Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 DAUT 15. KAPITEL

Woo well Gott, daut wie am deenen?

Woo well Gott, daut wie am deenen?
  • Sitt Gott aule Gloowes fa rajcht aun?

  • Woo kaun eena dän rajchten Gloowen finjen?

  • Wäa sent vondoag dän Dach dee, waut Gott rajcht deenen?

1. Woo woat ons daut gonen, wan wie Gott rajcht deenen?

JEHOVA GOTT räakjent ons väl un well ons dän rajchten Wajch wiesen. Wan wie am rajcht deenen, woat ons daut scheen gonen un wie woaren ons väl Trubbel spoaren. Hee woat ons uk biestonen un ons säajnen (Jesaja 48:17). Oba daut jeft hundade Gloowes un aula sajen, see haben daut rajchte, un doch sent dee gaunz veschieden. Dee sent sikj nich eenich doarenn, woo Gott es un waut dee haben well.

2. Woo kaun eena rutfinjen, woonen Gloowen Jehova fa rajcht talt? Met waut kaun eena daut vejlikjen?

2 Woo kaust du rutfinjen, woont de rajchta Gloowen es? Doatoo es daut nich needich, aul de veschiedne Gloowes to unjasieekjen un jäajenäwa to hoolen. Du brukst bloos weeten, waut daut en de Schreft werkjlich sajcht, woo Gott well, daut wie am deenen. Daut es biejlikj soo aus met faulschet Jelt. Saj wie mol, du motst faulschet Jelt von ajchtet Jelt uteneen deelen. Woo wurscht du daut doonen? Eena wudd sikj kjennen aul daut moakjen, waut aun faulsche Zadels aundasch lat. Oba wudd daut nich bäta sennen, daut du die eefach moakjst, aun waut daut ajchte Jelt to kjanen es? Soo wurscht du fuaz kjennen seenen, woont faulsch wia. Krakjt soo es daut met de Gloowes. Haft eena ieescht mol rutjefungen, woo de  rajchta Gloowen sennen mott, woat eena fuaz moakjen, aus een Gloowen rajcht es ooda nich.

3. Woo kjenn wie Gott jefaulen, soo aus Jesus säd?

3 Wie motten Jehova soo deenen, aus hee daut fa rajcht aunsitt. Väle sajen, daut es krakjt endoont, waut fa eenen Gloowen eena haft, oba de Schreft sajcht waut aundret. Daut rieekjt uk nich too, sikj bloos een Christ to nanen, wiels Jesus säd: “Dee woaren nich aula en daut Himmelrikj komen, dee to mie: Har, Har! sajen. Doa komen bloos dee nenn, dee doa doonen, waut mien Voda em Himmel haben well.” Daut Gott ons aunnemt, mott wie aulsoo rutfinjen, waut hee von ons velangt, un daut dan uk nokomen. Soone, waut nich Gott sienen Wellen doonen, nand Jesus “schlajchte” ooda gottloose (Matäus 7:21-23). Faulsche Gloowes sent to nuscht to brucken, krakjt soo aus faulschet Jelt. Oba nich mau daut. Dee sent soogoa sea toom Schoden.

4. Von woone beid Wäaj räd Jesus? Wua fieren dee han?

4 Jehova jeft aule Menschen de Jeläajenheit, eewjet Läwen to kjrieen. Daut wie noch mol kjennen eewich em Paradies läwen, mott wie Gott rajcht deenen un vondoag aul soo läwen, aus am daut jefelt. Oba väle wellen daut nich. Doawäajen säd Jesus: “Got derch daut enje Puat nenn. Wiels daut Puat es wiet un de Wajch es breet, dee en daut vedoawen fieet, un väle gonen dän Wajch; un daut Puat es enj un de Wajch es schmaul, dee toom Läwen fieet, un daut sent mau weinich, dee daut finjen” (Matäus 7:13-14). De rajchta Gloowen fieet toom eewjen Läwen, de faulscha Gloowen fieet en daut vedoawen. Jehova halpt Menschen äwa de gaunze Ieed, am kjanen to lieren, wiels hee nich well, daut doa wäa venicht woat (2. Petrus 3:9). Daut es opp iernst wichtich, daut wie Gott rajcht deenen, wiels daut es opp Läwen ooda Doot.

