Trigj nom Enhault

No de Enhaultslist gonen

Wanea woat Gott sien Kjennichrikj äwa de Ieed rejieren?

Wanea woat Gott sien Kjennichrikj äwa de Ieed rejieren?

Eenje von Jesus siene true Nofolja wullen weeten, wanea Gott sien Kjennichrikj wudd aunfangen to rejieren. Jesus säd an dan, daut see daut nich krakjt wudden weeten, wanea daut wudd sennen (Aposteljeschicht 1:6-7). Oba hee haud an ea aul jesajcht, daut doa jewesse Sachen tojlikj passieren wudden. Un aun daut wudden siene Nofolja seenen, “daut daut Gottesrikj dicht bie es” un daut et aunfangen wudd, äwa de Ieed to rejieren (Lukas 21:31).

WAUT SÄD JESUS, WAUT AULES PASSIEREN SULL?

Jesus säd: “Een Volkj woat jäajen daut aundre oppstonen, un een Rikj jäajen daut aundre. Un doa woat opp veschiedne Städen grootet Ieedbäben un Hungaschnoot un Pestilenz sennen” (Lukas 21:10-11). Aul dise Sachen sent een kloaret Tieekjen. Un wan dee aulatoop wudden passieren, dan wudd wie kloa seenen kjennen, “daut daut Gottesrikj dicht bie es”. Un es daut nu soo, daut sikj aul dise Sachen tojlikj erfellen un uk oppe gaunze Welt? Unjasto wie ons daut mol.

1. KJRICH

Forscha sajen, daut sikj von daut Joa 1914 aun aules jeendat haft. En daut Joa jeef et soonen grooten Kjrich aus noch kjeenmol ea. Daut wia de Ieeschta Weltkjrich! Don worden doa toom ieeschte Mol väl Kanoonen un jeftje Gauss un aundre schlemme Jewäaren jebrukt. Doa worden uk Bommen von Zhets raufjeloten. Daut fieed to dän Tweeden Weltkjrich, wua se dan de Atomm-Bommen brukten. Von 1914 aun haft daut emma irjentwua Kjrich jejäft un doa sent millionende Menschen todood jekomen.

2. IEEDBÄBEN

Jieda Joa jeft daut äwa 100 groote Ieedbäben, waut “väl Schoden” aunrechten, sajcht daut en de Britannica Academic. Un en de United States Geological Survey woat jesajcht: “No eene Räakjninj no (von ojjefäa daut Joa 1900 aun), kaun daut bat 16 groote Ieedbäben daut Joa jäwen”. Eenje meenen, daut haft noch emma soo väl Ieedbäben jejäft, oba nu kjennen se daut bloos dolla utfinjen, woo väl daut jeft. Aus daut soo es ooda nich, wäajen groote Ieedbäben jeft daut aulawäajen oppe Ieed soo väl Lieden un Doodes aus noch kjeenmol ea.

 3. HUNGASCHNOOT

Daut jeft foaken Hungaschnoot wäajen Kjrich, Onopprechtichkjeit, groote Wirtschoft-Trubbels un schlajchte Arnten. De Berecht von 2018 von de World Food Programme sajcht: “Oppe gaunze Welt motten 821 Million Menschen hungren un bie 124 Million es daut aul sea schlemm.” Äwa 3 Million Kjinja stoawen jieda Joa, wäajen dee prost to äten haben. Bie 45 Prozent von aule Kjinja, waut aune 2011 storwen, wia daut krakjt wäajen soont.

4. KRANKHEITEN

Een Buak von de World Health Organization sajcht: “En de latste 20 Joa haft daut aul groote äwaschlapende Krankheiten jejäft. Oole Krankheiten, soo aus Kolera un aundre Ploagen, kjeemen wada dolla opp un doa sent uk mea niee Krankheiten oppjestonen, soo aus Ebola un Zika un väl wiet vespreede Trubbels met odmen.” Wan de Doktasch uk aul sea väl äwa de Doktarie rutjefungen haben, kjennen dee de Krankheiten doch nich opphoolen.

5. ÄWA DE GAUNZE WELT WOAT JEPRÄDICHT

Jesus räd von noch waut, waut to daut Tieekjen jehieren wudd: “Daut Evangelium von Gott sien Rikj woat en de gaunze Welt jeprädicht woaren, soo daut aule Velkja daut hieren, un dan woat daut Enj komen” (Matäus 24:14). Wan doa uk soo väl schlajchtet enne Welt passieet, doonen doa noch äwa 8 Millionen Menschen de goode Norecht von Gott sien Kjennichrikj prädjen. Un daut en 240 Lenda un opp äwa 1 000 Sproaken. Soont haft daut noch niemols ea jejäft.

 WAUT BEDIET DAUT TIEEKJEN FA ONS?

Aules, waut to daut Tieekjen jehieet, waut Jesus säd, es nu kloa to seenen. Wuarom sull ons daut intressieren? Na, Jesus säd je: “Wan jie dit aula passieren seenen, räakjent doamet, daut daut Gottesrikj dicht bie es” (Lukas 21:31).

Boolt woat Gott sien Wellen derch daut Kjennichrikj oppe Ieed jedonen woaren

No daut Tieekjen no, waut Jesus jeef, un woo wie ons daut enne Schreft noseenen kjennen, stald Gott sien Kjennichrikj aune 1914 em Himmel opp. * Krakjt dan muak hee sienen Sän, Jesus Christus, toom Kjennich (Psalm 2:2, 4, 6-9). Wan Gott sien Kjennichrikj woat äwa de Ieed rejieren, dan woat daut aule menschelje Rejierungen oppriemen un de Ieed to een Paradies moaken, wua de Menschen fa emma läwen kjennen.

Boolt woat sikj daut erfellen, waut Jesus ons en daut “Unser-Vater”-Jebäd lieed: “Lot dien Rikj komen. Lot dien Wellen oppe Ieed jrod soo jedonen woaren aus em Himmel” (Matäus 6:10). Oba waut haft Gott sien Kjennichrikj von 1914 aun aules volbrocht? Un to waut kjenn wie ons aul freien, wan daut Kjennichrikj ieescht woat fa voll äwa de Ieed rejieren?

^ Varsch 17 En daut Buak Waut lieet de Schreft werkjlich? oppe Sied 215-218 kaust du noch mea äwa daut Joa 1914 läsen. Daut es bie Jehova siene Zeijen to haben.