Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Waut lieet de Schreft werkjlich?

 DAUT 5. KAPITEL

Woo Gott de Menschen derch Christus rat

Woo Gott de Menschen derch Christus rat
  • Waut es daut Leesjelt?

  • Woo wort doafäa jesorcht?

  • Waut fa eenen Nutzen kjenn wie derch daut Leesjelt haben?

  • Woo kjenn wie wiesen, daut wie doafäa dankboa sent?

1-2. (a) Waut vonne Jeschenkja sent fa ons besonda wieetvoll? (b) Woosoo kjenn wie sajen, daut daut Leesjelt daut wieetvolste Jeschenkj es, waut daut jeft?

WAUT es daut baste Jeschenkj, waut du mol jekjräajen hast? Een Jeschenkj brukt nich emma een Deel Jelt kosten, daut eenem daut väl wieet es. Daut haft mea doamet to doonen, aus daut waut es, waut eenem jefält haft un waut eenem Freid moakt.

2 Daut jeft een Jeschenkj, waut wieetvolla es aus aule aundre. Daut kjemt von Jehova Gott. Hee haft sienen Sän Jesus Christus aus een Leesjelt fa ons jejäft, un daut es daut wieetvolste von aul de Jeschenkja, waut wie von am jekjräajen haben (läs Matäus 20:28). Daut Leesjelt es daut, waut ons daut needichste fält un kaun ons soo väl Freid brinjen, aus wie ons nich mol denkjen kjennen. Dit Jeschenkj es de jratsta Bewies doafäa, daut Jehova ons väl räakjent.

 WAUT ES DAUT LEESJELT?

3. Waut es daut Leesjelt? Waut mott wie weeten, daut wie vestonen kjennen, woo wieetvoll daut es?

3 Daut Leesjelt es daut, wuaderch Jehova de Menschen raden deit, aulsoo von de Sind un dän Doot friemoakt (Efeesa 1:7-8). Daut wie vestonen kjennen, waut daut met daut Leesjelt opp sikj haft, mott wie aun daut trigjdenkjen, waut em Goaden Eden passieed. Wie motten weeten, waut Adam derch siene Sind aules vespäld. Ieescht mau dan woat ons daut kloa sennen, wuarom daut Leesjelt fa ons soo wieetvoll es.

4. Woo wia daut volkomne Läwen, waut Adam haud?

4 Aus Jehova Adam muak, jeef hee am volkomnet Läwen. Daut wia waut sea wieetvollet. Adam haud eenen volkomnen Kjarpa un een volkomnet Vestaunt. Daut bediet, dee wudd kjeenmol sennen krank ooda oolt jeworden, un wudd haben kunt eewich läwen. Dee haud uk een besondret Veheltnis to Jehova. De Schreft sajcht, Adam wia een “Sän von Gott” (Lukas 3:38, NW). Tweschen Adam un Jehova wia daut soo aus bie eenen leeftoljen Voda un sienen Sän, waut sikj väl räakjnen. Jehova räd met Adam, hee jeef dän goode Oabeit un säd dän uk, waut hee von am haben wull (1. Mose 1:28-30; 2:16-17).

5. Waut es doamet jemeent, wan daut sajcht, daut Adam Gott likjnen deed?

5 Adam wia soo jemoakt, daut dee Gott likjend (1. Mose 1:26). Daut bediet nich, daut Adam soo leet aus Gott. En daut ieeschte Kapitel hab wie jelieet, daut Jehova een onsechtboara Jeist es (Johanes 4:24). Jehova haft aulsoo nich eenen Kjarpa von Fleesch un Bloot, soo aus wie haben. Adam likjend Gott en dän Stekj, daut dee soone Ieejenschoften haud aus dee, soo aus Leew, Weisheit, Jerajchtichkjeit un Macht. Adam likjend Gott uk doarenn,  daut dee sienen frieen Wellen haud. Daut meent, dee kunn sikj selfst wälen, aus dee daut rajchte doonen wull ooda nich. Dee wia nich soo aus eene Maschien, waut bloos daut deit, to waut eena dee enstalt. Wan Adam sikj jewält haud, Gott to jehorchen, wudd dee haben kunt opp emma em Paradies oppe Ieed läwen.

