Trigj nom Enhault

No de Enhaultslist gonen

Jehova nodoonen: Dän Gott, waut Moot jeft

Jehova nodoonen: Dän Gott, waut Moot jeft

“Ekj low Gott . . . hee treest ons [ooda jeft ons Moot] en aul onse Trubbels” (2. KOR. 1:3-4)

LEEDA: 59, 3

1. Woo jeef Jehova de Menschen Moot un Hopninj?

VON dan aun, aus de Menschen sindjen un onvolkomen sent, es to seenen, daut Jehova een Gott es, waut Moot jeft. Fuaz nodäm aus Adam un Eva em Goaden Eden ojjehuarsom wieren, säd Jehova waut verut, waut äare Nokomen wudd väl Moot un Hopninj jäwen, wan see daut ieescht wudden vestonen kjennen. Daut es de Profezeiunk en 1. Mose 3:15, un doa vesprakjt hee, daut de “oole Schlang”, de beesa Fient, un aul siene beese Woakjen woaren venicht woaren (Opb. 12:9; 1. Joh. 3:8).

JEHOVA JEEF SIENE DEENA EN DE VEGONENHEIT MOOT

2. Woo jeef Jehova Noah Moot?

2 Jehova sien Deena Noah läwd en eene gottloose Welt, wua bloos hee un siene Famielje Jehova deenden. Noah haud kunt mootloos woaren, wäajen de Menschen to siene Tiet soo grausom wieren un een sea orreinet Läwen fieeden  (1. Mo. 6:4-5, 11; Jud. 6). Oba Jehova säd waut to Noah, waut dän Moot jeef toom wieda “en Jemeenschoft met [am]” läwen (1. Mo. 6:9). Jehova säd to dän, daut hee wudd een Enj moaken met de schlajchte Welt, un hee säd am uk, woo hee un siene Famielje kunnen äwaläwen (1. Mo. 6:13-18). Jehova muak Noah werkjlich Moot.

3. Woo wort Josua Moot jejäft? (See daut Bilt aum Aunfank.)

3 Lota jeef Jehova Josua Moot. Hee haud de schwieeje Oppgow, Gott sien Volkj no daut vesproakne Launt to brinjen un de stoakje Velkja entonämen, waut doa wonden. Jehova wist, daut Josua Uasoak haud, Angst to haben, un doawäajen säd hee to Moses: “Laj Josua daut krakjt väa, un spräakj am Moot too. Hee saul väaren ver dit Volkj gonen un daut Launt ennämen daut du seenen kaust” (5. Mo. 3:28). Dan spruak Jehova Josua selfst Moot too un säd: “Horch, ekj hab die jesajcht, daut du mootich un entschloten best. Hab kjeene Angst, un lot die von nuscht enschrakjen, wiels ekj, de HAR, dien Gott, bliew bie die, bie aules waut du doonen woascht” (Jos. 1:1, 9). Jleew jie nich uk, daut dise Wieed Josua väl Moot jeewen?

4-5. (a) Woo treest Jehova sien Volkj ieeschtemma? (b) Woo stoakjt Jehova sienen Sän?

4 Jehova jeef nich bloos eenselne Menschen Moot, oba uk sien gaunzet Volkj. Jehova wist biejlikj, daut de Juden wudd Troost fälen, wan dee wudden en Babel jefangen sennen. Doawäajen säd hee verut: “Enjst die nich, wiels ekj sie met die; fercht die nich, wiels ekj sie dien Gott. Ekj woa die stoakj moaken, un die halpen, un met miene jerajchte rajchte Haunt woa ekj die hoolen un bewoaren” (Jes. 41:10). Lota deed Jehova de ieeschte Christen treesten un krakjt soo deit hee ons uk (läs 2. Korinta 1:3-4).

5 Jehova jeef mau rajcht Jesus Moot. Bie siene Doop hieed Jesus eene Stemm vom Himmel, waut säd: “Dit es mien leewa Sän, met däm ekj sea tofräd sie” (Mat. 3:17). Dise Wieed motten am sea jestoakjt haben, aus hee sienen Deenst oppe Ieed derchfieed.

