Fräd finjen, wan daut uk Kjrich un Orru jeft
Gary wia ieeschtemma Soldot. Hee sajcht: “Ea ekj de Bibel studieed, wist ekj nich, wuarom daut enne Welt soo väl Grausomkjeit, Ojjerajchtichkjeit un Trubbels jeft. Oba nu hab ekj ennalich Fräd. Ekj weet, daut Jehowa Gott doafäa oppkomen woat, daut et oppe gaunze Ieed secha sennen woat.”
Gary es nich de Eensja, waut soo denkjt. Well wie mol seenen, woo de Schreft aundre Menschen jeholpen haft.
WAUT DE SCHREFT SAJCHT: “Du, Har, best goot un reed to vejäwen” (Psalm 86:5).
WUAROM DAUT HALPT: “Dis Varsch wiest mie, daut Jehowa metliedent es. Ekj weet, daut hee reed es, mie aules to vejäwen, waut ekj ea deed, aus ekj em Kjrich kjamfen deed” (Wilmar, Kolumbien).
WAUT DE SCHREFT SAJCHT: “Ekj moak niee Himmel un eene niee Ieed. Waut verhäa wia, woat nich mea aun jedocht woaren, un woat nich mea em Jeräd komen” (Jesaja 65:17).
WUAROM DAUT HALPT: “Ekj sie narfenkrank un ekj hab daut noch emma sea schwoa met daut, waut ekj em Kjrich beläft hab. Oba dis Bibelvarsch halpt mie doaraun to denkjen, daut Jehowa boolt aul miene schwoare Jedanken wajchnämen woat un uk de schlajchte Dreem, waut ekj hab. Dee woaren fa emma veschwungen sennen. Es daut nich wundascheen?” (Zafirah, Stäts).
WAUT DE SCHREFT SAJCHT: “En siene Tiet woat de Jerajchtichkjeit blieejen, un aules woat frädlich sennen bat de Mon nich mea es” (Psalm 72:7).
WUAROM DAUT HALPT: “Ekj denkj foaken äwa dise Wieed no. Boolt woat de Kjrich äwa sennen un uk aulet Schlemme, waut derch dän Kjrich kjemt, un wie woaren ons nich mea brucken Sorjen moaken, daut onse Famielje ooda onse Frind waut woat” (Oleksandra, Ukranien).
WAUT DE SCHREFT SAJCHT: “Diene Vestorwne, HAR, woaren läwen, ... muchten dee, dee unjare Ieed ligjen, oppwakjen un fa freid sinjen” (Jesaja 26:19).
WUAROM DAUT HALPT: “Meist miene gaunze Famielje wort dootjemoakt, aus eene Sort Menschen aule dootmoaken wullen, waut von dän Tutsi-Staum wieren. Oba dis Varsch vesechat mie, daut ekj dee wadaseenen woa. Ekj frei mie aul doatoo, dee äare schaftje Stemmen to hieren, wan dee vom Doot oppjewakjt woaren!” (Marie, Ruanda).
WAUT DE SCHREFT SAJCHT: “Daut woat nich mea lang dieren, dan woaren de gottloose nich mea sennen, ... oba de deemootje woaren daut Launt oawen, un sikj to de groote Fräd freien” (Psalm 37:10-11).
WUAROM DAUT HALPT: “De Kjrich es äwa, oba daut jeft doawäajen noch Ojjerajchtichkjeit un schlajchte Menschen. Dise Varzhen haben mie sea jestoakjt. Jehowa sitt aules un hee weet krakjt, woo mie daut jeit. Hee vesprakjt, daut aulet Schlajchte boolt äwa sennen woat un daut wie doa nich mol mea aun denkjen woaren” (Daler, Tadschikistan).
De Schreft haft aul millionende von Jehowa siene Zeijen jeholpen, ennalich Fräd to finjen, un deejanje, waut hia vetalden, sent uk mank dee. Dee haben daut jelieet, aundre nich mea to haussen un uk soone Menschen to leewen, waut von eene aundre Rauss, een aundret Launt ooda eenen aundren Staum sent (Efeesa 4:31-32). Jehowa siene Zeijen stalen sikj bie polietische Sachen opp kjeenem siene Sied un moaken nich met bie Grausomkjeit un Jewault (Johanes 18:36).
Jehowa siene Zeijen sent oppe gaunze Welt soo aus Breeda un Sestren, waut sikj leeftolich biestonen (Johanes 13:35). Oleksandra biejlikj, von dee wie ea aul räden, must sikj wäajen dän Kjrich met äare Sesta toop fuatbrinjen no een aundret Launt. See sajcht: “Aus wie äwa de Jrens kjeemen, sag wie doa fuaz Jehowa siene Zeijen von dit Launt, waut jekomen wieren, om ons to bejreessen. Met dee äare Help kunn wie ons doatoo wanen, aus Flichtlinja en een framdet Launt to läwen.”
Wie wudden ons sea freien, wan du no onse Toopkomes wanken wurscht. Doa lia wie, woo wie nu aul ennalich Fräd finjen kjennen un waut de Schreft äwa de frädelje Welt sajcht, waut boolt komen woat. Opp jw.org kaust du seenen, wua de Toopkomes en diene Omjäajent aufjehoolen woaren. Doa kaust du uk doano froagen, daut wäa von Jehowa siene Zeijen emsonst met die toop de Bibel studieet met daut Buak Een scheenet Läwen fa emma!
