Trigj nom Enhault

No de Enhaultslist gonen

Wan eena feelt, eena kaun nich lenja

Wan eena feelt, eena kaun nich lenja

Adriana von Brasilien, waut narfenkrank es, sajcht: “Dise Jefeelen wieren schia nich uttohoolen. Doawäajen docht ekj, daut wudd bäta sennen, wan ekj mie daut Läwen neem.”

HAST du die mol soo schlajcht jefeelt, daut du nich lenja läwen wust? Dan weetst du veleicht, woo Adriana sikj feeld. See haud emma groote Angst un feeld sikj truarich un onen Hopninj.

Kaoru es een Maun von Jaupaun, waut fa siene kranke Elren sorjen must, waut aul ella wieren. Hee sajcht: “To dee Tiet feeld ekj mie äwafoddat, wäajen se mie oppe Oabeit soo unja Druck saden. Tietwies vejinkj mie de Hunga un ekj kunn nich fein schlopen. Ekj docht soo, woo leicht daut nich sennen wudd, wan ekj bloos mol storf.”

Ojebode, een Maun von Nigeria, sajcht: “Ekj wia emma soo truarich, daut ekj road; doawäajen socht ekj no eene Jeläajenheit, mie daut Läwen to nämen.” Woo goot, daut Ojebode, Kaoru un Adriana daut nich deeden. Oba daut jeft jieda Joa hundatdusende, waut daut doonen.

WUA KAUN EENA HELP FINJEN?

De mieeschte, waut sikj daut Läwen nämen, sent Mana, un väle schämden sikj, no Help to froagen. Jesus säd mol, daut de Kranke eenen Dokta brukten (Lukas 5:31). Doawäajen, wan du die mol soo feelst, dan schäm die nich, no Help to froagen. Väl Narfenkranke haben jeseenen, daut eene Doktarie an halpt, bäta doamet foadich to woaren. Ojebode, Kaoru un Adriana wort aula derch Doktarie jeholpen, un nu jeit dee daut väl bäta.

Doktasch brucken veleicht Medizien ooda horchen de Narfenkranke too ooda doonen beides toom dee halpen. Soone, waut Narfentrubbel haben, brucken de Famielje un Frind äare Jedult, Vestentnis un Unjastettunk. De basta Frint, waut eena haben kaun, es Jehova Gott. Hee jeft sea gooden Rot en sien Wuat.

JEFT DAUT EENE WOARE LEESUNK?

Narfenkranke brucken foaken fa eene lange Tiet eene Behaundlunk un motten veleicht äare Jewanheiten endren toom doamet foadich woaren. Oba wan du uk Narfentrubbel hast, kaust du die doawäajen to eene wundascheene Tookunft freien, soo aus Ojebode deit. Hee sajcht: “Ekj frei mie aul to dee Tiet, wan Jesaja 33:24 sikj erfelt, wan kjeena mea sajen woat: ‘Ekj sie nich jesunt.’” Soo aus Ojebode kaun die daut Vespräakjen von “eene niee Ieed” treesten, wua kjeene “Weedoag” mea sennen woat (Openboarunk 21:1, 4). Dit Vespräakjen wiest, daut doa kjeena mea wäajen Narfenkrankheit truarich sennen woat. Aun de Weedoag en dien Hoat “woat nich mea . . . jedocht woaren, un woat nich mea em Jeräd komen” (Jesaja 65:17).