Trigj nom Enhault

No de Enhaultslist gonen

 FROAG 4

Woo kaun ekj daut fiksen, wan ekj waut jedonen hab?

Woo kaun ekj daut fiksen, wan ekj waut jedonen hab?

WUAROM SULL EKJ DAUT WEETEN?

Wan du lieescht, diene Fäla tootostonen, dan woascht du lieren, Sachen iernst to nämen, un opp die woat to veloten sennen

WAUT WURSCHT DU DOONEN?

Tim spält met siene Frind toop. Hee holt met dän Baul ut, un dee foat en dän Noba siene Koa enne Rut nenn un twei es de Rut.

Waut wurscht du doonen, wan du Tim wieescht?

DENKJ IEESCHT MOL NO!

DU KAUST DREEATLEI DOONEN:

  1. Utkleiwen.

  2. Daut opp aundre schuwen.

  3. Daut sajen, waut jeworden es, un aunbeeden, dän Schoden to betolen.

Veleicht wurscht du daut leefste bloos utkleiwen. Oba daut es emma daut baste, diene Fäla tootostonen, endoont aus daut om eene tweinje Rut jeit ooda om sestwaut.

 WUAROM SAUL EENA SIENE FÄLA TOOSTONEN?

  1. Daut es daut rajchte.

    De Schreft sajcht: “Wie wellen en aules, waut wie doonen, opprechtich sennen” (Hebräa 13:18NW).

  2. Aundre woaren eenem daut leichta togoodhoolen.

    De Schreft sajcht: “Wäa siene Sinden velicht, woat nich Jlekj haben; wäa dee bekjant un doamet opphieet, woat Metleet finjen” (Spricha 28:13).

  3. Daut wichtichste es, daut Gott daut jefelt.

    De Schreft sajcht: “Daut es oppscheislich waut de vekjieede Menschen doonen, oba de HAR es de jerajchte sea noaun” (Spricha 3:32).

Karina (20 Joa) haft mol eenen Strofzadel jekjräajen wäajen too stoakj foaren, un see wull daut fa äare Pape plietsch hoolen. Oba daut jlekjt ar nich. Karina sajcht: “Bie een Joa lota sach miene Pape dän Strofzadel met mienen Nomen. Daut brocht mie sea em Trubbel!”

Waut haft see doarut jelieet? Karina sajcht: “Fäla plietsch hoolen moakt aules bloos noch schlemma. Irjentwanea mott eena doamet verendach!”

WOO KAUST DU VON DIENE FÄLA LIEREN?

De Schreft sajcht, daut wie aula foaken Fäla moaken (Jakobus 3:2). Wan du diene Fäla toosteist – un daut fuaz deist – dan es daut een Bewies, daut du die aul groot oppstalst un die nich too väl meenst.

Daut näakjste wudd dan sennen, ut diene Fäla waut to lieren. Eene Mejal, waut Vera heet, sajcht: “Ekj proow, jieda Fäla aus eene Jeläajenheit to seenen, waut doarut to lieren. Daut näakjste Mol kaun ekj daut dan bäta moaken un een bätra Mensch woaren.” See wie mol, woo eena daut doonen kaun.

Dien groota Brooda lied die sienen Beisikjel un du muakst dän twei. Waut wurscht du doonen?

  • Nuscht sajen un hopen, daut dee daut nich enwoat.

  • Dän krakjt vetalen, waut jeworden es.

  • Daut vetalen, oba daut opp aundre schuwen.

Du kust dienen Schooltest nich moaken, wäajen du die nich reedjemoakt hautst. Waut wurscht du doonen?

  • Sajen, de Test wia väl too schwoa.

  • Daut enseenen, daut et diene ieejne Schult wia.

  • Sajen, daut de Liera die nich jleicht.

Emma wada äwa de Fäla nodenkjen, waut eena mol jemoakt haft, wudd soo sennen, aus biem foaren dän tietäwa nom Spieejel kjikjen, om to seenen, waut hinja eenem es

 Nu denkj mol han, du wieescht 1. dien groota Brooda ooda 2. dien Liera. Wan du dienen Fäla fuaz wellich toostunst, woo wudden dee doaräwa denkjen? Oba waut wudden dee von die hoolen, wan du de Sach proowsd plietsch to hoolen?

Nu denkj mol aun eenen Fäla, waut du en daut latste Joa jemoakt hast.

Waut hast du orrajcht jedonen? Woo jinjst du doamet om?

  • Ekj hilt daut plietsch.

  • Ekj jeef aundre de Schult.

  • Ekj stunt daut fuaz wellich too.

Wan du dienen Fäla nich toostunst, woo jinkj die daut dan?

  • Fein, wiels ekj kunn daut plietsch hoolen!

  • Schlajcht, wiels ekj haud sult de Woarheit sajen.

Woo hautst du doa kunt bäta met omgonen?

Waut hast du ut dienen Fäla jelieet?

WAUT DENKJST DU?

Woosoo wellen väl Menschen äare Fäla nich toostonen?

Waut woaren aundre von die hoolen, wan du diene Fäla emma west plietsch hoolen, oba waut woaren dee sajen, wan du diene Fäla toosteist? (Lukas 16:10).