6. Waut velua Adam, aus dee Gott ojjehuarsom wia? Woo wieren dän siene Nokomen doavon betroffen?

6 Oba Adam wia Gott ojjehuarsom un wort toom Doot veuadeelt. Siene Sind kjeem dän sea dia to stonen. Dee wort onvolkomen un velua aul daut goode, waut hee haud, aus hee noch volkomen wia (1. Mose 3:17-19). Oba nich mau daut: Uk siene Nokomen wudden krakjt soo onvolkomen sennen aus hee. Gott sien Wuat sajcht: “Soo aus derch eenen Mensch [Adam] de Sind en de Welt nenn kjeem un derch de Sind de Doot, soo haft sikj de Doot äwa aule Menschen jespreet, wiels see aula sindijden” (Reema 5:12). Soo es daut: Wie haben aula von Adam de Sind metjeorwen. Doawäajen sajcht daut enne Schreft, daut Adam sikj selfst uk siene Nokomen aus Sklowen aun de Sind un dän Doot “vekoft” haft (Reema 7:14). Fa Adam un Eva jeef daut kjeene Hopninj mea, wiels dee mootwellich Gott ojjehuarsom wieren. Oba woo es daut met dee äare Nokomen, wua wie uk met en sent?

7-8. Waut es met een Leesjelt jemeent?

7 Jehova kjeem de Menschheit met daut Leesjelt to Help. Waut es een Leesjelt? Daut kaun tweeatlei sennen. Eemol es daut de Pries, waut eena tolen mott, om waut trigjtokjeepen ooda wäm frietokjeepen, soo aus eenen Jefangnen. No de Schreft no es een Leesjelt uk de Somm, waut de Kosten von waut dakjt. Daut es biejlikj soo, aus wan eena een Ojjlekj veuasoakt un dän Schoden betolen mott. Dee mott krakjt de Somm jäwen, waut de Schoden kost.

 8 Derch siene Sind haft Adam eenen grooten Schoden veuasoakt. Derch dän sent wie aula aun de Sind un dän Doot veskloft. Woo kaun dis Schoden wada jedakjt ooda betolt woaren, soo daut wie kjennen friekomen? See wie mol, woo Jehova een Leesjelt veschauft haft, un woo ons daut kaun togood komen.

WOO JEHOVA DAUT LEESJELT VESCHAUFT

9. Waut fa een Leesjelt wia doa needich?

9 Daut volkomne Menschenläwen, waut Adam derch de Sind vespält haft, jinkj nich eefach met daut Läwen von eenen onvolkomnen Mensch trigjtokjeepen (Psalm 49:8-9). Doa wia een Leesjelt needich, waut krakjt soo väl wieet wia aus daut volkomne Menschenläwen. Dit wia daut, waut Jehova siene jerajchte Jesazen velangden. Soo aus de Schreft sajcht: “Een Läwen fa een Läwen” (5. Mose 19:21). Met waut wudd aulsoo daut volkomne Läwen gonen trigjtokjeepen? Bloos met een aundret volkomnet Läwen. Daut wia daut eensich paussende Leesjelt (1. Timotäus 2:6).

10. Woo veschauft Jehova daut Leesjelt?

10 Woo veschauft Jehova daut Leesjelt? Dee schekjt eent von siene volkomne Enjel no de Ieed. Daut wia oba nich bloos irjent een Enjel. Hee schekjt dän, waut hee daut mieeschte räakjend, sienen ieeschten Sän (läs 1. Johanes 4:9-10). Disa wia reed, dän Himmel to veloten un oppe Ieed to komen (Filippa 2:7). Soo aus wie en daut väaje Kapitel jeseenen haben, leet Jehova Maria derch een Wunda schwanga woaren un sienen Sän to Welt brinjen. Derch Gott sienen heiljen Jeist wort Jesus aus een volkomna Mensch jebuaren, onen daut dee de Sind metorf (Lukas 1:35).

Jehova jeef sienen eensjen Sän aus een Leesjelt fa ons

11. Woo kunn een eensja Mensch daut Leesjelt fa millionende Menschen betolen?

 11 Woo kunn een eensja Mensch daut Leesjelt fa millionende Menschen betolen? Aule Menschen sent je bloos doawäajen aus Sinda jebuaren, wiels dee de Sind un dän Doot von Adam metjeorwen haben. Aus Adam sindijd, velua hee daut volkomne Läwen un kunn daut nich mea aun siene Nokomen wiedajäwen. Jesus oba, dee enne Schreft “de latsta Adam” jenant woat, haud een volkomnet Läwen un deed kjeenmol sindjen (1. Korinta 15:45). Dee kjeem, om ons to raden un daut wada trigjtokjeepen, waut Adam vespält haud. Soo wia Jesus soo to sajen en Adam siene Städ. Doaderch, daut dee Gott gaunz un goa jehuarsom wia un sien volkomnet Läwen hanjeef, betold dee dän Pries fa Adam siene Sind. Soo jeef daut wada Hopninj fa Adam siene Nokomen (Reema 5:19; 1. Korinta 15:21-22).

