Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Well wie Bibelstund haben

 JESCHICHT 7

Waut kaust du doonen, wan du Angst hast un die auleen feelst?

Waut kaust du doonen, wan du Angst hast un die auleen feelst?

Kjikj mol dis kjliena Jung hia oppem Bilt. Es daut nich to seenen, daut dee sikj auleen feelt un Angst haft? Haft die daut uk mol soo jegonen? – Eenjemol jeit ons daut soo. En de Schreft kjenn wie läsen, daut uk eenje von Jehova siene Frind Angst hauden un sikj auleen feelden. Eent von dee es Elia. Waut haft dee beläft?

Isebel well Elia dootmoaken

Lang trigj, noch ea Jesus jebuaren es, läft Elia en Israel. Ahab, de Kjennich von Israel, deit nich dän woaren Gott Jehova aunbäden. Hee un siene Fru Isebel deenen dän Aufgott Baal. Doawäajen fangen de mieeschte en Israel uk aun, Baal auntobäden. De Kjennijin Isebel es sea schlajcht un well Elia dootmoaken un uk aul de aundre, waut Jehova tru sent. Waut deit Elia nu? –

Elia rant wajch! Hee jeit wiet en de Wiltnis nenn un vestakjt sikj en eene Heel.  Waut denkjst du, wuarom deit dee daut? – Hee haft Angst. Oba Elia wudd goanich brucken Angst haben. Wuarom nich? Wiels Jehova am wudd halpen kjennen. Jehova haft Elia aul ea jeholpen. Eemol biejlikj deed Elia to Jehova bäden un Jehova leet dan Fia vom Himmel faulen. Jehova es sea stoakj un dee wudd Elia nu uk kjennen halpen.

Woo deit Jehova Elia halpen?

Doawäajen rät Jehova to Elia, aus dee en de Heel es. Dee frajcht am: “Waut deist du hia, Elia?” Elia sajcht: “Ekj sie de eensja, waut die noch deent. Ekj sie gaunz auleen un hab Angst, daut dee mie uk woaren dootmoaken.” Elia denkjt, daut see aule aundre, waut Jehova deenen, aul dootjemoakt haben. Oba Jehova sajcht to am: “Daut es nich soo. Doa sent noch 7 000 aundre, waut mie tru sent. Sie mootich! Ekj hab noch Oabeit fa die.” Waut jleefst du, woo feelt Elia sikj, aus hee dit hieet? – Secha jeft am daut väl Moot.

Waut lia wie von Elia siene Jeschicht? – Du brukst kjeenmol Angst haben un die auleen feelen. Denkj doaraun, daut du Frind hast, waut Jehova jleichen un waut die uk jleichen. Denkj uk doaraun: Jehova es sea stoakj un woat die emma halpen. Es daut nich scheen, daut to weeten? –

LÄST TOOP EN DE SCHREFT:

  • 1. Kjennichs 19:3-18

  • Psalm 145:18

  • 1. Petrus 5:9