Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Well wie Bibelstund haben

 JESCHICHT 10

Jesus wia emma jehuarsom

Jesus wia emma jehuarsom

Es daut emma leicht, Mame un Pape to jehorchen? – Daut es nich. Weetst du, wäm Jesus jehuarsom wia? – Hee jehorcht Jehova un uk siene Elren. Jesus sien Biespel kaun die halpen, diene Elren to jehorchen, uk wan daut eenjemol schwoa es.

Ea Jesus no de Ieed kjemt, es dee bie sienen Voda Jehova em Himmel. Oba uk hia oppe Ieed haft Jesus Elren. Daut sent Josef un Maria. Weetst du, woo sikj daut romnemt, daut daut siene Elren woaren? –

Jehova deit een Wunda, soo daut Jesus en Maria äaren Buck waussen kaun, soo aus aule aundre Bäbes uk em Buck von äare Mame waussen. Soo bie näajen Moonat lota woat Jesus dan jebuaren. Soo woaren Josef un Maria Jesus siene Elren.

Aus Jesus noch mau twalf Joa oolt es, es aul kloa to seenen, daut hee sienen Voda Jehova sea väl räakjent. Jesus un siene Famielje moaken eene lange Reis no Jerusalem toom Passafast. Aus Josef un Maria dan ieescht oppem Trigjwajch sent, finjen dee Jesus nich. Waut jleefst du, wua es Jesus jebläwen? –

Wuarom es Jesus em Tempel?

Josef un Maria gonen schwind trigj no Jerusalem un sieekjen aulawäajen no Jesus. Dee sent sea besorcht, wiels dee dän nich finjen. Mau ieescht om dree Doag wieda finjen dee Jesus em Tempel. Waut denkjst du, wuarom es Jesus em Tempel? – Wiels hee doa väl äwa sienen Voda Jehova lieren kaun. Hee jleicht Jehova un well am jefaulen. Uk aus Jesus jrata woat, es hee Jehova emma jehuarsom. Hee jehorcht mau rajcht dan, wan daut schwoa es un hee doawäajen lieden mott. Deit Jesus uk Josef un Maria jehorchen? – De Schreft sajcht, hee deit.

Waut kaust du von Jesus lieren? – Daut es wichtich, daut du Mame un Pape jehorchen deist, uk wan daut eenjemol nich leicht es. Woascht du daut doonen? –

LÄST TOOP EN DE SCHREFT:

  • Lukas 1:30-35; 2:45-52

  • Efeesa 6:1

  • Hebräa 5:8