DU KAUST die denkjen, woo schwoa daut es, wan du enwoascht, daut du ooda eena, wäm du väl räakjenst, eene Krankheit haft, wua eena von stoawen kaun. Dan sent doa uk noch de empfintelje Jefeelen, wua eena met foadich woaren mott. De Angst un Sorjen kjennen jrata woaren, wan eena emma wada nom Dokta mott, meist nich eene Behaundlunk kjricht ooda betolen kaun ooda schlajchte Foljen von de Medizien haft. Angst met eene schwoare Krankheit toop kaun eenem sea toosaten.

 Wua kaun eena Help finjen? Väle sent enjeworden, daut et fa an de jratsta Troost es, wan see to Jehova bäden un Bibelvarzh läsen, waut Moot jäwen. Eene aundre Sach, waut halpt, es de Leew un de Unjastettunk von de Famielje un Frind.

Robert, waut 58 Joa es, sajcht: “Vetru opp Gott, un dee woat die halpen, met de Krankheit foadich to woaren. Bäd to Jehova un froag am no sienen heiljen Jeist. Saj am, woo du die feelst. Froag am no Krauft, daut du kaust eene goode Enstalunk haben un de Famielje Moot toospräakjen un de Krankheit met Jedult droagen.”

“Daut es soone groote Help, wan de Famielje eenem biesteit. Jieda Dach font mie eena ooda twee, waut mie froagen: ‘Woo jeit die daut vondoag?’ Frind von veschiedne Städen jäwen mie Troost. Doaderch feel ekj mie bäta un daut halpt mie, wiedatomoaken.”

Wan du eenen Kranken besieekjst, dan denkj aun daut, waut Linda säd: “De Kranka well secha uk soo goot aus mäajlich een normalet Läwen fieren un veleicht nich emma äwa siene Krankheit räden. Doawäajen räd to dän äwa soont, aus du to aundre deist.”

Met Gott siene Help, dän Troost ut de Schreft un de Unjastettunk von de Famielje un Frind kjenn wie ons secha sennen, daut sikj daut loont to läwen, wan wie uk eene schlemme Krankheit haben.