12. Waut wort doaderch bewäsen, daut Jesus soo lieden must?

12 Enne Schreft kjenn wie noläsen, woo Jesus ver sienen Doot lieden must. Dee wort met de Pitsch vekjielt, dan aum Pol jenoagelt un doa must dee kjemmavoll stoawen (Johanes 19:1, 16-18, 30; see uk dän Artikjel “Wuarom brucken woare Christen nich daut Kjriez?” em Aunhank von dit Buak). Wuarom wia daut needich, daut Jesus soo sea lieden must? Soo aus wie noch seenen woaren, haft de Soton em Twiewel jebrocht, aus irjent een Mensch wudd Jehova tru bliewen, wan dän aufjeprooft wort. Jesus bleef oba tru, uk wan dee väl lieden must. Soo bewees dee, daut daut nich soo wia, waut de Fient jesajcht haud, un daut een volkomna Mensch ut sienen ieejnen Wellen Gott volstendich tru bliewen kaun, endoont waut de Fient aules deit. Jehova mott sikj werkjlich sea äwa sienen leewen Sän jefreit haben (Spricha 27:11).

13. Woo wort daut Leesjelt betolt?

13 Woo wort daut Leesjelt betolt? Aun dän 14. Dach en  de judische Moonat Nissan aune 33 e. o. T. leet Gott daut too, daut sien volkomna Sän hanjerecht wort. Soo jeef Jesus sien volkomnet Läwen aus Mensch “een un fa aulemol” han (Hebräa 10:10). Dree Doag lota wuak Jehova Jesus opp aus eenen Jeist. Trigj em Himmel jeef Jesus Gott soo to sajen sien volkomnet Menschenläwen, waut hee fa Adam siene Nokomen jeopfat haud (Hebräa 9:24). Jehova neem daut aus daut Leesjelt aun, waut needich wia, om de Menschheit von de Sind un dän Doot frietomoaken (läs Reema 3:23-24).

WOO DAUT LEESJELT ONS TOGOOD KJEMT

14-15. Waut mott wie doonen, daut ons kjennen de Sinden vejäft woaren?

14 Wie sent aules Sinda, oba derch daut Leesjelt kjenn wie väl Säajen kjrieen. Well wie mol seenen, woo ons daut togood komen kaun.

15 Ons kjennen de Sinden vejäft woaren. Wäajen wie onvolkomen sent, es daut fa ons nich leicht, daut rajchte to doonen. Em räden uk em doonen doo wie foaken sindjen. Oba derch Jesus sien Opfa kjennen ons de “Sinden vejäft” woaren (Efeesa 1:7-8). Doatoo motten ons onse Sinden oba opp iernst leet sennen. Wie motten uk deemootich Jehova om Vejäwunk bedden un motten enseenen, daut de Vejäwunk bloos derch daut Leesjelt mäajlich es (läs 1. Johanes 1:8-9).

16. Wuaderch kjenn wie Gott met een reinet Jewessen deenen? Woo wieetvoll es daut, een reinet Jewessen to haben?

16 Een reinet Jewessen ver Gott. Met een schlajchtet Jewessen woat eena leicht mootloos un feelt sikj toom äwajen. Oba wiels ons derch daut Leesjelt kjennen de Sinden vejäft woaren, kjenn wie Jehova met een reinet Jewessen deenen, uk wan wie onvolkomen sent (Hebräa 9:13-14). Soo kjenn  wie met een frieet Jewessen to Jehova bäden un am aules sajen, waut ons oppem Hoaten licht (Hebräa 4:14-16). Wan eena een goodet Jewessen haft, es eena ennalich tofräd, feelt sikj mea wieet un eenem jeit daut scheena.