AUN WAUT EENA DÄN RAJCHTEN GLOOWEN KJANT

5. Aun waut es to seenen, wäa dän rajchten Gloowen haft?

5 Woo kaun eena dän rajchten Gloowen finjen? Jesus säd, dee wudd aun dän Waundel von dee to seenen sennen,  waut doano läwen. “Jie sullen dee aun äare Frucht kjanen”, säd Jesus, “een gooda Boom [drajcht] goode Frucht” (Matäus 7:16-17). Daut meent, Gott siene woare Deena sent doaraun to kjanen, waut dee jleewen un waut dee doonen. Uk wan dee onvolkomen sent un Fäla moaken, vesieekjen dee doch aulatoop, Gott sienen Wellen to doonen. Well wie mol sas Dinj betrachten, wuaraun dee to kjanen sent, waut Gott rajcht deenen.

6-7. Woo denkjen Gott siene Deena äwa de Schreft? Woo docht Jesus doaräwa?

6 Gott siene Deena sent doaraun to kjanen, daut äare Lia met de Schreft äwareen es. En Gott sien Wuat läs wie: “Aule Schreft von Gott jejäft, es wieetvoll ons to belieren, ons uttobätren, ons trajchttowiesen, un ons to unjarechten woo rajcht to läwen, soo daut een Gottesmensch em Staund es en goode Woakjen jeschekjt to sennen” (2. Timotäus 3:16-17). De Apostel Paulus lowd siene Gloowesbreeda doafäa, daut see daut Wuat “aus Gott sien Wuat aunneemen, un nich aus Menschenwuat” (1. Tessalonicha 2:13). De rajchta Gloowen stett sikj nich opp Menschenjebooten ooda opp daut, waut de Väafoaren jelieet haben. Dee stett sikj auleen opp Gott sien Wuat.

7 Gott siene Deena nämen sikj doarenn Jesus Christus toom Väabilt. Hee deed sikj en siene Lia emma opp de Heilje Schreft stetten. Jesus säd eemol to sienen Voda em Himmel: “Dien Wuat es de Woarheit” (Johanes 17:17). Hee jleewd, daut aules soo wia, waut de Schreft säd, un siene gaunze Lia stemd doamet äwareen. Foaken säd hee: “Daut steit jeschräwen”, un dan brukt hee eenen Varsch ut de Schreft (Matäus 4:4, 7, 10). Uk vondoag dän Dach lieren Gott siene woare Deena nich daut, waut dee sikj selfst utjedocht haben. Dee jleewen, daut de Schreft von Gott es, un dee äare gaunze Lia es äwareen met de Schreft.

8. Waut jehieet doatoo, Jehova rajcht to deenen?

8 Gott siene Deena bäden bloos Jehova aun un moaken dän sienen Nomen bekaunt. Jesus säd: “Du saust Gott, dienen  Harn, aunbäden un eensich am deenen” (Matäus 4:10). Gott siene Deena bäden aulsoo sest kjeenem aun aus Jehova. Doatoo jehieet uk, de Menschen daut to weeten to doonen, wäa Gott es un woo dee heet. En Psalm 83:18 läs wie: “Du, dee du Jehova heeten deist, du auleen [best] de Hechsta . . . äwa de gaunze Ieed” (NW). Jesus es daut baste Väabilt doarenn, woo eena Menschen halpen kaun, Gott bäta kjanen to lieren. Hee säd eemol to Gott: “Ekj hab de Menschen, dee du mie ut dise Welt jejäft hast, met dienem Nomen bekaunt jemoakt” (Johanes 17:6). Soo aus Jesus halpen uk Gott siene woare Deena de Menschen vestonen, wäa Gott es, waut dän sien Nomen es un waut dee noch doonen woat.

