaust toom die fa veschiedne Froagen reedmoaken (läs 1. Petrus 3:15).

12 Wan daut sest paussent es, dan saj diene Schoolpoatna, daut see uk selfst kjennen  opp jw.org waut sieekjen. Soo deed Luca daut, aus dee enne School äwa veschiedne Gloowes räden. Hee sach, daut en daut Schoolbuak waut äwa Jehova siene Zeijen stunt, waut nich soo wia. Wan am daut uk nich leicht wia, fruach hee de Lierarin, aus hee kunn sajen, woo daut werkjlich met de Sach stunt. Dee leet daut, un dan kunn hee uk noch de gaunze Klauss onse Websied wiesen. De Lierarin säd uk, aule Schoolkjinja sullen tus daut Video kjikjen Dee jewennen, waut domm to die sent. Luca wia sea schaftich, daut hee soon goodet Zeichnis jäwen kunn.

13. Wuarom sell wie aunhoolent bliewen, wan doa Trubbels oppkomen?

13 Wan du no jeisteljet sträfst un doa komen Trubbels opp, dan woa nich mootloos (2. Tim. 4:2). Krakjt soo wia daut bie Katharina. See wia 17, aus see sikj väaneem, aulem opp äare Oabeit to prädjen. Een Oabeitspoatna säd ar mieremol sea domm, oba see leet sikj nich mootloos moaken. Äa goodet Benämen foll Hans, eenen aundren Oabeitspoatna, opp. Hee funk aun onse Bieekja to läsen, studieed de Bibel un leet sikj deepen. Oba wiels Katharina wajchjetrocken wia, wist see von aul daut nuscht. Stal die väa, woo schaftich see wia, aus see 13 Joa lota met äare Famielje toop enne Vesaumlunk wia, un Hans doa hankjeem toom de Räd hoolen! Woo goot, daut Katharina don aunhoolent bleef un äare Oabeitspoatna Zeichnis jeef.

LOT DIE NICH AUFLENKJEN

14-15. (a) Aun waut sellen Jugentliche denkjen, wan aundre dee bat doa kjrieen wellen, dautselwje to doonen waut see? (b) Waut kjennen junge Menschen doonen, daut aundre an nich metrieten?

14 Bat nu hab wie en disen Artikjel jeseenen, woo goot daut es, doaropp to schaufen Jehova to jefaulen un no jeisteljet to sträwen. Oba een deel junge Menschen en dien Ella wellen bloos Scheengonen haben un wellen die veleicht bat doa kjrieen, dautselwje to doonen waut see. Irjentwanea woascht du motten wiesen, woo iernst die daut doamet es, waut du die väajenomen hast. Lot die doa nich von aundre mankspälen. Denkj noch eemol aun daut Biespel von de Boss. Wan du wurscht wellen wua hanfoaren, dan wurscht je du uk nich eefach en irjenteene Boss nenkrupen, bloos wiels de  Menschen doabennen een Scheengonen haben – ooda wurscht?

15 Woo kaust du doafäa oppkomen, daut aundre die nich metrieten? Go soont utem Stich, wua du kust vesocht woaren (Spr. 22:3). Un denkj doaraun, woo schlajcht daut kunn utkomen, wan du die metrieten leetst, waut orrajchtet to doonen (Gal. 6:7). Vejät nich, daut die eenjemol Help von aundre fält. Sie deemootich un horch doano, waut diene Elren un erfoarne Gloowesbreeda un Sestren to die sajen (läs 1. Petrus 5:5-6).

16. Woo wiest daut, waut Christoph beläwd, daut eena saul deemootich sennen?

16 Deemootich to sennen holp biejlikj Christoph, gooden Rot auntonämen. Meist fuaz no siene Doop funk hee aun, emma no eene Städ to gonen toom ekserseisen. De Jugentliche doa wullen haben, hee sull uk bie äare Sport-Grupp metmoaken. Christoph räd dan met eenen Eltesten doaräwa un dee säd, hee sull doaropp achten, waut doa fa Jefoaren wieren, biejlikj aus daut doa bloos emma doarom jinkj, sikj met aundre to mäten. Oba Christoph muak doawäajen bie de Grupp met. Met de Tiet wort hee dan en, daut et doa sea hunjsch toojinkj un jefäadlich wia. Hee räd dan met miere Eltestasch un dee jeewen am aula Rot ut de Schreft. Christoph sajcht: “Jehova schekjt mie goode Rotjäwa, un ekj horcht no dee, wan daut uk siene Tiet brukt.” Best du deemootich jenuach toom gooden Rot aunnämen?

17-18. (a) Waut wenscht Jehova sikj fa de junge Menschen vondoag dän Dach? (b) Waut beschoden eenje bie groot, un woo kaun eena daut väabieejen? Jeff een Biespel.

17 De Schreft sajcht: “Mensch, frei die to diene Jugentjoaren, lot die dee von Hoaten scheen gonen” (Liera 11:9). Jehova well, daut junge Menschen daut scheen jeit. En disen Artikjel hab wie eenatlei jeseenen, waut dee doabie halpen kaun. Daut es, no jeisteljet to sträwen un daut Läwen soo to plonen, aus Jehova daut jefelt. Je ea du doamet aunfangst, je ea woascht du beläwen, woo Jehova die beschizt, leit un säajent. En Gott sien Wuat es väl feina Rot bennen, waut du nokomen kaust. Liera 12:1 sajcht biejlikj: “Hool em Denkj, wäa die jemoakt haft, uk wan du junk best”.

18 De Jugentjoaren sent bosich vebie. Un väle motten daut lota beschoden, daut see bie junk no waut orrajchtet jesträft haben ooda verheipts no nuscht. Oba wan du wieda opp jeisteljet schaufst, dan woascht du die bie groot sea freien äwa diene Entscheidungen. Soo wia daut biejlikj bie Mirjana, waut en äare Jugent sea goot wia en Sport moaken. See wort mau rajcht enjelot, bie eent von de jratste Sport-Späls von oppe gaunze Welt mettomoaken, oba enne Städ daut funk see met dän Voltietdeenst aun. Nu, 30 Joa lota, es see noch emma em Voltietdeenst un äa Maun uk. See sajcht, daut deejanje, waut doa wellen bekaunt un jeieet sennen ooda waut no Macht ooda Jelt hinjaraun sent, kjeenmol werkjlich tofräd sent. Daut baste, waut eena em Läwen doonen kaun, es, Gott to deenen un aundre to halpen, dän kjanen to lieren.

19. Wuarom es daut goot, von junk aun opp jeisteljet to schaufen?

19 Jie junge Menschen sent werkjlich to lowen, wiels jie doaropp schaufen Jehova to deenen, wan daut uk nich leicht es. Jie sträwen no jeisteljet un fa junt es daut Prädichtwoakj eent von daut ieeschte en jun Läwen. Jie loten junt von de Welt uk nich auflenkjen. Jie kjennen junt secha sennen, daut june flietje Oabeit fa Jehova nich vejäfs es. Jie haben Breeda un Sestren, waut junt leewen un halpen, un wan jie junt Jehova äwajäwen, dan woat junt daut met june Plons jlekjen.