Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Well wie Bibelstund haben

 JESCHICHT 11

Mana, waut äwa Jesus schreewen

Mana, waut äwa Jesus schreewen

Wäa sent de Mana opp daut Bilt? – Daut sent Matäus, Markus, Lukas, Johanes, Petrus, Jakobus, Judas un Paulus. Dee aula läwen to Jesus siene Tiet un schriewen äwa dän. En dise Jeschicht woa wie een bät mea äwa dee hieren.

Wäa sent dise Mana?

Dree von dee sent Apostel, waut met Jesus toop jeprädicht haben. Waut denkjst du, woont sent de dree? – Daut sent Matäus, Johanes un Petrus. De Apostel Matäus un Johanes kjanen Jesus goot un beid schriewen  een Bibelbuak äwa Jesus sien Läwen. De Apostel Johanes schrift uk noch daut Buak Openboarunk un dree Breew; dee woaren ieeschta, tweeda un dredda Johanes jenant. De Apostel Petrus schrift uk twee Breew, waut en de Schreft sent. Daut sent ieeschta un tweeda Petrus. En sienen tweeden Breef schrift hee doavon, daut Jehova von utem Himmel räd un äwa Jesus säd: “Dit es mien leewa Sän, met dän ekj sea tofräd sie”.

De aundre Mana, waut opp daut Bilt sent, schriewen uk äwa Jesus. Eent von dee es Markus. Woomäajlich haft dee selfst jeseenen, woo Jesus faustjenomen wort. Een aundra Bibelschriewa es Lukas. Daut es een Dokta un daut kaun sennen, daut dee mau no Jesus sienen Doot een Christ wort.

Twee aundre Mana opp daut Bilt sent Jesus siene jinjre Breeda. Daut sent uk Bibelschriewa. Weetst du, woo dee heeten? – Dee heeten Jakobus un Judas. Aum Aunfank jleewen dee nich aun Jesus. Dee denkjen mau rajcht, daut dee nich gaunz kloa em Kopp es. Oba lota jleewen dee dan aun dän un woaren Christen.

De latsta Bibelschriewa opp daut Bilt es Paulus. Ea dee een Christ wort, nanden dee am Saul. Hee kunn de Christen nuscht lieden un behaundeld dee sea schlajcht. Weetst du, woo Paulus een Christ woat? – Eenen Dach, aus Paulus oppe Reis es, hieet hee met eemol eene Stemm vom Himmel. Daut es Jesus, waut met am rät. Dee frajcht Paulus: “Wuarom best du soo schlajcht to dee, waut aun mie jleewen?” No dit endat Paulus sikj un woat een Christ. Lota schrift hee dan 14 Bibelbieekja. Daut sent de Breew von Reema bat Hebräa.

Wudd daut nich fein sennen, jieda Dach en de Schreft to läsen? – Wan wie daut doonen, kjenn wie väl äwa Jesus lieren. West du daut nich uk? –

LÄST TOOP EN DE SCHREFT:

  • 2. Petrus 1:16-18

  • Markus 3:21; 14:51

  • Judas 1

  • Aposteljeschicht 9:1-18