9-10. Woo wiesen woare Christen, daut see Leew unjarenaunda haben?

9 Gott siene Deena haben woare Leew unja sikj. Jesus säd: “Wan jie Leew unjarenaunda haben, woat aulemaun seenen, daut jie miene Jinja sent” (Johanes 13:35). Bie de Christen ieeschtemma wia daut soo. Wäa soone Leew haft, feelt sikj met siene Gloowesbreeda oppe gaunze Welt vebungen un es sikj eenich met dee, endoont von wua dee häastaumen, aus daut Einheima sent ooda nich, ooda woo väl dee haben (läs Kolossa 3:14). Mank Menschen, waut nich dän rajchten Gloowen haben, es nich soone Leew. Daut es doaraun to seenen, daut dee sikj em Kjrich unjarenaunda dootmoaken, bloos wäajen dee von veschiedne Velkja ooda Lenda sent. Oba woare Christen nämen daut Jewäa nich enne Haunt. Enne Schreft heet daut: “Doaraun es daut to seenen, woont Gott siene Kjinja sent un woont dän Soton siene Kjinja sent: Wäa nich daut rajchte deit un nich sienen Brooda goot es, es nich von Gott. . . . Wie [sellen] ons unjarenaunda goot sennen . . . Wie sellen nich soo sennen aus Kain, dee vom beesen staumd un sienen Brooda doot muak” (1. Johanes 3:10-12; 4:20-21).

10 Woare Leew helt noch mea en, aus bloos aundre nich dootmoaken. Woare Christen brucken jieren äare Tiet, Krauft un Jelt toom aundre halpen un dee Moot toospräakjen  (Hebräa 10:24-25). En schwoare Tieden halpen dee sikj unjarenaunda ut. Dee sent uk opprechtich to aundre un wellen werkjlich “aun aule Menschen goodet doonen”, soo aus daut enne Schreft sajcht (Galata 6:10).

11. Wuarom mott wie Jesus aus dän aunnämen, dän Gott brukt, om ons to raden?

11 Woare Christen nämen Jesus Christus aus dän aun, dän Gott brukt, om ons to raden. Enne Schreft heet daut: “Doa es uk en sest kjeenem Radunk, wiels ons Menschen es unja däm Himmel sest kjeen Nomen jejäft, derch dän wie kjennen seelich woaren” (Aposteljeschicht 4:12). En daut fefte Kapitel hab wie aul jeseenen, daut Jesus sien Läwen hanjeef, om jehuarsome Menschen loostokjeepen (Matäus 20:28). Gott haft Jesus em Himmel uk toom Kjennich jemoakt un hee woat noch mol äwa de gaunze Ieed rejieren. Un Gott woat ons mau dan eewjet Läwen jäwen, wan wie no Jesus horchen un daut nokomen, waut hee jelieet haft. Doawäajen sajcht daut enne Schreft: “Wäa aun dän Sän jleeft, haft daut eewje Läwen. Un wäa däm Sän nich jehorcht, woat daut Läwen nich seenen” (Johanes 3:36).