JESUS JEEF AUNDRE MOOT

6. Woo kaun daut Jlikjnis von daut aunvetrude Jelt ons Moot jäwen?

6 Jesus deed krakjt soo aus sien Voda aundre Moot toospräakjen. Aus hee von daut Enj von dise Welt räd, vetald hee biejlikj daut Jlikjnis von daut aunvetrude Jelt. Doa lowd de Har jieda truen Kjnajcht un säd: “Du gooda, trua Kjnajcht, du hast goot jedonen. Du best äwa weinich tru jewast, ekj woa die äwa väl saten. Go un frei die met dienen Harn met!” (Mat. 25:21, 23). Met dise Wieed spruak Jesus siene Nofolja Moot too, Jehova wieda tru to deenen.

7. Woo jeef Jesus siene Apostel Moot, un besonda Petrus?

7 Jesus jeef siene Apostel emma Moot, wan dee am eenjemol veleicht uk enteischen deeden. Dee streeden sikj foaken doaräwa, wäa bie an de jratsta wia, oba Jesus rod dee jeduldich too, deemootich to sennen un aundre to deenen enne Städ Wieet to spälen (Luk. 22:24-26). Besonda äwa Petrus wia Jesus mieremol enteischt (Mat. 16:21-23; 26:31-35, 75). Oba enne Städ daut hee Petrus aufsäd, jeef hee dän Moot un säd, dee sull siene Gloowesbreeda stoakjen (Joh. 21:16).

 NOCH MEA BIESPELS VON IEESCHTEMMA

8. Woo stoakjt Hiskia de Väaschte von de Soldoten un uk daut Volkj?

8 Mau rajcht ea Jesus oppe Ieed kjeem un een volkomnet Biespel jeef, woo eena aundre Moot toospräakjen sull, vestunden Jehova siene true Deena aul, daut daut needich wia. Hiskia biejlikj vesaumeld de Väaschte von de Soldoten un uk daut Volkj von Juda un jeef an Moot, aus de Assiera an aunjriepen wullen. “Un daut Volkj veleet sikj opp de Wieed von Hiskia” (läs 2. Chronik 32:6-8).

9. Waut lia wie von daut Buak Hiob äwa Moot toospräakjen?

9 Hiob fäld selfst Troost, oba hee lieed aundre, woo eena wäm Moot jäwen kunn. De dree Mana, waut am wullen treesten, hauden am met äare Wieed wee jedonen. Hee säd to dee, daut hee an wudd jestoakjt un jetreest haben, wan hee en äare Städ jewast wia (Hiob 16:1-5). Lota wort Hiob dan von Elihu un mau rajcht von Jehova Moot toojesproaken (Hiob 33:24-25; 36:1, 11; 42:7, 10).

10-11. (a) Wuarom deeden se Jefta siene Dochta Moot toospräakjen? (b) Wäm kjenn wie vondoag dän Dach Moot toospräakjen?

10 Dän Rechta Jefta siene Dochta fäld daut uk doaraun, daut dee Moot toojesproaken wort. Jefta wull jäajen de Amonita Kjrich fieren. Hee vespruak Jehova, wan dee am halpen wudd to jewennen, dan wudd hee am dän ieeschten Mensch jäwen, waut am entjäajen kjeem, wan hee vom Kjrich trigjkjeem. Dee sull dan bie daut Aunbädungszelt deenen. De Israeliten jewonnen, un de ieeschta Mensch, waut Jefta entjäajen kjeem, wia siene Dochta. Daut wia sien eensjet Kjint. Jefta wia sea bedrekjt. Oba hee hilt sien Vespräakjen un schekjt siene Dochta no daut Aunbädungszelt en Silo, wua dee Jehova dan äa Läwen lank deend (Rech. 11:30-35).