17. Waut es doaderch mäajlich, daut Jesus fa ons jestorwen es?

17 De Hopninj, eewich em Paradies oppe Ieed to läwen. “De Loon dän de Sind tolt es de Doot”, sajcht daut en Reema 6:23. Un doahinja sajcht daut: “Gott oba schenkjt daut eewje Läwen en Christus Jesus, onsen Harn.” En daut dredde Kapitel en dit Buak hab wie aul jeseenen, woo wundascheen daut Läwen em Paradies oppe Ieed sennen woat (Openboarunk 21:3-4). Daut eewje Läwen es bloos mäajlich, wiels Jesus fa ons jestorwen es. Daut wie dit kjennen deelhauftich woaren, mott wie wiesen, daut wie fa daut Leesjelt uk dankboa sent.

WOO KJENN WIE WIESEN, DAUT WIE DANKBOA SENT?

18. Wuarom kjenn wie Jehova fa daut Leesjelt sea dankboa sennen?

18 Wie haben werkjlich Uasoak, Jehova dankboa to sennen fa daut Leesjelt. Een Jeschenkj es besonda väl wieet, wan daut dän, waut ons daut schenkjt, väl Mieej ooda Tiet  jekost haft. Feel wie ons nich sea jeieet, wan doa wäa opp soone Wajch ons wiest, daut dee ons väl räakjent? Daut Leesjelt es von aule Jeschenkja daut dieeschte, wiels Gott doafäa daut wieetvolste jejäft haft, waut hee haud. En Johanes 3:16 sajcht daut: “Gott seine Leew fa dise Welt es soo groot, daut hee sienen eensjen Sän jeef”. Daut Leesjelt es de jratsta Bewies doafäa, daut Jehova ons sea leeft. Un uk Jesus räakjent ons sea väl, dan hee wia reed, fa ons to stoawen (läs Johanes 15:13). Wie kjennen ons aulsoo secha sennen, daut jiedra eena von ons bie Jehova un Jesus sea väl wieet es (Galata 2:20).

Wie kjennen onse Dankboakjeit fa daut Leesjelt biejlikj doaderch wiesen, daut wie Jehova kjanen lieren

19-20. Woo kjenn wie wiesen, daut wie daut Leesjelt schazen?

19 Woo kjenn wie dan nu wiesen, daut wie Gott fa daut Leesjelt dankboa sent? Eemol doaderch, daut wie Jehova kjanen lieren (Johanes 17:3). Doatoo mott wie de Schreft studieren, soo aus met de Help von dit Buak. Je bäta wie Jehova kjanen, je mea woa wie dän räakjnen. Un soo woa wie noch mea daut doonen wellen, waut dän jefelt (1. Johanes 5:3).

20 Wiesen, daut wie aun daut Leesjelt jleewen. Von Jesus sajcht daut: “Wäa aun dän Sän jleeft, haft daut eewje Läwen” (Johanes 3:36). Woo kjenn wie wiesen, daut wie aun Jesus jleewen? Auleen to sajen, daut wie aun dän jleewen, rieekjt nich too. Soo aus Jakobus 2:26 sajcht, “es de Gloowen onen Woakjen doot.” Woara Gloowen es aulsoo aun onse Woakjen to seenen. Onsen Gloowen aun Jesus wies wie doaderch, daut wie am em räden uk em haundlen proowen notodoonen (Johanes 13:15).

21-22. (a) Wuarom sell wie jieda Joa dän Harn sien Owentmol hoolen? (b) Waut woa wie en de näakjste beid Kapitels lieren?

21 Aule Joa dän Harn sien Owentmol hoolen. Dän Owent aun dän 14. Nissan aune 33 e. o. T. fieed Jesus eene Feia en, waut enne Schreft “dän Harn sien Owentmol” jenant  woat (1. Korinta 11:20; Matäus 26:26-28). Daut woat uk daut Aundenkjen aun Christus sienen Doot jenant. Dise Feia sull de Apostel un aule Christen doaraun denkjen halpen, daut Jesus sien volkomnet Läwen aus Leesjelt jejäft haft. Hee säd: “Doot dit om aun mie to denkjen” (Lukas 22:19). Daut Owentmol halpt ons, aun de groote Leew to denkjen, waut Jehova un Jesus ons bewäsen haben. Wan wie daut jieda Joa hoolen, wies wie, daut wie daut Leesjelt schazen. *

22 Daut Leesjelt es werkjlich een wieetvollet Jeschenkj von Jehova (2. Korinta 9:14-15). Daut kaun soogoa de Vestorwne togood komen. En daut saste un säwende Kapitel woa wie seenen, woo.

^ Varsch 21 En dän Artikjel “Dän Harn sien Owentmol: Eene Feia, met dee Gott jeieet woat” em Aunhank von dit Buak jeit noch mea notoläsen von daut Owentmol.