Trigj nom Enhault

No de Enhaultslist gonen

Wan de Ehepoatna ontru es

Wan de Ehepoatna ontru es

“Aus mien Maun säd, daut hee mie wäajen eene jinjre Fru veleet, wull ekj stoawen. Daut feeld sikj soo ojjerajcht, besonda wan ekj doaraun docht, waut ekj fa dän aules oppjejäft haud” (Maria von Spaunien).

“Aus miene Fru mie haustich veleet, feeld sikj daut soo, daut een Biet von mienen Kjarpa loosjeräten wort. Onse Wenschen un waut wie ons toop väajenomen hauden, wia aula tonuscht jegonen. Doa wieren Doag, wua ekj docht, ekj haud daut äwastonen, oba dan wia ekj wada sea doljeschloagen” (Bill von Spaunien).

EENA kaun gaunz met de Narfen toopbräakjen, wan de Ehepoatna ontru es. Eenje kjennen äaren Poatna vejäwen, waut ontru wia, un haben met de Tiet wada eenen gooden Ehestaunt. * Aus dee nu toopbliewen ooda nich – deejanje, waut enwoaren, daut äa Poatna ontru wia, gonen derch eene sea schwoare Tiet. Woo kjennen soone met äa schwoaret foadich woaren?

BIBELVARZH, WAUT HALPEN KJENNEN

Dee, waut unja soont lieden musten, haben Troost enne Schreft jefungen, wan dee uk sea truarich wieren. Dee lieeden, daut Gott äare Tronen sach un met an metfeeld (Maleachi 2:13-16).

“Aus ekj ennalich sea beduat wia, freid miene Seel sikj to dienen Troost” (Psalm 94:19).

Bill sajcht: “Aus ekj disen Varsch läsd, stald ekj mie Jehova aus eenen leeftoljen Voda väa, waut miene Weedoag met väl Metjefeel berujen deed.”

“Du best tru to dee, dee die tru sent” (Psalm 18:26).

Carmen äa Maun wia ar aul Moonaten ontru jewast; see sajcht: “Mien Maun wia mie nich tru. Oba ekj wist, Jehova wudd mie emma tru bliewen. Hee wudd mie kjeenmol auleen loten.”

“Sorcht junt om nuscht. Lot Gott met bäden un prachren . . . aules weeten waut junt fält! Un Gott sien Fräd, dee wiet äwa aules jeit waut Menschen vestonen kjennen, woat june Hoaten . . . bewoaren!” (Filippa 4:6-7).

Sasha sajcht: “Ekj läsd dise Schreftstal emma un emma wada. Aus ekj emma mea bäden deed, jeef Gott mie Fräd em Läwen.”

Aul dise, von dee wie nu jerät haben, wullen tietwies oppjäwen. Oba dee vetruden opp Jehova Gott un kjrieejen Krauft derch sien Wuat. Bill sajcht: “Mien Gloowen jeef mie eenen Senn em Läwen, wan sikj daut uk soo späad, daut aulet aundre vestieet wia. Wan ekj uk fa eene jewesse Tiet ‘derch een diestret Tol’ jinkj, wia Gott met mie” (Psalm 23:4).

^ Varsch 4 Em Erwachet! vom 22. Aprell 1999 “Wenn der Partner untreu ist”, Sied 3-5, 6-8 un 9-12 jeit notoläsen, aus eena met dän aundren saul toopbliewen ooda nich.