11 Wan daut fa Jefta uk sea schwoa wia, wia daut fa siene Dochta secha noch schwanda. Oba dee wia wellich reed, daut to doonen, waut äa Voda vesproaken haud (Rech. 11:36-37, NW). Daut bedied, daut see sikj kjeenmol wudd kjennen befrieen un Kjinja haben. Jefta siene Famielje wudd aulsoo utstoawen. See brukt werkjlich Troost un Moot. De Schreft sajcht: “Daut word tom Jebruck enn Israel: Von Joah too Joah gohne de Dajchta Israels han, omm Jefta siene Dochta, dem Gileadita, vea Doag em Joah too besinje”, ooda to lowen (Rech. 11:39-40, Friesenbibel). Vondoag dän Dach jeft et uk Christen, waut sikj nich befrieen, daut dee sikj dolla “met daut, waut däm Harn aunjehieet”, beschaftjen kjennen. Vedeenen soone daut nich werkjlich, jeloft un oppjemuntat to woaren? (1. Kor. 7:32-35).

DE APOSTEL JEEWEN ÄARE GLOOWESBREEDA MOOT

12-13. Woo stoakjt Petrus siene Breeda?

12 Dän Owent ver sienen Doot säd Jesus to dän Apostel Petrus: “Simon, Simon, moakj die dit: Soton haft doarom aunjehoolen, junt soo aus Weit äwa een Säw to schekjen. Oba ekj hab fa die jebät, daut du dienen Gloowen nich velieren muchst. Un wan du ieescht trigj no mie jekomen best, dan stoakj diene Breeda” (Luk. 22:31-32).

De Apostel äare Breew jeewen de Vesaumlungen to jane Tiet väl Moot un dee stoakjen ons uk (See Varsch 12-17)

13 Petrus wia eena, waut en de ieeschtemmasche Christenvesaumlunk veroppjinkj (Gal. 2:9). Derch daut goode Biespel, waut hee Pinjsten un uk lota  jeef, muak hee de Breeda Moot. Nodäm daut hee sienen Deenst joarenlank tru jedonen haud, säd hee to de Breeda: “Ekj hab junt . . . kort jeschräwen, . . . [junt] to ermootjen un to betieekjnen, daut dit woarhauftich Gott siene Jnod es, en dee jie stonen” (1. Pet. 5:12). Petrus siene Breew jeewen de Christen to siene Tiet Moot un dee jäwen ons uk Moot. Un daut bruck wie uk en dise Tiet, wua wie luaren, daut Jehova siene Vespräakjungen sikj erfellen (2. Pet. 3:13).

14-15. Woo jeft ons daut Moot, waut Gott dän Apostel Johanes oppschriewen leet?

14 De Apostel Johanes wia uk eena, waut en de Christenvesaumlunk veroppjinkj. Sien scheenet Evangelium von Jesus sienen Deenst haft de Christen noch emma Moot jejäft, mau rajcht en de vondoagsche Tiet. Un bloos Johanes schreef doavon, daut Jesus säd, daut de Leew daut Tieekjen wia fa woare Christen (läs Johanes 13:34-35).

15 En Johanes siene dree Breew sent noch mea jeistelje Schaza bennen. Wan wie truarich sent wäajen onse Fäla, dan treest ons daut secha, wan wie läsen: “Daut Bloot von . . . Jesus Christus moakt ons rein von aule Sind” (1. Joh. 1:7). Un wan ons Hoat ons emma wada veuadeelt, dan sent wie sea dankboa, wan wie läsen, daut “Gott jrata [es] aus ons Hoat” (1. Joh. 3:20). Johanes es de eensja Bibelschriewa, waut schreef: “Gott es Leew” (1. Joh. 4:8, 16, Friesenbibel). En sienen tweeden un dredden Breef loft hee de Christen, waut wieda “en de Woarheit . . . läwen” (2. Joh. 4; 3. Joh. 3-4).

16-17. Woo muak de Apostel Paulus de Christen en siene Tiet Moot?