12. Waut bediet daut, nich von dise Welt to sennen?

12 Gott siene Deena sent nich von dise Welt. Jesus säd to dän reemischen Harscha Pilatus: “Mien Kjennichrikj es nich von dise Welt” (Johanes 18:36). Krakjt endoont, en waut fa een Launt Jesus siene Nofolja läwen, dee sent Unjadonen von sien himlischet Rikj. Doawäajen nämen dee nich deel aun de Politikj (Rejierungssachen) en dise Welt, un wan twee Gruppen sikj oneenich sent, stalen dee sikj opp kjeenem siene Sied. Wan oba aundre Menschen bie eene polietische Partei ooda Grupp biegonen wellen ooda sikj wellen fa een Aumt en de Rejierunk stemmen loten ooda äare Stemm auflajen, hoolen Jehova siene Deena an doa nich von auf. Heet daut dan, dee hoolen sikj nich aun de Jesazen von daut Launt, bloos wiels dee sikj nich en de Rejierungssachen mankmischen? Nä, wiels en de Schreft sajcht daut, dee sellen “de Rejierunk unjadon sennen” (Reema 13:1). Wan oba de Rejierunk waut velangt,  waut jäajen Gott sien Jeboot es, haundlen Gott siene Deena krakjt soo, aus de Apostel deeden. Dee säden: “Wie motten Gott mea jehorchen aus Menschen” (Aposteljeschicht 5:29; Markus 12:17).

13. Waut moaken woare Christen bekaunt?

13 Jesus siene Nofolja moaken bekaunt, daut bloos Gott sien Rikj de Menschen halpen kaun. Jesus säd em verut: “Daut Evangelium von Gott sien Rikj woat en de gaunze Welt jeprädicht  woaren, soo daut aule Velkja daut hieren, un dan woat daut Enj komen” (Matäus 24:14). De woare Christen sajen de Menschen, daut see sikj nich doaropp veloten sellen, daut de Rejierungen met aulet schlajchte een Enj moaken kjennen. Enne Städ daut moaken dee bekaunt, daut bloos Gott sien Rikj de Menschen werkjlich halpen kaun (Psalm 146:3). Daut jeft kjeene bätre Rejierunk aus Gott sien Rikj. Un doawäajen säd Jesus, wie sullen bäden: “Lot dien Rikj komen. Lot dien Wellen oppe Ieed jrod soo jedonen woaren aus em Himmel” (Matäus 6:10). Enne Schreft steit, Gott sien himlischet Rikj “woat aule aundre Kjennichrikjs en Bieta bräakjen un venichten, oba woat selfst opp emma bliewen” (Daniel 2:44; Openboarunk 16:14; 19:19-21).

14. Waut wurscht du sajen, wäa haft vondoag dän Gloowen, waut no de Schreft no de rajchta es?

14 Waut jleefst du? Wäa kjemt aul dit no, waut wie bat hiatoo jelieet haben? Wäa stett sikj vondoag rein gaunz oppe Schreft un sajcht de Menschen, daut Gott sien Nomen Jehova es? Wäa sent vondoag dee, waut woare Leew unja sikj haben un wiesen, daut see aun Jesus jleewen? Woone Grupp Menschen sent nich von dise Welt un moaken daut bekaunt, daut bloos Gott sien Rikj de Menschen opp iernst halpen woat? Wäa sent deejanje, waut aul dit werkjlich nokomen? Rajcht jesajcht sent daut Jehova siene Zeijen (Jesaja 43:10-12, NW).

WAUT WOASCHT DU DOONEN?

15. Wuarom rieekjt daut nich too, bloos to jleewen, daut doa een Gott es?

15 Om Gott to jefaulen rieekjt daut nich too, bloos aun dän to jleewen. En de Schreft heet daut, daut uk de beese Jeista jleewen, daut doa een Gott es (Jakobus 2:19). Dee doonen oba doawäajen nich Gott sienen Wellen un stonen uk nich en siene Jnod. Daut wie kjennen en Gott siene Jnod sennen, mott wie doonen, waut dee haben well, un nich bloos jleewen, daut daut dän jeft. Wie motten nuscht mea met dän faulschen Gloowen to doonen haben un motten dän rajchten Gloowen aunnämen.

16. Woo wies wie, daut wie met de faulsche Gloowes nuscht wellen to doonen haben?

 16 De Apostel Paulus schreef, daut wie ons met dän faulschen Gloowen nuscht aufjäwen motten: “Velot an un sondat junt auf. Habt nuscht met orreinet to doonen, dan well ekj junt aunnämen” (2. Korinta 6:17; Jesaja 52:11). Doawäajen bliewen Gott siene woare Deena gaunz wajch von aules, waut met faulsche Gloowes to doonen haft.