16 Paulus wia woomäajlich dee Apostel, waut aundre daut mieeschte Moot  toospruak. Aus daut met de Christenvesaumlunk aunfunk, bleewen de mieeschte Apostel en Jerusalem; daut wia de Städ, wua don de Väastaunt wia (Apj. 8:14; 15:2). De Christen en Judäa prädijden soone Menschen von Christus, waut aul jleewden, daut et mau eenen Gott jeef. Oba de heilja Jeist schekjt Paulus no soone toom prädjen, waut een deel Jetta hauden, biejlikj no de Griechen, no de Reema un no aundre (Gal. 2:7-9; 1. Tim. 2:7).

17 Paulus reisd en dee Jäajent rom, waut vondoag dän Dach de Turkei es, un uk en Griechenlaunt un Italien un stald doa aulawäajen manke Nichjuden Vesaumlungen opp. De niee Christen doa worden von äa “ieejnet Volkj” schlajcht behaundelt un musten lieden; dee fäld daut fresch aun Moot (1. Tess. 2:14). Ojjefäa en daut Joa 50 schreef Paulus no de niee Vesaumlunk en Tessalonich: “Wie danke Gott emma fa junt aula, en raede to Gott aewa junt enn onnse Jebaed en denke aun june Oabeit em Gloowe, en woo jie junt bemeaje enn june Leew, en uthoole” (1. Tess. 1:2-3, Reimerbibel). Paulus säd uk to dee, see sullen sikj unjarenaunda stoakjen. Hee schreef: “Moakt junt unjarenaunda Moot un but junt unjarenaunda opp” (1. Tess. 5:11).

DE VÄASTAUNT JEFT AUNDRE MOOT

18. Woo deed de Väastaunt en de Aposteltiet Filippus unjastetten?

18 En de Aposteltiet brukt Jehova dän Väastaunt toom aule Christen Moot jäwen, uk deejanje, waut en de Vesaumlungen veroppjinjen. Aus Filippus de Samarita von Christus prädijd, unjastetten de Breeda vom Väastaunt dän. Dee schekjten twee von an doahan – Petrus un Johanes. Dee sullen fa de niee Jinja doa bäden, daut dee dän heiljen Jeist kjrieejen (Apj. 8:5, 14-17). Filippus un de niee Breeda un Sestren doa wieren secha sea schaftich doaräwa, daut de Väastaunt an holp.

19. Waut deed dän Väastaunt sien Breef aun de Christen en de Aposteltiet?

19 Lota fruagen se dän Väastaunt, aus de Christen, waut Nichjuden wieren, sikj uk musten beschnieden loten, soo aus daut Jesaz Moses daut von de Juden velangd (Apj. 15:1-2). De Väastaunt bäd dan om heiljen Jeist un socht en de heilje Schreften no un kjeem to dän Schluss, daut daut nich mea needich wia, sikj beschnieden to loten. See schreewen dan eenen Breef, to waut see sikj eenich jeworden wieren, un leeten dän von Breeda no de veschiedne Vesaumlungen brinjen. Aus de Christen “dän jeläst hauden, freiden see sikj to dän ermootjenden Troost” (Apj. 15:27-32).

20. (a) Woo sprakjt de Väastaunt vondoag dän Dach de Breeda oppe gaunze Welt Moot too? (b) Äwa waut woa wie en dän näakjsten Artikjel räden?

20 Vondoag dän Dach deit de Väastaunt von Jehova siene Zeijen de Breeda, waut em Betel schaufen, de aundre Sondavoltietdeena un uk aule aundre Breeda oppe Welt Moot toospräakjen. Un krakjt soo aus de Christen en de Aposteltiet frei wie ons aula sea doaräwa. Aune 2015 jeef de Väastaunt dan noch daut Heft Komm zurück zu Jehova rut, waut väle äwa de gaunze Welt sea Moot jejäft haft. Oba sellen bloos dee, waut äwa Jehova sien Volkj aunjestalt sent, aundre Moot toospräakjen? Äwa daut woa wie en dän näakjsten Artikjel räden.