17-18. Waut es “daut groote Babel”, un wuarom es daut huach Tiet, doa ruttogonen?

17 En de Schreft woat jewäsen, daut aul de faulsche Gloowes to “daut groote Babel” jehieren (Openboarunk 17:5). * Dis Nomen staumt von de oole Staut Babel, wua daut no de Sintflut met dän faulschen Gloowen aunfunk. Väl von daut, waut bat vondoag dän Dach enne faulsche Gloowes jelieet un jedonen woat, kjeem en Babel opp. De Menschen en Babel hauden biejlikj soone Jetta, wua dree toopjehieeden. Uk vondoag woat en väle Gloowes jelieet, daut de Voda un de Sän un de heilja Jeist, dise dree, een eensja Gott es. Oba en de Schreft sajcht daut gaunz kloa, daut Jehova de eensich woara Gott es, un daut Jesus Christus dän sien Sän es (Johanes 17:3). En Babel jleewden dee uk, wan de Mensch ieescht jestorwen wia, läwd dän siene Seel wieda un kunn no eenen Uat komen, wua dee jekjwält wort. Noch emma woat en de mieeschte Gloowes jelieet, daut de Seel ooda de Jeist nich stoaft un en de Hal brennen kaun.

18 Wiels sikj daut, waut de Menschen ieeschtemma en Babel jleewden, äwa de gaunze Ieed vebreet haft, steit daut groote Babel fa aule faulsche Gloowes oppe gaunze Welt. Un Gott haft verutjesajcht, daut daut met dee aulatoop woat haustich een Enj nämen. Doawäajen es daut soo eene iernste Sach, daut wie nuscht met daut groote Babel to doonen haben. Jehova  Gott well, daut wie doa rutgonen, ea daut too lot es (läs Openboarunk 18:4, 8).

Wan du Jehova met siene woare Deena toop deenst, woascht du mea trigjkjrieen, aus du veloten hast

19. Waut woascht du trigjkjrieen, wan du Jehova deenst?

19 Daut kaun sennen, daut eenje Menschen nuscht mea von die weeten wellen, wan du die von dän faulschen Gloowen loosmoakst. Oba wan du Jehova met siene woare Deena toop deenst, woascht du mea trigjkjrieen, aus du veloten hast. Du woascht schlieslich väle Gloowesbreeda un Sestren haben, uk wan du soo aus de Jinja ieeschtemma eenjet veloten hast, om Jesus notofoljen. Du woascht dan to eene groote Famielje jehieren. Daut sent millionende woare Christen oppe gaunze Ieed, waut werkjlich Leew unja sikj haben. Un en “de komende Welt” woascht du noch mol kjennen eewich läwen (läs Markus 10:28-30). Un daut kaun sennen, daut dee, waut wäajen dienen Gloowen nuscht mea von die weeten wellen, doch met eemol de Schreft studieren un uk Jehova siene Deena woaren.

20. Waut woaren dee noch mol beläwen kjennen, waut Gott rajcht deenen?

20 Ut de Schreft lia wie, daut Gott dise beese Welt boolt venichten woat. Dan woat Gott sien Kjennichrikj äwa de niee Welt harschen, wua aules woat jerajcht sennen (2. Petrus 3:9, 13). Woo scheen woat daut doch sennen, en dise niee Welt to läwen. Dan woat daut bloos noch eenen Gloowen jäwen un aule Menschen woaren Gott rajcht deenen. Wudd daut nich daut baste sennen, nich lenja to siemen un sikj nu Gott siene woare Deena auntoschluten?

^ Varsch 17 En dän Artikjel “Waut es ‘daut groote Babel’?” em Aunhank von dit Buak jeit noch mea doaräwa notoläsen, wuarom eena sajen kaun, daut met daut groote Babel aule faulsche Gloowes toop jemeent sent.